شنو يصير إذا تزوج زوجي علي؟؟!!!

[أحب الصبر]

السلام عليكم خواتي أدري من العنوان بتقول عني مجنونة!صح وأنا مثلكم نفس الراي بدخل على طول بالموضوع صارلي 7 سنوات من الزواج الكل يقول عني مملوحة وناعمة والبعض يشوفني جميلة وزوجي يشوفني ملكة جمال أخاف الله وعلى كلام زوجي إن إلتزامه كان بفضل الله أولا ثم أنا والحمدالله كانت أمنيتي آخذ واحد ملتزم وزوجي ماكان ذاك الإلتزام يصلي ويصوم عادي عندي منه بنتين وولد أكيد كثير من المشاكل تحصل بين الزوجين وأنا كنت صابرة ومتحكمة بمعظم المشاكل بس الحين يمكن تقولون هذي ماعندها سالفة ولامشكلة من جذي اطلعلها مشكلة من تحت الأرض عموما من بداية زواجي وأنا أطلب من زوجي يحترمني ويقدرني ويرد علي يقولي انتي تحبين الرسميات ماتبيني أضحك معاج!أسكت وأطنش لما كبروا عيالنا بنتي الكبيرة 7سنوات والثانية 6 والولد7شهور يعني بناتي الحين يفهون إذا ابوهم يكلمني بضحك ولا بغضب وأنبها أكثر من مرة وبعض المرات لما يكون معصب بالسيارة يصرخ علي ولا يغلط بحقي جدام البنات مساكين بناتي يسكتون لما أشوفهم بهالمنظر أقعد أضحك يعني الموقف ضحك ما أحب أبين لهم إن أبوهم قاعد يصرخ علي جد وبغضب عشان مابي الطلعة تكدرهم ويقعدون يضحكون معاي ويمر الموقف بسلام على بناتي وجم مرة أطلب إذإ كان معصب مني ما أبيه يصرخ علي جدام أحد أيا كان وأقوله لما نكون بروحنا طلع كل غضبك علي مابي البنات يحطون في بالهم إن هذي المعاملة طبيعية بين الزوج والزوجة وإن الزوج له الحق يصرخ عالزوجة ولا يسحبها من ملابسها جدامهم ولا يحرجها ولازم أنا أسكت طبعا عشان ما تكبر السالفة وتصير صيحة بين الملأ!!!!ودايما اذكره إن لي هيبة جدام بناتي فإذا بيصرخ علي جدام الخادمة والبنات محد بيحترمني دايما هذا حوارنا ومشكلتنا ويعتذر ويقول أدري انا غلطان ما أعرف أمسك أعصابي ومن هالكلام اللي مأخوذ خيره وصلت لمرحلة اليأس معاه طول هالسنوات ما عندي سالفة إلا هالإحترام والتقدير ومليييييييت من كثر ما أقرا بالمنتدى وطبقت أشياء كثيرة ودايما أنا شايله هموم امة محمد على راسي وأنا محد يفكر فيني حتى زوجي اللي أهو أقرب الناس لي! قلت خلاص بحب نفسي وأهتم بنفسي واكون أنا من أولوياتي وقويت قلبي ووشلت إيدي مع إني اساعده بمصروف البيت اللي أن من نفسي عرضت خدماتي مو أهو اللي طلب مني وايد اشياء تداركتها وأخطاء لحقت على نفسي من هالمنتدى الرائع المشكلة أهو الوضع صار عنده طبيعي يصرخ علي وما يحترمني لأني أنا أطنش ولا أسويها سالفة وحوار ونقاش لأن الكلام ضايع معاه وأنا بعد قلبي صار حجر قابل للكدمات والصدمات وأقدر اصبر علشان عيالي يعيشون حياة طبيعية بين أم واب ما أفكر اطلب الطلاق بس عندي يتزوج علي يمكن ارتاح منه لأن اهو إنسان من أولوياته الجنس وأنا عندي الجنس من المهمات بالزواج وليس الأولويات وإذا صارت المعاشرة يصير لي مثل الخاتم وإذا مافي شي يرجع مثل ال---- هذا الكلام اهو بنفسه اعترف فيه وقالي خلج على طول معاي عالخط إذا تبين اي شي طلبيه مني بعد ال-- راح أوافقَ!!! وبعديييييييين هذي مو حالة يعني بتم طول عمري أعيش بتوتر وعدم استقرار والسبة عقليته وتربيته!! أهو يحبني ويموووووووووت فيني ويعشقني وأكثر من مرة يقولي شنو يصير إذا تزوجت ليش المرة تزعل لما زوجها يتزوج عليها وانا أرد عليه أقوله ماعندهم سالفة فيسألني أنتي شنو يصير فيج إذا تزوجت عليج كنت أطنش بالرد واااايد بس الحين رديت عليه وقلتله ترى أنا بشر ولي ومشاعر وأحاسيس أكيد بتظايق إني صبرت عليك وتحملت عيوبك لما تعدلت وايد عيوب فيك وتحسنت أخلاقك وبكل برود المرة الثاية تاخذ جاهز بالأخلاق الحميدة تعيش انت معاها بدون تعب!!! قلته بصراحة اللي بيصير فيني انهيار عصبي واحتمال ادخل فيه المستشفى ونفسيتي بتتعب حيييل راح يبين علي بجسمي وصحتي بس بالنهاية الشرع محلل لك 4 وانا ما أقدر أغيراللي الله كاتبه لي إذا مكتوب لي شريكة فلا حول ولا قوة وأنا أكلمكم جد يأست من حياتي معاه ما أجذب عليكم أقولكم ما أحبه بالعكس أهو أول رجل يدخل حياتي يعني حبيته بكل عيوبه وماراح أنسى لحظاتي الحلوة معاه بس وصلت لمرحلة اليأس لا تقلولي كشخي ولبسي أهو كله يقولي أنتي مثل المزهرية بالبيت بس ممنوع اللمس أخذت دورة جوكليت عند ناعمة واستفدت منها طلع مافيني برود مثل ما كنت أعتقد بالبداية إني باردة جنسيا بس أهو ما يحترمني ومزاجي وعنده الجنس أهو الباب اللي لازم أدخل منه عشان أحصل على احترام وتقدير صار عندي فتور عاطفي مني ! مابي أطول عليكم بس لازم أطلع لأن ولدي يبجي وأذن العصر جد ما أحب أطول بالسالفة لأن أنا أعصابي تتلف لما أقرى قصص بعض خواتي بالمنتدى وأتم قاعدة على أعصابي بعرف النهاية أنا إن شاء الله بقولكم بعض التفاصيل عشان تعطوني الحل والإجابة الشافية لي إذا تزوج علي زوجي!!!!!!!! قبل لا أتهور وأنا أخطب له

 

[دلع ملكة]

حبيبتي مالك اللي الدعاء
بس تظني ان تزوج عليكي راح ترتاحي لا والله انك بتموتي
من الالم والقهر وانك السبب
افرضي غيرتو عليكي خلتو ينساكي وينسى اطفالو
انتي بصراحه مجنونه كيف تحبي وكيف تبغي تزوجي
ومايرد القضاء الا الدعاء
ادعي وان شاء الله ربنا يهديلك هو
واتكلمي معاه وقليلو انك تتصرفي كذا عشان الاطفال وعشان لا تصير عندهم عقد نفسيه
انت ترضى اطفالك يعيشو وحالتهم النفسيه تعبانه ولا يخافو منك بسبب صراخك
حاولي معاه ثالث ورابع وخامس
اول شي بيني حسناتو وبعدين قولي عيبو اللي هو بسيط
الله يوفقك ويسعدك

 

[حرب الأحساس]

مدري حسيتك معطيته أكبر من حجمه!!!!!!!!
لا تزعلين بس من جد تعودينه على الدلع وانه يعبر عن فكرة الزواج قدامك وبدون احساس منه ليه؟
وليه بتعالجين مشاكلك بمشكلة أكبر ؟
ايش فيك عشان يتزوج ليه تعذبين نفسك نفسيأ أرحمي نفسك ولا تبينين أبدا انك موافقة ع التعدد تدرين ليش؟
لأن زوجك وبيتك مو ملكك لوحدك؟؟
نسيتي أولادك مو من حقهم تحافظون على بيتكم عشانهم؟
وبعدين والله أغلب الرجال مايتغيرون الحريم هم صابرااااات وعيش معه بعيوبه بس انت تغيري هدي ومشي وطنشي بقووووة مو بضعف !!!!
حطي ضوابط للبيت وخلاص وقفي عندها
ولا ترهقين عمرك وربنا يسعدك

 

[أحب الصبر]

الله يجزاكم خير الخوات دلع ملكة وحرب الإحساس أنا فاهمة وعارفة شنو بيكون مصيري بعد زواجه الزوجة الثانية أكيد بتكون صغيرة ومتفرغتله عدل يعني بتنسيه أمه من الدلال الزايد والاهتمام بس بصراحة ملييييييييت وأنا أتكلم وعلى فكرة كل مرة أكلمه فيه ينصدم من نفسه ويقول معقوله أنا بهالمستوى تشوفيني فيه!!! ويعتذر وكلام اللليل يمحيه النهار وترجع حليمة لعاتدها القديم أول لما كان يقولي بسافر مع ربعي للملكة يخيمون كنت أقوله ريلي على ريلك مافي سفرة بروحك وكان ما يهتم فيني ويروح وحزتها ما عندي خدامة وبناتي صغار ويخلينا ويروح وأنا مقهورة الحين أبيه يفج عني يروح يسافر أعتقد لو بعد عني فترة يمكن أعقل شوي بس أهو الله يهديه وااااااااااااااااايد متعبني تصوروا الآية قلبت علي بدل ما العيال يروحون عنده يطلبون طلباتهم يلجأون لي أنا ماما نبي نشتؤك بالنادي نبي مصروف حق الرحلة نبي فستان وغيرها من الطلبات أقوله إحنا لما كنا صغار نطلب من أبونا ليش انعكست الآية الحين!!! يعني 7سنوات وللحين مافي استقرار بحياتنا لي متى ؟؟؟ أنا اللي أعرفه قالوا أول 5 سنوات من حياتكم بتكون متعبة ماصارت هال5 العمر يروح والصحة والعافية كلها قاعدة تروح والسبة هالزوج !!!! يالله مرات أسأل نفسي مافي هم بالدنيا إلا هالزوج والعيال؟؟؟!! تقريبا حرمت نفسي من كل شي أتوهق إذا صار عندنا مناسبة ولا أوجب أحد أستقبال ولادة ولا زواج شنو ألبس معاشي كله حق العيال وأهو يصرف ولا يهتم بس من عقب المنتدى تحاشيت أخطاء وااايد وبديت أطبق بس حتى التطبيق مو سهل يبيله صبر وقوة قلب عشان الكل يتعود على التغيرات الجديدة اللي سويتها ولله الحمد أستغفر ويرجع لي زوجي مثل اللي أبيه بس بعد ال--------- يرتاح ويصير متفهم أنا تعبت من هالطريقة الرخيصة طبعا أنا الحين مو عاجبته لأني قاعدة أدور على راحتي صرت ما أطبخ والخادمة تقوم بالطبخ وتشوف اليهال أنا أرجع من الدوام شايلة إيدي من كل شي بس علي الإشراف!!! من جذي صرت ما أعجبه يقولي صايرة ملكة ما تسوين شي مرات أرد عليه ومرات أطنش لأني تعبت من أسلوبه أكيد بتقولون هذي ما عنده سالفة ولا مشكلة بس في تفاصيل كثيرة حدها تدل وتوحي بقلة أدبه وذوقه يظيق خلقي إذا ذكرتها أي شي أسويه من أوامره اهو لو متأخرة 5 دقايق وأقوله أصبر شوي أروح مثلا الحمام وأيي ولا أغير حق البيبي أسويلك شغلك يقولي عنيدة عمرج ما لبيتي طلبي بنفس الوقت ما عنده بقاموسه إلا هالكلمة عنييييييييدة وأسأله على شنو تقولي عنيدة؟؟ أصيده مرات كثيرة لما يقولي أنتي عنيدة بنفس الوقت أساله شنو الموقف اللي صار عشان تتهمني بالعناد يسكت أو يرد علي بطريق الجهال إييي انتي عنيدة وبس !! مادري شقولكم ؟؟؟ الكلام ضايع معاه والعيال يكبرون وأنا مو هذا النمط اللي أبيه حق حياتي الزوجية مع عيالي ؟ يعني إنسان عمره وصل ال30 سنة للحين ما يعرف يدبر أموره ولا يعرف متى ينام ولا شنو ياكل ولا متى يطلع ويصاحب منو ما عنده أسلوب بالكلام دايما عنده الناس ما يفهمون و يغلطون وأهو اللي يفهم و معفي عن الخطأ!!!!!! وإذا بتكلم معاه طبعا لما ألبي رغبته وأيييله بالسياسة والدلع والتمسكن والحركات وأهو يسوي نفسه متفهم وناضج "وكلي أذان صاغية " بالبداية يعطيج الأمان عشان أتكلم وأقول اللي بخاطري بس بالنهاية نتفق على ألا نتفق على شيء!!!! ومن ثاني يوم يقلب علي ويتغير!!!! اثاري كل اللي قلته يفهمني غلط وحزته لما ما يفهم شي ما يسألني شنو تقصدين بكلامج؟ وليش؟وشحقه؟ لالالالالالالالالالالا على طول سوووووء الظن أنتي شايفتلج شوفة وأنتي مغرورة الواحد ما يمزح معاج ولا يقولج شي وانتي تغيرتي من جبتي الولد ومتكبرة وشايفة نفسج علي وعلى أهلي وإذا أنا ماكنت عاجبج ليش رضيتي فيني ليش ما خذيتي واحد غني يلبي طلباتج ومن هالكلام اللي ما أدري من وين جايبه؟؟؟!!!!!!! أنا ما بي أمدح نفسي بس فيني طبع على شان وناستي مستعدة أدفع فلوس الدنيا بس لأني أنا بستانس يعني عطلة الربيع ألح عليه يودينا للعمرة وقالي ماعندي ميزانية وقلتله لك الفلوس اللي تلعب فيها وزيادة وخل نروح رحلة عائلية مع أمي وأمك وعيالي والخادمة وانت أخذ معاشك بس ولله الحمد كانت رحلة ممتعة مع وجود مزاجه اللي عكر علي بس خالتي "أم زوجي"الله يجزاها خير غطت عن ولدها عشان أمي ما تحس إن صار شي بيننا كانت كله تاخذ أمي وتطلع وصرفت فلوس عشان وناستي وكنت أدفع عن أمه مابيها تصرف شي من جيبها وأمي نفس الشي ما أحب أفرق بينهم والله يشهد علي الحين تقريبا الحياة بينا مملة أزواج جدام الناس إذا كان مزاجه حلو يصير بينا سوالف يعني حياتي معتمدة على مزاجه أهو!!!!! فينيييييييي صرااااااااااخ قوييييييييي ودي أنفجر ودي أصفعه على وجهه بس عشان أخخفف على نفسي ودي أنحاش منه أقوله خل نحجز شاليه طبعا بفلوسي يقول مافي سيارة وما عندي إجازة كل واحد فينا الحين عايش حق نفسه ولله الحمد العيال مو حاسين بهالشي هذا مهم والله يقويني عشان أقدرو أوفر لهم الحياة الطبيعية برايكم إذا تزوج الثانية ارتاح من همه ؟قصدي الزوجة الثانية بتهتم فيه وبتدلعه يعني بتشيل همه عني؟ وأنا أدري إنه بتنسيه عياله وأنا بعد وياهم بس مرات أقول أهو مو مؤثر علي بشي يعني إذا تزوج ماراح أفقده بالبيت لأن كل شي انا أسويه الطبيب المدرسة أدق عالصحي وغيره وأنا أدبر نفسي إذا نقصتنا فلوس لأن أهو مستحيييييييل يتسلف وهذي خصلة حلوة ما طلبت منه يتسلف بس عالأقل يعرف يتصرف بفلوسه!! أهو يلعب بالفلوس وأنا اللي أقتر على نفسي عشانه أهو فشنو اليديد؟!! كأني أنا الحرمة والرجل بالبيت بس مثل ما ذكرت قبل الحين أنا تغيرت خليت كل شي عليه يعني إذا تزوج خل يعطيني مصروف اليهال وأنا بتصرف!!!!!!!!!!!! ماني عارفة شقول شخربط جد جد مخي وقف عن التفكير صرت جسد بلا روح صرت جامدة بليدة المشاعر مادري شنو الصح ووين الغلط؟؟؟ بديت أحفظ القرآن ألتحقت بمركز تحفيظ قرآن عشان أبعد عن التفكير فيه وقلت ربي بييسر الأمور والحمدالله الأمور ماشية بس مااشية على الله !!! أخاف أتعلق بزوجي وأحبه أكثر وعقب يفاجئني بزواجه؟ وأنا أقول إذا حياتنا باردة جذي خل يروح يشوف نفسه وأرتاح أنا من العذاب النفسي اللي أنا فيه!!!!! رايكم يا بلقيسيات يهمني ولا تبخلون علي بردوكم:sad_1:

 

[سكررره**]

حبيبتي000 مشكلتك انك ارهقتي قلبك بمشاكل صغيرة في بدايتها واخدت راحتها الى ان كبرت00 انت عارفه ان الطريقه اللي تجيب راسه الجنس جاريه حبه حبه الى ان توصلي للي تبغيه ولا تسمحي لوحده ثانيه تاخده منك 00 يعني اتحملي هالشهرين وبعد مايخد اللي يبغاه لايكون طلبك غير (احسن معاملتي )ولاتطلبي شي ثاني 000الله يشرح صدرك ويهدي سرك امييييييييين

 

[ماهقيتها منك]

اختي مو حل (زواج زوجك) انتي تزيدين الطين بله
نصيحه اذا عصب قولي(الله يهديك ويفتح على قلبك)
اذا تكلم عن الزواج(لاتعطينه وجه ابدا )يعني خليه كانه يتكلم مع نفسه
(اذا تضايقتي من تصرفاته روحي زوري امك ووسعي صدرك)
وعليك بالدعاء والاستغفار وقيام الليل
وسترين النتيجه سريعه

 

[عائدة الى الله]

دعيني اصرخ وبكل قوة : انت مجنووووووووووووووووووووووووووووونة
كيف تفكري ان زواجه من التانية رح يريحك
ستفتحين عليك باب انت مو قده
ليش مكبرة الموضوع ؟؟؟؟؟؟؟؟؟؟
زوجك يحب الجنس .............طيب وين المشكلة وهو بيصارحك ان الجنس نقطة ضعفه
يا اختي هو حلالك متعي نفسك بتمتيعه
تقولين انك الاب والام تسوي كل شيء ......هذه غلطتك انت بالدرجة الاولى
انت تشتغلين وهو يشتغل ......مسؤولية مشتركة وقسمي الادوار بينكم واجعليه يتحمل اكبر المسؤولية
تفكيره بالزواج انت سببه لانه لا يشعر بالمسؤولية اتجاهكم واعطاه وقت فراغ كبير واصبح شغله الشاغل هو الجنس
اكرر نصيحتي لكي اختي لا تتساهلي في زواجه من اخرى ستندمين حتما

 

[أحب الصبر]

حبيبتي000 مشكلتك انك ارهقتي قلبك بمشاكل صغيرة في بدايتها واخدت راحتها الى ان كبرت00 انت عارفه ان الطريقه اللي تجيب راسه الجنس جاريه حبه حبه الى ان توصلي للي تبغيه ولا تسمحي لوحده ثانيه تاخده منك 00 يعني اتحملي هالشهرين وبعد مايخد اللي يبغاه لايكون طلبك غير (احسن معاملتي )ولاتطلبي شي ثاني 000الله يشرح صدرك ويهدي سرك امييييييييين

فعلا يا اختي كلامك صح صج قلبي مرهق وماعاد فيني أتحمل نفس الأخطاء اللي أشوفها من 7 سنين جد تعبت الله يجزاج خير يالحبيبة.

 

[أحب الصبر]

أختي ما هقيتها منك يزاج الله خير عالمرور وهذا اللي قاعدة أسويه أروح عند أمي ولا أطلع مع العيال يعني أهرب من الوضع المزري اللي أنا فيه ومن طبعي بعد الزواج ما أحب أحد يحس فيني إني مظايقة بحياتي الزوجية فيني غرور بهالشي أبي حياتي الزوجية سعيدة ومثالية حتى تربيتي حق بناتي أبيهم ستفيدون من وقتهم بالشي المفيد يعني كثر ما أقدر أوفر الجو والبيئة الطيبة و الطبيعية حقنا والله كريم.

 

[bellegirl]

السلام عليكم

هلا اختي أتمنى تكونين بحالة أفضل الحين

اختي تعرفين من كلامك حسيتك جمعتي كل مشاكل زواجك من يوم عرستي وبغيتي تحلينها فيوم واحد... والمشكل ان أغلب هذي المشاكل صغيرة بس كبرت بالوقت ... أنا برايي اختي انتي محتاجة شوية وقت تقعدين فيه مع عمرك وتريحين أعصابك ... وتاخذين ورقة وقلم وتكتبين كل الي فبالك وتكتبين رايك بحيا تك الحين

هل انتي مرتاحة ؟؟

إذا مب مرتاحة حطي النقاط الي صدق مزعجاك وناقشيها مع زوجك في جلسة خاصة بينكم بس تكون جلسة جدية... قوليله ان الكلام الي بتقولينه الحين ما بتعيدينه... لإنك وايد عانيتي منه من سنين الحين وخلاص ماتقدرين تشيلين هم أكتر

انتي انسانة ولك الحق في راحة البال اختي وفي الحياة الهنيئة وفي الإحترام والتقدير على كل ما تقدمينه لأسرتك

وبعدين أكبر غلط ان الخلافات تكون قدام الأطفال وهذا شي يا اختي لا تسمحين فيه...هذول عيالك وماتبغينهم يتعقدون من صغرهم

وترى تزويج زوجك مب حل أكتر ما هو مصيبة بتزيدك هم وغم ... إذا خلاص اختي ما تقدرين تكملين معاه ... لا يكلف الله نفسا إلا وسعها !!

أما ذا انتي نفسك تصلحين الأمور اوقفي وقفة جدية واستخدمي كل قوتك وأسلحتك وأهم شي أعيدي اكتساب الثقة في ذاتك

والله يعينك على مابتلاك به

ودمتي في أمان الله

أتمنى أكون أفدتك اختي

 

[أحب الصبر]

دعيني اصرخ وبكل قوة : انت مجنووووووووووووووووووووووووووووونة
كيف تفكري ان زواجه من التانية رح يريحك
ستفتحين عليك باب انت مو قده
ليش مكبرة الموضوع ؟؟؟؟؟؟؟؟؟؟
زوجك يحب الجنس .............طيب وين المشكلة وهو بيصارحك ان الجنس نقطة ضعفه
يا اختي هو حلالك متعي نفسك بتمتيعه
تقولين انك الاب والام تسوي كل شيء ......هذه غلطتك انت بالدرجة الاولى
انت تشتغلين وهو يشتغل ......مسؤولية مشتركة وقسمي الادوار بينكم واجعليه يتحمل اكبر المسؤولية
تفكيره بالزواج انت سببه لانه لا يشعر بالمسؤولية اتجاهكم واعطاه وقت فراغ كبير واصبح شغله الشاغل هو الجنس
اكرر نصيحتي لكي اختي لا تتساهلي في زواجه من اخرى ستندمين حتما

صح كلامك أختي ومشكووووورة عالرد أهو الله يهديه مايتفاهم إلا إذا شبع من --- يعني مخه تحت :busted_red: ما يفكر ولا يفهم إلا إذا خذه حاجته وبعدييييييييين هذي مو حاله الشغله ما تكون فيها لذه لدرجة صرت ممثلة بارعة بالفراش والسبة عشان يحس إني أنا مندمجة معاه ولا يظايق مني وبعدييييييييين لي متى هالوضع بيستمر لي متى بصبر عليه على هالأخلاق والتصرفات أحس إنه طفل صغير بحجم كبير ما يعرف يتصرف وغذا أخذ قرار طبعا دائما قراراته ناتجه عن تهور مستحييل يفكر بتأني ما يتحمل نتيجة اتخاذه للقرار لالالالالالا على طول يقطها علي كله منج خليتيني اشتري البيت وكله منج خليتيني أتغدى وكله منج نمت متأخر ولا قعدت متأخر من لنوم ومارحت للمعهد !!!!!! ما يقول غلطتي مانمت امبجر ولا ما خذيت الوقت الكافي أدور عالبيت اللي يناسب كل عايلته المحترمة من متزوج وغيره!!!!!! يالللللللله وغيرها من التفاصيل البايخة واللي تنقص العمر ما تحسسج بالأمان إنج ماخذه رجل بمعنى الكلمة بدل ما تعتمدين عليه أهو يعتمد علي وأنا السند له بوقت حاجته!!!!!! يتصرف بتهور من غير تفكير ولا يقولي بس لما يتوهق يلجأ لي لأن يدري انا عندي الحلول بدل الحل وأنا الغلطانه مثل ما قلتي والحين صارلي فترة تداركت الخطأ قلت خل أصلح غلطتي وأعيش لنفسي عشان يعرف ويحس شنو يعني مسؤليات أطفال الله يعيني ويقويني ويلهمني الصبر أكثر وأكثر مابي أكون السبب في خراب بيتي ما أحب اكون أنا الغلطانه أو السبب في زواجه الثاني ابي الغلط يطلع منه أهو!!!1 مادي حييييل متناقضه مع نفسي:no:

 

[أحب الصبر]

أشكر الخوات اللي ردوا علي وبردوا قلبي بردوهم الله يبرد على قلوبكم دنيا وآخره مثل ما بردتوا علي والله يلهمني الصبر ويعيني على إصلاح أمري الله يجزاكم خير يا بلقيسيات:c017: