الخيانه والموجهه شو الحل؟

[سارية الجبل]

خواتي العزيزات ساعدوني وشوروا علي من اسبوع واجهت زوجي بخيانته لي وكيف اني فتشت موبايله واكتشفت علاقاته المتعدده وثار علي وقال لي مب من حقح تفتحين الموبايل وهو وايد يتحسس من هالموضوع لانه سبق وصار من قبل وعدته مااسويها مره ثانيه لانه اعتذرلي وقال نزوه ماراح تتكرر بس ووفيت بوعدي اكثر من سنه بس حسيت من قريب انه في شي غلط الحاسه السادسه اشتغلت وللأسف طلعت صح ياخسارة الثقه اللي عطيته اياها المهم انا ماسكت له ورديت عليه وبانه جرحني وخان الامانه والثقه وسكرت التلفون بويهه . كنا نتكلم في التلفون واتصل كذا مره وماارد عليه وطرش مسج وفي البيت بعد حاول بس ماعطيته فرصه يتكلم كنت انتفض من الغيظ والقهر . وثاني يوم اداني طناش لا حاول وانا مول ماجابلته هوشمالي اعتقد غربي وانا جنوبيه شرقيه واحنا على هالحال مناسبوع احس انه مايبغي يعتذر ويبى يرجع الامور عاديه بدون مناقشات وانا مصره على الرفض شو رايكم حبيباتي ؟ انا اصر على موقفي واللي فيها فيها عشان اضمن انه هالموضوع مايتكرر انشاءالله ولا مافي فايده لانه متعود عالعلاقات ومدمن عليها شو راي الاستشاريات والخبيرات انتظر ردودكم ورايكم واقتراحاتكم بفارغ الصبر والله العالم بالحال رتنسوني ياللا جاوبوني

 

[مالي سواك]

عليك بقيام الليل والدعاء والله المستعان على كل شي,,..

 

[شمعة لا تنطفيء]

صلي بالليل وأكثري من الاستغفار
يا حبيبتي ترا المواجهه ما عمرها نفعت احد
بالعكس يا كثر ما دمرت بيوت
وتفتيش الجوال غلــــــــــــــــــــــــــــــــــــــــــــــــــــــــــــط
لا تفتشين جواله عشان ما تكدرين خاطرك خليك يا غافل لك الله
والله احسن لك
أحسن مما يدوس هيبتك ويبدأ يكلمهن قدامك
يا حبيبتي خليك بعيده حبك يزيد
وترا مهما حاصرتيه وقفلتي عليه وهو يبي يكلم
يبي يكلم غصبن عليك
حتى لو زعلتي وقفلتي عليه عشر قفول
بالعكس كل ما حس انه ممنوع يبي يرغب زياده
لأن كل ممنوع مرغوب
بس أنصحك تدعين ربك وتصلين تكثرين من الاستغفار
والله يهديه ويخليه لك
يــــــــــــــــــــــــــــــــــا رب​

 

[سارية الجبل]

صح المواجهه ماتفيد ولا العشره لها اي اعتبار واللي ما استحى من ربه اي شي يسويه عادي بس والله افضفض من القهر والصدمه من ردة فعله البارده وكأني انا الغلطانه حسبي الله ونعم الوكيل .

 

[قطرية]

عندهم وعندج خير اختي ... ترى صحيح كلام أختي اللي قالت المواجهه ماتنفع لانها معروفه اللي مسوي الغلط دايما يكون في مو قع الهجوم ويردها لج كاأنج انتي الغلطانه ... وتفتيش الجوال يعور القلب صج بس الحاسه السادسه اللي عندنا احنا الحريم سبحان الله الا القلب دليلنا مو الحاسه السادسه يعني تحسين ان في شي غلط وهم عادي عندهم حتى لو اوعدوا والله لو يبي يكلم بيكلم ,,,,,,

 

[جورية الخبر]

غاليتي ..
بما انك واجهتيه .. صعبة انك تطنشي الموضوع وتخلينه معلق ..؟؟
انتي واجهتيه اذن لازم تنحط النقط على الحروف عشان ما تصير مهزلة ؟؟
الله يهديه ويصلحه​

 

[سارية الجبل]

يعني شوالمفروض يصير انتظر جنابه لين ما يتنزل ويقرر يكلمني ولا ابتدي انا بطلب الحوار والله قهر

 

[سعــاد]

صلي وادعي ربك وطنشيه لا تكلمينه

 

[سارية الجبل]

تصدقون انا بعد احساسي يقولي طنشيه ولاتكلمينه لازم يحس بقوة الجرح اللي جرحني اياه مب سهل على الوحده ان زوجها يخونها لا وبعد يطنشها ويحاول يكلمها عادي ولاكأن في شي رياييل آخر زمن .

 

[الياقوتة السمرا]

أختي في الإسلام سارية الجبل: هذا الأمر (الخيانة) مما ابتلانا الله به في آخر الزمان وهي موجودة بكثرة بل ومتفشية في أغلب البيوت المسلمة، وليس لها حل إلاَّ تقوية الوازع الديني، والمحافظة على الصلاة في أوقاتها، والدعاء، والاستغفار.
وأما بالنسبة لمشكلتك فقد حصلت المواجهه وانتهى الأمر وليس أمامك الآن إلا أن تتنتظري فرج الله، ومدام بدأت فلا تحاولي تهيني كرامتك وتتصلي.
وأنا والله حاسة بموقفك، ومدى القهر الذي تشعرين به، وأنتي من بدأ بالمواجهه وهو حل لا ينفع مع جميع الرجال الخونة، بل أشعر أن الحل هو تأسيسهم من جديد ، وهو صعب جداً لكن يسير على من كانت تحب زوجها وتحتسب الأجر في إصلاح حاله، وخصوصا إن كان لها أولاد منه، والله أعلم

 

[دانة الامارات1]

حبيبتي ...
عن تجربه ... انا مثلج وجهته مرتين
بالعكس كانج ما وجهتي .... يصير كل خطوه يخطيها بحذر عسب ما تحسين
بس مشكلتنا الحريم الحاسه السادسه الي عنا....
الموقف الي صار بعد المواجه الثانيه (وانا من النووع اذا عندي شي ما اروم لزم ارمس)
ليش اتفتشين و مو من حقج وانا ما افتش في اغراضج .. و شكلي من اليوم و رايح بدس اغراضي عنج .............
و من هذا الكلام....... و انا كانت اصرخ في وجهه مووووووووو هذاااااااااااااا مووووووووووضوووووووعنا ليش تتهرب من الموضوع الاساسي...و بعدين ع حسب علمي ما في اسرار بين الزوجين الا اذا كانت تخص غيرنا يعني موضوع خاص بربيعتي او ربيعك او احد من اهلك او اهلي هذي الساعه نقدر نقول اسرار....

بس للاسف ... للاسف الي يخون مره و يكون هذا الشي في دمه ,, يعني شي متعود عليه من ايام مرهقته صعب صعب يتغير... فا مثل ما قالو الاخوات حتى لو حسيتي مره ثانيه اشغلي عمرج و طنشي... راح يدور ويدوور و بالنهايه يرجع لج الانه اني الاساس و انتي قالتي اكثر من وحده يعني مثل الي عندي .... معناتها مب جاادين بس لعب و تسليه, بس بصراحه هذا ع حسب شخصيت الريال مب شرط........ يمكن انا في اشياء نفعت معه و اشياء لا يمكن ريلج العكس مادري.

والله يعينج ويعينا على ما بتلاناااااااا​

 

[سارية الجبل]

الله يعينا كلنا على ازواجنا والله يهديهم متى ؟ مادري ومثل ما قلتي يادانة الامارات هم ما يفتشون لانهم واثقين فينا بس هم كيف نثق فيهم هم ما يحسون بأخطائهم ولا يستعبطون مرات احس انه عنده افصام في الشخصيه هههههه والله يحتاجون طبيب نفسي ولا اعادة تربيه مادري نربيهم ولا نربي عيالهم شكلي بحطهم كلهم وبعطيهم دروس ومحاضرات بستوي الدكتور الخليفي . ياريت اعرف اوصله واسأله هو بيعرف لهم .

 

[حبه دمرني]

خواتي العزيزات ساعدوني وشوروا علي من اسبوع واجهت زوجي بخيانته لي وكيف اني فتشت موبايله واكتشفت علاقاته المتعدده وثار علي وقال لي مب من حقح تفتحين الموبايل وهو وايد يتحسس من هالموضوع لانه سبق وصار من قبل وعدته مااسويها مره ثانيه لانه اعتذرلي وقال نزوه ماراح تتكرر بس ووفيت بوعدي اكثر من سنه بس حسيت من قريب انه في شي غلط الحاسه السادسه اشتغلت وللأسف طلعت صح ياخسارة الثقه اللي عطيته اياها المهم انا ماسكت له ورديت عليه وبانه جرحني وخان الامانه والثقه وسكرت التلفون بويهه . كنا نتكلم في التلفون واتصل كذا مره وماارد عليه وطرش مسج وفي البيت بعد حاول بس ماعطيته فرصه يتكلم كنت انتفض من الغيظ والقهر . وثاني يوم اداني طناش لا حاول وانا مول ماجابلته هوشمالي اعتقد غربي وانا جنوبيه شرقيه واحنا على هالحال مناسبوع احس انه مايبغي يعتذر ويبى يرجع الامور عاديه بدون مناقشات وانا مصره على الرفض شو رايكم حبيباتي ؟ انا اصر على موقفي واللي فيها فيها عشان اضمن انه هالموضوع مايتكرر انشاءالله ولا مافي فايده لانه متعود عالعلاقات ومدمن عليها شو راي الاستشاريات والخبيرات انتظر ردودكم ورايكم واقتراحاتكم بفارغ الصبر والله العالم بالحال رتنسوني ياللا جاوبوني

الله يعينج حبيبتي ماتفيد المواجه بعض الاحيان واحيانا المواجه تنفع انا براي احب اواجه زوجي علشان ابين له اني كشفته ويستحي مره عن مره يتعدل ويحس انشاءالله اكثري من الدعاء والاستغفار والصدقه ان الصدقه تطفئ غضب الله وسوره البقره يوميا والله الهادي

 

[ليتني احتويك]

الموووووووووووووووووووواجه مااااااا تنفع ولو برياااال راح تطلعي في الاووووول والااااااخير انتي الخسرانه طنشييييييييييييييه ولاتسألي عليييييييييييييييييييييييييه خلييييه يحس بمشكلته ويتربى عدل علشاااان يعمل حساااابه مره ثااااانيه ...

 

[ام خليفه وسلمان]

مثل ما قالوا خواتي عليج بصلاة والدعاء والقران والله يفرج همج انشاله عن قريب وبشرينا

 

[تكنولايت]

الله يفرج همك ويعينك
حبيبتي لازم تفكرين انا اريده ؟ام لا؟
طبعا الاجابة نعم كل الحريم ما تضحي بسهولة!!
اذا يبدا مشوارك في اصلاحه وتعديله وهذا يتطلب منك جهد ووقت ونتائج ليست مرضية مية بالمية ؟؟
لكن عليك البداية والاتكال على الله ثم فتح المشاكل هنا وستطلعين بنتيجة انشاءالله تناسب حالتك
ربنا معاك

 

[سارية الجبل]

مشكورين حبيباتي على شعوركم احس انكم مثل خواتي مع اني مستحيل اخبر خواتي يفكروني نايمه بالعسل الله يستر بس فعلا يحس بالنفس انه كل هالسنين وكل المشاعر والذكريات طلعت هباءا منثورا كنت واثقه من حبه لي معقوله كان يمثل ولا حد غيراه علي اتمنى بس اعرف الحينه شو شعوره ؟ هل ممكن يكون متأثر ولا عادي انا آسفه احس اني اكلم نفسي ميته من القهر يارب فرج هم كل مهموم ولاحول ولا قوة الا بالله العلي العظيم ,

 

[نديمة الشذا]

حبيبتي صدقيني هو يحبك بس يبي يتسلي شوي

انتي طنشيه ولاعاد تواجهيه ابد واذا قدرتي تخربين علاقاته بدون يحس يكون افضل

اهم شي استعيني بالله تعالي واكثري من الدعاء والاستغفار

اهتمي بنفسك طنشيه عيشي حياتك وصدقيني راح يمل ويرجع

وكل ما حسيتي بالقهر وبالغبه في الانتقام قولي)ربي اعوذ بك من همزات الشياطين واعوذ بك رب ان يحضرون)

وراح تهدأين باذن الله تعالي حاولي تكملي هالمره والله يعينك المره الجايه

ونصيحه يا اخوات لاتواجهي الا لما تكوني متأكذه من نفسك ومن وضعك ومن ادلتك لانك راح تكوني انتي الخسرانه

وافضل من المواجهه العمل بالخفاء والله الهادي الي سواء السبيل

 

[الحلم الهادىء]

سبحان الله لو انا متاكده انك وحده ثانيه غيري كان قلت هذا انا نزلت هالموضوع وانا ناسيه !!

نفس اللي صار لي مع زوجي...الله يسامحه ويهديه

وانا مثلج بنفس الوضع الحين...صارت المواجهه وقلب علي الموضوع وان انا غلطانه لاني مسكت جواله وانا اللي جايبه لنفسي عوار القلب !!! تخيلوا؟؟؟

ولما قلت له طيب انا غلطانه باللي سويته امنا بالله...وانت؟؟؟ وعلاقاتك بهالبنات؟؟؟ لا وفيه منهم متزوجات تخيلوا؟؟؟ وكلام الجنس؟؟؟ تشتهي هذي وتبي تبوس ذلك وكلام قسمن بالله صدمني جدا لما شفته مرسله لهم مسجات!! فما بالكم باللي يجري بالمكالمات؟؟؟

قالي : ادري ان هالشىء غلط وادعي ربي يفكني منهم ..ومش انتي اللي تحسابيني..هذا شىء بيني وبين ربي واذا ربي ساتر علي لاتجين انتي وتفتشين جوالي عشان تفضحيني!!

شايفين المنطق؟؟

سبحان الله

والحين صرنا منفصلين هو ينام في غرفه وانا في غرفه...والحوار شبه معدوم...لا وازيدكم من الشعر بيت..قالي انه يستخير اذا يقدر يكمل معاي او نتطلق!! لان مايطيق الحرمه اللي تفتش جواله!

قسمن بالله منتهى الظلم

يكذب ويوعد ويخلف وعوده ويستغفلني وانا صابره ومتحمله...وبعد مش عاجبين

والقهر الاكبر لما واجهته اذا انا مقصره بشىء يدفعه لخيانتي!! قالي لالالالالالا..انتي فوق توقعاتي وماقصرتي بشىء

طيب لا مواجهه نفعت ولا الصمت حل..خاصة اني اخاف تتطور علاقاته بهم وتوصل للزنا

وبصراحه ماعدت اثق فيه وفعلا اخاف يوصل لهالمرحله

لان اللي يتكلم بالجنس اكيد بيطور الموضوع للقاء ..ولمس...والخ

ليمتى يعني بيتم يتكلم بالمجسات وبالمكالمات بس؟؟؟

شرايكم؟؟

 

[البلاتينيه]

ياناس ياناس اللى مامعاها اولاد تعض ثوبها وتنحاش بعدكم سنة ان ماكان كم شهر يكشر عن انيابه ولاعاد يهمه زعلتي او لا ومن ترك شي لله عوضه الله خير منه انت تفكرين الان بالعاطفة وهو يفكر بنزواته والاستخارة لك نافعة