اسافر؟؟ والا مااسافر؟؟!!صوتي لي

[ام نايف2009]

كيفكم حبايب قلبي
شوفوا اخواتي انا قاعده ارمم بيتي وجيت عند اهل زوجي
لحد ماينتهي فتره الترميم ..معاي؟؟
اكتفي بكلمه سواء نعم سافري ..او لا لاتسافري..برجع بعد الترميم
ساكنين بجنبي مو بعاد عني
وعندي طفلين وحامل
بقول لكم الايجابيات والسلبيات
الايجابيات ان عندهم شغاله وريحتني كثير من المواعين وشغل البيت
واكلي جاهز واذا ابغى اسوي وعلى كيفي
السلبيات
1-اخو زوجي عنده اختبارات وابغاه ياخذ راحته بالبيت
2-عند زوجي اخت صغيره تقريبا عمرها 5سنوات
تضرب ولدي الصغير عمره 3
وصراخها قووي قوووي لدرجه مااتحمله
واذا خاصمتها او شئ احس ان خالتي تاخذ بخاطرها
مع انها هي نفسها تخاصمها وتشوفها اذا غلطت
وتعالوا شوفوا الهواش بين الاطفال الله يصلحهم جميع ويهديهم
وزجي يشوفني اني اعصب ويتكلم علي
وابغى اسافر لاخوي في الباحه وبرجع بعد الترميم عاد تعرفون درجه الحراره في الرياض :39:
واش تشورون علي فيه اسافر والا اجلس لحد ماينتهي الترميم
والله محتاره
آخاف اني ازعل خالتي بشئ وانا مااقصد
لاني الليله قلت لها ودي اني اربيها انا :8اقصد انا يتدخل بينهم اذا تهاوشوا)
ردت خالتي وقالت يعني بتربينها اكثر مني؟
قلت لها انا ماقلت انك ماتعرفين تربين
بس البنت اذا شافت امها معها تضارب واذا جت بغرفتي تصير هاديه وتتأدب
تعرفين الطفل يحس بالامان اذا سمع صوت امه حتى لو قالت لها اجلسي
عيب مايصلح كذا ..........
قالت ماصار شئ :35: بس واش اسوي بها؟(شئ طبيعي تحب اطفالها حال حال غيرها)
اناآخاف تفقع عينه لانها البارح غرزت القلم في راسه وانقهرت منها الله يهديها ​

​

 

[ابي اوصل فوق]

بصرااااااحه

الي سويتيه وردك على خالتك عيب
وانتقادك لبنتها وانتي جالسه في بيتهم مو حلو ابد الي قلتيه يكفي انهم مريحينك وعلى الاطفال شي طبيعي بيتهاوشون
اقول روحي لخوك لاني متاكده اذا استمريتي على كذا هم بيقولون روحي وبياخذون فكره سيئه عنك
واخوك ان كان عنده اطفال برضو ما راح يتحملك لنك من النوع الي ما يحب ينقال شي لعياله اما النا ماعندك مشكله تنتقدينهم

 

[ابي اوصل فوق]

لا تزعلين هذا رايي وخالتك ما شاء الله عليهاشكلها وحده عاقله

 

[نقااء الثلج]

لا عااادي تحصل في كل بيت واذا تبي تروحي بيت اخوك روحي وغيري جو انتي وعيالك ربي يسعدك ويوفقك

 

[ولدي اعز ماعندي]

سافري يااختي
وانتي عارفه مشاكل الصغار ماراح تنتهي
بس قبل ماتسافري خلي خالتك تكون راضيه عليكي
والله يوفقك

 

[ـأشكيك لمين]

أسـألي زوجك قولي وش رايك ـأروح ولآ ـأجلس معك
بعد ـأنتي لآتآخذين ع الاطفال
مدامك مرتآحه وهالشششيء بس اللي مضآيقك ـأقول ـأجلسسسي ولآتروحين لآخوك امكن زوجتةة ماتتحمل
وعمتك معـآها حق تزعل المفروض ماتقولي كذا
....!

 

[ثقتي بصمتي]

اكيد عنداخوك اطفال اذا تشوفي انك راح ترتاحي سافري
الله يوفقك

 

[شيهانة نجدية]

الله يختار لك الخيرة المباركة

 

[مدري ليش]

ياحليل خالتك صبوره بس مدري زوجة أخوك بتستحملك زي خالتك

 

[استغفرالله@]

بالعكس اوقفي مع زوجك فالترميم ليس سهل وكوني زوجة الابن الباره لان من خلال كلامك ام زوجك طيبه ماشاء الله لو وحده ثانيه قومت الدنيا ع كلمتك واذا زوجك يبغاك تسافرين سافري وربي يصلح الحال

 

[ردية الحظ]

اذا تبين تقيرن جوا خلي زوجك يوديك اذا انتي تحسين باالراحة عندي اخوك روحي الله يوفقك

 

[ام نايف2009]

طيب
هل من مزيد
اشكر كل من ردت
والبنات اللي يقولوا خالتك متحملتك
اقصد انهم اذا تهاوشوا انا اللي يفرقهم عن بعض
لاني دايم اترك لها الهوشه وهي تفرقهم
والبنت تزيد اذا جت امها
انا اقصد لو خالتي ماتتدخل وتسوي نفسها ماتدري عنهم يمكن كانت البنت هديت شوي
لانها بسرعه تروح تشوف وتخاف ان بنتها تسوي شئ بالولد
وتدري بنتها ان امها تخاف وتزيد​

 

[مييسو]

نصيحة خذوا شقة مفروشة لين يخلص بيتكم احسن ما تغثون خلق الله الناس في العطلة ماتحب الحكرة والناس الثقيلة لاتقولين بيت اخوي انا دارية بس صعب هم مراح ياخذون راحتهم الضيافة ثلاث ايام بعدها محد يتحمل احد
يازين من زار وخفف

 

[ام نايف2009]

هلا ميسووو
ردك ضحكني
ههههههههههههههههههه
افكر في الشقه المفروشه
من قبل ننقل
بس زوجي يقول نستفيد من فلوسها
في اي شئ في البيت افضل
يازين من زار وخفف
صار لنا 10 ايام
ان شاء الله مابيننا شئ انا وخالتي لاني فهمتها
وفهمت
ومو زعلانه ابدآ
بس شكلي باخذ شقه مفروشه واريح راسي
لان ولدي اخذ حركات عمته في الصياح والتفه والبكاء والتشكي
​

 

[@@الجوهره@@]

مع ميسوووو انا

 

[ام نايف2009]

شكرا يالجوهره
يارب ان زوجي يوافق ونطلع في شقه
قولوا آمين​

 

[القوية]

شوفي زوجك كلامه منطقي فلوس الأجار انتوا حالياً في امس الحاجة لها............حاولي أن تتأقلمي مع بيت حماك لأنها فترة وبتمر وحماتك انسانة فهمانة ماشاء الله وبالنسبة لسفرك ممكن أنك تسافري لعند أخوك فترة بسيطة تغبري جو وبعدين أذا أحسستي بانك ضيفة ثقيلة بترجعي ..........ربنا ييسر أمرك

 

[لعيونه آحيآ]

اشوف انو مافي حل غير انك تقنعين زوجك بشقه مفروشه ..

الناس ماعاد تتحمل خصوصآ اذا كان فيه اطفال ..

والله يعينك ..

 

[الجده الصغيره]

استخيري وربي ييسر امرك لما فيه خير....وامسكي نفسك شوي قدام خالتك...

 

[ام نايف2009]

اليوم الاوضاع كويسه وهاديه ومطمئنه
مافي قصف والجو كويس
ومتصافين للآخر
وعاد انا ابغى اطلع من البيت قدام يصير شئ
لاني فعلا يبان في وجهي المضايقه من الصراخ
انا عادي تضربه ماعندي مشكله مابزعل
بس لايجي عندي يبكي لاني انا بضربه ​