استاذه شيماء جزاك الله خير
انا قربت اجن وعقلي بدا يروح مني
وتعبت من حالتي بشرح لك وضعي بالتفصيل الممل
انا من حملت بطفلي الأول دائما احس اني بفقده
وان حريق بيشتعل وان احد بياخذه مني او حادث
او اي شي راح ياخذه مني وكانت تتكرر علي احلام فضيعه
انجبت وكبر ولدي ولازالت الافكار تهاجمني حتى اني صرت احلم وانا جالسه
حتى وانا في السياره فجئه افزع
واصرخ ولدي كأن سياره صدمتنا
احيانا كأن الولد فتح باب السياره وطاح
وكأنه حلم بس انا في الحقيقه صاحيه
لكن اشوف الموقف امامي كأنه حقيقه
جبت بعد الولد هذا بنتين ولازال الوضع مثل ما هو وصار لي موقف زاد الطين بله
اختي انا قبل 3 سنوات حضرت زواج اختي وبعد الزواج اليوم الثاني
اهل زوج اختي عملو حفله عشا اليوم الثاني من الزواج في استراحه
الي صار ان الاستراحه احترقت واحنا نجينا بفضل ربي
وكنت ابحث عن اهلي واولادي وسط الفزع والخوف
والذهول والموقف الذي لا احسد عليه والحمد لله في هذيك الليله محد تضرر وكلنا نجينا
لكن هذا الموقف زاد الافكار والخيالات عندي
وصرت ادور عيالي وهم موجودين قدامي
صرت اخاف اروح اي زواج واتعب نفسيا كل ما صار عندي مناسبه
صرت ما اروح زواجات ولا مناسبات
العام الماضي كان زواج اخو زوجي تعبت نفسيتي لأني لازم احضر
وصارت الافكار والخيالات تزيد عندي
والخوف تملكني لين عدا الزواج على خير
وقبل اسبوع زواج اختي جنيت من الخوف والتفكير
لين عدا الزواج على خير
اخاف حتى من المكيفات اروح اشم ريحتهم اخاف يحترق
او يصيبه ماس كهربائي
في الشتا اخاف اشغل الصخان
وفي الصيف اخاف من المكيف
ولاني عارفه وش اسوي
الوسواس اكل عقلي والخوف لعب فيني لعب
والاحلام تزيد لدرجه اني اسوي خطة هروب
وقصه كامله في لحضات سرحان قليله
الحقو علي بستخف خلاص بجن
نفسي احس بالأمان على نفسي وعلى عيالي
نفسي انام بدون قلق نفسي اكون طبيعيه
دلوني شسوي واش سبب الي انا فيه
انتضر ردك بفارغ الصبر ارجو من الله ثم منك مساعدتي
هذا الأمر يؤثر على حياتي وعلى عيالي
خوفي عليهم متعبني ومتعبهم
وتعلقي فيهم صار يزعجهم
لدرجه اذا رحت عند اهلي ما يبون يجون معاي
احس عيالي كرهوني اسألك بالله ردي علي
بأسرع وقت وش اسوي
