أبسألك بس أبسألك وش هو شعورك وأنت تدفن قلب انسان؟!!!

الحالة
مغلق و غير مفتوح للمزيد من الردود.
كملي
حسبي الله ونعم الوكيل
 
يافرح وينك ........ ويل قلبي من قصتك ......... أبكتني من قوة الخيانة ......... تساقطت دمعاتي
ونبض قلبي تسارع ........ عشت حبك وفرحتك ....... تألمت من جرحك ........ ومن أقرب الناس
خيانة ليست ككل خيانة ......... يافرح وينك ....... زادك الله صبراً وعوضك خيراً..... أكملي فرحك الله بالقادم
ولنا الله من قلوب قاسية وظالمة تسرق الفرحة
وتدفن القلوب وتهرب بقسوة​
 
لاحول ولاقوة الا باالله العلي العظيم ايش صار في الدنيا الله المستعان اعانك الله وجبر مصيبتك المشكله الخيانه ممكن تنقبل من بنات الحرام الي ماتعرفينهم من بعيد لكن وحده عايشه معك وتكون قريبه لكي هذي الي صدق قويه اكملي غاليتي فوالله عجزت يدي عن الكتابه لاادري ماذا اكتب ولكن كان الله في عونك
 
لاحول ولاقوة الا بالله حسبي الله ونعم الوكيل..
آآه من خيانة الرجال..
 
لا حول ولا قوةالا بالله
تأثرت كثييير بقصتك ربي يفرج همك
وخفت كثييييييييير من زوجي

ننتظر تكملة القصه
 
الله يجزاكم خير يالغاليات
أنا مابيكم بسبب قصتي تشكون في أزواجكم
رجل يختلف عن رجل
وظروف تختلف عن ظروف

أبي أرد عليكم وحده وحده لكن بعد ماأنتهي منها كاملة
أنا جالسه أكملها ومدري عن ظروفي لكن بإذن الله أنزلها اليوم
والله أني أشعر براحة كبيرة وأنا أفضفض عن ما في صدري..
أسأل الله لي ولكم أنشراح الصدر
 
مؤلم​

مؤلم ​


مؤلم !!!​


ويحك يا قلبي على ما قرأت ​

تساقطت دموعي وانا اقرأ ذلك ​


لا حول و لا قوة الا بالله العلي العظيم

​
 

غاليتي التعبير يخونني في هذهـ الحضه
والدمع ينزل على خدي والعبره تخنقني
وأنا أقرئها أذكر ربي عليكم
وأقول ربي زيدهم من فضلك
وقي الجزء الآخير خانني التعبير
وما أقول غير الله يصبرك
والله يرزقك نعمت النسيان
الله يفرج همك ويريح قلبك
وينور دربك ويثبتك
أن لله وأن إليه راجعون
::::::::::::::::::::::

​
 
اه يالقهر
قصتك مؤلمة
واللي يقهر انة زوجك كان زي السمنة علي العسل وملاحظتي شئ تغير في تصرفاتة معاكي يعني ما كان في اي علامات في اسلوبة في كلامة في خرجتة من البيت ولا علامة تدل انة في شئ غلط وفي خيانة
هذا اللي قاهرني
والشئ الثاني مع مين بيخون مع قريبتك اااااااااااااااااااااااااااه يالقهر
خوفتيني من زوجي
 
مدري كم مر من الوقت وأناأبكي بحرقه وأرتجف ودافنه راسي برجولي
كنت أحس بيدين أمي وخالتي مثل النار على جسمي..ودي أصرخ فيهم وأبعدهم عني بس ماقدرت
وأسمع أمي تقول لخالتي
بنتي تنتفض أخاف يجيها شئ
من بين دموعي
سمعت خالتي ام فهودي تقول:
هي يمكن مانعته عن الزواج كان خلت الرجال يتزوج بدل مايسوي الحرام من وراها!!!

تخيلتوا معي ردها!!
ماقدر أوصف حرقة قلبي وأناأسمعها تقول كذا!!
يعني هي جالسه الآن تقدم عذر لفعلة بندر وهدى!!
وإلا جالسه تحط اللوم علي!!
يعني كل هذا غلا لهدى!!

سمعت خالي منفعل ودخل عندنا يصارخ
:الحقيرة قطعت عقالي على ظهرها..وأنتي وين زوجك؟ وينه؟
‏(لأن بيت ام هدى بينه وبين بيت جدتي دقايق معدوده)
سمعت صوت بندر بالصالة يسأل عني ونورة ترد عليه
:حرام عليك يابندر وش اللي سويته كسرت قلبها ياويلك من الله ياويلك من الله
طلع له خالي يصارخ عليه
:ماخذها لشقة يالحقير..بدل ماتكسر راسها إذا سمعت أنها مسوية شئ..هذي أصلا تستاهلك وتستاهلها

صرت ماأسمع الصوت وكأني بحفرة..ماأسمع شئ حتى صوت بكاي أنقطع
أبي أتكلم حسيت لساني ثقل وأحس تنميل براسي وغثيان
بعدها ماحسيت بشئ

صحيت وأنا بالمستشفى على صوت خالي:الحمدلله ع السلامه خوفتينا عليك كل هذا دلع
:خالي وش صار..ليه أنا هنا
:مافيك إلا العافية دوخه خفيفه وعدت وبعد ساعه بنطلع
:وين أمي
:أمك أزعجتنا تبكبك وحلفت عليها تطلع من المستشفى كله ههه وشوفيها جالسه برا هي وأم بندر
جلس خالي يسولف يبيني أضحك وأنا أحاول أبتسم مجاملة له..
سكت شوي بعدين تكلم
:هذي بنت خالتك أستري عليها ولاتجيبين طاري الموضوع عند أحد بالذات أبوك وأخوانك

مارديت علية أخذني التفكير لزوجي أحس قلبي طلع من مكانه ودي بشئ يغسل ألم بداخلي

قطع تفكيري كلام الدكتورة
:سلامتك ياابتهال ماعندك شئ إلا شوية أنخفاض بالضغط وأرهاق عصبي..بعطيك أدوية تستمرين عليها وحاولي تزودي الملح في أكلك..اوكي..وريحي نفسيتك بلاش من الإنفعالات الزايدة..

أخذني خالي لسيارة عند امي وخالتي وراح يجيب الأدوية
...
أول مادخلت بيت أهلي حسيت بشعور غريب..كأني غريب ضايع ماله مكان..كأني أول مره أدخله.. كأني طفل تيتم..

توضأت ودخلت غرفتي وأمي طول الوقت تلاحق وراي
طلبت منها أجلس وأنام لوحدي
قفلت باب الغرفة
فرشت سجادتي وكبرت وبكيت من كل قلبي..طولت وأنا واقفه أبي أكمل الفاتحة ماقدرت إلابعد وقت طويل..بكيت ودعيت ربي يربط على قلبي وأن يمسح الحزن عن قلبي..لأني فعلا حسيت بطعم الحزن الحقيقي..صرت أردد
أن لله وأن إليه راجعون
جلست أبكي وأناأتذكر هدى ولاحسيت بالوقت
أذن الفجر..تذكرت كيف كانت تصرفاتها وأفكارها ناحية الرجل كالعطشان يريد ماء..مزحها وكلامها وضحكها كله عن الجنس..ياما وياما سألتني عن بندر كيف معي بالفراش..وإذا صديتها برد بدون ماأجرحها..كانت تضحك تقول خايفه علية تحديني أجيب راسه..
تذكرتها مره كانت تسولف بواحد متزوج يكلمها وتضحك تقول أن زوجته دخلت عليه وسألته من يكلم
وسبها وشتمها وطردها من الغرفه وهدى على الخط تسمع
وفرحانه لأنه بنظرها يحبها اكثر من زوجته!!!...
أذكر أني قلت لها يااااحياتي يازوجته حسبي الله علية
والله من قلب أشفقت عليها وأنا ماأعرفها
أشياء كثيرة مرت قدامي
أسلوبها بالكلام لسانها الحلو حسبي الله هونعم المولى ونعم النصير
...
مر أسبوع وأنا بعالم ثاني
ماأطلع من غرفتي
ما أطيق شوفة أي أحد
حتى جوالي مغلق..كنت عارفه أن بندر بيتصل ويرسل بس ماكنت أقدر أستقبل منه أي شئ أوأسمع أي شئ..أكذب عليكم إذا قلت أني كرهته لاوالله ماكرهته..تمنيت أن الألم جاء من أحد غيره عشان ألجأ له بعد الله..
كل ماأحط راسي بنام ماأقدر أنام ماأقدر..أتخيل أني نايمه بين يدينه
الأكل ماأقدر آكل أشوفه قدامي
كل شئ أسويه أتخيله معي
وأبكي على فراقه
أحس أني أدمنت على معاملته لي
أتخيل شكلهم على السرير وأشم ريحة عطرها..لدرجة أني أقوم من فراشي أحط عطر على يدي وأشم ريحته عشان أبعد ريحتها عني..
أحس بقهر وعجز
القهر طعمه مر ..مر..
حسيت أني شارفت على الجنون
أقرا قرآن وأصلي بس تعبت تعبت
صرت أبكي قدام أهلي
:أبي أنام بنجن أبي أنام راسي بينفجر
صار أبوي عندي حاط يده على راسي ويقرا قرآن وينفث
تمر ربع ساعه ولانمت
أبكي أقول لأبوي ماقدرت أنام راسي بينفجر
صرت آكل حبوب منومه وبالعافية أنام 4 ساعات
أي شئ آكله كنت أرجع وأنتم بكرامه
رحت قالوا لي عندك قولون وألتهاب بجدار المعده
كل هذا خلال اسبوع بس والباقي أشد
بعد هذا الأسبوع طلعوا خالاتي والبنات لمنتزه..كل هذي الطلعه خصيصا عشاني..رفضت أروح معهم..كنت أحس بالسخرية
أي طلعة أي خرابيط..الحزن والضيق في الصدر موفي المكان

بعد مارجعوا من المنتزه دخلت عندي نورة
:ياوقاحتها تخيلي جايه ومتكشخه تلعب وتاكل وتضحك مومثلك يالخبله منخشه كأنك أنتي الغلطانة
:عمرك شفتي المقتول يطلع ويلعب وياكل؟..
:ابتهال أرجوك
:بس يانورة ماني مستعده أسمع أي شئ نفسيتي تعبانة أرجوك أتركيني..
...
مر شهر حاول بندر في أهلي أني أشوفه أو على الأقل أكلمه ورفضت
ماأردد إلا طلاقي أبي طلاقي وبس

والحقيقه اللي في نفسي أني مابيه يطلقني ولاأبي أرجع له وأشوفه بعد اللي صار

صرت عصبية وأتنرفز كثير من كلام أمي عن بندر أو عن موضوعه..إذا شافتني ساكته قالت كل اللي صار لك اكيد عين فلانه أوعلانه
وإحمدي ربك ماجاك منه عيال
أن رفضت آكل صرخت علي
تسب بندر
وأنا أتضاااااايق وأتضااااايق
إذا طلبت منها تقفل الموضوع قالت ايه تدافعين عنه بعد اللي سواه فيك
دايم وأنا في نقطه مسدوده مع أمي..
ماحد حاس فيني إلا أبوي..كان يطلعني كثير..ويفتح معي مواضيع كثيرة..يعطيني أشعاره وخواطره اللي يكتبها عشان أعطيه رأيي فيها
وصار في جدال دائم مع امي بسببي..
قال لي عطي نفسك فرصة ولاتستعجلين بقرارك
:بعد اللي حصل منه أرجع له!
:يابنتي الله يغفر ويسامح حنا يالبشر ليش مانسامح،،النقطة الثانية هل أنتي فعلا مقتنعه بفكرة الطلاق أوبس لحظة غضب؟ لايأثر عليك كلام أمك أن مايربط بينكم أطفال وطلاقكم هين..يمكن فيه رابط بينكم أقوى من الأطفال حنا ماندري عنه ..أنتي أستخيري وفكري
:أن شاءالله

صديقاتي ماتزوجوا وصرت أهنيهم على كذا وأقول ياخسارة دفنت نفسي من بدري

حنان تتصل تسأل عني وقالت لي أن بنتها تنتظرني عشان أشوف مريولها وشنطتها

ياسبحان الله السنين مرت بسرعه جاء في بالي القرآن كم حفظت منه؟!..
قررت وسويت لي جدول أحفظ فيه القرآن..أرتاحت نفسيتي وأستغنيت عن الحبوب المهدئه
لكن الحزن مازال..والتفكير في بندر ذبحني..
ماأنام إلاوأنا أبكي وأدعي ربي يصبرني
وفي ليلة نمت وكعادتي أبكي حزينه
حلمت أن واحد يقرا علي قرآن بصوت جميل..صحيت وجدت حزني ذهب وماله وجود..حمدت الله ومن الصباح كانت شهيتي للأكل ممتازه حتى أهلي مستغربين التغير المفاجأ..

مرت 4 شهور على اللي صار خلالها جات خالتي ام بندر تترجاني أرجع وبكت قدامي قالت والله أنه مريض وحالته مايعلم فيها إلاالله
أشرحت لي اللي صار أن هدى أقتحمت حياته على أنها تبي مساعده منه إلين تمكنت..
أنا هذا الكلام مايسوى عندي أي شئ ..ماهمني كيف وليش..أنا شفت الخيانة بعيوني وخلاص..

عرفت أن خالتي ام بندر راحت تجلس عند بندر في بيته لأن نفسيته تعبانة..

طبعا تركت الجامعه ولافكرت أجيب ملفي ماكنت أبي أشوف أحد تقوقعت على نفسي

في جلسة مع بنات خالي في بيتنا..قدموا لي تحقيق عن سبب وجودي عند أهلي..مرات أطنش ومرات ترد نورة بالنيابه عني

مها:ههه هدى تقول طبت علينا قبل نسوي شئ!!!!!!!!!!!!!!

بعد تفضح نفسها!!

ماقدرت أتحمل نظراتهم لي حسيت أن بندر صار نقطة سوداء بحياتي لازم أتخلص منها
مع أني في داخلي أنزف وأنزف أحس أني وحيده بدونه..ميته..
كان ودي أحد يجي يصحيني ويقول كل اللي صار في المنام موفي الواقع..كان ودي أصحى وألاقي نفسي في بيتي..

أصريت على الطلاق وبأسرع وقت طلب بندر أنه يجلس معي لآخر مره أوحتى يكلمني ورفضت

بيوم جاء أبوي وأنا بغرفتي وبلغني أن بندر طلقني..
دعى لي أبوي أن الله يعوضني خير وطلع..

وآااااه بس..حسبي الله على اللي كانت سبب في أني أعيش هذي اللحظة..أنقتل كل شئ فيني كان ودي أصرخ للعالم كله:أبي بندر وبس
بكيت لين جفت دموعي..دخلت المستشفى يومين..
أمي كانت معصبة
:اللي يشوفك يقول وحده فقدت أهلها مره وحده...يومك تحبينه كذا ليش مارجعتي له!

كان ودي أقولها أيه فقدت كل شئ كل شئ كل شئ..بندر هوكل شئ وراح..
ماكنت متصوره كيف أعيش بدونه
كرهت بيت أهلي والمنطقة كلها باللي فيها..ماعاد صار شئ يرضيني
أجلس قدام التلفزيون أسمع الأخبار أنتظر أحوال الطقس
ياالله إذا قال اسم المنطقة اللي عشت فيها مع بندر أحس بسعادة..

كنت أتضايق إذا أحد قال أنتي صغيرة وحلوة و..و..
مابي شئ اسمه زواج
وبنفس الوقت أحس بفرااااغ كنت أشتاق لحنان بندر..

بعد سنة من طلاقي وافقت على الزواج من خالد.. كان من أقرباء بندر ..أبوه وأبوبندر عيال عم
خالد كان مطلق زوجته بعد شهر فقط من زواجهم

وافقت عليه بعد ألحاح من أهلي..
ماكنت أحس بالفرح ..
طلب أنه يشوفني قبل الملكة وفعلا شافني
تم كل شئ وأنا ماأحس بأي سعادة أوأي شعور ناحيته
رفضت أنه يسوي زواج أوحتى حفلة بسيطة

خالد من عائلة غنية..جامعي.. وسيم جدا"وهذا الشئ مخليه ماخذ في نفسه مقلب أنه أفضل الناس..اللي يشوفه يقول هذا راقي بتعامله مثقف محترم
لكن من عشرتي معه طلع فاشل بمعنى الكلمة..خسارة الشهادة فيه
ممثل محترف بارع..
من أول ليلة كنا بالفندق أول مادخلنا(وماكان بيننا اي اتصال بعد الملكة) قال بأسلوب جااااف: بدلي ملابسك
أول مابدلت ملابسي أخذ اللي يبي وعطاني ظهره ينام
اليوم الثاني من الصباح جالس ع اللاب توب
الأكل يطلبه ويقول يالله تبين تعالي
سافرنا اسبوع ممل بمعني الكلمة صااامت..جااااف..ماحاول حتى يعرف عني أي شئ
تفكيره همجي الحرمه عنده خادمه تمشي مثل الساعه على قولته
ياويلها إذا تأخرت بشئ
يقول بحط لك نظام
ويسرد علي الجدول اليومي وكأننا في إدارة حكومية
نظامه بالساعه كله عن تنفيذ طلباته وخدمته وطلعته من البيت ويختمها بي
:الساعه 11 تدخلين تسبحين وتلبسين قميص نومك وأكون أنا راجع من برا
ويوم الأربعاء إذا صحيت المغرب أوديك أهلك تجلسين إلين الجمعه بالليل
أبدا" مافيه تآلف بيننا ولا إنسجام هويبيني خادمه فقط يعني لاكلام لاغيره أنفذ طلباته وأطلع عنه عشان ياخذ راحته مع الجهاز
أما الجنس فهويبيني جريئه ويملي طلباته
بعكسي تماما"
تذكرت بندر اللي كان يحب خجلي

تعبت من خالد ماقدرت أكون مثل مايبي ولاهوقدر يكون مثل ماأنا أبي
كنت أحلم بكلمة حلوة منه
أولمسة حانية
لكن أبدا مافية

قالي أنة طلق زوجته لأنها نحيفه مره ولاأعجبته بالفراش!!!
من أول أسبوع أكتشفت أنه صاحب مكالمات من وحده لوحده وأكثر من جوال لكن عادي ماأثر فيني ولاأهتزت فيني شعره عليه
انسان يحب المظاهر تصوروا الشئ الوحيد اللي يهتم فيه فهو لبسي وعطوراتي يقول لأنك بتعكسين مظهري قدام الناس وش بيقولون الحريم زوجة خالد ماتلبس ماركات !!!

أكثر من مرة يزعل بسبب لبسي يبغاني ألبس في مناسباتهم قصير وغيره وغيره
يقول عباتك ع الراس موذوق
يبي يكشخ فيني بالأسواق!!

لسانه بذئ بمعنى الكلمة
يجرح ويهزأ
ماعنده رحمه أو رأفه
تصوروا مره صحيته الظهر لأني مكتومه موقادرة أتنفس
وداني المستشفى وبالسيارة يصارخ ويلعن ويسب ويدعي علي

يتبع
(سامحوني على التأخير كنت ناويه أنزلها اليوم بعد الظهر بس حصلت لي ظروف ..بكره بإذن الله بنزلها بدري الصباح..
الله يجزاكم خير يابنات
ترى خاصية الرسائل الخاصه عندي ماتعمل يعني أستقبل فقط
ماقدر أرد....جنوبيه تسلمين يالغاليه...)
 
الله يجزاكم خير..يالغاليات
برد عليكم بعد أنتهاء القصه...
والله كل حرف كتبتوه أثر فيني..
أسأل الله لي و لكم أنشراح في الصدر وسعة في الرزق وسعادة في الدارين..
 
يافرح وينك..الفرح موجود..الأمل موجود..الله فوق كل شي الله معانا..حبيبتي قصتك ماتتخيلين كيف وقعها علي وصدقيني والحمدلله أنا لي معاناة مع الخيانه بجميع أنواعها والحمدلله ربي الحين مسح على قلبي حبيبتي والله العظيم حسيت بحرقة قلبك مع كل حرف كتبتيه ويارب يشرح صدرك ويريح بالك ومنتظرينك يالغاليه وياقلبي يكفينا أنك تدخلين وتفضفضين لأنك وبصراحه راح تلقين هنا قلوب تاخذ بيدك وتوصلك لبر الأمان مثل ماعملوا معاي والله العظيم أنك هنا راح تشوفين قلوب أخوات يخافون عليك مثل أهلك وأزود..منتظرتك يافرح وينك..وعلى فكره الفرح موجود مهما قست علينا قلوب البشر..
 
له له له ياعزيزتي له
شو هدآآآآآآآآ..؟؟
قصتك كسرتني
اسال الله ان يفرج همـــــــــــــــــكـ
وصدقيني عزيزتي مهما ضآآآآآآآآآقت تفرررررج
فما بعد العسر الا يســـــــــــــــــــــــــــــر
قلبي معآآآآآآآآآكـ
>>
حتى اسمك يافرح وينك؟
من جد الاسم لحالو حكآآآآآآآآآيـــهـ:tears:​
 
والله ياأختى انت ماتعلمى كيف اثرت فينى قصتك هذه والله احس قلبى يتقطع الله يكون بعونك
قبل كده كنت بسمع عن الخيانات وما افكر ابدا ان يحصل معايا كده الابعد قصتك صرت خايفة جدا ربنا يستر وخاصة ان زوجى مسافر حاسة انى لوحصل معى موقف ذى ده ارووح فيها ما اقدر استحمل حتى لوجواز اللى كان مطمنى انه ملتزم الحمد لله وبيحبنى كتيير لكن بعد قصتك وبعد المعاملةاللى كان معاك بها بقيت ميتة من الخوف انا ببحث عن بقية القصة من امس الى ان لقيتها دلوقتى الله يكتر فرحك يارب
وحياة خالد دى كمان طيب ليه ما قابلتى بندر بعدها انا عارفة ان جرح كبيييييييييير بس نفسى يعوضك بحنانه (معلش انا جنوبية) يارب تلاقى فرحك وان شاء الله يكون قريب
 
كنت دايم أتودد لخالد وأحاول أكون الزوجة المثالية..كنت حاسه أني عايشه لحالي..
من أول مارجعنا من السفر حصلته مجهز لي لاب توب هدية يبغى يشغلني بأي طريقة
وقالها بنفسه :أنا أفتح جهازي روحي أنتي أجلسي ع جهازك وسلي نفسك!
كل أربعاء يتركني عند أهلي ويسافر مع أصدقائه أو يسهر معهم ولايرجع إلاالجمعه..لايتصل ولايرسل..جربت أرسل له رساله شوق ..ولافكر يرد..
مره سافر أسبوع ولاأتصل
أتصلت فيه سألته عن الحال وكانت مكالمه عادية ثقيلة خالية من أي مشاعر سألني نهاية المكالمه
:تبين شئ؟
:لا
:يالله الشباب ينتظروني!!
قلت له بعد مارجع
:خالد ليش ماتتصل علي؟
:ليش أتصل عليك..عند أهلك بآمان وأعطيك البطاقة(الصرافة)
...
أخترت الوقت اللي كان هادئ فيه
:خالد ممكن أتكلم معك شوي
:تفضلي
:طيب سكر الجهاز وناظر فيني
:نونو أنتي..لازم الواحد يناظر فيك وأنتي تتكلمين..عشان يثبت لك أنه يسمعك
:خالد أنت ليش تعاملني كذا؟
:ياسلام وكيف تبغيني أتعامل معك ياسمو الأميرة؟
:دايم تعاملك جاف..عصبي..تتجاهلني..حتى كلمة طيبه ماأسمعها منك..
:استحي على وجهك هذا بدل ماتحمدين ربك على النعمه اللي أنتي فيها..غيرك يتمنى ربع العيشة اللي أنتي عايشتها..وإذا على عصبيتي هذا طبعي يابنت الناس أعصب يصير لساني وسخ ماعرف أمي من أبوي!! ولازم تتعودين على كذا..
:طيب طلعاتك ياخالد أناحاسه أن مالي وجود في حياتك أحسك تتجاهلني..الحب من الله إذا موحابني مافيه شئ يجبرك علي
:وش فيها طلعاتي؟عادي كل الرجال يطلعون يعني تبيني أجلس 24 ساعه في البيت..وبعدين منو قالك أني ماأحبك وأتجاهلك.. عمري دخلتك السوق وطلعتي وأنتي نفسك بشئ ماشريته لك؟
:لا
:مطبخك ناقصه شئ؟
:لا
:بيتك ناقصه شئ؟فيه شئ موعاجبك نغيره؟
:لا
:أهلك أسبوعيا"أوديك لهم صح ؟
:صح
:طيب وش اللي ناقصك؟
:ناقص أنك تسمعني الكلمة الطيبه..تجلس تسولف معي..نطلع مع بعض..أبي أحس بقربك ياخالد
:شوفي كلام المراهقين هذا ماأحبه لايكون بس تبيني أقولك ياعمري وياحياتي..أتركي عنك هالخرابيط وأهتمي في بيتك وزوجك..والطلعات أنا إذا شفت مزاجي 10على 10 بقولك ألبسي ياابتهال بنطلع..
:ايوه لكن
:بس ياابتهال أنتهى الموضوع..

كنت أوهم أهلي أني سعيدة مع خالد..
أموت مية مره من كلامه..مايعجبه شئ..ينتقد كل شئ فيني..
مايمر يوم إلا يصارخ فيه ويسب يا....
ويا....
والأسباب تافهة جدا جدا
تحسون أنه يدور الزلة..

كم مره يقول بوقت يكون رااايق فيه:ترى ماعندي مشكلة أي يوم يضايقني شئ منك على طول لأهلك وورقتك معك<<هذا وهومبسوط
:إحمدي ربك أنك متزوجة خالد بن...<<هذا بأعلى مراحل الإنبساط

من الأسباب اللي يصارخ بسببها ويهدد بالطلاق
لما أجيب له كاس ماء وماتعجبه برودة الماء
لما يشوفني جالسه على التلفزيون<ويكون في هذي اللحظه ماله خلق يشوفني جالسه عنده
أشياء تافهة ماتنذكر مع أني أدور رضاه بكل لحظة..
صرت بليده ماأحس..حتى أهلي صرت ماأشتاق لهم..
أجلس في بيتي من الأربعاء إلى الجمعه يسهر برا البيت إلى الصباح
قلت له :ولاترسل ولاتتصل تطمن علي جالسه لحالي ..
:ماأحد قالك تجلسين الأربعاء عندي!!
مايحب الجمعات والمناسبات حتى لما يكون فيه مناسبه في بيت أهله ينزلني ولايدخل
وإذا راحوا الناس يرجع يتعشى
إذا سألته ليش؟
يتكلم عن عمه فلان وولد عمته و..و..
يغار بشكل فظيع..يحقد على اللي أخذ شهادة أوشرى سيارة..حتى إذا واحد فيهم تزوج يسأل أمه عن جمال العروس يموت قهر إذا قالوا أنها حلوة!!!
مره وحنا في السيارة رديت على كلامه:بصراحه أول مره أدري أن الرجال يغارون من بعض..!
وجلس يصارخ..لدرجة أني حسيته بيقتلني

دايم يسب بندر قدامي..ويحط عيوب الدنيا فيه..يتعمد أنه يحضر المناسبات اللي يكون بندر موجود فيها..
كنت أكتفي بالصمت فقط

حضروا مناسبه وكان خالي حاضرها
وقابلت خالي في بيت أهلي
:الله يعينك ياابتهال على المريض اللي عندك
:تقصد خالد
:ايه أعوذ بالله نفسه شينه وكأنه طفل..ويتعمد يغيظ بندر بسوالفه إلا أنتي مرتاحه معه؟
:ايه الحمدلله
:والله ماأظن
:لا خالي مرتاحه ماشية أموري
:عمرك لاحظتي عليه يكلم حريم
:ايه أدري ليش تسأل
:لا بس واضح كل 5 دقايق يطلع يكلم
:عادي ياخالي مايهمني ياليته بس يعاملني بالطيب ولايغلط علي..
:نصيحة مافية شئ يسوى تضغطين على نفسك
:كيف يعني تبيني ياخالي أتطلق مرة ثانية
:أهم شئ الإحترام واللي يهينك طلعيه وسكري الباب بينك وبينه
...
ماأحد صار يتكلم عن بندر أمامي إلاخالي..كان نفسي أسأل أمي أونورة عن حاله بس ماقدرت..

عرفت من خالي أن جدي خطب هدى لبندر ووافقت عليه بدون مهر إلامبلغ بسيط من جدي تتجهز فيه..

بعد شهرين من زواجي راحت هدى وولدها مع بندر..بكيت بكاء مرير..
زرت أهلي قالت لي نورة أنه مقهور يقول ماحصلت إلاخالد ولدعمي تتزوجه!..قلت لها ماله دخل فيني قالت لي تراه إلى الآن يبكي على فراقك..مريض ونحف كثير..
قلت لها وأناسعيدة على فراقه ومايهمني..
...
أبكي طول الليل أحسد هدى على بندر..كرهت طيبتي وسذاجتي.. وذل خالد لي وإهاناته..

رحت لدكتورة عشان الإنفلونزا
قالت لي:قبل كل شئ أنتي متزوجة
:ايوه
:بسوي لك تحليل حمل
:لاماأظن حامل
:ليه الدورة عندك
:لا بس هي صارت تتأخر عشان نفسيتي تعبانه
:طيب نتطمن

بعد نص ساعه قالت لي
مبروك ياقمر حامل
:أيش
سوت لي أشعة..طلعت حامل من أول زواجي ولاكنت أدري..
حسيت الدنيا تدور فيني
ليش..لييييش..أستغفرالله
طلعت ركبت السيارة وهومعصب كعادته
:هاه وش قالوا لك..مرض خطير يفكنا منك..
كملت بكاي وهومشى رايحين البيت
:أوف اسكتي جبتي لي الهم ولوماأنكتمتي بفتح باب السيارة وأرميك معه..
...
يتبع
‏(بجهز الغدا..وأرجع أكمل لكم)
فراولة لاحبيبتي لاتشكي ولاتخافي من زوجك
صدقيني أنا عارفه شخصية بندر يتأثر كثير بالكلام مع أني متأكدة أنه يحبني...وعارفه شخصية هدى زين..
 
بصرااااااااااحهـ

اهنيك ع قوة اردتك

ووصفك للحظة الخيانهـ

روعه رغم المهـ

واللي يظهر لي من قصتك

انك بنت ناس واصل

رب الملا يحميك من كل شر​
 
لا تتأخرى علينا كتير نفسى اعرف النهاية
انا اول مابفتح الجهاز على طووووووووول على قصتك
الله معك
 
الحالة
مغلق و غير مفتوح للمزيد من الردود.
عودة
أعلى أسفل