أين مكان طفلك في قلبك.؟

[هدأة الغسق]

مافي ام ماتفرح بمولودها وتحبه وتموت فيه وتحلم به في الليل وتخاف عليه وتبوس فيه لحد ما تطلعله حرارة في وجهه الصغير.......صح ؟؟؟؟؟؟

ولما يبدأ يكبر الصغير وتزيد مسؤوليات الام يقوم الصغير يقابلها بالبكا والصراخ والقرف طول وقته وما تصدق الام متى ينام عشان تأخد نفس.

وكل ما كبر زاد قرفه ولما يبدأ يتكلم يقعد يسأل اسئلة كتير مملة ويكررها مرات ومرات لحد ما يقرف الام.

ويكبر كمان ويبدأ يتعلم على الحمام ويوسخ البيت والام تدور وراه تمسح وتغسل بلاويه ويجي زوجها يعصب ويقول ريحة البيت معفنة وكل البيت اتنجس ..قومي شيكلي ولدك دا عن خلقتي .

ويكبر الطفل كمان ويروح المدرسة وكل يوم يتضارب مع احد وكل اسبوع تتصل المدرسة على البيت يشتكو من طفلها .

في كل دي الاحوال اليي تمر على الام يبدأ حبها لطفلها يقل ويقل لحد ما يوصل انه يموت زي الغرسة الصغيرة اليي تجف وتموت...خاصة اذا كان الطفل واحد بين عدة اطفال لنفس الام ....تكون الام دايما مضغوطة ومشغولة بين طبخ وغسيل وكوي وتنضيف .....ويجي الطفل ببلاويه يزيد توتر الام ويخليها تكره نفسها كمان....دحين لاتقولو ايش هده الحرمة من فين جايبة هدا الكلام في ناس كدا؟
ايوة فيه وهدا الواقع واذا كنا غافلين عنه تعالو كل وحدة تسأل نفسها: كم مرة تقبلي طفلك في اليوم ....؟
انا اقولكم عدد المرات يقل حسب عمر الطفل.....يعني المولود الجديد يمكن خمسين مرة
وابو السنتين عشرة مرات ....والتلاتة خمسة مرات .....على كدا ....يعني عمر الطفل يتناسب تناسب عكسي مع عدد القبلات في اليوم الواحد...
نجي نشوف الطفل اليي عمره عشرة سنين ؟؟؟؟؟؟؟
هدا نفتكره في الاعياد....اذا افتكرناه.....مو صح؟

طيب بعد المقدمة الطويلة العريضة هده....اليي ذكرت فيها اسباب موت الحب في قلب الام....اقولكم تجربتي...
زي اي ام مشغولة في حياتها.....بدا حب ابني الكبير يقل في قلبي خاصة انه مشكلجي ومغلبني....ولا يجي يتلصق في ويبوس في زي اخته اليي تفرض حبها علي.
طبعا قعدت مع نفسي وقلت مو معقول انا لمتى راح اتجاهل الولد ؟ راح يجي علي يوم ما اضم ولدي ولا اسلم عيله الا في العيد
وجلست لوحدي على سريري وعيني على السقف وانا تذكر شكله وهو مولود وقد ايش فرحت به وحبيته ......وشريط الذكريات يمر قدامي ...فعلا اشتقت لنفس الطفل اليي جاني في المستشفى وحبيته ..اشتقت ليده الصغيرة ..لنظرة عينه لقدمه الصغيرة ...لوجهه الناعم ..لشعره القليل..
رحت غرفته وهو نايم ....(نصيحة اذا سويتي تجربتي لاتروحي لطفلك وهو صاحي عشان لايجيك احباط) لقيت الطفل اليي اشتقت له ينتظرني
طبعا خلاص حسيت اني لازم ارجع لعهدي مع ابني زي ما كان وهو رضيع.

كمان امس وهو رايح المدرسة وانا زي العادة واقفة عند الباب اشوفه وهو يركب السيارة اشار بيده مع السلامة واتبسم .....مرة حنيت عليه.

ودايما اقوله اني احبك وانتظر منك انك تبادلي نفس الاحساس ....لانه من باب (اذا كان حبيبك عسل) يعني مخزوني راح يفضى اذا كنت اعطي بس من غير ما اخد....وضربت مثال بسيط عشان يفهمه انه اذا عبيت علبة بسكوت وجلست اخد منها من غير ما اعبيها تاني راح تفضى!!!!.

اتمنى اني اكون نفعت .....​

 

[فراشه]

اذا عبيت علبة بسكوت وجلست اخد منها من غير ما اعبيها تاني راح تفضى!!!!.

عجبني المثل.. شكلي باقوله لولدي بس ما أدري بيفهمه ولا لأ..

أنا حالتي مثل حالتك بالضبط.. ولدي كنت أحبه موت، صح إني قاسية عليه شويه وهو صغير بس كنت أحس

ما في أم تحب عيالها مثلي (غرور)

بس الحين يمكن وصل الحب عندي قريب الصفر (عمر الولد 4 سنوات بس)

أولاً بسبب الاكتئاب اللي عندي..

ثانياً ضيقي من إهمال أبوه لي وله واني دايماً محبوسة في البيت..

ثالثاً هو مشكلجي ومزعج وإزعاجه يزيد كل يوم..

صرت ما أطيقه زيادة وزيادة.. وكل ما أفكر بيني وبين نفسي إنه ما يستاهل واني قاسية وايد عليه واني

لازم أتغير وأحن عليه أكثر.. من أول مشكلة يسويها أرجع أسوأ مما كان..

فكيف الحل؟ أخاف تنقطع العلاقة بيني وبينه ونصير مثل الأغراب في بيت واحد..

إذا عندك نصيحة لا تبخلين بها علي..

 

[بسمة]

وأضم صوتي لكم

وحتي انا من كثر حبي لهم احسن انه قل من قبل

اعتقد لان الحبسه في البيت والتواجد الدائم للطفل امام عيني هي السبب

ورغم محاولاتي الدائمه لهم بالتجديد مايتغير منهم شيئ ازعاج وعناد وملل وغير وصاخة البيت

وخاصه ان ماعندي شغاله تعيني علي شغل البيت على الأقل احس اني بنفجر وان الصبر خلص

بس الحمد لله ان حبي لهم مانقص لا بس الصبر هو اللي نقص مني

الله يخليهم لنا

والله يعينج يافراشه وتلقين الحل

لان مشكلتي مثل مشكلتج هو التواجد في البيت وعدم الأهتمام من الزوج