التهاون في الصلاة لأعذار واهية ...إنها الصلاة

[راجيه الرضا]

شوفت تعليق لأخت فاضلة حامل في السابع وكانت بتقول إنها مش بتصلي علشان مش قادرة ترفع رجلها على الحوض وتغسلها أثناء الوضوء.

على أد ما حاولت أرد عليها بهدوء وقتها، بس حقيقي الموضوع محزن ويقهر لأقصى درجة!!

هو احنا ازاي بقينا بسهولة كده بنطلع أي حجة ونضيع الصلاة مننا من غير ما نحاول نشوف حلول ونموت نفسنا في البحث لو لزم الأمر علشان نأدي فرض ربنا!!

مشكلة زي دي ليها كذا حل: زي إننا نستخدم دورق نغسل بيه الرجل، أو حنفية الدش اللي تحت، أو أي خرطوم، أي حاجة الطرق كتير، مش لازم الحوض خالص!!

كذلك من المواقف اللي تقهر إن مثلًا بنت ترجع البيت قبل العصر بـ 5 دقايق وهي لسه مصلتش الظهر..

فتروح تغير هدومها وبعدها تتوضى وتنشف بالفوطة وبعد ما تخلص كل ده ويكون العصر أذن تقول: أعمل إيه يعني ما أنا ملحقتش!!

طيب مش كنا ممكن نتوضى بأسرع طريقة واحنا بلبس الخروج حتى لو هيتبهدل ونجري نلحق الصلاة قبل ما تروح طيب؟

كذلك البنت اللي بتفوت الصلاة وهي برا البيت وتقول مش لاقية مكان أصلي فيه لأنها مكسوفة تصلي في الشارع

ولا اللي مش متوضية ومش راضية تتوضى برا علشان الميكب ميبوظش أو هدومها متتبلش!!

يا جماعة بالله عليكم ده كلام؟
دي الصلاة!
عارفين يعني إيه الصلاة؟

يعني أول حاجة هنتحاسب عليها، وتركها عمدًا أكبر كبيرة ممكن نقع فيها..

يعني لازم نحط دايمًا في بالنا إن ضياع صلاة واحدة = كارثة حقيقية

وإننا لازم نبذل مجهود ونجاهد أشد مجاهدة علشان منضيعش مننا صلاة واحدة!

الاستهتار بالصلاة ده حقيقي عقوبته وألمه صعب أوي، فنلحق نفسنا قبل ما نموت زي شباب كتير حوالينا ونرجع نندم يوم لا ينفع الندم

هدانا الله وإياكم وثبتنا على دينه..

#رقية_طه