خايفه ومب عارفه كيف اتصرف ..!

[antelope]

السلام عليكم

أنا عندي مشكلة، ويمكن عقب ماتقرون موضوعي بتقولون هذي مب مشكلة، لكن بالنسبة لي

مب قادرة ومب عارفة كيف اتصرف ..!

الله يسلمكم اخويه متزوج من وحده عربيه ( يعني مب خليجيه ) ما بدخل في التفاصيل ،

نحن كنا مب موافقين عليها .. أكيد هي تعرف إنها نحن مب متقبلينها، وبعد ماياها ولد منه

قامت تزورنا وتبين نفسها إنه وايد تحبنا ...

ونحن من طبايعنا بنرحب بها ومستحيل نطردها من بيتنا ...

المشكلة

إنها تفرض نفسها علينا .... قلنا ما يخالف يمكن تبغي تتقرب منا ..

بس أشوفها تسأل عن راتبي، تسأل عن عمري، وكل مره تسأل عن شي ، يعني فضوليه ...

وحسوده بعد ... أنا أهلي ما يتدخلون في حياتي، نحن من النوع اللي ما نتدخل في حياة غيرنا

وحتى أجرب الناس لنا ما نسألهم هذي الأسئلة ...

اليوم حلمت حلم، ويوم فسرنا الحلم، طلع التفسير إنه امرأة تزوركم تدخل بيتكم، تتصرف كأنها

من أهل البيت، احذروا منها ...

حبيت أقولكم إنه قبل الحلم انا كنت مب مطمئنه منها ولا مرتاحه .. ابغي ربي يعطيني الشجاعه

إنه يوم تسألني ما أرد عليها ، يعني مابغي أكون وقحه .. بس أبغي أطنشها ...

باختصار ساعدوني دلوني شو أسوي ...

صح إنه الناس عايشه في مشاكل أكبر، ولله الحمد، لكن نحن انقرصنا من قبل في وحده مثلها

وأبغي احذر واااايد منها ...

 

[Ms Uae]

وعليكم السلام ورحمة الله وبركاته

الله يكون في عونج ويبعد عنكم كل ما فيه ضر

أول شي صحيح انتوا ما بتتقبلونها..خاصة لانها مش من ثوبنا

هاي الفترة بتكون وايد صعبة لأن عاداتها غير عنكم وهي الحين تحاول تمشي نفسها بينكم..

إذا إنتي مش مرتاحة وياها..حاولي تخلين نفسج بعيدة عنها..يعني اذا يتكم ايلسي بعيد عنها ..وخبري اهلج يحذرون منها ..

واذا حبت تتدخل في تفاصيل انتي ما تحبين تقوليلها عنها ردي برد بسيط..ضيعي الموضوع..اسكتي..تكلمي في موضوع ثاني..

يعني اذا سألت عن راتبج..قولي: الحمدلله المهم يكفيني ويستر عليه
(ترا أغلبهم يتحرون احنا عندنا وااااايد فلوس ويالسين نلعب بهم ومب عارفين شو بنسوي بهم..يعني بيني لها ان مستواج زين ..بس مب مثل ما هي تتخيل)

واذا سألتج عن شي ما تبين تردين..ابتسمي وصدي الصوب الثاني..او انج تسوين عمرج ما سمعتي..وترمسين اختج او اي حد ثاني..فبتسكت..او انج تتطالعينها تبتسمين وصدي الصوب الثاني..

آخر شي بتفهم انج ما تبين تخبرينها..عاد خبري خواتج واهلج لانها بتحاول تسألهم عنج

الصراحة احنا بعد انقرصنا والله يكون في عوننا بس لا تعطينا المجال واذا حسيتي انج تقدرين تردين عليها

ابتسمي في ويهها وبكل ادب قولي لها هاي خصوصياتي وانا حتى خواتي ما اخبرهم

وان شا الله ما بتشوفون شي يضركم

تقبلي مروري أختج

Ms Uae

 

[antelope]

اختي Ms Uae مشكورة على المشاركة، وطريقتج في الرد، كأنه عايشه ويايه، ما شاء الله عليج ..

تراني خبرت هلي بأسألتها، أمي كانت متنرفزه من الحركه وأختي قالت والله لو كانت سائلتني مابرد

عليها، وباجي خواتي متزوجات ما عيبهم بعد ... وعلى فكره خبرت ربيعتي، قالت المفروض

تقولين لها أنا أمي ماتعرف عن راتبي وابتسمي لها ...

آخر مره يت عندنا كنت في الحجره، خلت اخويه يدق عليّه الباب أونه عسب أشوف الولد،

كان عندي احساس إنه هي مطرشتنه، لأنه انا اعرف طبعه هو ما يسوي جيه، اليوم الثاني اختي

كانت تتكلم ويايه وقالت لي : مرة أخوج كانت تقوله سير سير ود الصغيروني عندها ..

ويوم طلعت بدت تنقز بالرمسه ... :tears: بس أنا مابغي اسويها ضرابه، ابغي اطنشها ...

وإن شاء الله مانشوف شر منها، الله يسمع منج ...

 

[خان وذليته]

عادي اذا سالتك واحرجتك قولي لها معليش هذي من خصوصياتي ومااحب اتكلم فيها مع ابتسامة وانشالله ماتسال مرة ثانية ولازم تحذرين امك وخواتك بس اخوك لايدري لان السالفة بتكبر ويقول ليش تكرهون زوجتي عرفتي؟

 

[Ms Uae]

اختي ms uae مشكورة على المشاركة، وطريقتج في الرد، كأنه عايشه ويايه، ما شاء الله عليج ..

تراني خبرت هلي بأسألتها، أمي كانت متنرفزه من الحركه وأختي قالت والله لو كانت سائلتني مابرد

عليها، وباجي خواتي متزوجات ما عيبهم بعد ... وعلى فكره خبرت ربيعتي، قالت المفروض

تقولين لها أنا أمي ماتعرف عن راتبي وابتسمي لها ...

آخر مره يت عندنا كنت في الحجره، خلت اخويه يدق عليّه الباب أونه عسب أشوف الولد،

كان عندي احساس إنه هي مطرشتنه، لأنه انا اعرف طبعه هو ما يسوي جيه، اليوم الثاني اختي

كانت تتكلم ويايه وقالت لي : مرة أخوج كانت تقوله سير سير ود الصغيروني عندها ..

ويوم طلعت بدت تنقز بالرمسه ... :tears: بس أنا مابغي اسويها ضرابه، ابغي اطنشها ...

وإن شاء الله مانشوف شر منها، الله يسمع منج ...

اقري على عمرج ..وما عليج شر ان شا الله.. شوفي هي يمكن الحين ما تبا تضرك..بس عاد هي تبا تتقرب منك..خليج بعييييدة عنها ..لا تجلبين عليها بس بردود بسيطة.. عشان مثل ما قالت " خان وذليته"

عشان ما تستوي مشاكل من بينكم

وما عليكم شر ان شا الله بس ها احذري

 

[Ms.RoZa]

وعليكم السلآم


مو مشكله يالغلا خلي علاقتك معاها رسميه مهما حاولت تدخل نفسها فيكم انتم حطو حدود لها
لاتعطونها كل الأخبار والمعلومات .. هي بس يمكن هالفتره بتعرف الأوضاع بعدين أكيد بتتغير ..

علاقتكم لاضرر ولا ضرار .. لاتطيحون بالعلاقه وتمونون عليها حيل ويكون البساط احمدي
ولا انكم تنبذونها وتتجنبونها وتقطعون العلاقه معها وتسوونها ضرابه على قولتك

خليك معاها رسميه لكن راعية واجب ..

وماراح يجيكم منها شر بهالطريقه إن شاء الله

آرق تحيه

 

[سونيا الأردن]

انا شايفة انواالموضوع عادي وما تعطيه اكثر ما يستاهل بعدين ليش يتحكي خايفة تذكري انه لن يصيبنا إلا ما كتب الله لنا بعدين وين المشكلة في إنها جنسية ثانية مش غلط ولا عيب أنتي بأسلوبك بينتي انو الجنسيات الثانية مش منيحة وإذا صار موقف مع وحدة غيرها مش ضروري تكون هي كمان مش منيحة أصابعك كلها مش زي بعض وبالنسبة للحلم اللي حلمتيه ما تخافي منه لانه انتي بتفكري بالموضوع كثير فعقلك الباطن خزن الموضوع فالنتيجةانك بتحلمي في هالأشياء

 

[ج ـنون الكـون]

امممممممم

ماادري رحمتهاا .. حسيتهاا وحيدهـ ..وبغرربه ..
ومن حركاتها باين انهاا بتتقرب منك اكثرر ..وبتحااول تكسبك ..
تبغى تتعرف ع ناس وتتخالط ..ماتبي تسير وحييده <ربي مايحطك مكانها ياارب .

ومن نااحيه اسئلتهاا ... <- انا مثلك مااحب احد يسئلني عن شي يخصني ..
اذا سئلت حاولي اخرجي عن الموضووع .. (تهربي من السسؤال)< يعني غيري السالفه بحيث انها ماتحس وتتضاايق

او قولي لاززم واضحككككككي
او قولي سر وبعد اضحكي ..او سوي انك تسولفين معها عن وحده من صديقااتك انها ملقووفه واسئلتها كثير وانك ماتحبين احد يسئلك مررهـ < يمكن تتنبه شوي ..

وانتبهي اول وتالي منهاا ومن اي احد عمومآ ..

لكِ ودي وخالص اح ــترامي ..ٍ

 

[antelope]

خواتي


خان وذليته فهمت قصدج، ومستحيل أدخل أخويه أو حتى اتشكى له، ومن الأساس أبغي أتم مثل ما أنا ..

لكن مب حابه أسألتها ...


Ms Uae أكيد اختي أقرأ على عمري الحسد من كل صوب عوذ بالله ... بس الواحد يتوكل على الله ..


همس العذارى نحن نحاول قد مانقدر ما نتكلم عن كل شي، بس أخويه الله يهداه كل شي يخبرها به، قمنا

ما نقوله شي عسب ما ينقل لها ... بس بــ هالطريقه روحها متعبه ...


سونيا الأردن شكرا لج على المشاركة


ج ـنون الكـون هي تبغي تتعرف، بس أكيد هي حاسه إنها مب مقبوله، كونه إنه محد حضر حفلة الزواج ..

بالمختصر تفرض نفسها، ولكن يوم تزورنا البيت مانقدر نطردها مستحيل نسوي هالشي ...