اكتشفت خيانته قبل الزواج و لم اصارحه وبعد الملكه فاجئني استمراره

هلا وغلا حبيببتي ألف مبروك الملكة ومبارك عليك الشهر الكريم ....
نصيحتي لك صلي الاستخاااار ة اكثر من مرة والله يهيئ لك الخير...
وخالك دايم معه يعني اتصلي عليه كثير حسسيه انك شغله نفسك فيه اهديه شريط اسلامي عن المعاكسات
حاولي تتقربين له أكثر بالسؤال عنه لاتهملينه لانه راح يفكر يكلم غيرك بالوقت الا هو انت تتغلين عليه بالتصال ....موفقة والله يكتب لك الخير
 
اذا انت متاكدة احسن تسيبي مدامك لسه على البر لانو ابوطبيع مايجوز عن طبعة
 
عزيزتي .... الف مبروك الملكة

وربي يسعدكم

ابنتي ..... انت حاولي انك تلمحي له ...يعني مثلا تقولين ان كثير من الشباب يكلمون بنات حتى وهم خاطبين او متزوجين ...وهذا التصرف قد يهدم بيوتهم

او قولي له ان صديقتك و زميله لك اكتشفت ان خطيبها يكلم بنات وهي طالبه ان تنفصل عنه

وانت معاها في الانفصال ...لان اللي اولها كذا ...ينخاف من تاليها

وشوفي ردة فعله

صعب ان الواحد يضمن لك انه راح يترك هذه الاشياء بعد الزواج ...لكن كثيرين فعلا يتركون وينصلح حالهم بعد الزواج

وربي يسعدكم
 
عزيزتي

مواجهتك له لن تنفعك ابدا ولا تعتقدي انه راح يعترف بخيانته ولو اعترف ماراح يتركها

لو هو فعلا طبش شباب كان انهى علاقاته بزواجكم والله اعلم

رأيي انك تحكيه عن فلانة من صديقاتك فكت خطبتها او ملكتها بسبب انه زوجها يكلم بنات وشوفي ايش يقولك ..

استشيري اهلك وخذي برأيهم

انت لسة صغيرة في العمر والله يعوضك بخير منه

والي هذا اوله ينعاف تاليه ... أسؤ شيء في الحياة الزوجية انك ما تشعري بالامان مع زوجك ... وممكن في اي لحظة او نتيجة اي خلاف او حتى لمجرد سغرك او ابتعادك يعود للكلام مع البنات .. هذا اذا ترك اصلا الكلام معاهم

والله يختار لك الي في الخير
 
كلام عنقود عنب من ذهب

أنا معها

يقولون حرص من صاحبك ولاتخونه


أحرصي عليه

بس ابعدي عن المصارحه
 
ذكريه بالله حاولي تقوين الوازع الديني عنده قولي له قصص متلا فيه شخص دايما يعاكس ولما اتزوج وجاله بنت

مثل القمر يخاف عليها من الهواء كانت فريسيه للذئاب البشريه كله بسبب ابوها فكما تدين تدان

وفيه شخص كان يعاكس واخته ايضا تعاكس ومسكت الهئيه اخته وابوها متوفي واتصلوا عليه يستلم اخته

ولما دخل على رجل الهئيه عرفه لانه كان محجوز من يومين عندهم بسبب معاكسته لاحدى الفتيات

هذي حقائق حاولي تهتمين بصحتك ونفسك ولا تنشغلين كثير بموضوع خيانته

وتفائلي التفاؤل يجلب الخير وادعي الله كثير وحاولي برمجته انه انسان مخلص وصادق وانك تثقين فيه

وانك تحبيبنه وشوفي هو من اي الشخصيات جنوبي او شمالي او شرقي او غربي وتعاملي معه على اساس شخصيته

والله يهديه لك يارب ويبعده عن بنات الحرام ورفاق السوء
 
الله يكتب لك الخير بالدنيا والآخرة ..
صراحة مااااأدري وش أقولك إذا قلت لك اتركيه صعبه واصعب اذا قلت استمري معه فأنا أؤيدك على انك تكلمي الاستاذه ناعمه وتسمعي منها أفضل لكِ..
وأوصيك بالالحاح على الله بالدعاء بأن يكتب لك الخير وأن يريك الخيره من أمرك واستخيري واكثري من الاستغفار والصدقة ..
ربي يسر أمرك ويعينك.​
 
الله يفرج همج يارب شوقي كيفية التعامل مع الزوج الخائن واتبعي التعليمات والله يوفقج ويهديه عليج
 
انتي اسأليه تحبني والا بس كلام

وبعدين قولي له ما راح اسامحك لو تخونني بيوم لأن انا احبك وما حبيت احد بالدنيا غيرك ومن واحنا صغار وانت حبيبي والحمد لله قريب تصير زوجي اذا انت مو حاببني ومو مقتنع قول لي ولا تاخذني ونتعذب بعدين

واحس انه واحد يحب يلعب وعنده قابليه انه يعرف غيرك

استخيري والله يكتب اللي فيه الخير بس ما تقولين انا شاكه فيك خليها على اساس بالمستقبل وخلوا الصراحه بينكم
 
الله يصلح حالج ويهدي خطيبج

انصحج بالاستخاره والله ييسر امورج ويكتبلج الخير وين ماكان
 
السلام عليكم
مشكورات و يزاكم الله الف خير عن كل كلمه ونصيحه و دعاء

خواتي السموحه ما دخلت المنتدى لي كم يوم بس كانت حالتي النفسيه تعبانه صدق ،، عندي جامعه وصيام وقلة نوم هدا وكله ما لي خاطر اكل اي شي

ملاحظه: شكرا لكل وحده حاولت تساعدني بان اوصل لحل معاه،بس للخوات الي تقولي ما منه فايده واتركه ،، ابدا ما كان الطلاق حل ولا انا الي بتنازل عن زوجي لبنات الحرام،، لانه اعرف انه يحبني ولو كان زواجي تقليدي لكن هو الي طالبني بنفسه وهو الي مستعجل للعرس،،
الحمدالله يا بنات انه زوجي تربيته طيبه والحمدالله يصلي صلاته في وقتها ومحترم وايد مع الناس،، كل مشكلته انه ماخذ فكرة انه هو ذكي ومايبين على تصرفاته اي شي غلط من وجهة نظره وبالنسبه للشباب قلت لكم قبل الاغلبيه يعرفون بنات ،، وانا ان شاء الله بس افهمه انه انا ملاحظه عليه شي او المح له بالكلام بشي بيفهم وبيتغير بس كنت متردده من ناحية اصارحه او لا،،

فتحت الموضوع عند اهلي وصارحتهم بموضوعي مع زوجي وعندي صديقه لوالدتي بحسبة امي انسانه فاهمه ولها خبره فالحياه ،، تكلمت معاها وقلت لها الموضوع كامل قالت لي خلاص لاتردين على اتصالاته لما يي بيتكم وعقبها تفاهمي معاه وقولي كل الي بخاطرج و وضيحله انه انتو للحين بالبر وانه هالحال ما يرضيج ولا بتستمرين عليه ،،

وهذا الي صار،، لمدة اسبوع ماكلمته وبحكم وضع دراسته وانه بيخلص قريب ،،مايطلع من الدوام الا آخر الاسبوع والتلفونات ممنوعه الا تلفونات الدوام فكان يتصل مره ومرتين فاليوم ،، وصار يحرق التلفون ومارديت فعلا لليوم طلع من الدوام وانا فهمت امي قبلها انه لما يكلمها دايما تقوله انا فالغرفه والا نايمه والا فبيت يدي اي شي بس ما تبين انها تعرف اي شي وطبعا هو ما قال شي لامي بس كان يسال عادي

اليوم كان عندي موعد عند المصمم اتصل عقب الفطور وقال لامي انتو وين و وصيتها تقوله بروح للسوق وسالها عني قالت له موجوده فغرفتها قالها اوكي بتصل فيها واتصلت وما رديت ،، رحت لموعدي و رجعت البيت و رد يتصل مره ثانيه ومارديت ،، وطرش مسج انا بمر صوبكم الحين وبس نزلت بالصاله ويلست عند الاهل دخل وسلم على امايه ، وقفت وسلمت عليه عادي و شوي خلتنا امايه ع اساس نتكلم،، قالي شو فيج عسى ماشر فيج شي مضايقه والا زعلانه من شي ،،والا شي بخاطرج،، قلت لها ابد مابه شر اشرب قهوتك وعقب بنتكلم،، قهويته وعقب دخلنا نتكلم ، كان بيبدا بس ماخليته وبديت اتكلم : قلت له كل شاب تكون له حياته قبل العرس وسوالفه وانا من ملكتنا ما سالتك عن شي لانه انا اعرف تفكيرك واعرف كيف تربيتك و شو قناعاتك بس انت صدمتني بانك مستمر ولا عرفت تغير من نفسك على اساس انك تبدا حياه يديده وانت ريال متزوج هب مثل اول عزابي

طبعا فيه شوية استهبال كيف ليش شو صار ،، المهم ما قال شي محدد لانه اظن انصدم انه انا حاطه في بالي انه يكلم غيري ،، و قلت له احنا في اول حياتنا وهذي فترة الملكه عشان كل واحد منا يعرف شريكه حياته ويقرر اذا يقدر يكمل معاه او لا،، وانت وايد بعيد وهذا لانه في امور ثانيه شاغلتك،، قال الدراسه تعرفين واهلي ،، قلت له لا انا بنت ناس واعرف الاصول و لو شفت انك مشغول مع اهلك ما اقول شي وحتى ايام دراستك،، لكن انا شفت الموضوع زاد ولازم اتكلم و اقول ،، وانا ما تزوجت عشان اشتغل محقق والا تحريات ادور وراك ،، قلت له اظن انه نحن اكبر عن هالشي ،، وانا نفسي ومستواي ما يسمح لي انه احط عمري بمقارنه مع غيري،، رد علي بسرعه انت عزيزه عن هذا كله وقدرج اكبر من جيه،، بس انا اعرف انه انا قصرت لكن مستحيل حد يشغلني عنج(( قصده بنات))
طبعا طول الكلام ما قلت بشكل مباشر بنات او تكلم بنات بس الكلام كله مفهوم،،
و اكثر شي ارتحت له انه ما خربط بالكلام او انفعل مع انه انصدم،، بس مسك اعصابه و حاول يكون هادي ،، الي اكد لي انه عاقل وقادر يتحكم بنفسه وانفعالاته،،

المهم خلص الموضوع وقال ان شاء الله ما اقصر مره ثانيه وامكن انا كنت غافل عن شي لانه مستحيل اقصر معاج وبس سكرنا الموضوع
وبعدها تكلمنا عادي عن امور العرس وجيه

والحمدالله طول الوقت وانا قدرت امسك نفسي بدون انفعال او بكى او شي وكنت اتكلم بثقه
والحمدالله للحين انحل الموضوع وان شاء الله تكون هذي آخر مشاكلنا،،

واسمحولي طولت عليكم

طلبتكم يا بنات،، ادعولي و ادعوله الله يهدي سرنا ،، ويهدينا ويبعد عنا عيال الحرام،، ويوفقنا في حياتنا
والمسلم الي يدعي لخوه المسلم في ظهر الغيب له مثل ما دعا له به
الله يوفقكم في حياتكم مع ازواجكم و ابنائكم،، ويسر لكم كل خير ويبعد عنكم كل شر ,, اللهم آآمين​
 
ما شاء الله عليك

عقل و ثقل و حكمة

ربي يديم عليكم الساعدة
 
السلام عليكم
اختي انتي لما تملكتي له ما لاحظتي شي؟؟؟؟؟؟؟؟؟
اي ان عدد المكالمات بدأيقل شوي شوي(اتمنى لان هذا شي يبشر بخير)
لان اكثر الشباب عندهم هالشي قبل الزواج واحتمال بعد الزواج بفترة قصيرة
لان شوي شوي راح تكسبينه واعتقد انه مصر عالزواج بسرعه لانه يحبج وانتي وشطارتج بعد الزواج باسلوبج تقدرين تنسينه نفسه عدل؟
الله يهنيكم يارب
مع تحياتي
 
اختي ما دام انكم ع البر انا من رايي انج تصارحينه وتكلمينه عن اللي انتي حاسة فيه
او استخيري احسن لان في نوعية من الرياييل ما يقولون لاء لأهلهم وبعد ما يتزوجون اللي كانت محيرة له يرجع لحبيبته ويتزوجها واكبر دليل انه ما قطع علاقته فيها
لا تستعجلين في الزواج خذي وقتج في التفكير
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل