أشعر بالموت البطيئ بعد فراق زوجي.. يارب ارحم ضعفي

الحالة
مغلق و غير مفتوح للمزيد من الردود.
سيوف الحب

سيوف الحب

New member
إنضم
2010/11/03
المشاركات
35
السلام عليكم ورحمة الله وبركاته

في الحقيقه انا تعبت من الفراق,, واشعر بنهاية الدنيا.. وكأنني اراها ظلاما حالك لاتستحق الضحك ولا السعاده
ذهب عني,, وتركني وحيده,, لا اعلم ما مصابه؟؟

أيام الخطوبه كان يراني فتنة تمشي على الارض,, وكانت غيرته علي مميته قاتله
لدرجة انه منعني من المكياج والعدسات واللبس الفاتن
كان لايذهب ولا يتصرف حتى يأخذ برأيي
كنت معه امشي فوق السحاااب
وكان لاينام الا بعدما يأتي عند باب اهلي ويأخذ مني قبلات,, ويقول لي أدمنتها

بعد الزواج...... استمر حالنا لمدة اربعة اشهر
اصبح يتغير شيئا فشيئا
جمالي ماصار يشوفه، لاقالوا الناس قدامه والله طالعه حلوه اليوم يقول اي والله تصدقين نبهوني، اثاريك حلوه وانا مدري؟؟
 كلام اقاربه طيــن عيشتي
انت لاتخرج ,, اتحسب نفسك مازلت عريسا جديدا
انت لاتملك القرار هي من يتحكم فيك ويقرر عنك
انت لاتستطيع اجبارها على من تريد وهي عكسك تماما تجبرك على اهلها واحبابها
انت مقاده,,انت مالك شخصيه,, انت مدلعها,,وووووووووووووووو
لما انهبل الرجال علي
وصرت لاقلت شي يقولي انتي تبين تتحكمين فيني؟
احيانا يسوي مواقف تستدعي الغيره مثل انه يسلم على حريم خواله ويبوس زوجة عمه ويبوس بناتها واعمارهن من 16 وفوق يعني صبايا وكبار والمفروض يتغشون عنه
عارفين كيف تكون ردة الفعل؟؟
يهب فيني
انتي تبين تسيطرين علي
انتي تخنقيني باسم الحب
انتي انانيه تبيني لكي لحالك
وكل هذا باسم الحب
ياشيخه حرام عليك لاتسووين اشياء وتقولين باسم الحب؟
صار حتى الغيره يشوفها سيطره ولا بعد باسم الحب
ظلت حياتي جحيم, يكلم بنات بالنت وبالجوال
ويجلس مع بنات خواله وعمامه
ويسولف معاهم ويطلعهم معاه بالسياره ويتمشون
ويتكلم مع بنات مايقربونه ويخلص اشغالهم ويوديهم ويجيبهم لانهم يصيرون بنات اخ مرة عمه
وانا وين رحت؟؟
لما اطلبه حاجه ينفر مني
لما اترجاه اروح السوق يقول روحي مع السواق
اسأله طيب ليش غيري تسوي لهم وانا آخر شخص تفكر فيه؟؟
ليش حاجاتي ماتهتم فيها,, عاملني مثل ماتعامل غيري
كنهم زوجاتك وانا الغريبه؟؟
ليش؟
حملت منه وولدت وطول فترة النفاس مشاكل
تغير زياده بفترة النفاس
وصار ع الطالعه والنازله انتي تكرهين اهلي
انتي ماتحبين خواتي
انتي ماتحبين قرايبي
انتي انتي انتي
ومشكلته الوحيده انه يسمع كلام اي شخص
يسمع التحريش والتحريض
والمشكله الاكبر
كل اسرار حياتنا الزوجيه طالعه عند اهله وخواله وعمامه
يعني ما احس معاه بالخصوصيه
اخاف ابوح له باسرار
اخاف اخذ راحتي معاه بالسوالف باللبس وحتى بالفراش
لانه ثاني يوم يقول والله عملنا وسوينا وقالت وعملت
حياتي احسها مفضوحه
مافيها اسرار
والفتره الاخيره صاير بس يتكلم بالطلاق ويقولي انتي لحد اليوم تفكرين بالرومانسيه؟؟
انا مقدر اعيش معاك
وانا خلاص عفتك
لما جرح كرامتي وطلعت من البيت

وللأسف اني عند اهلي صار لي شهرين
ولا سأل لافيني ولا بالولد اللي معاي
اهله قاطعوني وخواته حذفوني من ايميلاتهم ومن المنتديات حقتهم
وهو كمان حذفني من ايميله
وفصل عني رقم جوالي
وقطع عني حتى المصروف انا والولد
والمشكله الاعظم اني اسمع من الناس اني تطلقت
وكل يوم اسمع الكلمه من الناس اللي يتصلون ويسألون ويقولون سمعنا
أرسلت لأبوه رساله قلت عمي صدق تطلقت؟؟
ولا رد لي جواب
ليش؟؟
مو حرام عليهم اللي يسوونه فيني
مو حرام لما يخربون بيتي
ليش حرموني السعاده
كنا انا وزوجي متفاهمين ليش الحسد والتنكيد والتحريش
ليش الواحد مايتمنى الخير لزوجة الولد
ليش الاهل يحسبون مرة الولد العدو وانهم معاها في ساحة المعركه
واعظم سؤال ليش يسمع كلامهم ويعذبني؟؟
ليش كل ماتذكرت ايام الخطبه ابكي
ليش يقولي والله محد قالك صدقيني بالخطبه؟؟
ليش لليوم احبه؟؟
ليش لليوم اتمنى ارجع له؟؟
ليش ماني قادره اكرهه؟؟
معقوله طيبتي لدرجة الغباء؟
معقوله خلاص ماراح ارجع؟؟

وش الحل؟؟ وش السواة
انا في دواااااامه
ساعدونـــــــــــي مالحل


​
 
عليك بالأستغفار وصلاة الوتر والحي على الله بالدعاء
واقري البقره يوميا وربي يفرج همك
 
ليش ياقلبي هذا كله في قلبك حرام عليك اللي تسويه في نفسك مانتهت الدنيا ولا شي خلاص دام هو مايبغاك بكيفه لاتذلين نفسك عند واحد مايستاهلك انتي دره مكنونه وفرط فيها وهو الخسران تري مصيره يندم ويرجعلك استهدي بالله وقومي صلي لك ركعتين وادعي فيها انو ربي يفرج لك همك ويكتب لك الخير بالعكس البسي واطلعي وانبسطي وفرفشي وانسي معاك ولد بحاجه لك صدقيني الدنيا تافهه وماتستاهل انو نزعل ونتنكد اذا راح بيجيك اللي احسن منو وعسى ان تكرهوا شيئا وهو خيرا لكم لاتزعلي انسي او تناسي وارمي ورى ظهرك ولاتمرضين عشانه وهو مو مفكر فيك والله ليتك عندي كان واسيتك وخففت عنك بس ربي يفرج كربتك وياخذ حقك من اللي غير حياتك ويكتبلك كل خير
 
غاليتي الرجل لايتغير من كلام بنت دانة الخليج الرجل يرجع لحقيقته الاولى والزوجه تقول تغير
فترة الملكه والخطوبه فتره الابتهاج بشي الجديد ولهذا يبدى الرجل برجوع قليل لشخصيته الحقيقيه وتبدى تقول الزوجه تغير تاثر بكلامهم اكيد قالو له عني
وكلها اوهام لكل رجل نمط لايظهر فترة الملكه ابدا
وكمان انتي فيك اغلاط شكلك حنانه حتى لما توضحين غيرتك توضحيها بصراخ والرجل مايحب الاوامر حتى اذا عبرتي عن غيره
عندما تحول اجواء البيت للنكد يهرب الرجل منها وهذا ماحدث عليك بصدقه بنية رجوعكم واستغفري
واذا عدتي غيري طبعك واقفلي بابك على عالمك وحبي اهله لكي يحبك فكل ماشكت الزوجه من اهل زوجها هذى لايقرب الزوج منه بل يبعده فهو راح يسنتغني عنك ولن يستغني عنهم وكل ما احسنتي علاقتك بهم كسبتيه وكسبتيهم
لانك لو انتي كاسبتهم من الاول كان اول من وقف معك في محنتك الان هم وكثير مارجع ىزوج لزوجته بفضل تدخل اهله لانهم احبو زوجته
الان لتاكدي من طلاقك يذهب رجل من عائلتك اليه ويتاكد لان هذا خطاء عدم معرفتك وقضاء عدتك​
 
حبيتي كان الله في عونك ويصبرك على ما ابتلاك
صعبه تجلسين كذا لا مطلقه ولا متزوجه لازم تحسمين الامر وترتاحين نفسيا اكره شي وامرض شي للنفس الانتظار
خلي اهلك يكلمونه او يتواصلون معه مثلا اخوك او ابوك وتعرفين الموضوع
ممكن اشاعه يروجونها اهل زوجك علشان توصل لك ويبعدونك او يكرهونك بزوجك
وان شا الله يرجع لك بس بقولك نصيحه
الحب والرمانسيه والمشاعر الجياشه تبدا تخف وتيرتها مع الوقت يعني اول اشهر الزواج بعدين تخف وتيرة الحب مو يكرهك ممكن يحبك واكثر من اول بحكم العشره بس خلاص تهدا النفوس بعد ما ارتوت وشبعت
ممكن ما يقدر يعبر لك زي اول عن محبته بحكم انه رجل والرجل بي الفعل يبين حبه مو بي الكلام زي الانثى ممكن انتي خنقتيه بي الاسئله والشك بي محبته لك وخلاه ينفر منك الزوج ما يحب الزوجه الحنانه النكديه انا انصدمت بي زواجي كنا بي الساعات كلام الحب ولما تزوجت تفاجاة بي التغير وصرت احس اني مو مرغوب فيني صرت اشحذ منه الكلام واحيانا يطلع بي الغصب مجامله وصار ينفر من الجلسه معي
بس مع الوقت فهمت واستوعبت زوجي وحاولت احتوي شخصيته وتقبلت التغير هذا
اما موضوع الغيره حاولي تهدين شوي ومو كل شي تعلقين عليه الا اذا موضوع كبير جدا لان الغيره تموت الحب واكبر عدو للحياة الزوجيه بعض الاشياء كانك مادريتي عنها مشيها وتذكرى انه رجل ماتقدرين تسيطرين عليه
وانتبهي تتكلمين عن اهله قدامه لانك بيحسك غيور وتكرهينهم لان مهما كان مايرضى وبي اتفه مشكله راح يقول لهم انك قلتي كذا عن فلانه وراح تنشحن النفوس عليك ويكرهونك اهل زوجك لانك منتي بنتهم راح يعذرونك او يسامحونك لان بعض اهل الرجل يتلقطون الزله على مرة الولد
اما موضوع الخصوصيه لازم يحط حد لان اسرار بيتكم ماتطلع خصوصا الخاصه جدا عييب اي رجلشرقي مايحب اسراره تطلع بس غريب زوجك كيف راضي جيبيله احاديث نبويه تحرم ذلك او قصه او لمحي له ان هذي مو حركة رجال خصوصا نقل الاخبار هذي حركات الحريم التافهات او كانك تسولفين عن شخص انه كذا وضحكو عليه الناس تلميح فقط علشان يخلي عنه نقل الاخبار
اتمنى لك السعاده ويلم شملك مع زوجك ويحنن قلبه عليك ويكفيك شر كل من اراد لك الشر
 
ياعمري الله يفرج لك والله انتي معاك حق ومن حق الزوجه تغار على زوجها وحرام عليه يسلم على بنات عمه واخواله لا وبعد يوديهم مشاويرهم وانتي لا والله حرام
وحرام على الناس اللي تخرب بين زوجين يعني اي زوج يجلس او يلبي طلبات زوجته علطول يتهمونه بانه متسلطه وانت مالك كلمه والله حرام بدل ما يصلحون بين زوجين يخربون بينهم خاصه الرجال دايم تعليقاتهم على اصدقائهم انت مطاوعها انت مالك كلمه عاد الرجال اللي ماله شخصيه علطول يتاثر بهالكلام
وين الاقتداء بالرسول مع زوجاته ..الرسول كان ينظف مع عائشه البيت والبيت كله غرفه مو مثل بيوتنا الحين

الله يفرج لك وعليك بقيام الليل وكثرة الاستغفار ودائم قولي حسبي الله ونعم الوكيل على زوجي وعلى كل من خربه عليك والله يعينك ويصبرك
اسال الله العظيم ان يرد لك زوجك ردا جميلا وحسبي الله ونعم الوكيل على كل ظالم
 
قطعتي قلبي ياعمررررررررررررررررررري
بس ليش تقوووليم موووووووووووووت بطي والله حرام عليك انتي عندك ولد انسي الماضي واشغلي نفسك واستغفررري ربك ماتدرين وش الله كاتب لك
ولاتحاوووولين تكلمينهولاتكلمين احد من اهله خليه متى ماجا يجي لاتذلين نفسك له مادام خواته حذفو ايميلك وهو بعد لاتذلين نفسك اكثرررر خلي هو اللي يجي يركض وراك

حاووولي اشغلي نفسك دورري لك وظيفه لو بروضه او حضانه ومنها تاخذين ولدك معك غيررري من نفسك اثبتي له ولاهله والناس انك عايشه فيه او بدووووونه الحياة حلوووه برجل او بدووونه لاتموتين نفسك وترهقين عمرررك وتضيقين صدررك وصدر اهلك على شي مالك يد فيه ولاغلطتي بشي ومصيررررررررررررره راجع لك بس اذا مادورررتي وراه خليه ولو شفتي السالفه طالة خلي احد من اخوانك او ابوووك يتدخل بالمووووضوع
واما سالفة ايام الملكه وبداية الزواج والخطبه هذي الفتررره كلنا عدين فيه وفقدناه ونتمنى لو انها ترجع بس سبحان الله اغلب الرجال كذا حدهم سنه سنتين ويبدووون يتغيرون

وصدقيني بيدك تخلين دنيتك جميله
وبيدك تسعدين نفسك
وبيدك تتغيرين للافضل
وباذن الله راح يرجع لك
وبدون ماتدورررين وراه وورى اهله
والله يوفقك ويفرج همك وضيقتك
وخليك على تواصل معنا وبشرينا وش يصير عليك
 
الزوج العاطفي بقدر ما يعجب المرأه ويسعدها.. بقدر ماهو سريع التقلب.. ومتأثر بمن حوله..

ربما كان من الحكمه اخفاء حبه لك عن من حولك..

احفظي كلماتي هذه للمستقبل

أما زوجك فدعيه لخالقه.. واسألي ربك العون والنصره

كوني معه سبحانه في كل أحوالك,, وأريه منك ما يحب

كوني له سبحانه في الطاعات كما يريد .. يكن لك كما تريدين

ربما لن تنفع في زوجك المحاولات منك التي استنفدتيها..

لكن جربي قريب لك خال أو عم أو أخ

أي شخص من أقربائك مؤثر ويحبه زوجك

ويجلس معه بانفراد ويحاول الصلح..


إن عاد فالحمدلله وكوني بعيده عن الجميع وحافظي على حياتك بكتم أخبارك

وإن لم يعد فالحمدلله الذي لا يحمد على مكروه سواه .. هو خير قدره الله لك وسيعوضك خيرا منه..


فرج ربي همك
 
طموحي بعيد
والله ماقصرتي,, لكن قسما بعزة الله وجلاله اني حاولت ما اهتم بس لقيت الهم اقوى مني
وانا نقطة ضعفي اني احبه حاولت اكرهه ماقدرت
اشوف ولدي اتذكره ويتقطع قلبي
والله حاولت اطلع واروح واجي وللأسف وانا بوسط الناس احس اني لحالي والناس بعالم وانا بعالم ثاني
احس الدنيا ظلماء مدري ليش
والله لليوم ادعي وجالسه اقول يارب اذا كانت الدنيا للي فرق بيني وبينه يارب انا لي الاخره وتعوضني
بس مقهوره والرسول تعوذ من القهر الله لايحطكم مكاني
 
اختي ريوف جزاك الله خير
بالنسبه للأسلوب مافي الطف مني معاه
وقبل لا اناقشه ابكي ويضيع الكلام وعارفه كيف تكون ردة فعله؟؟ يقولي بديتي دراما
كيف اجل لو جيته بالاسلوب اللي قلتي بتحكم و أوامر؟؟ يمكن لحظتها طلقني
بالعكس اهله مأثرين عليه
وهو يسمع لاي شخص كان وبالذات اهله
لما تطلقوا خواته من ازواجهم عارفه ايش قالي؟؟ قالي مقدر اعيش بسعاده وخواتي تعيسات
قلت له انا وش ذنبي يابن الناس؟؟
تحكم علي بالتعاسه علشان غلطه مالي فيها
واهله ماقصرت فيهم وامه وابوه ما احب غير على روسهم لكنهم ماحبوني
مره جاني عمي قالي ياأم فيصل اكسبي خالتك تراها تغار منك هي والبنات يفكرونك خلاص خذيتيه خاصه انه من وراك بس يتكلم فيك حتى لو صدوا عنك اكسبيهم وماقصرت
ولماتطلقوا البنات شنوا علي حرب
حاربوني,, وقرروا لي الشقاء
فيه بعض ناس ماينفع معاهم الطيب لو حبيتي ايديهم
 
الله يفرج همك ويسخرلك زوجك ويهدي اهله يارب
نصيحتي لك الدعاء والاستغفار وارقي نفسك وحصني نفسك
 
ام سعود جزاك الله الف خير
والله يوم اسمع من الناس اني تطلقت انهار
ويقولون والله ام الولد تمشي وتقول خلاص طلقناها
امي دقت عليه ومايرد
اخوي دق عليه ومارد
زوج اختي كلمه وقاله صحيح الكلام قال له والله تقدر تقول ك1ا
خالي كلمه قال له لو سمحت مالك دخل بيني وبين زوجتي
والله سويت المستحيل
وارسلت عليه ناس يعزهم ويحبهم ورجعوا بدون جواب
ارسل لي رساله قالي تنازلي عن المؤخر واطلق بهدوء اذا ماتنازلتي اسف ما اطلق اخلعيني وهاتي حلالي
اهله بعد ماتطلقوا بناتهم حقدوا علي زياده
وهم من اول يغارون مني وقالوها بوجههي حنا يوم اخذناك كنتي اقل من حلاوة خواتك لكنك طلعتي بعد الزواج احلا خواتك معقوله كنتي خادعتنا وماكنتي تتزينين؟؟
صرت لما اروح لهم ما اتزين علشان اتحاشى غيرتهم وحرمت نفسي عشانهم وع الرغم من ذلك اول من عاداني يوم طلعت هم
لاحول ولاقوة الا بالله العظيم
 
شموخ بلقيس جزاك الله الف خير
ومثل ماقلتي حسبي الله على اللي كان السبب
 
اختي الجوهره جزاك ربي الف خير
والله العظيم ماتركت باب للصلح الا ودقيته
وماخليت احد يعز عليه الا وارسلته
وانا نفسي كنت ارسل له رسايل ويرجع يرسل لي لو سمحتي لاترسلين
اقسم بالله قبل اسبوع حطيت له ورد على سيارته وارسلت رساله قلت اطلع شوف اللي ع السياره
يوم مريت ثاني يوم لقيته مرمي بالشارع بمكان السياره ويابس
عارفه لحظتها وش تمنيت؟؟ قلت يارب خذ روحي وريحني
خلاص ماعرفت اتنفس تحشرجت روحي؟؟ وش الخطاء اللي سويته يستحق كل هالعقاب
قاطعوني كلهم وكأني شربت من دمهم
ماقدروا شيبات الوالد ولا قدوا امـــي ولا اخواني
مدري وش صار فيهم؟
ومدري وش صار فيني
انا لله وانا اليه راجعون
اللهم اجرني في مصيبتي واخلفني خيرا منها
 
اختي واثقه جزاك المولى الف خير
والله كل باب للصلح الا ودقيته
ارسلت اقارب له وازواج خواتي وكلمت نساء اصحابه ولكن بدون جدوى
وارسل لي رساله يقول فيها الافضل انك ماتوسطين احد
ترا كل ما ارسلتي كل مازاد عنادي
ومنها وقفت
صرت انا ارسل له رسايل ولا اجد سوى الاستهزاء
وها أنا اليوم لايعلم بحالي الا الذي خلقني
بيده كل شي سبحانه
وكما قلت اذا كانت لهم الدنيا فيارب ارحم ضعفي واكتب لي الاخره
لا حول ولا قوة الا بالله العظيم
 
وهج الامواج جزاك الله الف خير
التفاحة الخضراء الله يجزاك الخير وماقصرتي
 
خــــواتي واللي يرحم والديكم ويفرج همومكم
ادعوا لي في ظهر الغيب
فأنا منذ ذلك اليوم أعاني من الانهيارات العصبيه المستمره يوما بعد يوم
اللهم اجرني في مصيبتي واخلفني خيرا منها وارحم ضعفي يالله ووهن قوتي
ياربي ياحبيبي الطف في وخذ بيدي للهدى
لاحول ولاقوة الا بالله العظيم وانا لله وانا اليه راجعون وحسبي الله على من ظلمني ودمرني وشتت عائلتي وبيتي الصغير يارب أوكلتك امري ياربي
 
الله يفرج همك يااختي والله قطعتي قلبي
بس نصيحه ألزمي الاستغفار وصلاة الليل واشكي كل همك لله والله يفرج همك
 
الحالة
مغلق و غير مفتوح للمزيد من الردود.
عودة
أعلى أسفل