الحل مع زوجي ؟؟؟؟ افيدوني

[ghalawy]

السلام عليكم جميعاً

حبيت اطرح مشكلتي عندكم وان شاءالله الاقي لها حل ... وغر كذا ابغى اعرف نمط شخصية زوجي الله يخليكم .

انا متزوجه من 5 شهور من رجل اكبر مني بـ 12 سنه تقريبا وانا عمري 24

والحمدلله انسان واعي وفاهم وعاقل بس فيه مشكله انه عصبي وحسااااااس وانا طبعي هاديه

وهو يعصب على اشياء تافهه يمكن تطلع مني وانا اشوفها عاديه بس هو من عصبيته وحساسيته الزايده يشوفها كبيره في حقه ..

غير كذا عنده تفكير تقريبا مسيطر عليه الي هو ( الحرمه ماتنعطى وجه - والحرمه ماتستاهل احترام زايد ووو.. من هالكلام )
وفي تعامله معي احسه يبغى يمحي شخصيتي ويحط لي شخصيه في مزاجه اللي هي الحرمه اللي عمرها 45 سنه وتشيل بيت فوق راسها وتطبخ وتنفخ وتجيب عيال وبس وكل شي يقوله زوجها تقول ابشر ولا يهمك

وانا مااحب هالاسلوب ومستحيل وقلت له انسى اني اصير هالحرمه اللي في بالك واذا حاولت اناقشه في شغله يعتبرها طولة لسان وحنَه .. ويمنعني من حضور مناسبات اهلي يقول منتي ملزومه في احد الا امك وابوك

مدري وش اسوي معه وانا اخاف اني اطفش لاني كذا مره جا في بالي موضوع الطلاق بس اقول بصبر لاني حامل واشوف يمكن يتغير ..


يا بنات ابغى اعرف كيف اقدر اغير تفكيبره وكيف اخليه مرن واتفاهم معه هو شخصيته قوووويه

احيانا احسه مايحبني وانه تزوجني علشان اجيب عيال وبس والناس يقولون لي لا هو الا ماصدق على الله انه لاقي وحده مثلك صغيره وحلوه وانه يخاف انك تطيرين من يديه وخصوصا لانه خطب كذا مره وكلن رفضه ولانه اكبر مني بكثير ماتوقع اني اوافق ..

والله محتاره مدري وش الصدق وعلشان مااظلمه هو مايقصر علي بشي ابد بس طبعه شوي حاد وانا ماقدرت اتأقلم معه ..

اتمنى تفيدوني باللي تقدرون عليه الله يخليكم ويرزقكم ..​

 

[دحومتى]

والله ياحبيبتى افضل شى لك انو تروحى للانماط الشخصيه وشوفى شخصيته وبعدها شوفى ملف يخص شخصيته وراح تفهمينه كثيررر وتقربين له اكثررر يعنى بينقلب النفور الى عندك الى ود و حب انشاءالله

 

[حرم الطيار]

ادعي له ... الغاليــه الظاااهـــر انه طيب بس فيــه شوية عيوووب ان شاء الله رااح تتعودين عليها مع الايام

ومااافي انسان كااامل ...الكمال لله سبحااانه وحدهـ ...

الله يسخرهـ لــج يااارب ...

 

[ice creeem]

الله يسخره لج

 

[اطياف انثى]

الله يخره لكي يار بان شاء الله اسمعي بالسياسه باذن الله سايسه وحاولي ماتعانديه كثير وخذي كل اللي انتي تبغيه بطريقه غير مباشره وحاولي تهدي اللعب اكثر الايام هذي الى ان تفهمي من هو وايش هو عليه وتكسبيه ولا تنسي الاستغفار والصلاه اخر الليل والدعاء الله ييسر امرك يا رب بس كمان شغله ترى احيان الشباب يحبوا يفرضوا سيطرتهم على زوجاتهم اول سنه من اللي بيسمعوه عن الحريم ومن هذا الكلام اعطي نفسك واعطيه فرصه يعرف من انتي وشوفي تربيته يمكن لها تاثير بهذا الشي والله ييسر اموركم يارب

 

[#ريوم#]

عطيني اذنك واسمعيني زيييييييين
شوفي انت قلتي عنه انه( فاهم وواعي وعاقل ولايقصر عليك بشيء)هذي كلها ماشفعت له
احمدي ربك ان فيه هذي الصفات غيرك عندها- احمق - فاشل - خاين - يدار بالريموت- يعني ماله شخصية
تمسكي بزوجك ولاتفكرين بالطلاق علشان اشياء ممكن تتعدل مع مرور الأيام

وبما انك تقولين انه واعي شوفي ابحثي عن دورات عن الحياة الزوجية واشتركي انت وهو مع بعض

وفيه كتاب انصحك بقراءته وهو (الرجال من المريخ والنساء من الزهرة)تلاقينه في مكتبة العبيكان
ومهم زي ما قالو الأخوات شوفي نمط شخصيته وحتستفيدين كثييير في التعامل معه

وبعدين مثل شخصية زوجك ما راح تتعبين في تربية اولادك لأنه بيساعدك كثير في التربية بإذن الله

وانتبهي ترى الشيطان حرييص على تفريق الأزواج

وياحلوك انت وكريشتك ههههههههههههههه

هاه قولي لي وش بتسمين اللي في بطنك نسميك ام مين ههههههههههههههه

 

[هــمــwـــه]

الله يسخره لك ويسعدك ياااااااارب

 

[القلب المفتوح]

الجئي إلى ربك أولا
ولا تسألي الناس عنه بعد ما تزوجتي خاصة أنك أنت اخترتيه
وفرق السن عادي مو كثير وانتي مو صغيرة لدرجة أنك تطيرين مع الرياح واللي حولك يحركونك
المهم ما شاء الله باين إنك فاهمة بدليل انك شكيتي لزميلاتك في المنتدى ما خليتي المشاكل تقضي على حياتكم من أولها
والولد أو البنت بإذن الله راح يغيرون أبوهم لكن عليك بالصبر والتخطيط والمسايرة حتى لا تغرق السفينه

 

[قصه الم]

نشاالله ربي يالف بين قلوبك
طيعي زوجك الطاعه مهي مقتصره على المراءه ام 45
قواليله سم وحاضر وتامر وتدلل
هذه لاتعد طاعه عميه بالعكس تحرجه وتخليه يحبك اكثر ن تسمعيه ناده باسمك ردي علي به الكلمات
صدقين مررررررره يحبوها الريجيل
على فكره انا زي عمرك وماقول لزوجي اله سم وامر ليست تبعيه واستلم وضعف ولاكنها نابعه من الحب
حتى ان بنتي عمرها 8 سنين لاترد على ابوها اله بكلمت سم يابابا
الله يوفقك ويريح بالك خليك لينه شوي