الدوره والنفاس تعالوا نفيد بعض وش نسوي وش مانسوي فيهم

[سعاد٣٣]

السلام عليكم بلقيسيات .. :39: احترت وين احط الموضوع شفت الاقسام للاسنان واليدين حسيت ان القوام انسب شي عاد اذا مكاني غلط انقلوه الله لا يهينكم:31:

المهم بنات تعرفون الدورة والنفاس يبيلها اهتمام وعناية وانا سمعت الدكتور جابر القحطاني يتكلم عن هالموضوع واخر شي قال اسالوا جداتكم وش كانوا يسوون ايام الدوره لان كل شي كانوا يسوونه صح ومهم

طبعا في بنات ماعندهم جدات ولا يعرفون وش يسوون فياليت اللي عندها خبره تقول لنا واللي جدتها حيه الله يحفظها تسالها ونفيد بعض :23: يعني نبغى خلطات مشروبات مفيده ، نسوي ايش ونحتجب عن ايش واي معلومه مفيده حول هالموضوع

بقولكم اللي اعرف مع اني اعتقد ان كلكم تعرفونها بس بقولكم اللي عندي يمكن احد يستفيد انا سمعت انه مهم تلبسين شراب وتمتنعين عن الحمضيات والاشياء اللزجه مثل الباميا والمولوخيه


يالله بنات تكفون فيدونا ولا تخبون شي لو معلومه بسيطه لو كلنا عارفينها اكتبوه يمكن وحده ما تعرف وتستفيد:32:

 

[مصاصه بالفراوله]

هلا فيك
انا اللي اعرفه انك تتدفي و تلبسي شراريب صح كلامك و
تشربي قرفه لانها مفيده للنساء عموما خاصه للدورة و كثري نعناع و شمر
و بس هذا اللي اعرفه

و ننتظر خبرات البنات

سلامتكم​

 

[نوره الشمري]

هلا حبيبتي , أنا الخبره اللي عند أمي معدومه بس أنا اللي قدرت أجمعه من الصديقات والنت هو أهم شيء أنه الجوع في فترة الدوره ممنوع وعدم أكل الحوامض والمواد اللزجه مثل الموليخية والشمام والبطيخ والخيار والمخلات والمواد الغازيه , وشرب السوائل الدافئه ,وأحسن شئ جربته شرب الحليب بالفلفل أو الزنجبيل وأكل التمر بالرشاد , وعدم التروش والإكتفاء بالمسح وهذا اللي عندي واللي عندها شيء تفيدنا .
دمتم بحفظ الرحمن

 

[كل الغــــلا]

ماعلى كلامكم زووود

الجووع ممنوع .. القرفه ممتازززه مع كمون مطحوون

تنزل الدم بشكل فضيييع

الغازيات ممنوعه و الحمضيات و تتعرضين لجو بارد ممنوع ولازم شرارييب

ولو بتدخلين الحمام تكرمون لازم المروحه مطفيه لان الهواء يضر الارحام

ومممم كمان ووش

الفوط الصحيه لاززززم لااااازم تتغير كل 4 سااعات

لان اذا طولت تتكون بكتيريا ضاره وبعدها تسبب التهابات ​

 

[كل الغــــلا]

ايه صح نسيت اقول

مكان الموضوع خطـأآ

اتمنى المشرفات ينقلونه للقسم المناااسب

​

 

[نسمة امل]

البنات ما قصروا

 

[اميرة الكـــل]

والله انا هالنظام استخدمه ومرتاحه عليه الحمد لله وماراح امدح اكثر لأنكم بتشوفون الفـــــــــرق...

اول ماتنزل كدره لونها بني اللي قبل الدوره اشرب قرفه او حلب علشان تنزل براحه وماتعورني...




النظام كالأتــــــــــــــي....

كوب حلب مطحون>>>>اذا ماتبغين ريحه تقدرين تحطين ملعقه او ملعقتين وماراح تطلع ريحه..
كوب ماش الأخضر مطحون>>>الماش يقوي الرحم
فنجان حبه حلوه اللي هي الشمر>>>مطحونه
فنجان فلفل اسود>>>مطحون
نصف كوب حبه سوداء حبة البركه اقصــــد>>>>تطهر الرحم وتنضفه وتنزل الدم الفاسد
تخلطينها كلها مع بعض وتاكليـــــــــــــــن
ملعقتين كبار مع كاس حليب دافي اول ماتصحين من النـــــــــــــوم يعني على الريق
الثلاث ايام الاولــــــــــــــــــــى

اما الأربع ايام الأخيره او الثلاث ايام الأخيره
تحطين تمر بدون نوى مع ملعقه سمن دافي
وتعجنينهم مع بعض وبعدين تسوين كور
وتخلطين التمر مع الرشااااد
يعني 7 تمرات مع رشاد مايكون مطحون
و7 تمرات مع حبه سوداء ماتكون مطحونه
وتاكلينهم فاليوم الواحد مع قهوه او حليب عاد كيفك
لحد ماتخلص الدوره...

ملاحظه..
بيطلع معاك كتل دم متجمد لأن الخلطه تنضف الرحم
لاتخافين عادي وترا الخلطه تناسب المتزوجه واللي مو متزوجه...


واهم شي وقت الدوره ماتتعرضين لتكييف بارد
ولا تتسبحين اول الايام لأن الرحم يكون مفتوح وراح يسبب لك اشياء
انتي في غناء عنها
ولاتشربين بارد ولا تاكلين حامض ليمون برتقال
ولا تاكلين موز يجمد الدم ويخليه يتكتل ولاتاكلين باميا
وملوخيه تزيد الأفرازات
ولاتكثرين ماء بس فترة الدوره
وعادي استحملي كلها 7 او6 او 5 ايام بالشهر يعني تحملي ماراح يضرك شي
بالعكس بتنتفعين...

 

[الالم الماضي]

:19:كلام اميره صح لاني كنت اموت من الم الدوره الله يكرمكم واللحين من بعد ماقريت في منتدى الصراحه ناسيه اسمه وانا ما احس بالالم وهو تقريبا نفس طريقه السفوف بس انا طريقتي تختلف شوي اسوي ماي يغلي فوق الغاز واسوي معاه 2ملعقه قرفه مطحونه \2ملعقة حلبه \2ملعقه حبة الرشاد\2ملعقه كمون مطحون \2ملعقه زنجبيل مطحون \2فلفل ابيض مطحون \ونعناع وبعد مايستون على النار اسويه بالبراد واشرب 3\4 اكواب في اليوم واخلطه مع عسل لانه طعمه شوي مر وآكل خلطة التمر بعد وبعد لازم تلبسون سروال طويل مريح ما يكون واسع طبعا ودلاغ عشان ماتبردين وسلامتكم :21:

 

[نجمه الخليج123]

مشاء الله اميره كفت ووفت ههههههههههه << شكلك مااره مسنعه عمرك لا اله الا الله الله لا يضرك
بصراحة انا ما اسوي شي من هالي قلتيه باس اكتشفت مأخره ان الليمون يأخر الدوره واذا كلتيه بوقت الدوره يكتلها القرفه حلوه تحسين براحه اذا شربتيها اهم شي ما تجوعين نفسك وتاكلين كل اللي نفسك فيه اذا كنتي مصلحه رجيم اممم وشووو بعد
بس سفووف ما اخذ لاني ماحب ريحه الحلبه ابد ابد لا تقولين لي تروشي وحطي عطر << والله لو تتروشين باليوم مليون مااره ريحه الحلبه لابد منها واذا حطيتي عطر كأنك حاطه عطر على وصاخه
من ناحيه التروش يا بنات وش فيكم على هالرحم بيدخله هوا انا سألت استاذتنا حقت الاحياء يوم اني بالثنوي وقالت لي بالعكس تروشي وتنقعي بالبانيو بس بماي داافي علشان يحرك الدم وينزله اوما مسأله ما تتروشوون بصراحة مو حلوو احس مو قرف الا قرفين لازم تتروشين يختي على الاقل خل نقول اول ثلاث ايام بكيفه بااس رابع يوم تروشي ما تقهرني الا اذا جتها الدوره وتحسينها بأنفاس مو دوره تعبانه وحالتها وحاله وهالات سوداء سلامات باس وتصحى بمرقوق وتنام على مطازيز ولحم وحلبه وريحه الغرفه وش تطلع يا ويلي باااس وخصوصا على البنات اللي ما يشغلون حتى المكيف ولا مروحه يعني تطلع مااره مااره خلاص ريحتها واصله بس اهم شي ابعدي عن الايسكريم والاشياء المثلجه والبارد وكثري من الحار وخلاص

وان شاء الله كلكم تجي وتخلص منكم وانتوا بصحه وعافيه
شكرا على الموضوع الحلووو
​

 

[اهديك عمري]

بصراحه الموضوع مره حلوو والبنات الي مايعرفون يستفيدون
طبعا تشربين حليب مع زنجبيل وتاكلين تمر مع طحينه سايله تكثرين من الاشياء الحاره ولازم تلبسين شرابات واهم شي انك ماتتعرضين للهواء او للبروده ماتشيلين اشياء ثقيله
طبعا ماتتسبحين بس فيه ناس يقولون الا عادي بس انا من باب الحذر والخوف مااتسبح لانه يدخل الهواء فيك مره
طبعا الي مسويه حميه ايام الدوره تتركه الحميه لبعد الدوره لانك اصلا ماراح تستفيدين بس تخربين عمرك وبس
طبعا تبعدين عن الجبن <<ومشتقاتها
تاكلين بيض وسمك ولحم اشياء مثل هيك
والله الحين مو متذكره الاشياء الي استخدمتها بالضبط لانها من زماااان ماجتني خخخ​

 

[روح وردة]

والله أنـا إذا تروشت توقف ، وتقول أبدن والله ماأنزل ..
بس شسوي ، غصب ..

وكلام البنات ماعليه زود َ ..

 

[اهديك عمري]

والله أنـا إذا تروشت توقف ، وتقول أبدن والله ماأنزل ..
بس شسوي ، غصب ..

وكلام البنات ماعليه زود َ ..

ايوه لان هواء بارد دخل الرحم
وجمدها علشان كذا تتوقف
بس انتي خلاص اذا جتك لاتتسبحين​

 

[حبيبه فهد]

موضوع مره حلو بس حابه اسال هل عدم الاهتمام اثنا الدوره يواثر من الناحه الجنسيه للمتزوجه

 

[اهديك عمري]

موضوع مره حلو بس حابه اسال هل عدم الاهتمام اثنا الدوره يواثر من الناحه الجنسيه للمتزوجه

اكييد ياحياتي
يعني انتي الحين ماهتميتي بنفسك ايام الدوره
وقت العلاقه ((تطلع اصوات جداتنا وامهاتنا يسمونه الخوا ))
وتتوسع عكس الي تهتم ​

 

[omjoda]

والله موضوع حلو انا جدا مهملة فى نفسى وقت الدورة الله المستعان جزاكم الله خيرا على المعلومات

 

[الأليفه]

موضوع ممتاز ومفيد جدا

 

[الفتاة البدينة]

انا مرررررة ماكنت اهتم بنفسي عشان كذا انا الحين تعبااااانة حيل
لكن ان شاء ببدا اهتم بنفسي اكثر واكثر
شكرا ياصاحبة الموضوع ...​

 

[سعاد٣٣]

الله يجزاكم خير والله استفدت من ردودكم كثير والكل ان شاء الله يستفيد يارب

اللي ماجتها الدوره ليش ماتحجمين انا اذكر مره رحت للي يحجمون قالت لي في حجامه للي ماتزل لها الدوره تصير تنزل ان شاء الله

 

[سعاد٣٣]

حبيت اضيف معلومه للنفاس قريتها لدكتور جابر باحد المنتديات بس ما سمعتها منه للامانه
يمدح مشروب قشر القهوه والسنوت

والله اعلم

 

[نسمة امل]

ماشاااااء الله بنات
ومرة استفدنا
الله يجزاكم كل خيييير