أحلى يوميات.. بدون شغالات

الحالة
مغلق و غير مفتوح للمزيد من الردود.
ط

طموح الروح

New member
إنضم
2008/08/07
المشاركات
83
قوه بنات.. ياحلوات...
اليوم يومياتي غير... القرار اللي وايد نسوان مايقدرون يتخذونه لعدة أسباب .. يا إنها تشتغل ... او عيالها وايد... او بيتها كبير... او عزايمها طول الشهر... او غيره و غيره... وتعددت الأسباب...

أنا(أعوذ بالله من كلمة أنا) أتخذت قرار قوي وسهلت على روحي شغلات كثير..
قلت خلاص باودي شغالتي اللي ملوعة جبدي طول اليوم .. لا أعرف ألبس .. لا اخذ راحتي ببيتي.. لا اعرف ادلع زوجي... والبقية تأتي...
فقلت يالله ياحلوة نظمي وقتج طول اليوم وبيكون كلشي اوك بدون هالشغالات
فشسويت؟؟؟؟؟؟
أولا: قررت اني افضي غرف البيت .. واخليها خالية تماما إلا من الأثاث.. يعني غثرة مافي.. لا ألعاب ولا ثياب ولا ولا شي .. بس أثاث علشان طبعا يسهل التنظيف ونمر على الغرف كل يوم مرور الكرام...
ثانيا:الأطفال احصرهم في المطبخ مع التلفزيون والألعاب وكل شي خطير ارفعه فوق مثل الصابون وأدوات التنظيف والزجاج وغيره... وايد ناس ماشجعوني على فكرة حصرهم في المطبخ وقالوا لي حرام.. ليش حرام بعد؟ عادي وايد ناس كعدتهم وقومتهم وأكلهم في المطبخ..
وخليت لهم بعد في الحوش الخلفي (دورفه- بركه صغيرة - ودراجة -وحصان هزاز)
ثالثا: الطابق الفوق بس للنوم يعني يتنظف مره وحده .. وحتى فوق الكبتات مافي ولا شي .. علشان يسهل المسح على الماشي...
رابعا:باستعين بالشغالات بالساعات للأشياء الصعبة مثل الحوشين وغيره وغيره...
خامسا: باغسل في اليوم 10 قطع ملابس يعني باغسل يوم بيومه علشان لا يتراكمون وفي التنشر اسهل وفي التطوي بعد...
سادسا: الملابس اكويهم وإذا ماعندي مزاج اوديهم الدوبي...
افكر بعد استعين بأجهزة تخفف علي الشغل وتختصر لي الوقت ولجهد مثل غسالة الصحون.. والمكانس الخفيفة بالجارج وغيره..
وطبعا مو لازم اطلع كل يوم من البيت.. وباستقبل زبايني وباجابل بزنسي وانا في البيت.. وهوايتي بعد باعطيها حقها وباتقرب من ربي وهذا احسن شي... في الأخير الدنيا دار ممر والأخرة هي دار المقر إن شاء الله

هذي ورقة من يومياتي .. اللي كل مااقراها او تمر في مخيلتي تعطيني شحنة إيجابية وتهون علي كل شي صعب...
إن شاء الله تستفيدون ياحلوات....:icon31:
 
هههههههههههههه والله دمك خفيف
أحلى حاجه أنك أخذتى القرار
وأجدعنى ياله بالتنفيذ وربنا يسهل عليكى الأمور
 
ماشاء الله عليك

هذا القراااار يريد ارااادة قوية ،،، لان الشغااااالة صااااارت ش اساااااس في البيت وخاصة لما نكون عم نشتغل.

للأسف لاأستطيع ان اخطو خطوتك مع اني اتمنى ،،،،

الله يعطيكي العاااااافية ومافي احلى من الشغل بإيدك بيقول المثل " اتعبك حالك ولا تتعب لسانك "

تحياتي لكي

ايمي
 
لا إله إلا الله .. لا حول ولا قوة إلا بالله العلي العظيم

كعدت الساعة 10...رتبت سريري.. وطبعا غرفة النوم خالية من الأغراض .. مافيها إلا الأثاث والأباجورات فوق الكمدينات وقطع سجاد.. يعني طلعت من غرفة نومي وهي مرتبة..بس يبي لها كنس ومسح ... إجراء روتيني :bigsmile: لأن الغرفة بس للنوم فما تتأثر ولا تتوسخ
.....دخلت الباث روم.. وطبعا محد يستخدمه إلا انا وبعلي العزيز... فالأرضية ماتحتاج تنظيف وفكرت إني احط فيها قطع سجاد الخاصة للحمامات.. فماباقي إلا المغسلة اللي يبان فيها أثر الأستخدام.. فخصصت لي درج في الحمام فيه صابون واسفنجة وقفاز للتنظيف السريع...

......دخلت غرفة الملابس والتبديل .. ماتحتاج شي بعد .. طلعت منها.. وساعات يكون في ملابس على الشماعه .. ارجعهم الكبت..

.... اليهال نايمين في غرفتهم ... عقب مايكعدون برتب السرير..
....باقي للطابق الفوقي تغيير أكياس القمامة...وخلاص أنزل تحت للطابق التحتي....وآخر شي بقى نكنس السيراميك ونمسحه.. ومو شرط كل يوم.. لأن المكان فقط للنوم .. وإذا الجو مو مغبر مايحتاج.....

يتبع...............يتبع.........يتبع.........يتبع...........يتبع.........يتبع
:icon31:اشرايكم بعصر السرعه :icon31:خخخخخخ
الله عطانه العقل وميزنه عن باقي المخلوقات.. ونقدر نذلل لنه اي شي صعب
اتمنى كلماتي البسيطة تعطي بعضكم دافع للتغيير للأحسن وأتخاذ القرارات
 
نزلت الطابق التحتي
........... رحت غرفة الكمبيوتر..خالية مافيها غير الكمبيوتر وجلسة على الأرض... طلعت منها مافيها شغل...وإذا حبيت امسح الغبار عن الكمبيوتر..والتلفون وسلال القمامة.. أخذ منديل رطب بتاع الميكب او مناديل الأطفال وأمسح بها الغرفة كامل وارميه ..

...... دخلت غرفة البزنس والهوايات... كل شي مرتب وفي محله... طلعت من الغرفة ..مافيها شغل...

.... نجي للصالة... احتجت اسفنجة وصابون لتنظيف كراسي الجلد لأن يبالهم عناية يومية... ومسحت المكتبة والتلفزيون عن الغبار.... وغيرت سلال الطابق التحتي..

.... دخلت الحمام التحتي... غسلته.. واغلب الوقت يكون نظيف لأنه محد يستخدمه إلا انا والضيوف....

شغلت الفواحه.. وبديت اكنس وامسح على السريع.....

الحوش الأمامي ينتظر الشغالة ( أم الساعات) لتنظيفة مع الحوش الخلفي
.... شغلت الغسالة وحطيت فيها ملابس اليوم اللي فات يعني يجون 10 قطع

... كعدوا اليهال... راحوا الحمام... غيرت للصغيرة البامبرز.... دخلنه المطبخ... حضرت لهم الفطور... وشغلت لهم التلفزيون .. وكعدوا ياكلون ويطالعون.... مسحت سطح المطبخ والثلاجة... وطاولة الطعام... وطلعت

..... رحت لحبيب القلب... الكمبيوتر... شغلت على منتداي الغالي... وكعدت اكتب لكم شنو سويت من عقب ماكعدت من النوم......

تخيلي لو كل يوم هذا نظامي مو روعه؟؟؟؟:bigsmile:

يعني اقضي شغلي من عقب مااكعد من النوم... وخلاص بعدين اتفرغ لنفسي وبزنسي وهواياتي وزوجي........
 
التعديل الأخير:
الله يقطع الشغالات ,,,, يا رب آمين ويغنينا عنهم إن شاء الله من فضله ,,,

ما شا الله عليك يوميات رائعه مليئة بالحيوية والنشاط ,,, والله الشغالة للمرأة غير العاملة عبث ,, لكن اللي عندها دوام مشكلتها وين بتحط الصغار ,,,

الشغالة مهما كانت غبية بتحط عينها عليك وتحسدك على كل شي ... الله المستعان بس ...

متابعينك ...
 
الله يقويك ويعطيك العافيه
اصلا حنا ما خربنا الا كثرة النوم وعدم تنظيم الوقت بس الموظفات اله يعينهم
وبعد اللى عندهم ظروف خاصه صعبه
 

لا إله إلا الله ... لا حول ولا قوة إلا بالله العلي العظيم .. وأستغفر الله ربي واتوب إليه.....

هلا والله بحبايبي... رجعت لكم ... عبيت البركه ماي .. وكعدوا اليهال يلعبون فيها... وعقب ماكملوا.. يبت الجونسون وسبحتهم مره وحده...

.....في أثناء لعبهم فب البركه... دخلت المطبخ سويت النودلز للعشاء

... خبركم اليهال اي شي ياكلون ومايعجبهم كل شي.. يعني بناتي حدهم الروب والعيش كأنهم عياييز خخخخخ والنودلز ...أو مشويات وآلوا..

... كعدتهم يم التلفزيون مره ثانية... وأكلتهم ... وعقب كعدت في غرفة البزنس... أفكر بخطط جديدة ومشاريع مربحه....

.... فكرت كثير ... وتوصلت لعدة أمور من شأنها تدر علي الأموال وأنا نايمه.... خخخخخ قويه

......شفت روحي بالمنظرة ... امممممم شكلي أحتاج للصالون... بدلت ملابس اليهال ولبستهم ملابس الطلعه... وجهزت انا... ركبنه السياره.... وتوجهنا بيت الماما... وطبعا إن بيت الماما قريب من منطقة سكني... من جذي طلعت... وإلا جان أكعد مكاني احسن....:msn-wink:

....ركبت بيت الماما وكعدت شوي... وشاورت امي وقلت لها معليه اخلي اليهال شوي ؟ باروح الصالون..... قالت اي معليه بس لا تتأخرين...

مساكين أمهاتنه.. خليناهم يرجعون يربون مره ثانية... يكفي إنهم ربونه وتعبوا علينه.. واللحين نقط عيالنه عليهم .... والله حاله......

الأجر على الله ....الله يخليهم لنه إن شاء الله....
رحت الصالون وخذيت اختي معاي... وكان الصالون قريب من بيت الماما يعني مشي مايحتاج سيارة ...

..... سويت شغلي في الصالون.... وشفت شكلي بالمنظرة.. استانست بالشكل الجديد.. وانا من النوع اللي أحب التغيير بإستمرار...

رجعت بيت الماما وكعدت لي الليل .. ماعندي شغل اروح البيت... والزباين طبعا يتصلون لي قبل لا يمرون... فكنت ذاك اليوم فري...:icon30:

.... كعدت وتعشيت مع بيتنه.. ورحت مع امي بيت جدتي .. وبيتهم يم بيت الماما بعد....

.... صارت الساعة 10 تقريبا... وصار لازم ارجع البيت....

.... رجعت البيت.. بدلت اليهال ولبستهم ملابس النوم.. ركبتهم غرفتهم ... فتحت الأبجورة والمكيف .. وقلت لهم قولوا بسم الله الرحمن الرحيم وناموا....

.... رحت غرفة التبديل .. بدلت ملابسي .. لبست ملابس النوم...وتعطرت وحطيت ماكياج خفيف..وتمددت فوق السرير... وخذيت لي كتاب اقرأ فيه...لين يوصل بعلي العزيز...

:icon31:بنات.. جان لاحظتوا.. أعيش حياتي كأني بروحي
يعني زوجي خفيت عليه وايد.. ماقمت اسأله نفس قبل وين رايح ووين بتروح... شفت هالشي أريح لي.. وخفت المشاكل...عندي سيارتي االخاصة وبزنسي.. وقمت اهتم بنفسي علشان نفسي.. مو علشان احد....وخبركم الرياييل بعضهم عندهم البيت كانه فندق للنوم والأكل .. طبعا نطلع مع بعض بس بشكل عام هذا الروتين اليومي لهم....
..... هذا يوم من الأيام اللي بدون الشغالة.. بدون عورا قلب وتعالي سوي وفعلي.. اسوي كلشي ابيه بسكات وعلى مزاجي....لي عوده:icon31:
 
شاطرة الله يوفقك تعرفين احسن حاجة فيك انك مقتنعة ان الموضوع سهل يمكن مش سهل بس مش مستحيل شجعتيني
اني اسوي نفسك
انا ساكنة عند اهل زوجي والبيت بالنسبة لي كبير جناح الضيوف مكون من 3 غرف بالاضافة للحمام الله يكرمكم وغرفة النوم حقي وغرفة لعيالي0( ولدين) وصالون لي ،وهم عندهم 3غرف نوم وحمام وصالتين ودرج وحوش كبير والمطبخ طبعا هذا كله دور واحد احاول اني امشي حالي اسوي نفسك احاول اقسم وقتي يوم انظف بيتي ويوم بيتهم ويوم للغيسل بس احوس الصراحة في رمضان الشغل يكثر وتنظيف ماله حدود اتمنى تساعديني وش اسوي بدون ما استعين بالشغالات
ومشكورة
 
واصلى واحنا وراك واصلى واحنا معاك
خلينا كلنا نعترف بان الحاجه للخدمه مش ضرورى لهدرجه ادرى ان فيه حالات تحتاج وبشدة بس فيه حالات مو لها الدرجه الله يغنينا عنهن بالعافيه
 
رجعت لكم... مشكورين على التشجيع حبيباتي..
وبالنسبة لنور العمر .. الله يسلمج تقدرين تقفلين غرف الضيوف وحمامهم بعد التنظيف وماينفتحون إلا إذا الضيوف بيشرفون....هذي شغله افتكينه منها ومابتحتاجين تنظفينهم كل يوم....
أما عن غرفتج وغرفة عيالج بتحتاجين تنظفينهم كل يوم طبعا.. بس الأستراتيجية المريحة تكمن في حصر الأطفال في مكان واحد.. وعدم التنقل في البيت كله ... طبعا محد يوصخ البيت ويعفسه غير اليهال... فالحل يكمن في حصرهم في غرفة مع توفير كل وسائل الراحه والتسلية فيها....
وبالنسبة لبيت أهل زوجج... كل التنظيف عليج يعني؟ فوق وتحت؟؟ حرام بعد جذي...يعني إذا يصير اييبون شغالة لهم بروحهم بدونج... او يساعدونج على الأقل...تحياتي لج
 
والله وناسه انتي
كلج همه وحماس
احب هالنفسيات الايجابيه .. يومياتج تعطينا رسائل ايجابيه تحمسنا نعتمد على انفسنا ونستغني عن الخدامات (الشر الي لابد منه)
وازيدج من الشعر بيت.. الحياة مليانه متاعب، شغل تنظيف ترتيب مراكظ ورا اليهال، لكن هذا الشي مش يومي وهذا الي يهون علينا التعب.. لازم نحط في بالنا ان التعب بيخف كل ما كبرو اليهال، وعقب مايكبورون بيساعدونا..

وعندي تعليق بسيط على يومياتج المثاليه،، علمي عيالج ايرتبون سريرهم ويلمون ملابسهم ويرتبون العابهم بنفسم حتى لو كانو صغار,, تابعيهم وهم يرتبون وحمسيهم وكافئيهم بتلاقينهم يركظون ورا رضاج وبيساعدونج، وبتكون هذي عادتهم وروتينهم وانتي الربحانه في كل الحالات. انا ولدي من كان عمره سنتين ونص وانا اقوله يلا رتب سريرك عشان اتريحني وما اتعب،، وكان فديته يحاول وانا اساعده، والحين عمره ثلاث سنوات وفديت روحه يرتب سريره كل يوم من غير ما اطلب منه
 
هلا هلا اختي مدخن ودخون... حلوة تجربتج مع ولدج ... وفي الحقيقة اتبعتها مع بنتي الكبيرة...وبالنسبة للألعاب بعد.. وكنت اتبع معاهم اسلوب الثواب والعقاب.. وكان ناجح

..... ارجع ليومياتي:
يه آخر الشهر.. وصار لازم اروح السوبر ماركت اشتري اغراض البيت..
جهزت البنات وركبنه السيارة مع زوجي.. وانطلقنه خخخخخ
وصلت السوبر ماركت.. خذيت جاري وحطيت البنت الصغيرة فيه.. حبستها وافتكيت من ملاحقتها على كبر المكان... والبنت الكبيرة كانت تجر الجاري.. خخخخخخ والله ريحتني بدل ما أنا أجره... لفيت السوبر ماركت لف... وعلى فكرة الميزانية طلبت منه إنها تكون في يدي... ماكان راضي في البداية بس مع تكرار الطلب رضى... قالي باعطيج 70 دينار فقط .... علشان لا ارضى تكون الميزانية في يدي خخخخ .... لكني قبلت بهذا المبلغ فقط لشراء اغراض البيت من مأكولات... وخاصة إن إحنه شوي 4 أشخاص ... بس إذا رحنه معاه وكان هو اللي يدفع توصل الفاتورة لي 90 دينار...
شفتوا شلون... يعني يدفعها هو حلو على قلبه... وإذا انا لا :santa_1:

ماعلينه.... في سلبية اكتشفتها بعد ماراحت الشغالة... إن عقب ماارجع من السوبر ماركت ماقدرت اشيل الأغراض من السيارة واوديهم المطبخ ... مسافة يعني... وثانيا ثقل... وحتى لو زوجي بيساعدني حده بينزلهم من السيارة .. وانا علي توصيلهم المطبخ وترتيبهم .. وخبركم انا توني راجعه من المشي في السوبر ماركت يعني تعب....ففكرت لين وصلت للحل الأمثل والأريح طبعا لي.... وانا ذبحتي الراحه..:shiny: قلت مافي إلا حل واحد... بدل لا اشتري في الشهر مره كل الأغراض في يوم واحد.. خلني اشتريهم كل اسبوعين او كل اسبوع حتى لو من البقالة اللي جنب البيت مو لازم من الماركت.. هذي الحركة البسيطة بتقلل التعب علي وتخففه لأنها بتكون موزعه على طول الشهر... واراعي لازم إني اكتب الأشياء الناقصه في ورقة علشان لا أشتري اللي احتاجه واللي مااحتاجه...

........عقب ماكملت من السوبر ماركت رحنه تعشينه في نفس المجمع اللي فيه السوبر ماركت...وتعشيت مع بناتي وزوجي براحه بدون محد يراقبني وانا أكل .. أقصد طبعا الشغالة ... قبل يوم كنت اروح وواوديها وياي كنت احاسب اقول اللحين بيصير خاطرها بأكلي او بأكل اليهال.. لأن كل واحد نشتري له غير وحتى هي نشتري لها وجبة مثلا او بيتزا... بس بعد اقول يمكن يصير خاطرها في أكلي...:thumbdown:

.... الحمدالله إني افتكيت وصارت هذي السوالف من الماضي....تصدقون الوحده اللي كان عندها شغالة وبعدين توديها تحس براحه نفسية عجيبة... وكذا وحده قالوا لي هذا الكلام..وهذا صحيح..والله حتى التنفس قمت اتنفس عدل عقب مااذلفت....:bigsmile:

... أكتفي بهذا القدر من اليوميات.... وألقاكم إن شاء الله في مواضيع أخرى... لا تحرمونه من تجاربكم القيمة في هذا الموضوع... تحياتي:icon31:
 
تسلمين الغالية
يومياتك تشجعني كثير : اما بالنسبة لسوالك انا وهل زوجي ساكنين في دور واحد يعني هم عندهم 3غرف نوم وحمام وصالونين والمطبخ مشترك وما حد يقوم بالتنظيف الا انا طبعا // لأن بناتهم متزوجين وعندهم ولدين شباب يعني مستحيل يساعدون بس يممكن تستغربين ان خالتي الله يحفظها اللي تساعدني من يوم ماتزوجت هي اللي ماسكة الطبخ وتقول لي انتي عليش التتنظيف وانا هالموضوع حاز في خاطري عاد حرمة كبيرة الله يعنها على نفسها ومشكورة حبيبتي على مساعدتج
ورااح احاول اطبق كلامك
 
الحمد لله اني مفتكه من الخدم ولا افكر اجيب لانه بيتي مايحتاج

الله يوفقك يارب
 
مااا شاء الله عليكـ .. نظمتي بيتك ووقتكـ وافتكيتي من الشغالات وقرفهم :blush-anim-cl:

ونفس الوقت ما أهملتي نفسك وأطفالك وزوجك ..

أهنيك والله على هالخطوة ..

شاااكرة لكـ طرحكـ المميز ..



MaHa​
 
الحالة
مغلق و غير مفتوح للمزيد من الردود.
عودة
أعلى أسفل