أبسألك بس أبسألك وش هو شعورك وأنت تدفن قلب انسان؟!!!

الحالة
مغلق و غير مفتوح للمزيد من الردود.
حبيبتي ماتشوفين شر
على مهلك لاتعبين نفسك
باانتظارك
الله يشفيك ويعافيك
ويبعد عنك كل المرض ياقلبوووووووو
 
الله يشفيك ويعافيك والله مره متحمسه مع قصتك وكل لحظه حسيت نفسي عايشه معك وبكيت كثير وحبيت طيبت قلبك شخصيتك دخلت قلبي وانا انتظرك الله يقويك ويقومك بالسلامه
 
الله يشفيكي ويعافيكي ويبعد عنك كل شر
منتظرينك تخلصي لنا القصه ....................لاتخافي متابعينك وما ناسيينك
 
صدقتي يالقلب المهموم الحياة معلم قاسي يؤدي الإمتحان ثم يشرح الدرس..الله يبعد عني وعنك وعن الجميع الهموم
صمتي يناديك الله يسعدك يالغلا والله ماااااكان ودي أجرحها ولاأني أنحط في موقف كذا مع هدى أوغيرها
أنا فلة لااااا ياختي صعبه أرد عليها بهذا الكلام بتتعب نفسيتي أكثر منها
الشوق عذبني زين أنك غيرتي من نفسك أنا أحاااول وأحاااول ومازلت فعلا اللي تستسلم لناس وكلامهم تضيييع وينجحون عليها
الجوهرة أحبك الله الذي أحببتيني فيه..الله يخليلك نور
دمعة شمعة الله يبارك فيك ويبارك في الجميع ومشكورة أنتي ولبيه يالغلا على التشجيع هههه
أحبك يايمن .فراولة ساااامحوني أتعبتكم بالإنتظار
نوارا فديت دموعك وعيونك سلامتك والله لوكنت أدري كان مانزلت القصة عشانك..الله يشفيك أكثري من غسل عينيك بماء زمزم مفييييد لأمراض العيون ولاتتركين الأدوية نصيحه مافيه أغلى وأهم من العيون..لازم طبيب مختص يشوفك
شجون لامازعلت بس والله ظروف
ترى والله نفسي أرد على الكل بس رديت على التساؤلات
وإلا مانسيتكم وشايفه وقفتكم معي أمة الله الضعيفة.. أم مصعب بدايتي.. أمنيتي في ظلها..نزيف الورد..أم يالا..بيرين نجد..جمانة الدر..الزوجة العفيفة..هادئة البال..حبي ميدو الله يسلمك..أم صوفيا..شامخه رغم الجرح..تنهدات أنثى..ماريز..وغيـــرهم..وغييييررررهم بس أنا كتبت اللي آخر من ردوا علي وإلا والله كل حرف أنكتب هنا لي
فله وقع في نفسي..الجميع بلا أستثناااء أحبكم في الله ياأخواتي..
تسلمون والله..الله يعطيكم العافيه ويسلمكم من كل شر ويبارك فيكم..
واعذروووني على التأخير من أسبوعين تعبانه بسبب تغير الجووو
تعبت من الإنفلونزا..
تــابع

حاولت أبين هدوئي أمام نورة لأني حسيتها تضااايقت وبان عليها الحزن والتوتر طلعت فوق لبيتها..ونادتني أمي أتغدا..جلست مع أهلي أحاول آكل وأشاركهم الحديث..الكل مومنتبه إلا شخص..يعرفني زييييين ويعرف كل من يجلس معه فما بالكم في بنته..طول الوقت ينظر لي بنظرة خوف وقلق وحنيه..بعد الغداء ناااداني الوالد الله يحفظه ويطول بعمره..سألني إذا فيني شئ أو حصل شئ أو ناقصني شئ..أوإذا بتراجع فمعي الوقت الكافي>>>أول ماسألني هذاالسؤال..
جاء بندر أمام ناظري..نفسي أرمي نفسي في حضنه مثل زمان وأبكي فيه وأطلع كل حزني..أحس أني بدونه ضااااايعه
وتعبااااانه ولوجمعوا لي كل شئ يسعد الإنسان بيبقى شعور الحاجه
له موجود في نفسي...قلت لا مافيني شئ لكن عندي صداع!!

أغلقت علي باب غرفتي..أخرج كتب..وأدخل أوراق..أفتش..
أبعثر..أرتب..أخرجت فستاني نظرت إليه..
ألقيت بنفسي على السرير ..أفكر في كل شئ...حتى ظننت أني
جننت..
قطع تفكيري رسالة على الجوال
أووووف أكيد هذي هدى>>>هذا اللي دار في راسي
قرأت الرسالة
أحضني حيل وخل يذوبني
الحنان..!
والله مشتاق لحنــــــــــانك
من زمان..!
لمني حيييل..!
محتاج حضنك..بصيييح
برتوي شوفك..
من بعد..ليل الظما
لمـنــــي..
مثل طير شفته جرييح
لـ شاف جناح أمه
طار واحتمـــى..
**أحبــــك**

حسيت أن التوتر وصل لحد السماء..هذا وقتك يابندر..
ياربي ياليتني أجلت الزواج على الأقل أسبوع..

ماحسيت بنفسي إلا وامي تطق الباب وتنادي
يالله نمت ساعه وحسيت أني نمت دقائق معدودة
:أبتهال أذن العصر ..يالله صلي وتجهزي الرجال بيجي
:يمه طيب تكفين لاتقولين كذا فجعتيني
:هههه ليش أنتي نايمه
:ايوه نمت ساعه واااااو ياحلوها
:نوم العوافي يالله بسرعه تعالي
:الله يعافيك

جلست شوي على السرير أحس نفسيتي هدأت شوي
صليت العصر وسمعت أخواني ياخذون القهوة وعورني بطني
ههه ترى صدق أنا خوافه..كنت قبل طلاقي الأول إذا جلست عند أهلي يومين ماشفته أصير أستحي منه وكأني أول مره أشوفه
فما بالكم بثلاث سنوات تقريبا"
أستخرت ودعيت ربي وأحسنت الظن بالله..وصممت وأقنعت نفسي
أني سأكون راضيه بما قسمه الله لي سواء سعاده أو لا..سواء راحه
أو لا..فربي أعلم بالخير لي..وكل شئ مريت فيه وبمر فيه فهومكتوب قبل أن أخلق نطفة في بطن أمي..

:ابتهال
:هلا سعد
:تعالي أبوي يبيك توقعين
:طيب ليش ماجبته هنا بالغرفه
:ههه ليه مستحيه من أبوي..والله أنتم يالبنات عليكم حركات يقالي الوحده مستحيه من توقيع وإلا أنها تقول موافقه وهي بليلة عرسها
تكشخ وتلبس وتطير معه ههه
:هههه طيب قدامي أشوف تأخرنا على أبوي
:شف البنت مستعجلة وين الحيا اللي قبل شوي
:مومسألة مستعجلة بس حرام أبوي واقف
:ياعيني ماأقدر أنا على اللي يحبون أبوهم
:ههه

..
:هاه ابتهال وأناأبوك موافقه خلاص ..كل شئ تمام
أبتسمت لأبوي عشان أطمنه
:كل شئ تمام

وقعت وتذكرت ملكتي الأولى
سبحان الله كل شئ عن زواجي الأول أذكره زين
ملكتي ..ليلة زواجي..والأيام والشهور اللي بعدها بأدق التفاصيل
بعكس الثاني..مومتذكره حتى تفاصيل أول أسبوع..
بارك لي أبوي وأخواني وأمي..
رحت لغرفتي وطحت على السرير..غمضت عيوني أحاول أستوعب أني خلااااص صرت زوجة بندر..
جوالي كان يدق ولافكرت أشوف المتصل
وبعد شوي طقت الباب نورة
:ياهوووووووه أفتحي لايكون أغمى عليك من الفرحه
فتحت الباب وسحبتها
:بسسس فضحتينا..كل اللي في البيت يسمعونك
ضمتني إلين حسيت ضلوعي تكسرت ههه
:عادي ياقلبي خليهم يسمعون مبروووووك وأخيرا صرتي زوجة اخوي
:ههه الله يبارك فيك..بس بعدي عني ذبحتيني..
:هههه ايه خلاص ماعاد تبيني
:هه لاأبيك فيه أحد ينسى أخته أساسا أنا ماأستغني عنك
:صراحه أشك بكلامك
:ههه
:طيب بسرعه تجهزي الكوافيرة بتجي
:نورة تصدقين خايفه
:يارررربي ابتهال تكفين أرحميني اخاف يجيني شئ ترى عندي عيال
:ههههه عيال..أشك بصراحه همك الأول العيال
:ههه تقصدين سعد
:ههه ايوه
:لاحبيبتي ضاااامنته لويفكر مجرد تفكير بغيري قطعت راسه ورميته عليكم مع الشباك
:يممممممه يالمجرمه
:مجرمه وإلا مومجرمه علي وعلى أعدائي
:ههههههه

جات الكوافيرة
وهي جالسه تحط لي ميك آب كنت انااام آخذ لي غفوة هههه
وكل ماأفتح عيني تبتسم
:حبيبتي أنتي شكلك مانمتي في الليل
:ايوة مانمت بس دايم عادي أتحمل اليوم مدري وش فيني ماقدرت أقاوم النوم
قاطعت نورة كلامنا
:ههههه ايوة معذورة تبين تسهرين الليلة
:نوووورة بس
:ههه ليش تنكرين الواقع
قاطعتها الكوافير
:ههههه خفي على البنت حرام خوفتيها

ماتدري أني متزوجه قبل كذا مرتين هع

دخلت أمي خااايفه ومتوترة
:ياويلنا من جدك كلمتني جدتك تقول معصب وزعلان يقول
قلوا عليها الرجال تخرب بيت بنت خالتها
يوووووووووه.. موناااااااقصه هالكلام أبدا موناااقصه
سكت ولارديت على امي..حسيت نظره الكوافير متعجبه وتتفحص وجهي..تكلمت
:أنتي متزوجة واحد متزوج..ليه حبيبتي لسة صغيره وحلوة ماشاء الله؟!أيش لك بالمشاكل!
سكت شوي أنتظر نورة ترد وتريحني من الكلام..لكن ماأحد تكلم
:...الظروف أجبرتني
:ليش أبوك جابرك على الزواج
:لا موأبوي..أنا أجبرت نفسي
:والله شئ يزعل أنتي قمر كثير شباب يتمنوك
:نصيبي
ماحسيت إلا ودموعي نازلة
:ليييييه حبيبتي لييييييييه تبكي..خلاص هذا نصيبك
قاطعتها أمي
:ليييييه تبكين موهذا اللي أنتي تبينه؟!
ردت نورة
:خالتي الله يرضى عليك أنتي ماكان لازم توترينها بكلام جدي
وأنتي ابتهال ماعليك من جدي يطق راسه بالجدار
:عيب نورة هذا جدك
:ماقلنا شئ ياخالة جدي..بس جدي دايم وتصرفاته همجيه ويتحكم في كل اللي حواليه..يبي الناس على كيفه وتحت شوره

أنا كانت دموعي تنزل غصب عني وأحاول أمسك نفسي أحس بداخلي بركان بينفجر ويحرق كل اللي عنده..
كملت مكياجي وشعري ولبست الطرحه..
خلصت نورة وأمي وكل وحده راحت لغرفتها تلبس
جلست لحالي بغرفتي نفسي أحط راسي وأنام وأسحب عليهم ههه
أحس بضيق وملل ودي أبكي وأطلع اللي في قلبي بس ماكنت أقدر يخرب الكحل هههه..ولاأحط راسي ويخرب شعري..
دخل عندي ناصر
:عمتي ابتهال الله صرتي حلوة
:ههه يعني قبل موحلوه
:إلا حلوة
:طيب عطني كاس موية
:طيب
رجع مرة ثانيه وشربت المويه
:عمتي عادي بلمس هذا
:هههه وشو الظل وش تبي فيه
:بس كذا ودي ألمسه
:ههه عليك حركات كأنك اول مرة تشوف مكياج يالله غمضت ألمسه
:هههه لمسته..عمتي طيب ليش مالبستي فستانك أطلعه لك؟!
:لاحبيبي لاتطلعه بعد شوي ألبسه
:عمتي ابتهال أنتي بتزوجين خالي بندر؟
:ايوه
:أحسن ترى مايضربك مثل خالد!!!!
أنصدمت من كلامه ماتوقعت أنه عارف بكل شئ يدور حوله
:ايوه حبيبي أحسن من خالد
:تدرين أنا يوم كنتي بالمستشفى كنت إذا بنام أبكي عشانك
:هههه صدق ياقلبي ليش ماقلت لي وإلا الليلة التعبير عن المشاعر
:ههه أستحيت أقولك
:فديت اللي يستحون هههه

:ماشاء الله وش تسوون؟!
:مانسوي شئ بس انا وولدك نحش فيك
:آااااه يالوحوش.. ناصر روح مع أبوك..وأنتي وش تنتظرين قومي ألبسي عباتك وروحي للفندق وأنا وخالتي بنروح للقاعه
:لااااااا نووورة تكفين روحي معي
:هههه وين اللي مابي أحد..لاحبيبتي اسمحي لي ماقدر من بيوقف بالحفله خواتي تعرفينهم متنحات لازم أحد يحركهم
:لانورة تكفين
:ههه ابتهال وش فيك هذا بندر تعرفينه إلى متى الخوف
:نورة والله مدري وش فيني أحس بخوووف وحيااااء
:طيب خلاص أفكر أجي معه
:لا وش تجين معه أنا أبيك عندي
:ابتهال صدقيني بيروح الخوف من اول ماتشوفينه بس أنتي كذا دايم متوتره..هدي نفسك..وش بيصير يعني..زوجك وبيدخل عندك..الحمدلله..
:....
:خلاص عاد أنا بتصل فيك..جوالك معك
:ايوة
:يالله مع السلامه ليلة سعيدة هههه

طلعت ألحقها ماسكه طرحتي هههه
:وين أمي
:هلا يالله أنا بطلع تبين شئ
:يمه ليش ماتروحين معي
سمعت صوت نورة وهي طالعه
:قلنا لك بنتصل فيك..يالله خاااااالتي تعالي تأخرنا
:جايه ..جايه..لا ماقدر أروح معك خالتك أم بندر هناك بروح أسلم عليها وأجلس معها!!!!
:يمه لاحقه على خالتي بكره تجيكم هنا في البيت
:لا لا ..أنتي وش خايفه منه..بندر زوجك ويعرفك وتعرفينه!!! إذا وصلتي الفندق ألبسي فستانك وتعوذي من الشيطان وسمي!!!!!!
:..
:يالله مع السلامه أنا أمرك بكره وإلا أتصل فيك!!!
:مع السلامه يمه..

ناداني أخوي محمد (أصغر مني) عشان ياخذني للفندق
:محمد ممكن تطلع فستاني معك لسيارة وشنطتي
:ايه أكيييد بندلعك هذي آخر ليلة لك عندنا
:اسم الله علي..عيب تقول كذا أنا أختك..
:هههه ايه صح أختي..يالله أنا بطلع وأنتي قفلي مداخل البيت
:طيب

ركبنا السيارة رايحين للفندق
:الحين أشغل لك شريط طق أخليك تقومين ترقصين
:هههه الحمدلله موصاحي ..لاشكرا مابي
:لا لازم الليلة عندنا فرح
شغل شريط
:بس محمد بس خفض الصوت وإلا سكره ماله داعي الأغاني
:أوكي
:محمد ترى ماله داعي الأغاني تخيل لونصدم ونموت وأنت مشغله
:وش هالفال
:وأنا صادقه أنتبه لنفسك وعن الأغاني
:أن شاء الله أوامر ثانيه..
:ههه سلامتك
:يووووه ابتهال وش توقعين شعور هدى
:محمممد مالك شغل خلاص لاتجيب طاريها
:عادي وش فيك زعلتي..صح تستاهل..
:لاتقول كذا
:إلا نسيتي اللي سوته فيك
:محمد خلاص أتركها بحالها لاتتكلم فيها..

وصلنا الفندق ونزل محمد أغراضي سألنا عن رقم الغرفه اللي آخذها بندر ..ودخلنا انا ومحمد
كان صالون صغير وممر يودي للغرفة
جلس محمد في الصالة
دخلت للغرفة وتفاجأت بالورود الحمراء المنثورة على السرير
إلا كل الغرررفة روووووعه الورود والإضائه والروائح ومليانه من ريحة عطر بندر أحسه غصب يبيني أشم العطر ههه أول ماشميتها حسيت بطني عورني
ناديت محمد
:محمد جيب الشنطة هنا
دخل محمد
:أحلا أحلا ماأنت بهين يابـنيـدر
:ههه أذكر الله
:ياعيني خايفه عليه
:ههه
:طيب الحين شلون تنامون وهالورد وين تودونه ههه
:....
:طيب عادي آخذ لي كم وحده يمكن أصادف معجبات وإلا شئ
:ايه عادي
:كريمه أختي طالعه علي
:ههه
:طيب أنا بنزل تحت وإذا خلصتي لبس بجي
:طيب
طلع محمد بعد ماآخذ ورده
لبست فستاني ووقفت ساعه قدام المرايه
ورتبت أغراضي..دقيت على محمد
:وينك تعال
:طيب وش تبين أجيب لك معي
:مابي شئ
:لا أمي أتصلت تقول جيب لها شئ تاكله
:لا مابي شئ
:لا لازم بجيب لك معي شئ خفيف حتى أنا جوعان باكل معك
:أوكي براحتك

جلست أنتظر محمد وأطقطق في جوالي وصلني مسج ولاأمداني أفتحه أتصلت نورة
:هاه بهلوله كيفك
:تمام
:الحمدلله ..للحين خايفه
:مررررره
:هههه أحسن
:يانذلك
:الحين أنتي وش خايفه منه
:من اللقاء
:أحلا ياللقاء ..والله قهر بتفوتيني ودي أشوف شكلك وهوداخل عندك
:ههه وش قالوا لك مسرحيه
:بااايخه هههه
:ههه
:لبستي فستانك؟
:ايوه
:ههه ناصر أزعجني في السيارة يقول ماما متى ابتهال تلبس فستانها
:هههه حرام عليكم خليه يجي معهم عشان يشوفني
:ايه من زواجك أنتي وخالد وهويقول أنا ماشفت ابتهال ليش أختي شافتها..عاد لازم أعوض ولدي
: ههه تصدقين يقول لي أنا أبكي يوم كنتي بالمستشفى
:ايه وليدي طالع على أمه حساس
:هههه طيب نورة تعالي قبل يجون
:خلاص عطيتك وجه بااااي
:باي

فتحت الرسالة:
(ليتني بحضنك طول الأيام مسجون
وأقول حطوا من ورى القفل قفلـيـن
تلمني بالحيييل ماقول بالـــهوووون
حتى نصير بجســم واحــد وقلبـيـن
مفتوووون بي وأنا بعد فيك مفتون
وتـــقـــول ياحبــي وأنا أقــول لبيه

مشتاااق لك يالغالية ردي علي ولوبرسالة فاضية )

أول ماقريت رسالته تخالط شعور من الخوف والحب والتوتر
أرسلت له رسالة فاضيه هههه
دخل محمد وشربت عصير ماااقدرت آكل
دخلت للغرفة ومحمد في الصالة
فتحت القرآن وجلست أقرا البقرة مر الوقت وتفاجأت أني وصلت لآخر صفحة من سورة البقرة ..الحمدلله
قبل أنتهي سمعت صوت أخوي محمد يكلم
وأول ماأنتهيت دخل عندي
:ابتهال ترى بندر وصل تحت الحين بيجي
حسيت بدوار في راسي وبرودة في أطرافي وريقي نشف وتندمت أني ماأصريت على أمي وأخذتها معي أحس يدي ترتجف وأطمن نفسي أقول في نفسي الحمدلله وش فيني كذا خايفه
لكن ماقدرت ...كنت أقول ياربي أخاف يغمى علي خخخخ
دق جوال محمد
:عند الباب يالله طيب
سمعت صوت محمد فتح الباب وصوت بندر وسعد
:السلام عليكم
:وعليكم السلام هلا والله مبروووك
:الله يبارك فيك
:وينكم ياخي تركتوني وحيد هههه
:ودي أنا أجي من المغرب بس سعد كل بعد شوي يقول لي شوي شوي
:ههههههه
سمعت صوت ناصر
:بابا أروح
:ايه تعال معي
دخل عندي سعد وولده يسلمون علي
:مبروك يالغالية
:الله يبارك فيك..هلا نصووور
:مبروك
:ههه الله يبارك فيك..هاه شفت فستاني
:ايه حلوة
:هههه الحلوه عيونك
:يالله أنا بروح تبين شئ
:سلامتك ياخوي
:الله يسلمك
:مع السلامه عمتي
:مع السلامه حبيبي
شفت نصور يناظر للورد..أخذت وحده وعطيتها ناصر
مسك سعد ولده وطلع لصاله..مدري كيف تكلمت وصرت طبيعيه قدام سعد..أحس أني كنت أتكلم مع نصور عشان أخفف عن نفسي الخجل
سمعت محمد يقول: ألحق تراها توزع الورد مابقى شئ..يالله أدخل وش تنتظر؟!
:وش عليك مني ..توكل على الله مع أخوك ..
:لا ياأخي بسلم عليكم
:أنا وسلمت علي..وأختك لك أكثر من ساعتين عندها يالله حبيبي مشكور وماقصرت بكره مرونا
:هههه أيا النذل لا بشوفكم مع بعض
:سعد تكفى خذه معك
:يالله يامحمد مووقت مزح ..تأخرنا
:ههه يالله بنطلع في آمان الله والله الله بأختي ترى بكره من الفجر وأنا محضر عندكم بشوف هي مرتاحه وإلا لا
:ههههه ولايهمك أختك بعيوني أنت بس أطلع
سمعت الباب تسكر وتمنيت أن فيه باب ثاني أطلع معه >>>والله تخيلت كذا هههه
سمعت صوته قرب للغرفة
وأقول ياربي أجلس وإلا أوقف وإذا وقفت وين أوقف ههه..
وقفت قبل يدخل بثانيه
:السلام عليكم
:....
يالله يوم سمعت صوته وربي قلت في نفسي الله لاااايحرمني منه
ترى بس أسولف مع نفسي هههه
مسكني ورفع راسي
:ابتهال ماتبين تسلمين علي ههه
:....
:ناظري فيني مستحيه مني هههه
ضمني على صدره وحسيت كل الخووووف راااااااااح مره وحده
حسيت بطمأنينه عجيبه..حسيت أن شئ ضااااايع وحصلته
والله أنه يضمني بقوة وأقول في نفسي معقوله مرت علي فترة فقدته معقوله أنا أفترقت عنه وتركته..معقوله الحين هذا بندر..كنت أقول
بنفسي الحمدلله ..الحمدلله..
:مااااني مصدق بهلوله بين يديني
مسك يديني ورفعهم على وجهه
:اضربيني سوي أي شئ بشوف هذا حلم أوحقيقه
:ههه
:الله ياابتهال زمااان عن هالضحكه..أشتقت لك أشتقتتتت لك يابنت الناس اشتقتتتت لك
:..
:الله وش هالزين..والحلا كله..تعالي نجلس هنا
مسك يدي ورحنا نجلس وأنا بداخلي أضحك على نفسي وخوفي اللي أختفى وأقول الله يعين نورة والله جننتها
ترك يدي جلس قبلي وأنا واقفه
:هاه الحين وين تجلسين
كان ودي أقول على المكان اللي بجانبه بس أستحيت
أشرت على اللي بعيد شوي
:لا بزعل منك
:هنا>>>>أشرت على اللي بجانبه
:لا جد زعلت منك نسيتي حبيبك وين يجلسك..ماتجلسين إلا في حضنه
وقف جلسني..مدري ليش راح فكري لهدى
معقوله هدى يعاملها كذا..وتجلس في حضنه بكل وقت!!
:ابتهال..حبيبتي وش تفكرين فيه؟!
هزيت راسي بلا شئ
:شكلك بتدلعين علي وتحرميني الليلة من صوتك
:..
:حطي راسك على صدري..سمعتي نبض قلبي..هذا القلب وربي
مافيه غيرك ولاراح يدخله غيرك..
ماكنت أبيه يرفع راسي..كنت أبيه يسكت ويقفل الموضوع..كنت أسمع نبض قلبه وأحس بسعاده..ماحطيت راسي إلا على صدره ولاسمعت في الدنيا إلا نبضه وكأني ماتطلقت منه ولاكأني مريت بكل اللي مريت فيه..كأني أمس تركته ورجعت له..
:اشتقت لك يابهلوله ..ياشين دنياي بدونك..تدرين أني أسعد انسان في الكون..
دق جوالي وأنحررجت نسيت أقفله
شاف المتصل نورة..
:هذي نورة برد عليها
:هلا نورة
:ههه الله يبارك فيك يالغاليه أن شاء الله تفرحين بعيالك
:بهلوله طيبه شوفيها بحضني
:أحسن أنا أبي أحرجها هههه
:نورة بتكلمك
كان ودي أقول لاااااااا....كيف برد عليها..
:هلا
:بهلوووووله مبروك
:الله يبارك فيك
:في حضنه هاه
:...
:هههه أحسك ودك تذبحيني صح
:ايوه
:هههههه كأن أحد خانقك ..يالله مع السلامه في آمان الله

أخذ الجوال مني
:وهذا الجوال قفلناه..مانبي نرد على أحد
:..
:ابتهال وش فيك نحفانه
:حتى أنت نحفان
:تتركيني وماتبيني أنحف..أشتقت لك وأشتقت للأكل معك انتي ماأشتقتي لي
:أشتقت لك..

كل مايقول شئ..تجي في بالي هدى..كنت قبل الزواج أقول مستحيل أفكر فيها ..وبنسى وجودها عشان ماأتعب..لكن لقيت نفسي من أول ليلة أفكر فيها..أحيانا أفكر فيها بخوف..وش بتسوي..أخاف أنحرم من بندر بسببها..قبل ننام قالي أننا بنمر نسلم على جدي قبل نسافر
خفت..مابي أحد يتكلم علي..بيت أم هدى عند بيت جدي يعني ممكن تجي ..أفكار كثيرة دارت براسي..
وكعادة بندر ماأنام إلا بين يدينه ..حسيته نام.. وأنا أفكر ..أقول يالله كم ليلة وأنا وحيدة..كم ليلة تمنيت أحد يحن علي مثله ..
قطع تفكيري
:مانمتي
:لا
:ليش وش تفكرين فيه
:لا ولاشئ
:ابتهال لاتخافين من شئ.. أي أحد يتكلم معك قولي كلامكم مع زوجي مومعي
:طيب
:سمي ونامي

يتبع..





 
رهيبه يافررررررررررررح
مؤثرررررررررره جدااااااا
نتظرك لاتتاخرين علينا حبيبتي
احس بدا الحماااااااس
الله يووووفقكم ويخليكم لبعض ويبعد عنكم
كل شر
 
يافرح كلي شووووق لمعرفة المزيد
اكملي وفقك الله ورعاك​
 
آآآآآآآآآآآآآآآآآآآآآآآآآآآآآآآآه يافرح مدري ليش وانا اقرا
احس ودي اصيح ودي اقول للعالم خليهم
يعيشو براحتهم
حسبي الله على من كان السبب...

تكفين
تكفين
تكفين يافرح كمليها اليوم والله اني افكر فيك طول اليوم ..


​
 
فرح

اقولك شئ بس ماتهاوشيني







اكيد








طيب













حبيت بندر


















ياويلي احسك بتهاوشيني

اووه اقصد حبيت شخصيه بندر اشفيك فهمتيني غلط الله يسامحك..
الله يخليكم لبعض يارب ويبعد عنكم الحساد يارب..​
 
الله اروع قصة حب مشاء الله الحين امسكيه بيدك وسنونك والله انه انسان طيب
 
ماشاء الله لاقوة الا بالله الله يخليكم لبعض يارب من بعد الصياح خلينا نفرح لما قريت قصتك دموعي ماوقفت يالله ارتحت الحين الله لايفرقكم تكفين اختي مااوصيك بالورد اليومي اذكارك لاتنسينها

كملي لا تطولين بانتظارك
 
ياااااااربي والله بدي ارقص من الفرحة<<<<< بس ما بقدر حامل .خخخ
حبيبتي الله يوفقك الله يسعدك...و يارب تطلع (ضلال) من تفكيرك وترجعي مبسوطة متل اول ويارب ما تتفرقوا عن بعض وربي يتم السعادة عليكم ويؤجرك في مصائبك , ويسعدك في الدارين , ويبعد عنك عيون وانفس الحاسديييييييين ....
بانتظاااااااارك لا تتأخري
 
حياتي إنت يا فرررررررررررح... ياااااااااااااااااااااااه حرام عليك بكيتيني وضحكتيني.. بالعربي حركتي كل المشاعر داخلي.. والله فررررررررررررررررررررررحت من قلب قلبي..
مع كل سطر كتبتيه ودي بسرعه اوصل للسطر اللي بعده من الفرحه والحماس.. ياااااااااااه الله يسعدك يا غاليه ويرد كيد الكائدين عنكم..يشهد علي انها اكثر قصه اثرت فيني وعشت معها حرف حرف.. أنتظررك..
 
حياتي إنت يا فرررررررررررح... ياااااااااااااااااااااااه حرام عليك بكيتيني وضحكتيني.. بالعربي حركتي كل المشاعر داخلي.. والله فررررررررررررررررررررررحت من قلب قلبي..
مع كل سطر كتبتيه ودي بسرعه اوصل للسطر اللي بعده من الفرحه والحماس.. ياااااااااااه الله يسعدك يا غاليه ويرد كيد الكائدين عنكم..يشهد علي الله انها اكثر قصه اثرت فيني وعشت معها حرف حرف.. أنتظررررررررررك..
 
الله يسعدك ولايفرقكم عن بعض ويرزقكم الذريه الصالحه يارب ويجعل حياتكم كلها فرح
 
الحالة
مغلق و غير مفتوح للمزيد من الردود.
عودة
أعلى أسفل