آآه جت الاجازه ومشاكلها
السلام عليكم ورحمة الله وبركاته هانحن على مشارف الاجازه اسال الله ان تكون مباركه على الجميع وان يوتينا من خيرها ويكفينا شرها اخواتي لااجد احد افضفض له مابخاطري بعد الله سواكم زوجي عادة يسافر لحاله وبعدين يسافر فينا وهالمرره لا بنسافر مع بعض ومع والدته الله يخليها له ويخليه لها والمشكله اني اشيل هم كبييير للسفر خاصه مع بعد المسافه وبعد وجود شخص من خارج الاسره والدة زوجي مو معنا بالبيت ومو متعوده عليها مره ولو نطلع رحله كم ساعه اكون رسميه وما اخذ راحتي واملل لاني مااحب التكلف في حياتي ومااتحملل اجامل مده طويله وغير هذا زوجي ماشاالله عليه بار بامه مره ويداريها هي والله طيبه بس بصراحه اكون مكتووومه واذاسافرنا مع بعض ماادري كيف احس زوجي مايهتم فيني لانه يحس ان فيه احد مالي عليه وقته ومو بحاجتي عاد هو خلقه جاف وما يراعي المشاعر خبركم الشماليين متعبين تخيلوا لما كنا عند البحر وداخل يسبح مع اطفاله بمجرد ماشافني دخلت طلع بسررعه ولو ضايقني بتصررف مااقدر اتكلم ولا اطللع اللي بخاطري عاد لازم اذا سافرنا نتخانق وهو بنفسه يقول انا اذا فضيت وعطلت ادوور المشاكل لاني اعاني من الفراغ ومتعوود ع مشاكل الدوام طبعا عيب ارد عليه وفيه الماما وضغط نفسي مايعلم به الا الله ووقته كللله مع الماما يستحي منها ولا يدخل الغرفه الا اذا داخ وبغى النوم والسواليف الخاصه عالطاير مرات احس اني مكبرره السالفه واقول الدنيا ماتسوى مشيها ياروائع وعيشي ببساطه ولا تعقدين الاموور بس من نبدا السفر تبدا المتاعب والمشاكل واكتم واذارجعنا قلت هذي اخر مرره عساي اتحمل اسلوبك واحنا لحالنا عاد وانت اخذ الماما يعني الاقيها منين والا منين والله اني اغبط اللي ببيوتهم لايسافرون ولاشي وش كسبنا من السفر الا وجع الراس والبهذله وهم الخطوط السريعه الله يحمينا واياكم والمسلمين والا بهذلة البحث عن سكن آآه والله تعبت شاركوني ارؤكم واقتراحاتكم وتجاربكم وتقبلوني برحابة صدر ودمتم
اسم الموضوع : آآه جت الاجازه ومشاكلها
|
المصدر : الأستشارات الزوجية العامة