اختــــــــــي الشماليه تقول ملت من خطيبهـــــــا ... هذا و هي لسه مالجـــه !!!!

[فاطمه محمد]

السلام عليكم ورحمه الله و بركاته



خواتي اليوم انا ابغي نصيحتكن لأختـــــــــي و الله يحقق امنيه كل وحده بترد و لها دعوة من القلب ان شاء الله


خواتي السالفه ان اختي طبعا مالجـــــــه مملوك عليها من سنـــــــه ... وهي عمرها تقريبا 22 و ريلها اكبر منها بسنتين ..




أختـــــــــــي شماليـــــه غربيه .. وزوجها جنـــوبي شرقـــــــــــي




و امس كانت يالسه تصارحني و تكلمني بصراحـــــــه ... طلبت نصيحه





السالفه انها و الحمدلله تكلم زوجها و هو يكلمها و متواصلين مع بعض من سنـــــه كااامله طبعا نادر تطلع مع زوجها لكـــــــــنها تكلمه كل يوم و هو الي يتصل بها و هي بعد تتصل فيه ...


تقول لي انا مليت ... مادري ليش ما ابغي اكلمه ... مع انه طيب و زين معاها و لا عمره شتمها ... لكنها تقول كشعور انا مليت منه و من سوالفنا اشوفها متكرره و مملـــــــــــه ...


ابغي اتنفـــــــــس ...


اريــــــــد ابتعـــــد عنه فتـــــره << يعني فتره بسيطه اشوف نفسي بس علشان ارتااااااااااااااح شوي من هالروتيـــــــــن الممل ... مليــــــــــت و مب عارفه احس اذا كلمته اكثر ممكن اتخــــــانق معـــــــاه ...


تقول ابغي ابتعد فتره علشان ترتاح نفسيتي و اشتاق له شوي و بعدين برجع اوكي تمام معاه ...



بس مشكله مـــــــــــــا اقدر ابتـــــــعـــد لأنه اذا مارديت عليـــه و طنشته يزعــــــــل و يتضـــايق و تستوي لي مشكــــــله ... !! ويسأل ليه و ليه و ليه و ليه و يعاااتب كثير .. الخ



تقول مره عملتها و ابتعدت يومين ما كنت ارد على مكالماته ... ولا على مسجاته ... بس قام يتصل و يبعث مسجـــــــــات يقول "الحين بانت خفاياج يا فلانه و انا مو لعبه عندج" ويقول " تبغين تقطعين الي بيننا فهميني ليش ما تردين و انتي اكيد ما تبغيني " و كــــــــذا !!!



تقول لما اكلمه أضحك معاه غصب .. انكت ... اغير جو و هو يستانس ... نضحك مع بعض ... نسولف ,, لكـــــــــــن بس خلااااص مليييييييييييييت و العرس طبعا بعده لظروف اجباريه لااااااازم يتأجـــــــــل شهور كثيــــــــــــــــرررررره


هي تبغي تبتعد على الاقل كم يوم ... تقول لااااعت جبدي منه ...



انا نصحتها ان ما يصير تتكلم بهاذي الطريقه عنه بس تقول شو اسوي انا مليت من هالمووال اليومـــــــي ...

ملاحظه تقول و بعد سبب الملل ان اغلب كلامه الكلام العادي الي تسمعه اي خطيبه من خطيبها " مثل كلمه رومنسيه يعيـــد فيها مليون مره و انا أسايره طبعا يوميا على هالحال ,, احس يخسر رصيده على الفاضي "


حلو ان الرجل يقول كلام حلو و رومنسي لكن عاد مش كل المكالمه !!





-------------------------------------


مادري اذا هالشي الي بقوله له صله او لاء لكن بيني وبينكم اختي كانت في البدايه تشوف طموحها اكبر من هذا الولد تبي زوج مستواه احسن واعلى .. و لكـــــــــن بعدين اقتنعت فيه لأنها تخاف تتزوج واحد وراه بلاوي و تتعب معاه و رضت بهذا وخذته و الحين تقول انا احبه و كذا ...




رجااااء اعطووونا آرائكم ... :blush-anim-cl::blush-anim-cl:

و ادري فيكم ما تقصرون

 

[smy]

الله يعينها وويوفقها

اعذرين اختي ماعندي خبره بهاالمواضيع

 

[بنوته كلها حزن]

حبوبه مو سالفه ملل ماكو احد يمل من زوجه او خطيبه

يمكن اهي لي الحين مو مقتنعه فيه ولا حبيته اذا الحين ملت شلون بعدين

لاتعذب الريال معاها اذا ماتبيه خلاص خل تقوله ولا جذي من البدايه ملت

ترى زواج واذا الحين ملت تتركه قبل لاتتزوج وتتركه الحين احسن

 

[um_rqawy]

انا من راايي انه تقووله بطريقه حلوه خل نبتعد عن بعض اشوي خل نشتااق البعض وتسويهاا كاانه تمزح ويااه تقووله اشراايك مانكلم بعض اسبوع اللي يدق ع الثااني اهو اللي خسرران خخ الله يهدي اختج

 

[حصه الخالدي]

ملت منه وهي لسه مكالمات مو كل يوم يشوفون بعض!! بصراحه من الحين اذا ماتبيه تتركه تراه زواج كل العمر مو لعب

وخليها تبتعد كم يوم ماتسمع صوته عالاقل اسبوع وتشوف

الله يختار الصالح لهم​

 

[قطـــــريه]

اختي توهم عالبر وتبي ترتاح منه كم يوم ؟؟؟ اعيال الناس مو لعبة ! لا تخليه يتعود منها عالجفا لانها بتندم بعدين .. طيب انا ريلي فديته يطلع من البيت يكلمني بالجوال لين يوصل شغله .. وهو في الشغل يدق علي وهو طالع يدق علي تخيلوا الوضع بس في عقل .. صج مرات اتملل بس اقول عالاقل يدق ويسولف معناته يحب يسولف معاي وهاي يسعدني .. ممكن تقوله يوم الجمعه لا تدق عشان هلي عندنا او خواتي او اي حد وبتتعب نفسيا لو مادق عليها بتشوف البنات كلهم جوالاتهم ترن الا هي ساكت بتتحطم .. من رايي تعلمينها درس وتتفقين مع حد من اخوانج يتفق مع ريلها انه مايدق عليها ثلاث ايام ولا يدز مسجات وشوفي اي حجة لهالشي مثلا قولي يقولها عقب انه غاب عشان تلفونه مثلا انمسحت الأرقام منه .. انباق منه الخط أ, اي عذر ثاني وصدقيني بتعرف قيمته هني لمن يحقرها ومايرد عليها ولا تقولون لها انه مقلب لان اختج من النوع القاسي ممكن تاخذه حجه وتسويها له عذر وتتهاوش وماترد على جوالاته عقب ..

 

[كلي غنج~]

تتحمله اشووووي والله يسااعد قلبها ...

انا لو انا مكانها >>اقتررح بس
انها ترد ع مكالماته "علي انه جنوبي زوجها " بيعصب و يعاتب اذا ماردت عليه " كما تفضلتي وقلتي انه يعاتب كثير..

فقتراحي "انها ترد عليه بس ما تطوول المكاالمه تخفف مكالمات قدر ماتقدر ...
مره اشوي واكلمك ..
ومره الوالد يناديني..
ومره عندي بنات "عزيمه..
ومره مشغوله ...
ولاترد بسرعه...
بس تنتبه لا تغير اسلوووبها بالكلام ...لان الجنوبي مرره حساااس ...
وشكرا ,,
اتمني اني اكون افدتك..

 

[فاطمه محمد]

حبوبه مو سالفه ملل ماكو احد يمل من زوجه او خطيبه

يمكن اهي لي الحين مو مقتنعه فيه ولا حبيته اذا الحين ملت شلون بعدين

لاتعذب الريال معاها اذا ماتبيه خلاص خل تقوله ولا جذي من البدايه ملت

ترى زواج واذا الحين ملت تتركه قبل لاتتزوج وتتركه الحين احسن

طيب تقول انتي تخيلي نفسج تكلمين خطيبج سنــــــــه كامله .. و يوميا


السوالف راح تخلص و غصب عليج بتملين منه ولوشوي !! ..

 

[يحق لك]

الحمد لله رب العالمين

 

[توما]

الصراحه الشماليه تكره نفسها حتى من هالروتين!

الشمالية ماتحب الرووووووووتييين ابدا

والجنوبي روتيني وما يخلق جو صراحه :tears:

مادري شقولك ان شاء الله تستفيدي من كلام البنات الاخريات

كلام اخت كلي غتج واايد حلوو وينفع

 

[ملاك 88]

مرررررررررررررررررحبا...
هلا والله ......
اختج تحبة وتبغية ..هي أصلا ماملت منة هي ملت من كثر تتكلم ف تلفون بس مجرد كلام ..
يعني خللللللللللللاص ماعندها صبر بس كم وكم وكم بتسولف وبتضحك وشتقول ..تبغي الحل انة تتزوج تبغي تستقر تبغي شي حقيقي هي جنبة ..
كل واحد يمل وكل واحد مايقدر يتحمل ..
انا نفس شي لما كنت مالجة سنه كااااااااااااااااملة .
مليت جبدي لاعت ..والله وااااااايد اضارب بس عشان ابتعد عنة اسوي عمري زعلانه عشان اسكر ..
استغفرة الله دوووووووووم اجذب علية اقولة بسير اسبح ههه بسير السوق بسير ايلس عند اهلي كل هذا عشان اتهرب ..كل واحد يمل .
الله يعينها ..سبحان الله لما بتحدد العرس كل شي راح يصير حلو وبتستانس وبتنسى ...
هاي سنه الحيااااة ..
هي اختج مزاجية ماتحب الروتين وايد ...
الله يكووووووون بعونها..
بس تتحمل لاتخبره انها ملت ولااتحسسه ف اي شي ....
حررررررام هو ماله ذنب ...
المفروض خل أتششجعه وتترس راسة افكار حلوه شو بصير لما بنزوجج خل اتحمسة تخلي يتحرقص ..عشان لو الزمن مايسمح اللحينة يسوي العرس ..
راح يسوي المستحيل عشان يقرب العرس خل اتجرب ها التجربة ..دووم اتحمسة عشان يتحرك اشوي يسوي شي مب بس سااااااااااكت بارد ..

 

[عبـ الشهادةــق]

السلام عليكم
بكون صريحة معاكِ شوي يالغلا



ما تمر فيه أعتبره نتيجة طبيعية لطول فترة الملكة
وأيضا كون زوجها على ما يبدو شرقي جنوبي
لأن هذا النمط هو الروتيني في الأغلب
أماطول فترة الملكة فهذه مصيبة أخرى تؤدي الى ما وصلت اليه أختك ولكن
قولي لأختك ما هكذا يا سعد تورد الإبل
فهي تمر الآن بما يسمى تشبع عاطفي من هذه المرحلة
واتوقع اختك شمالية غربية
تبي علاء الدين الي كل يوم يدخل معاها في مغامرة جديدة:detective2:
ماذا تريد أكثر من ذلك ؟؟؟
شاب في سنها
تعيش معه قصة حب ترضي الله ورسوله
يحترمها
يقدرها
يسمعها كلمة حب
الكثير من الفتيات تتمنى الحصول عليها ولو من طريق الحرام
يتصل بها ويسأل عنها
شخص يفكر فيك كلما فكر في نفسه ومستقبله
ويتمنى الالتقاء بك متى مايسر الله له ذلك
كل هذا النعم وتمل منها؟؟
حقا إن التعود على النعم يفقدنا الاحساس بها
غاليتي
كلمة واسمعيها مني
تخيلي أنك في يوم وليلة فقدتي كل هذا بأي طريقة كانت
ما هو شعورك
الفرح
إذن اتركيه لمن تسعده وتعرف قدره حقا
أما إن كان الآخر وهو الأغلب على ظني
فاحمدي الله
واقرأي وتعلمي
واسعدي زوجك واسعدي
واعلمي يالغالية أن الحياة الزوجية لا تخلو من الملل والفتور كذلك
والانسان ما خلق إلا في كبد ومعاناة
ولكن الذكي من يقتنص فرص السعادة ويحيى بها ولو كانت تحت أسوار الشقاء
ومن غير المعقول أن تعيشي معه فترة ثم تطلبين أجازة زوجية
الزوجة الناجحة هي التي ترك بصمتها في حياة زوجها بحيث لا يستغني عن وجودها إلا نادرا وإذا اضطر لذلك
أما إذا كثرت الإجازات الزوجية فلا شك أن هناك اخرى تسد الفراغ
وفقني الله وإياكِ لما يحب ويرضى


ملاحظة
أنا زوجي شرقي جنوبي وأنا شمالية غربية
ولا أخقيك أن المكالمات مع هذا النمط نوعا ما ممله
ولكن الحياة معهم غيررررر
أتمنى أن لا تخسره بكلمة تجرحه فهو من النوع الحساس جدا ولا ينسى
تحياتي
:icon26::icon26::icon26:​

 

[*جوانا*]

طبيعي هذا الملل أنا سمعت من كذا إستشاري إن طول فترة الملكة مو حلوة وكذا واحدة مثلها عندها نفس المشكلة
الله يعينها تصبر إيش تسوي ما دام هو طيب وإبن حلال ليش تتركة
الله يسهلها وتتزوج اليوم قبل بكرة

 

[فاطمه محمد]

و الله صدقتن .. صاااااااادقااات بكل كلمه ...

هي ملانه من المكالمات و في من البنات الله يهديهن يعتبرون انها تلعب على الولد و يقولون كلام صعب بدون ما يفهمون السبب الرئيسي لمللها وهو طول الملكه و المكالمات الروتينيه !!


و اتصدقين يا ملاك88 انها تسوي مثلج ... تتهرب منه بأي طريــــــــــقه بس هو يزعل ويتضايق و يتصل بها دوم ..


شكرااااا

 

[مدري شسوي]

الله يعينها وويوفقها