صدمتي في سرير الزوجيه
- السلام عليكم
عندي موضوع ماني عارفه اتكلم فيه عند منو او شلون اشرحه
جنني فعلاً
انا متزوجه حديثاً ما صارلي سنتين
واخذت زوجي عن قصه حب
عندي صعوبه اني اتناقش مع زوجي في امور الجنس
يمكن في مجتمعنا النقاشات هذي ما تحصل كثير وبتحرر مثل الاجانب
ولكن في امور اساسيه وضروريه الازواج يتكلمون فيها ما عليها اختلاف
مثل المصارحه عن النشوه الجنسيه
او التحدث عن بعض الحركات الغير مرغوبه في السرير
او ( انا يعجبني هذا الشي وما يعجبني هذا الشي )
امور مهمه جداً تقرب الزوجين من بعض وتزيد التفاهم بينهم و تقوي العلاقه
لكن انا زوجي يرررفض رفض قاااطع اتكلم عن اي شيء
انزين يا زوجي ممكن نتكلم شنو تحب وما تحب؟
-مع الوقت بتعرفين
والوقت ما علمني شيء، ولو بفترض اني توني متزوجه وبعدي ما شفت شي >> تسبقكم بالرد
اللي يحصل هو، لو سويت شي ما يرغب فيه او يكرهه يزفني في وسط العلاقه يا بنات! متخيلين؟! او يبعد وجهه عني اذا كنت ابي ابوسه مثلا وهو ما يرغب
وفي اوقات ثانيه يرغب اني ابوسه ويتصرف طبيعي ويندمج والوضع سكر نبات!
كيف يعلمني الوقت وهو اطباعه متقلبه؟!
يعني شي غير ثابت عشان احفظه او نفترض الوقت يعلمني
شي يحير الصراحه ويحطني في مواقف محرجه جدااااا
والادهى من هذا، ان في بعض الاوقات تحصل امور خطأ او حركه كانت مؤلمه او وضع انا مو مرتاحه فيه ويحق للللي اتكلم
بس مع زوجي يا ويلي لو فكرت اني اوجهه او انبهه!
يرد علي بنفس اللحظه ويقولي: شرايج تعلميني بعد شنو اسوي؟!
اقوله والله اني ما اعلمك ولا اني احسن منك او احاول افرض رأيي عليك
لكن شنو فيها اذا وجهتك او نبهتك؟! بالنهايه نبي متعتنا احنا الاثنين
ولا ما يهمك وين تكون متعتي؟!
يرد علي: انا عارف شنو اسوي، لا يكون مو عاجبج لا سمح الله؟!
والله يا بنات تخنقني العبره وابجي من كل قلبي
انا بشر والله عطاني جسد وعطاني الحق بالمتعه مع زوجي
ومع هذا زوجي يعاملني معاملة ( تقبلي شنو اسويلج واعطيج وانتي ساكته! لا تقولين لي سوو هذا ولا تسوي هذا ولا تقولين لي بوسني او المسني، او تحطين ايدي على خصرك او ظهرك، انا عارف شنو اسوي )
حلو ان الزوج يبغى يكون المسيطر والقوي والمتحكم
ولكن في امور لا شعوريا تحصل، او غير متعمده فيها
مجرد ملاحظه اقولها او شي اسويه وفي المقابل اتوقع منه تفاعل ( مثل موضوع البوس وان يوخر وجهه )
انا شعرفني انك تبي او ما تبي
ليش تعفس الدنيا وتعفس وجهك بوجهي وتطالعني بنظرات غضب؟ ما يستحق الموضوع والله
لو اقول ينتقد او يعلق او يرفض شي معين بهدوء وحنيه لان الموقف حساس وما يسمح
لكن اللي يحصل هو العكس تماماً!
خصوصاً يكون مروق على قولتكم ومزاجه عالي ويبتسم ويتغشمر، يعني ما يكون مزاجه متعكر قبلها وانا سويت شي في وقت غلط
بالعكس احاول اكون على طبيعتي واضحك واتغشمر ونكون مشتاقين لبعض بس فجأه! يتغير كل شي لي درجة انصدم واستغرب اقول لنفسي: يا ربي شاللي سويته غلط؟؟؟؟؟ شفيه علي؟؟
زوجي عادي عنده ينفصل عن اللحظه ولا كأنه ويرجعلها بثواني
وانا يعتفس علي الوضع تماااما لي درجة بعض الاحيان الدمعه بعيوني
او وجهي يقلب احمر بسبة الاحراج واحس بروحي صغييييره وتافهه واكره نفسي
حاب يسوي كل شي على مزاجه
اذا قلت له لازم نتكلم بهذي الامور في غرفة المعيشه عشان نتجنبها في غرفة النوم، لازم نتكلم ونتحاور ونتناقش ونعرف اللي لك واللي عليك، اقل شي يا ولد الحلال بس انا اعرف عنك انت مو لازم تعرف عني اذا ما يهمك
بس عالاقل نتوصل لحل وسط
يرد علي ان مواضيع الفراش بعضها "خط احمر " ولازم ما اتجاوز هذا الخط!! وعيب علي اتكلم بهذي الامور!
وانا في حيره الله يعلم فيها
شلون خط احمر وانت زوجي؟! وشلون عيب؟؟! والصدمه ماخذني عن علاقة حب... والله يتكلم بطريقه وكأنه شخص ما عاش ولا سمع كأنه مولود في زمن آخر!! وهو مو كبير ترى منتصف العشرينات
يعني زمنه زمن التحرر والجرأه مو زمن جدي وجدتي.
والادهى ما كأنه عاش قصة حب معاي! كأني غريبه عليه وما نعرف بعض
اللي راح نتكلم فيه هذي علاقتنا مع بعض وهذا سريرنا وغرفة نومنا! احنا مو قاعدين نتكلم عن اشخاص ثانيين هذي حياتنا احنا ولازم نصارح بعض بكل شي فيها او يكدرها
والله احيانا اشك في انه يحبني من تصرفاته هذي وما ادري شنو اسوي يا بنات
اكثر شي يتعبني لاني اكون مشتاقه له ويجيني احساس ابي انصهر معاه في جسد واحد لحظتها. بس دايماً خايب ظني ومنكسر خاطري
وهو ولا همه
انا جدا جدا اسفه اذا الموضوع في تفاصيل لكن والله حاولت قدر الامكان اوضح بصوره بسيطه ومثال بسيط وما افصل كثير بس عشان اوضح لكم الموضوع
في تفاصيل اكثر ومواقف اكبر من اللي ذكرته بس تركت الفهم لكم
ساعدوني رجاءا
الله اعلم شكثر تعبت نفسيا من هذا الموضوع
اسم الموضوع : صدمتي في سرير الزوجيه
|
المصدر : الزوج والزواج