! سكوـون !
New member
- إنضم
- 2010/09/24
- المشاركات
- 10
السلام عليكم ورحمة الله
اولاً احب اوضح لكم امور عني .. انا متخرجة من الثانوية وعمري 18 سنة والان اجهز للدراسة الجامعية قسم حاسب وان شاء الله ربي يكتب لي التوفيق ..
متأكده ان الكثير بيتهموني بالتخريب بين الزوجين .. لكن اقسم بالله الذي لا اله الا هو اني انسانة اخاف الله في نفسي .. وقبل ان افكر بنفسي وضميري انا احب الخير لغيري .. اتمنى تقرأوا التفاصيل وتتمهلوا بالحكم
بطريقة ما كان احد الأشخاص على الإنترنت يعاني من مشاكل نفسية .. وكنت اعطيه من النصائح باسلوبي المقنع الي الله وهبني .. زيه زي اي شخص يمر في طريقي ..
ولكنه طلب مني التواصل فقط يبغى يوضح تفاصيل كثيره .. وافقت : ) واعرف ان الكثير يخالفني في هذي الخطوه .. ولكن مشيتها ..
بدأنا بالسلام وانطلق بسرد قصة حياته .. ويوم بعد يوم تفاجئت بالشخص يعترف لي بكل شي في حياته .. دائماً الناس تثق فيني مااقول اني مااستحق ولكن استغرب لانه مو اول شخص قبله كثير بنات من اول لقاء يعترفون لي بكل تفاصيل حياتهم فتعودت على هذا الشي ..
الشخص هذا عانا في حياته كثير انحرف في احد مراحل حياته صار يميل للعلاقات مع بنات .. ولكن يقول ان صديق له لحق عليه ورجعه للطريق الصحيح ( يتيم الأب وتقريبا يتيم الأم مالها اي ادوار الا السلبية فقط )
تفاجئت وقال لي انه متزوج ! كان يجلس بالساعات ولا يفارقني الا اذا كان وقت العمل .. فكيف يقول انه متزوج ؟
وقال لي انه تزوج قريبته وهي رافضته وانها ماترضى ابداً فيه ولابمحاولات الإصلاح .. يقول تكرهني كره شديد اعمى وتتقزز مني حاولت ان اطرح له حلول لإصلاح وضعهم وقلت له ثق في قدرتي انا افهم الحريم وافهم كيف يميل قلبها ولكن اعطيني فرصة اعلمك كيف .. لكنه رفض يقول اهانتني بما فيه الكفاية !
كئيب جداً الى ابعد الحدود ولكن خطوه خطوه خرج من دوامة الكئابه رغم انه في حالات يرجع لها بشكل مفاجئ ويتألم ويبكي ..!
كان يلمح لي كثير انه يميل لي .. لكن هذا الموضوع انا ماافكر فيه نهائياً ..
كان لايعترف باهماله لصلاته .. سألته عن الصلاة فقال لي انه يصلي .. رغم انه كان يهمل ولكن ماحبيت اوضح له اني ملاحظه هذا الشي .. لانه نفسياً بيتقبل لو شاف اني متقبله ..
ولكن حببته فيها بطريقة غير مباشرة كنت احكي له عن راحتي النفسيه بقربي من ربي وو .. خطوه خطوه هذا الانسان بدا يرجع للحياه ويترك الكئابه وعشقة للحزن ويتمسك بصلاته وهذا اكثر خبر يفرحني لاني اعرف مادام تمسك بصلاته بيفتح ربي بوجهه ابواب الخير ..
انا ارفض الزواج تماماً لاني اشوف ان الزواج هو مصيبة مش اكثر !
كان يلمح لي كثييير .. حتى جاء وقت واعترف وقال لي عن ميوله الشديد لي على حسب تعبيره .. وبدا يسرد لي قائمة التغييرات الي حصلت له من بعدي .. احب انوه انه شخص فقييير عاطفياً .. وهذا الجانب معدوم تقريباً في شخصيته .. يتجاهله الجميع !
حاولت اوضح له ان مشاعره تسرع فيها .. وانه قد يكون يميل لي لاني البنت الوحيده ! فأقسم لي انه لو كان يبغى ينام كل يوم مع وحده كان قدر لان الموضوع متوفر له .. وان الموضوع مش كوني بنت وفقط
قال لي الي يأكد لي مشاعري انك بعيده عن منطقتي يعني حتى لو كنت بدور الشر كنت بختار وحده قريبه .. وهو من الحجاز وانا من نجد من الرياض ..
كنت اتجاهل هذا الشيء عمداً .. رغم انه قال لي انه بالشهر الفلاني بينفصل عن زوجته ويرتاح وترتاح هي ..
ماطلب مني صورة .. او صوت .. او نظرة او او او او .. شخص مرتاح مادياً الى حد كبير جدا جدا ..
متفهم .. واكتشفت فجأه انه يفهم كل ذرة فيني رغم اني كنت اظن اني متحفظه .. فرحت كثير لاني وجدت شخص يفهمني ولكن ماوضحت هذا الامر له .. لاني ارفض تماما اني اعلقه او اتعلق فيه ..
طلب مني طلب .. قال لي اذا كنتي موافقة انا بجي وبكلم اهلك .. واقسم لي بالله انه صادق وانه ينتظر مني الموافقه فقط عليه كـ رجل مطلق وله ابن .. ابنه عمره 4 سنوات
ولكن كنت اتجاهل كلامه .. تجاهلت كثير لاني ارفض هذا الموضوع نهائياً ..
ولكنه كان يعيد ويكرر .. الى ان جاء احد الايام وقال لي اتمنى انك اليوم فقط تاخذي الموضوع بشكل جدي واعطيني اجابه .. نعم لا ..
قلت له اني ماافكر في هذا الموضوع نهائياً ولا ارغب بالزواج .. وهو بدورة غير الموضوع ولا ضغط علي .. الى ان انفتح من جديد .. وقال لي بعيشك ملكه وبتشوفين مني الي ينسيك حليب امك .. حاول يفهمني انه شخص يفهمني وانه يقدر يسعدني ويعرف الي يسعدني .. وانه ينتظر مني موافقه بس ..
ماعمره طلب مني كلمة حب .. كان دائماً يقول اعطيني فرصة اثبت لك صدقي !
انا مااكذب عليكم .. بدأت افكر بالموضوع بشكل جدي !
اخواتي ارجوكم ! ابغى نصيحة حكيمة !
ماابغى وحده تتأثر بقصته .. وتقول لي وافقي ! انا اقدر اسعده وانا انسانه اثق بنفسي اني اعرف مفاتيح كل شخص .. واني عندي القدرة اني اكون الملكة لو رغبت ..
ولكن ! هل اغامر وادخل هذي المغامره ! انا الأمر الي يشجعني انه انسان مرتاح مادياً يعني قادر يريحني من جوانب كثيييرة جداً ..
الى وقت قريب كنت احاول ما اخذ الموضوع بشكل جدي ولكن بالأمس تكلمت معه قلت له اتمنى افرح ففيك وتتزوج وترتاح بحياتك فقال لي انا سعادتي ماتكون الا مع وحده هي انتي وبس .. يقول انا اهنت بحياتي كثير ودمروني الناس ماباقي فيني الا شعره ولا ابغى ادخل تجربه جديدة واخسر .. لاني بخسر حياتي ! قال اسمحي لي بس اكلم اهلك .. فقلت له جرب .. تعال وكلم ابوي .. هو فهم اني مااخذت الموضوع بجد .. قال لاتعطيني امل وانتي رافضتني ! وقال كلام ..
انفجعت من كلامه لأنه وضح لي انه جاهز فقط ينتظر مني اشارة .. وصرفت الموضوع بطريقتي لاني فعلاً مجرد شبح الزواج يسبب لي ازمة نفسية مااعرف سببها ..
اخواتي انا مالي اخوات غيركم .. لي اختين متفهمات نوعاً ما ولكن ماابغى افاتحهم بالموضوع .. والامر الثاني اني بحاجه لنصيحة متزوجة !
الأمر الي يخليني افكر بشكل جدي بهذا الشخص .. اني لو رفضته وبعد كم سنة فكرت بالزواج .. راح اتزوج شخص مااعرف عنه شي .. وممكن تكون الايجابيات الي بالمطلق هذا ماتتوفر فيه ..!
بينما السلبيات ممكن اصححها فيه .. وهي موجوده باغلب الشباب تقريباً ..
حبيت اقول ان الفرق بيني وبينه تقريباً 9 سنوات ..
اخيراً اترك التعليق لكم .. الله يوفقكم لمى فيه الخير ويفرج همومكم وهموم المسلمات ..
