أنا غلطانه ولالا

[أستغفررالله]

بنات السلام عليكم ورحمة الله وبركاته

بنات انا كنت عند أهل زوجي الخميس وكان ولدي الي عمره 5 سنوات يلعب قام أخذ كبيوتر


أخو زوجي الي هو عمه ورماه علا الأرض طبعن أخو زوجي عمره 19 قام يابنات طقه طق الله

لايوريكم جاء ولدي يصيح قلت وشفيك قال عمي ظربني وقال إسمه يوم فتشت علا ظهر

ظربات يده أنا ماتحملت قمت ورحت هاوشت أخو زوجي وجلس يتكلم علي وبدأيغلط

قمت علمت زوجي ونا مقهور جاء زوجي وظرب أخوه وكل واحد يظرب الثاني لي فكتهم

خالتي وقامت خالتي وقالت روحو البيتكم ولاعاد تجون ومدري وكلام فاظي وقالت لزوجي


لاتكلم علي وإلا أخرررره ولو تشوفون حريم أخوانه الثانيات جالسات فشله وطردتني وهم

ينااات وش الحل زوجي مايتكلم وخوه متهاوش معه وخالتي ماتكلمني تكفووون وش الحل

الله يدخل الي ترد جنااااات الفردوس ومايرحمها جناته ويخليلها زوجها ويطول بعمره ومايشوف غيرها


أسفه علا الإطاله:8:

 

[كلي فداك يابوي]

صراحه انتي غلطانه المفروض تسكتين حتى لو ضربه مكان لازم تقولي لزوجك وتسببي مشكله وكره بين الخوان موصاير شي لولدك يبكي ويسكت حاولي تصلحي بينهم والله يهديك ويهديهم

 

[أأأنااا]

استحملي الله يجزاك خير , وتراك غلطتي إنك خبرتي زوجك , الموضوع ما يستاهل تكبرونه لأن أخو زوجك يعتبر مراهق و لا يقدر اللي سواه , لكن بتصرفك كبرت المشكلة و زادت , الله يصلح ما بينكم , و إن شاء الله أزمة و تعدي لأن حتى خالتك و زوجك مالهم غنات عن بعض أهم شي إنت حاولي تصلحين الموضوع بحكمة .

 

[دلع قلبه]

الله يهديك اخو زوجك مراهق
ماكان فيه داعي لضرب وتدخلين زوجك بالموضوع
كان ناديتي خالتك وقلتي لها عشان تنتبه لولدك مره ثانيه مايروح لعمه يخرب عليه ويضربه
لان ضربك ماجاب نتيجه !!يعني هل ولدك بتطيب الضربات اللي فيه!!
مايتعالج الخطأ بخطأ اخر
جبتي لنفسك مشاكل انتي في غنى عنها لو تغاضيتي
المضاربات تصير بكل عائله حتى بين عيالكم بكرا اذا صارو مراهقين بتشوفين مذابح
لكن عادي مرحله يمر فيها كل مراهق
اعرف اخوان يكسرون نظارات بعض لا تقولين اخوان عادي حتى هذا عم ولدك
ماتدرين بكرا يمكن ماينفع ولدك الا عمه هذا
ولدك صغير بينسى وبكرا بتلقينه يلعب مع عمه ولا كأن صار شي
لكن انتي وزوجك وخالتك وسلفاتك بيجلسون طول عمرهم يتكلمون ويحرجونك
الحياة تحتاج ضبط اعصاب وتفكير قبل الاقدام على القرار
صحيح شي يقهر ولدك ينضرب لكن طفل وتصير كثير بكل عائله..
حاولي تكلمين خالتك وتبينين انك غصب انقهرتي ومايهون عليكم العيش والملح اللي بينكم
وهدي زوجك وخليه يتصالح مع اخوه
ولدكم طفل بيكبر وينسى لكن حرام تسببون قطيعه عشان موقف مثل هذا
عوائل ينذبح لهم عيال ومع هذا يتغاضون ويسامحون مو طفل ومراهق تكافخو مصير قصتهم النسيان..

 

[مذوبه الورد]

الله يهديكي ياااحيااتي يعني هوو عمه يمكن ولدك غلط
ولا قااال شي وعمه ماتحمل المفروض انتي قلتي هاذا عمك ظربك اكيد سوويت غلط حتى لوو ماسووى شي بس عشاان عمه يعرف ان انتي تثقين فيه انه مستحيل يظربه بدون سبب

واللحين انتي بتصرفكي سوويتي حساسيه بين الكل

خلي زوجك يمشي الموضوع عااادي وانتي بعد

 

[سعوديه خطيره]

معليش عزيزتي انتي كبرتيها ترى هذا مراهق اشوف اخوي اللي كبره
حاط دوبه بالبزران بس ماله داعي تكبرينها شوفي الحين وصلت الكبارين والمفروض
مشاكل البزران ماتكبر لازم تعتذرين منهم حتى اخو زوجك عشان مايصير بخاطره شي عليك

 

[أموووله الحلووه]

انتي الغلطانه خير ياطير واذا ضربه ما كان المفروووض تروحي تهاوشي اخوووه بعدين هو كبير وشي طبيعي بيحس بالاهانه اذا زوجة اخوه ماده لسانها عليه
واذا ع ولدك بزر يبكي شوي وينسى ما صار شي ولا بلغي ابوه بهداوه انه بس ينبه عليه لا يضربه مررره ثانيه مو تقومي وتهاوشي وتسببي مشكله من لا شي

شي طبيعي الام بتقول كذا لانك سببتي بقطيعه بينهم علشان طفل انطق وشوي ينسى ويروح يلعب

الله يهديك اختي حاولي تصلي الامور بينهم والله يصلح الحااااال

 

[اميره حكي]

يااختي قال الله تعالى (قل لعبادي يقولو التي هي احسن ان الشيطان ينزغ

بينهم)لماذا تعجلتي الغضب الطفل يزعل ويرضى وعمه محل ابوه الله يهديك

المهم استسمحي خالتك ورضيها ورضي اخو زوجك عيب حمولتك يزعلون

مكانتهم من مكانة زوجك اهديهم وشوفي احد يمون عليهم يكلمهم ابد

لاتسكتين زوجك يمسكها عليكي بكره الرجال مالهم امان

الله يصلح بينكم يارب

 

[حلا ماركه]

الله يهديك كبرتي الموضوع
ولدك غلط وعمه غلط بس المفروض ماتتهاوشين مع عمه
وتكبر السالفه وتوصل لضرب بين الاخوان
كان سكتي لين تروحين للبيت وكلمتي زوجك وعلمتيه بالقصه وانه يتكلم مع اخوه بالسياسه انه مايمد يده علي الصغير بالضرب المبرح والكمبيوتر يصلحه هومهيب نهايه العالم

 

[مزوح وتروح]

الله يهديك كان ماعلمتي زوجك طالما انتي تصرفتي من عندك وهزأتي حماك
مع انو عيب اللي سويتيه وحماك مو صغير عشان تغلطين عليه !! كان سكتي وتحملتي لحد ما يجي زوجك وهو يتصرف مع اخوه أو كلمي خالتك وعلميها أيش سوى ولدها مع ولدك !! عجبك المشكله اللي صارت بين الاخوان
ولا تلومين خالتك شكل هذا ولدها الصغير وزي مانتي انحمقتي على ولدك هي كمان محموقه منك ومن زوجك اللي ضرب اخوه !!
لعلمك انا ماقلت الكلام هذا من فراغ والله ان حماي احيانا يضرب ولدي ويهاوشه (( عمه مو مشكله) بس احيانا انقهر خاصة لمن يهاوشه على شي تافه !! صدقيني ما اكلم احد اروح لزوجي واقله اللي صار وافهمه ان ولدي ما حد يضربه الا امه وابوه >> واذا صادق يحبه ويخاف عليه يجي يعلمنا وش سوى الولد وانا اتفاهم معاه بطريقتي لان ولدي مره حساس ومو احد يعرف يتعامل معاه !!
زوجي يهدي الموقف ويقوله هذا عمه وزي ابوه قلت ما اختلفنا بس يعلمه بالحكمه مايضربه وما اسمح لأي أحد يمد يده عليه
حتى أخواني اللي هما أخواله ما أرضى منهم أحد يضربه !!

 

[انا من السعودية]

الله يهديكم وييسر اموركم ومعليش انتي غلطانه بس ادعي ان الله يصلح شأنكم

 

[اسيرة المحبه]

اختي الفاضله :
صراحه غلطتي يوم خانقت الرجال وقلتي لزوجك مباشره
والولد 5سنين المفروض يعرف الصح من الخطا
واخوا زوجك غلط بس ماكان لازم نعالج الخطا بالخطا
لازم تروحين تعتذرين لاخوا زوجك وامه وبسطي الامور يابنت الحلال ولاتكون بداية لقطيعة رحم
انا زوجي الكبير في اهله وكان الوحيد المتزوج من العيال وكان ولدي عمره ثلاث سنوات وهادي بطبعه وجالس عندي مايتحرك وكنا في زيارة لهم وكانن بناتهم وعيالهن موجودين سووا ضجه بالبيت وانحاشوا للحوش وجاء ابو زوجي وماشاف الاولدي جالس عندي صار يلعن ويشتم ويتهدد باعلى صوته ودعاوي ياساتر تهز الارض هز وبصوت عالي جدا اتوقع الجيران سمعوا اقوله ولدي عندي ماتحرك بس مافي فايده
وكان يبي يضربه بعصا بس كان توه متعافي من الجلطه وبصعوبه يمشي
الله يرحمه ويسامحه
انا سكت وحاولت اني اخفي دموعي وبعد ماخلص اخذت ولدي وروحت لبيتي
صحيح تضايقت بس ماقطعتهم اروح لهم
وبعدها بايام خبرت زوجي بعد ماهديت ولااحتريت انه يقول شي وفعلا ماقال اي شي
بس صارت روحات عيالي تخف لهم
لانه اول زوجي يخليهم يروحون من يصحون من نومهم الى وقت النوم في اغلب وقتهم غصبن عني واذا احد وسخ او طرش اتصلوا تعالي غسلي وكان يحسب اهله مستانسين
لكن بهالموقف هذا ومواقف ثانيه شافها هو بنفسه صار بعدها مايوديهم دايم علشان مايزعج اهله والحمد لله على كل حال

الله يعين على هالدنيا اذا ماجاريناها تعذبنا
واخيرا لاتزعلين مني والله اني ناصحه لك

 

[دمعة الغيمه]

فعلا انتي غلطتي يوم رحتي تهاوشين اخو رجلك بعدين هو كبير ليش تروحين له عيييييييب
والعيب الكبير تعلمين اخوه ويتضاربون من حق خالتك تزعل عليك والله غلطتي واعتذري لخالتك واخو زوجك
وكل الاولاد ينضربون صحيح حزة في نفسك بس كان كتمتيها بصدرك والا خبرتي خالتك اذا مايرضيها بتهاوش
ولدها بعد ماتروحون

 

[حناااان الكون]

الله يصلحك انتي غلطانه مفروض لما العم ضرب ولدك مافي داعي تروحين تكلمين العم , تراه مب بزر ولا بطفل ولا انتي امه والا اخته الكبيرة انتي زوجة اخوه وحيا الله .... عم وضرب ولد اخوه خير يا طير لو ضربه ع خطأ من حقك تزعلين لكن ولدك غلطان كم عمره 5 سنوات صح صغير بس مفروض يكون هادي في بيوت الناس

بعدين وش استفدتي يومن علمتي زوجك تضارب مع اخوه وعملتي بينهم فجوه وفرجتي اللي يسوى وما يسوى بالاخير انكرشتي انتي وزوجك وولدك قدام سلفاتك

لا هدأ زوجك كلميه بهدوء وفهميه ان الشيطان دخل بينكم ومنتي حابه الموضوع يكبر ويصير في فجوة اكبر ويوم اتفقي مع زوجك جهزي قهوتك وحلاك وروحي لام زوجك انتي وزوجك وولدك وحبوا ع راسها واستسمحوها وخذوا لها هدية تطيب خاطرها وبرضوا خذوا لحماك شي يطيب خاطره وخلي زوجك يجلس معه ويكلمه مافيها شي لو اعتذر له لان زوجك غلطان مفروض ما يمد يده ع اخوه هذا اخوه دمه ولحمه وماهو بزر عشان يضربه ولا قدام حريم اخوانه يعني الكل مجتمع وينضرب صعبه جدآ ... خلي زوجك يعزم حماك ع كافي والله يصفي القلوب ................ بس لا تطولون انهوا الموضوع عاجل ومهما كانت الصدود تحملوا هذا نتيجة تعجلكم الله يصلح الحال يارب​

 

[*ملكة الحب*]

كبرتي السالفه وجت على راسك

الولد وابوه مردهم لأهلهم ومهما يكون عيالهم ماراح يشيلون عليهم

بس انت تحملي اللي بيجيك

 

[دلة قهوه]

امبيه والله فشله الله يعينج على الموقف اللي حطيتي نفسج فيه سوي مثل ماقالوا البنات روحي واستسمحي من عمتج وخلي زوجج ينادي اخوه عندكم في البيت وتصالحو والله يهدي النفوس وان شاء الله مع الوقت بينسون

 

[الزوجه الاولى]

انا مع الاخوات كلامهم صح

 

[سماي الامل]

الله يعينك حاولي تهدي زوجك وتخليه ما يشيل في قلبه على اخوة مهما كان هو اخوة و مصيره يحتاجه

والله يعدي المشكله على خير

 

[من يفهمني؟]

أختي الحبيبة أنت تقولين..( ولدي الي عمره 5 سنوات يلعب قام أخذ كمبيوتر


أخو زوجي الي هو عمه ورماه علا الأرض) ولدك غلط غلط كبيييييييير ياخذ لاب توب ويرميه على الأرض أكيد عمه بيضربه حبيبتي الاب توب ماهو بمية أو ميتين هو بالآلاف ومن حق عمه أنه يضربه ويعصب .. وإذا عندك أن قيمة الاب توب عادية عطي عمه قيمة لاب توبه.. الولد غلط ويتحمل اللي جااااااااااه..

 

[ايام غربه]

غلطااااااااانه المفروض يوم جاك ولدك قلتي له ضربك لانك غلطان وليه تطيح جهاز عمك ولدك يفهم مو صغير
وبعدين رحتى قلتي لخالتك بينك وبينها انها تنبه على ولدها مايضربه مو تروحين وتكلمين على رجال وتاخذين وتعطين معه وتجيبين لنفسك الكلام الله يهديك خلي زوجك يروح يوعتذر لامه اكيد بتزعل هذاك برضو ولدها وانتي غلطتي بعد​