أريد حل لمشكلة أخوي الله يوفق كل من يدخل ويساعده!!

مشكوووورين على ردودكم​
 
يا حبيبتي دامها كارهتة يتركها هالفتره لا يتصل ولا يرسل ولا هدايا ولو بغى يسأل عنها يكلم امها أو ابوها عشان تحس انه ثقل وشاريها بس مو ميت عليها يكبر راسها ترى أحنا يالحريم نحب الثقل حتى لو قهرنا شوي ( الحمد لله والشكر )
اذا ولدت على خير يشوف وش الوضع ....بس يحط في راسة كل الإحتمالات عشان ما ينصدم
الله يسعده وييسر اموره يارب .
 
يارب فرج الهم قال:
حتى ما تعطيه وجه وقبل فتره أرسلها هديه غاليه الصراحه ولا عبرته وقاعد يرسلها مسجات غراميه (((( ولا عبرتني )))) لعل الله يفتح على قلبها وتحن عليه وترجع بس لاحياة لمن تنادي..
أنقر للتوسيع...


مدري ليه عندي إحساس إن كاتب الموضوع هو صاحب القصة نفسه ؟؟؟
والموضوع مكرر في الزوج والزواج
والاستشارات الزوجيه
والحمل والولاده
مانقول لإلا
الله يرجعهم لبعض ويتهنوا بحياتهم​
 
انا اخوي مدرس كان يقولنا قصه زميله بالعمل زوجته حملة وجاها الوحام على زوجها مااا تدناه تكرهه وماتبي

تشم ريحته لدرجه لشافته زوجها تستفرغ المهم انه ودها بيت اهلها ومازارها ولاكلمها لين ولدة وجابت طفلها

بعدها تقريبا بشهر رجعت والامور زي العسل ورجعوا لبعض والحين عايشين بسعاده

فخلي اخوك يصبر ولا يطلقها ابدا ولا كل شوي يراسلها ويعطيها هدايا خلاص لايكلمهم الا اذا طلبوا منه طلب مثل مقاضي ولا شي يجيبها لهم ويرجع

( يعني السبب الحمل بس )




واذا عدة فترة الحمل والولاده والمشاكل والوضع مثل ماهو خلي اخوك يشوتها ضفر لبيت اهلها ويعطيها صك الطلاق

والبنات ماليات البيوت بيلقاء الى احسن منها وتربي طفله بعد

(( لانه باين انها هي ماتبيه ))
 
يترك المحاولات إلى بعد الأربعييين
يمكن ولدها يحنن قلبها أو اذا كان وحام يخف
 
طيب أنتي أتصلي فيها أو زوريها وأتفاهمي معاها يمكن عندها سبب مضايقها منه
لو كان في سبب زعلها حاولي تحلي وتصلحي بينهم
لو ماكان في سبب مقنع احتمال كبير يكون من الحمل والوحام وزوجات كثير يحصل لهم كذا خاصة لو كان الحمل الأول يكون الوحم قوي وقتها أتركوها لين تولد بالسلامة ووقتها راح تحس بإرتباط أكثر بزوجها لأنه راح يكون أبو ولدها
وبهالفترة لا يكثر إتصال فيها يعني يتصل ويسأل عنها في الشهر مرة ولا يلح عليها أنها ترجع يترك لها الأمر
 
حبيبتي المره مي طبيعيه يمكن سحر او عين كلمو اهلها يودونها لشيخ يقرى عليها لا تهملون

حالتها الناس ما ترحم يبون يفرقون بينهم وخليها تشغل سوره البقره والرقيه الشرعيه وتشرب مويه مقري فيها

الله يفرج كربتهم يارب عاجلا غير اجلا
 
أهلين خواتي
مشكووورين على الردود
المشكله ماضيق صدر أخوي وتعكر مزاجه ونفسيته تعبت إلا أنها ما تعبره ولا تعطيه وجه ولا رساله علشان تحسسه بأنه زوجها وأبو اللي في بطنها ، اسم متزوج ولكن ما عنده زوجه ولا كمل سنه زواج انصدم الضعيف من الزواج والنساء بس الحمد لله الشكوى لله

هو الحين قطعها وهجرها سمع نصايحكم..​
 
ابقول مثل ماقالوالاخوات خليه يطنشها
انابعدولادتي جاني اكتئاب وكرهت زوجي وماكنت اطيقه
كانه وحش موبادمي واتصلت على ابوياوهوبمنطقه بعيده وقلت له تعال خذني والابهرب من البيت الوالدالله يحفضه على طول جاواخذني زوجي كان يترجاني يقول مااقدراتخيل اجلس باالبيت لحالي لاكن رفضت وقلت على الاقل اسبوع وارجع
المهم رحت بيت اهلي وهوطنشني لااتصال ولارساله
بعداسبوعين خفت وبدات احس بذنبي كان الكل ماعتبني
وانابصراحه ماكنت احبه بس حنيت عليه وقلت لااختي قولي لزوجك يتصل على زوجي غريبه مااتصل واتصل فيه قال اذاخلصت شغلي بجي المهم قمت ادق عليه مايردقلت لاامي تتصل عليه امي اتصلت عليه تقوله زوجتك تحبك ومتندمه على الي سوت اتصل عليها
المهم اتصل على ورديت على طول قال وش تبي قلت ماابي شئ قال مع السلامه اناانقهرت ورجعت ادق ومافي فائده المهم واحده اعرفهاالله يجزاهاخير اعطتني رسالةاعتذارقويه رسلتها على طول اتصل وقال هذي الرساله من منك قلت ايه وانت صادقه في الكلام الي قلتيه قلت لوماني صادقه ماكتبته قال خلاص بجيكي بكره وفعل جاء
انامااقول خلي اخوكي يتهدد لانمافي شئ يمشي باالتهديد
لاكن خليه يقطع اتصاله فجاه واذااتصلت لايردوينهزم ويصبرلاان الانسان بطبعه يحب اذاشاف واحديبغاه يتغلى واذااحدمن اهلهااتصل يقول انامشغول ماني فاضي ذي الايام مره وشوفي كيف بتجيه جري
 
ليش يفكر اخووووك بالطلاق واصلن ليييييييش يطري الانفصااال على باله وزوجته حااااااااامل
المفروض يسكت منها ويخليها اللين تخلص الوحم
وبعدين يتفاهمون
ترى الحامل نادرا تكون تصرفاتها عقلانيه لانها تحت تاثير هرموناتها
هرمون الحااامل يرتفع وينخفض
ويتطور الوضع احيانا انها تفكر فالانتحااار
يعني اسكتوا منها وخلي اخوووك يعطيها مصروف لانها حااامل
وبعد الولاده يكون لكل حااادث حديث
والله اني كنت افضع من كذا وابشع والحمد الله عدت على خيييير
وتدخل ابوي وانتهت السالفه وهالحييين انا وياه عسل على سمن
=======
وبعد الولاده لازم اخوووك يكلم استشاااري علاقات اسريه
ويروح هو وزوجته
ترى بعد اخوووك مو منزهه من العيوب والاخطاء

يمكن فييييييييه العيب لييييش ؟لأ
 
اتقيييييييييييين الله في مسالة الطلاق
قولن خيرا او اصمتن
والله لو اللي نصحت بالطلاق جربت الوحم والحمل والولاده والنفاااس واكتئاب مابعد الولاده
وتذبذب المشاعر والهرمونات وتلخبطها
ماقالت هالكلام
اقرب الحلول الطلاق
الطلااااااااااااااااااااااااااااااااااااق اخر حل وليس اول حل
===========
اللي نصحت بالطلاق ياليت تقرا موضوع باسم على ماعتقد
هذي العضوه رح اطردها
علشااان ماتخرب بيوت المسلمات
 
يمكن تكون تتغلى..أو متوحمة فيه..أو جايتها نفس..فالافضل أنه يبعد عنها تماما وإذا ولدت يروح يسلم على البيبي فقط..وينصحهم يقرون عليها..لأن كثير شفتهم زي كذا وتعافوا الحمدلله..والثثثثثثثثثثثقل ترى زين..تموت الحرمة على الثقيل.
 
مشكورين وما قصرتوا
يا جماعة تراني تلخبطة ناس يقولون خلي أخوك يصرف عليها لأنها زوجته وهي حامل، وناس يقولون لا يعطيها وجه الثقل زين

الله لايهينكم عطوني الحل الأمثل الله يسعدكم​
 
احسن حل يتركها هالفترة لا يهتم كثير الى الولادة
وبعدها كل شيء يبان ولا يبين لها غلاها واجد تتدلع او يزيد كرهها اذا كانت متوحمة علية
 
حبيبتي يتركها نفسها ما يعطيها وجه
لبعد الوجام
يسأل عنها عند ابوها امها
ترا هذا بالقران والسنه مذكورين ان المرأة يحدث لها تغيرات وقت الحمل والدورة
وما باقي شي يالغلا ع الولادة
الله يفرج همكم
​
 
اختى الغاليه يارب فرج الهم ..

اسالأ الله ان يهدي سره وان يوفقه للخير .. وان يسهل امرة ويجمع شمله يارب
اخيتي اتمنى ان تسألو شيخ في امر النفقه لظهور عده اقوال في ذالك
والارجح ان عليه نفقتها ونفقه الجنين في بطنها

واتمنى ان يهتم بهذه النقطعه لعل يكون له خير وان يحنن قلبها عليه بان تشعر انه مهتم بها وان يطلب رضاها
هي زوجته ولا تسمعى لكلام البنات هي فترة حرجه وان شاء الله ترجع غيمه صيف
 
يارب فرج الهم قال:
مشكورين وما قصرتوا

يا جماعة تراني تلخبطة ناس يقولون خلي أخوك يصرف عليها لأنها زوجته وهي حامل، وناس يقولون لا يعطيها وجه الثقل زين​


الله لايهينكم عطوني الحل الأمثل الله يسعدكم​
أنقر للتوسيع...

يكون ثقل ولا يلاحقها ويرسل ويدق ما تتعارض مع أنه يصرف عليها إذا ماهي موظفه يرسل لها على حسابها ويكلم امها مثلا ويقول مصروفها وصلها ...وإذا موظفه لا يرسل شيء .

خليني احكي لك عن نفسي في مره حصل بيني وبين زوجي مشكله رحت لأهلي وجلست شهرين طبعا هو دق وكنت محوله جوالي مقفل ( ما كنت ادري انه ممكن يعرف اني محولته ) ارسل مسج قال( كلمت جوالك محول مقفل إذا بغيتي تتكلمين اتصلي ) وخلااااااااص شهر ما كلم ولا ارسل مررره انقهرت ...اخر الشهر ارسل مصروفك في حسابك ) وبس
بصراحه كنت مقهوره منه في البداية بعد ما ارسل لي مصروف اثر فيني كثير حسيته يحبني واني بباله
بس كبريائه ما يخليه ينذل ويترجى .
يعني ثقل بس مو ظالم ثقل بس حنون بتصرفاته
اخوك هالفتره خليه يكون كذا لا يظلمها ويقصر عليها ولايلاحقها
وان شاء الله بس تولد تهدى الامور وترجع المياه لمجاريها الله يسعدكم.
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل