التربية الجنسية .. ابغي النصيحة

[نفرتاري]

هلا فيكم خواتي

راح ادخل بالموضوع على طول
انا أم لدي البنين والبنات
اكبر بناتي في الثانوية

لما قربوا بناتي لسن البلوغ
كان سهل علي اني افهمهم على مسائل الدورة وكيفية التعامل معاها
والتغيرات اللي تصير بالجسم
بس لما كبروا شوي .. صار لزاماً علي اني افهمهم أكثر
افهمهم عن جسد المرأة وجسد الرجل
أفهمهم العلاقة الطبيعية ما بينهم
واعلمهم الفرق ما بينها وما بين العلاقات الشاذه
وهذا الموضوع ماكان سهل علي بالمرة
عانيت اسبوع كامل من وين ابتدي وشلون أمهد
بس الحمدالله ساعدتني دكتورة
ومع ذلك ما قدرت أقعد لحالي معاهم .. قعدت خواتي معاي
حشا داشة حرب:shiny:

السبب في معاناتي
تربيتي .. تربيت عند أم ( فديتها ) كل الكلام هذا ممنوع عندها
كلمة زواج أصلاً عيب وممنوعة
أنا ما الومها .. هي تربيتها بعد اثرت عليها

المهم نرجع لموضوعنا
البنات .. وصار الموضوع معاهم أوكي
لا أنا استحي منهم ولا هم بعد

بس الحين عندي ولدي
كلمت زوجي في الموضوع عشان يكلم ولده
ما رضى .. قال مارده بيتعلم من لاشارع
ماراح اقولكم على تفاصيل الحوار
لأن واااايد اختلفنا على وجهات النظر
صار لي سنه احاول معاه بلا فائدة
فقلت مالي إلا اني أتولى الموضوع
بس الصراحة ماني قادرة

ودي اتساعدوني

شلون يكون حواري مع ولدي:dunno:
شلون ابتدي ؟
وفي أيش اتكلم بالأول؟

للعلم ولدي الحين عمره 14 سنه
وبلغ الريال .. واحنا مازلنا أنا وابوه مختلفين:shutup:

ساعدوووووووووووووني​

 

[fatimah]

لسه ما وصل ولدي لهذه المرحلة بس ان شاء الله الاخوات يفيدوك

 

[سوبر ناني]

صدق زوجك الطفل سيتعلم من ان لم يكن تعلم للان
عليك بالتكلم معه بشكل صريح ومباشر خاصه عن العلاقات المحرمه الشاذه وعن العاده السريه تكلمي بوضوع وبشكل مباشر ولا تخجلي والى تعلم الطفل من الشارع ملا تحمد عقباه

 

[V I P]

من زمان وانا ودى بطريقه اكلم فيها بنتى وافهمها
حاولت وصراحه حسيته شى محرج. ودى لو سمحتى تكتبين شو قلتى لبنتك بتفصيل الممل
ابى اشرح لها وصلت سن 13 .

 

[نفرتاري]

من زمان وانا ودى بطريقه اكلم فيها بنتى وافهمها
حاولت وصراحه حسيته شى محرج. ودى لو سمحتى تكتبين شو قلتى لبنتك بتفصيل الممل
ابى اشرح لها وصلت سن 13

ام محمد
في ذاك السن كل اللي قلته لهم عن الدورة ما اتذكر التفاصيل عدل
بس اللي اذكرة اني فتحت الموضوع معاهم في سن أبكر من 13
يعني لما بديت الاحظ التغيرات الجسمانية عليهم
مثل طلوع الشعر في الأبط والعانة
بروز الصدر شوي
قلت البنات شكلهم يالسنة يا السنة الجاية بيبلغون
فقعدت معاهم وقلت لهم عن جسم البنت والولد والاختلافات اللي فيه ..
المعلومات كانت بسيطة جداً في حدود فهمهم ..
بعدين تكلمت عن الدورة
وعن الطهارة .. والاغتسال
بس في نفس الوقت قلت لهم هذي اشياء خاصة فينا احنا البنات
ماينفع انسولف جدام أي حد

لما وصولوا لأول ثانوي
مثل ما قلت لج احترت ماعرفت اشلون افتح الموضوع معاهم
بس سبحان الله الواحد يضطر .. علشان اولاً اقدر احمي البنات من العلاقات المحرمة والشاذه
والللي منتشرة بصراحة
الشي الثاني علشان اكسر حاجز الحيا بيني وبينهم
واخليهم يسالوني بدل ما يسالون ربعهم
الشي الثالث .. اعلمهم ان كل واحد له خصوصيته ولابد من احترامها

شلون بديت

اول شي فضلت اني اقضيها سهرة معاهم على فلم حلو وكان أصلاً إجازة
علشان كنت ناوية على نية شينه
وشكلهم ماراح ينامون .. من التفكير
ما الومهم

المهم اول شي جبت القرآن
وفتحت على سورة النور
بتقولين اشمعنى؟
اقولج
لأن سورة النور بدايتها اتكلم عن حادثة الإفك
فكانت بداية حلوة اني أقولهم قصة عائشة
وكم كان عمرها لما تزوجها الرسول
وكم كان عمرها لما صارت هالقصة

استانسوا منها وايد
عجبتهم
كانوا يظنون قصة ماقبل النوم:shiny:

بعدين كملت معاهم باقي السورة اللي كانت التكلم عن الزنا وهالأمور
كان هذا أحلى مدخل لي
في خلال كلامي قمت اسألهم عن المعلومات اللي عندهم من هالناحية
لأن احياناً راح تنصدمين انج غافلة عن بنتج
كنتي اظنينها قطه مغمضة واطلعت مايه من تحت تبن:shiny:
وممكن العكس حاطه في بالج أشياء .. وتطلع البنت لا ليها لا في التور ولا في الطحين:bleh:

هذي كانت البداية
بكرة اكمل:shiny:
تعبت من كثر ما اكتب​

 

[نفرتاري]

سوبر ناني
ما أظنج فهمتي علي
زوجي رايه
ان الولد خله يتعلم من الشارع
يعني ما يبي يتعب نفسه

وأنا رايي ماينفع يتعلم من الشارع .. لأن تعليم الشارع يعني تجربه
راح يتعلم من ربعه
عاد والله خير ربعه مثله وشرواه
اعتقد التعلم من الشارع .. يعني لازم يجرب الصح والغلط
هذي وجهة نظري​

 

[V I P]

متابعه.......

 

[نفرتاري]

هلا فيك يا عضوات المنتدى
وبالأخص ام محمد
سامحيني على التأخير
يلا .. نكمل الموضوع

بداية .. فية نقاط احب اركز عليها قبل ما اذكر الخطوات

وهي :

اولا ...لازم تختارين العمر المناسب ..

وانا ما اقصد بالعمر المناسب .. السن المعين ..
لأ .. انا اقصد ان كل بنت تختلف عن الثانيه
فيه بنات السن المناسب عندهم هو سن 12-13
وفيه بنات لأ توصل ال16 والعمر بعده ماصار مناسب
فيه بنات يجونك يسألون ويستفسرون عن (( الحوه وعروقها )) على قولة امهاتنا
وفيه بنات عمرهم مابيسألون
ولو تقولين لهم ان الزوجة بمجرد انها تلبس الفستان الابيض بتحمل وتجيب عيال بيصدقون
طيب ..
شلون تعرفين العمر المناسب ..
هاي تعرفينه من خلال اسئلتها ..
اما اذا جات ما تسأل فلازم .. انتي تبتدين معاها من سن 10 - 11 ..
بداية تعلمينها عن الدورة
والمفروض قبل سن البلوغ..
ماتنتظرين لين تجيها وتتفاجأ
طيب واذا جات بنتي صغيرة .. بس (( مفتحة باللبن )) على قولة اهل الكويت ..
هاي حلها بسيط .. جاوبيها على قد اسئلتها وعلى حسب عمرها
يعني مو من اول سؤال .. تفتحين لها عالبحري
عطيها المعلومات بالقطاره ..
كل كم شهر عطيها قطره
وهي بتكون معلوماتها في حدود اللي تسمعه من زميلاتها بالمدرسة ..
او بنات العايلة اللي من سنها
وكلهم (( الله بالخير )) .. مايعرفون شي

اذكر سؤال سألتني فيه بنتي ..
قالت انا سمعت من بنت عمتي ان الأطفال ينولدون بطريقتين ..
طريقة طبيعيه وطريقة غير طبيعيه ..
(( وهي كل هالمده تظن انهم يجون من البطن ))

فأنا قلت البنت خلاص عرفت .. وبنت عمتها من سنها
فسألتها عن الطريقة الطبيعية ..
فقالت لي انها من البطن
سألتها .. والغير طبيعية ..
فقالت (( الله يعزكم من ورا ))
فضحكت وقلت لها (( هاي ام العريف اللي تاخذين منها معلوماتج ))
وصححت لها معلوماتها

ثانيا .. انك تختارين الوقت المناسب
ويفضل يكون عطلة صيف لانها عطلة طويله
لان الموضوع اللي بتكلمينها فيها كبير عليها وبيشتت انتباها وتفكيرها فترة طويله قد تمتد لأشهر ..
وما اعتقد انك تبين تشتتين انتباها فترة المدارس
وتفكير البنات هاليومين مشتت من دون شي ..
تجين انتي وتقضين على البقية الباقية

ندخل اللحين بالموضوع ..
وانا افضل ان سن البنت يكون بين 13 – 14

هو عبارة عن ثلاث مراحل ..

اول مرحلة ..

انك تجبين لها سورة (( النور )) بتفسيرها
وتظلين تقرين لها كل ايه بتفسيرها ..
وما فضل تخلينها بروحها تسوي هالخطوه
لأنها مابتطبقها حرفيا ..
بتقولج ان شاء الله بقراها لكن المطلوب انها تقراها اية .. اية

ثاني مرحلة ..
وافضل تكون بعد المرحلة الاولى بأسبوع
تكونون انتي وياها قريتوا السورة مع تفسيرها بتمعن ..
ومن غير تسرع
هي انك تجيبين صورة تفصيليه لجسم الرجل
واخرى لجسم المرأة
وتكون الصورة توضح الأعضاء الداخلية والخارجية للجنسين
وتبتدين تشرحين لها كل عضو مع وظيفتة
لاتركزين على العضو التناسلي ..
لأ .. ركزي على كل الاعضاء

اللحين انتي كونتي عندها خلفية دينية وثقافيه عن هالموضوع
وتدخلين بعدها على اصعب مرحلة
وهي المرحلة الثالثة

وهي بتكون صعبة عليج قبل لا تكون صعبة عليها
خصوصا اذا كنتي خجولة
انسي الخجل في هالمرحلة

المرحلة الثالثة ..
ابتديها بطريقة الأسئلة ..

* انتي تعرفين من وين ينولد الطفل (( خصوصا اذا ماكانت تعرف من وين ))
* طيب تعرفين شلون تحمل المرأة .. واذكر ان اجابة بنتي كانت :
ايوه اعرف .. لما تتصافح مع الرجال تحمل . (( ماكانش حد غلب ))
* تبتدين تشرحين لها ان كل كائن الله خلقة في هالكون خلق منه اثنين
(( الذكر والأنثى )) سواء انسان او حيوان او نبات
وتبتدين تشرحين لها عن التزاوج عن الحيوان والنبات
لأنها اكيد بتكون خذته في المدرسة
ومنها تدخلين على الأنسان
(( والله يعينج ))
ولازم توضحين لها ان هذي حاجه .. فطرها الله في الأنسان
مثل حاجته للهواء والطعام
وتشرحين لها الفرق بين العلاقة الحلال والعلاقة الحرام
بس بنتك ساعتها يبيلها كاميرا فيديو تسجل تعابير وجهها في هالساعة
ياهي تعابير بتشوفينها
صدمة على قرف على كراهية على حقد
بتكون اول صدمتها في الدنيا
اذكر كنت وأنا أكلم بناتي
الكبيرة اشوف الدموع تنزل من عينها
والثانية كانت مفهية على الآخر والصدمة واضحة بتعابير عيونها
والله اني خفت اكمل .. بس كل مرة كنت اسكت واسمح لهم انهم يطلعون اللي في خاطرهم

المعاناة الحقيقية بتعانينها في المرحلة اللي عقب
تغيير في تصرفاتها .. بتشوفينها دايما سرحانه وتفكر
دايما قاعده بروحها ..
او معاكم بس بالها مش معاكم
بتشوفينها تراقب كل حركة تصدر منك في وجود ابوها
حتى لو يأكلك على الغدا تراقبكم بشك
بتطيحون انتي وابوها من عينها مؤقتا
بس .. عادي ..
كل هالتصرفات طبيعية
هي مرحلة بتمر فيها مؤقتا وبتعديها

الحلو انهم تعلموا شلون يطقون الباب قبل ما يدخلون الحجرة
قبل كانوا تدرعم على الأولي والتالي
عرفوا ان كل إنسان له خصوصيه

بس اهم شي انج دوم توضحين لها وتأكدين عليها
انها لو عندها أي استفسار ماتسألج الا انتي
لا تسأل أي حد ثاني حتى لو كانت صديقة مقربة
لأن محد بيفيدها غيرك
وانتي خلك عند كلمتك ..
حتى لو سألتج سؤال محرج يخص العلاقة جاوبيها



اختي الكريمة أتمنى اني أكون أفدتج
وأي استفسار أنا حاضره:bigsmile: ​

 

[V I P]

كفيتى ووفيتى الله يعطيك العافيه
صراحه ضحكتنى رده فعلهن
الله يعينى على التطبيق .
انا بعد اتاثرت اول ما عرفت وطاحو اهلى من عينى ما ادرى بعدين انا بنسير فى الهوا سوا.

 

[مرحة : )]

ماشالله عليج يا نفرتاري

خووووووش حجي
فديتج


الله يحفظ بناتج ويخليهم لج

 

[مثل الورد]

بصرااااااااااحه عجيبه...

والله ومنج نستفيد الله يعطيج العافيه....

والله احب اكون جريئه واتكلم لاني وايد اخاف على الصغاريه...

وبما ان ماعندي للحين البنات ... بس ان شاء الله بطبقه باختي الصغيره...

 

[اموله99]

الله يعطيج الف عافيه

 

[الزهرة الربيعية]

عاد تصدقين نفرتاري أول شي الله يحفظ لك عيالك وعيال كل اللي في هالمنتدى الجميل
ثاني شي انا ماعندي بنات وباقي أولادي صغار لكني تمنيت يكون عندي بنت بعد كلامك هذا
رغم ان ولدي عمره خمس سنين لكنه دايم يسألني أنا وين كنت لما يشوف صور زواجنا ويجلس يبكي ليه خليتوني نايم في البيت
وماسكت الا لما صرت اقول له كنت في علم الغيب باقي أو كنت في بطني
ربي يحفظهم جميعا ويحميهم من فتن هالزمان