عقلك الباطن و كيف تستفيد منه؟
الفرق بين العقل الواعي و العقل الباطن:
1-العقل الواعي:
هو الذي يدرك ما حوله من خلال الحواس و و ظائفه الرئيسية:
-الادراك
- الاستنتاج
-الربط
- منطقي ومحلل
- يقوم ببرمجة العقل الباطن
2-العقل الباطن هو:
- مركز العواطف و الانفعالات
- مخزن الذاكرة
- يتحكم في الطاقة الجسدية والنفسية وبيده توجيهها.
- لا يعقل الأشياء مثل العقل الواعي
فهو ببساطة يخزن المعلومات ويقوم بتكرارها.
- يستجيب للتأكيدات الايجابية القوية.
كيف تستفيد من عقلك الباطن؟
1- العقل الباطن يحب التكرار:التكرار امر في غاية الاهمية
لطبع المعلومات في عقلك الباطن إذا أردت
أن تتعود على عادة أو عمل صالح فعليك
أن تكرر الرسالة عدة مرات إلى أن تتبرمج تماما .
2- راقب افكارك التي تدخل الى عقلك الواعي فهو يرسل المعلومات الى عقلك الباطن
لذا تأكد ان ترسل الي عقلك الباطن فقط الرسائل الايجابية.
مثل
أنا قوي . أنا سليم أنا أستطيع الامتناع عن....)
3- قبل النوم مباشرة ابلغ عقلك الباطن
بمشاعر حقيقية بما تريد ان تكون
وسينفذ لك ما تريد ، كرر هذا كل ليلة.
فالعقل الباطن ذو طاقة هائلة
ويمكن أن نبرمجه بما نريد وسيشرع هو فوراً في التنفيذ. .
4- التخيل و احلام اليقظة أثناء الاسترخاء وسيلتك الى الابداع .(تخيل دائما انك شخص مميز و تخلص من سلوكياتك السلبية).
5- كن على يقين تام بقدرتك على النجاح و التغيير.
(اليقين و الثقة امر ضروري)
6- اجعل عقلك الواعي مشغولا دائما بتوقع الافضل لان هذا سينطبع على عقلك الباطن.
7- الاحلام هي الطريق الى اللاشعور
(العقل الباطن) ما تتخيله و تحلم به
سيقبله عقلك الباطن و يشرع في تنفيذه
وأنا عن نفسي عملت نفس الشيء ولن اثره كبير على نفسي وضعته لكم
كانت ثقتي بنفسي صفر بالميه وأنهدرت بسبب زوجي مثل اغلب الحريم أي مشكله تنهز وتتزعزع ثقتها
كان زوجي يقاارن بيني وبين كثير أجمل مني لكني كنت أحزن وأزعل وهو غرضه مزح
أو توجيهي لأمر يفضله فيهم يبيني اسويه وكنت اعتقد انه يقارن فصرت كل يوم
أكرر ماحبهم الا لأني شينه مع ان الواقع غير كذا فصرت اكره اطالع بوجهي
كل يوم اطالع المرايه واعبس واقول ليه انا شينه ومو حلوه فسبحان الله صار زوجي يقولي نفس اللي افكر فيه صار يجيب لي مرايه ويقول طالعي وجهك بالله هذا وجه انثى
فصدقته المهم بالاخر انعدمت شخصيتي لأني شغلت عقلي بأني شينه وشخصيتي مزعزعه ومن هالكلام
حتى شغلي ببيتي ونظافته اهملت كل شيء بالاخر تطلقت ولأني احب أقرأ القصص قررت اقرأ قصص الانبياء وأسمعها من مشايخ كثير باليوتيوب لأني كنت ابي انسى همي كانت صدمه زوجي اللي احبه طلقني
ثم صرت اسمع لطارق الحبيب لأني كنت ابحث عن السعاده كل شيء اسود بعيوني بعد الطلاق وزوجي حالف مايرجعني كارهني فجأه لما كلمته خاصه ان عندي منه بنت رفض يرجعني أسودت الدنيا بوجهي لما قال لو ينتهون بنات الدنيا ومافيه الا انتي مستحيل اخذك فلجأت لليوتيوب ابحث عن سبيل ولقيت شيء واحد والله لما سمعته طبقته بس ماأذكر وش أسمه بالاخر عرفت من كلام الشيخ اللي بالمقطع بأن القلب اذا اشتغل بأحد غير الله يسلطه الله عليه وهذا اللي شفته من زوجي يعني مثل حاله عذبه الخاطر حبه زوجها بجنون وعذبها وانا لأن زوجي صديق زوجها فهو مثله بالتصرفات لأنهم رابين مع بعض فقررت اللجوء لله والله يابنات كانت اول صلاه لي بالليل قيام صليت من 12 الين 1ونص ماحسيت بها من سجدت قلت كل شيء لربي فجأه صرت اتكلم بكل شيء مريت فيه من طفولتي وزواجي وعيشتي فضفضت بكل شيء حسيته من الناس او من اهلي شكيت بكل شي وأنا ادري ان الله يعلم اللي مريت به بس حبيت احكي له قصتي كلها من الى لأني ابي انهي ماضيي فقررت اقول كل شيء لأجل امحيه من حياتي وبركعتين قلت كل اللي بخاطري وأول مره انام براحه تامه بدون ازعاج او قلق او حزن ففي اليوم الثاني كذا من الله أكتشفت موقع لعلم النفس لقيت فيه مواضيع كثيره لبناء الذات وفجأه حسيت ان عندي أمل قوي بالله وفي كل شيء اتكلم بنفسي مع ربي يعني لما احد يهزئني اسكت واقول شفت ياربي الحين وش اسوي والله يابنات وعن تجربه اني بنفس اللحظه يجيني معرفه وش اسوي كنت ثرثاره اي شيء احس فيه اقوله فلما صرت كل يوم اتكلم لربي بالليل بالسجود واقول كل اللي بخاطري فجأه صرت مع الناس شبه غامضه موكل شيء اقوله وأستغربو من صمتي ماهو مرض او حاله نفسيه لا بس كل اللي بخاطري قلته لربي ليه اقوله للناس ثم فجأه اكتشفت الدكتور ابراهيم الفقي رحمه الله عليه تفتحت عيوني شوي شوي كنت مااعرف اقرأ قران والله كنت اتلخبط في قراءته من كثر هجره ماأقولها كفخر لا والله بس لما بدأت اقرأ كثير بالكتب والقصص والروايات وبأسلوب مثل الدكاتره سبحان الله صرت اكتب مثل الدكاتره والفلاسفه لأني عودت نفسي على هالشيء اقرأ بصوت اسمعه انا بطريقه ثقافيه فلسفيه فصرت اعرف اقرأ القرأن اول اتاتأفيه وأنحرج مع نفسي الأن الحمد الله اعرف اقرأه وبرمجت نفسي على المعرفه وطبعآ هالامور ماجت بسهوله أما زوجي فكيف رجع لي تبون تعرفون الله سبحانه رجعه لي بدون ماأسوي شيء غير أني استغفرت كثيييير وحسيت بوجود ربي والله حسيت فيه وبرقابته علي حتى بالصلاه احس به مع اني اول كنت في شرق والطاعات والعبادات بغرب بس سبحان الله احيانآ الطلاق خيره لنا والله ماعرفت ربي الا لماتطلقت وسبحان الله ماكملت سنه الا زوجي من نفسه اتصل علي وطلبني للزواج وكان فرحان بي اكثر من فرحتي به وثقتي زادت لما صرت كل يوم اطالع المرايه وأقول فديتني اهبل وزوجي ينتقدني وأضحك بوجهه بثقه مصطنعه وأقول كلي حلا ولأنك ماوصلت لقلبي من قهرك تنقدني وانا مبسوطه أصلا عاجبني شكلي بس انت اعمى ماتشوف كل هالحلا كله
والله من كثر ماأكررها له كلما اكشخ صار من نفسه يقول تهبلين تجننين وهذا احد اساليب علماء النفس في تغيير نظره الشخص لهم
أنا غيرت نظرته لي والتمثيل المصطنع اللي اسويه كل يوم بأني حلوه وواثقه من نفسي صار طبع فيني الأن مهما نقدني مايهز فيني نقده شعره وللعلم أنا استعملت هذا الاسلوب مع زوجي لمده 10شهووور وبفترات متقطعه يعني كلما اكشخ او بروح مناسبه ويجي يتريق لاشافني احط مكياج ابدأ بالتمثيل المصطنع فالأن بعد 10شهور تمرين صار صفه فيني وزوجي ماعاد ازعجني بنقده شافني جديه بمدحي لنفسي فسكت
حتى بيتي كنت ساكنه معه بمكان صغييير الان مكان اكبر كنت عجازه ومن النوع اللي يأجل الشغل الأن كل شيء في لحظته ماعدا بعض الامور اتكيسل فيها لكن احاول اطورها المقصد من هالكلام كله انك تقدرين تخلين الوحش لحيوان اليف بعلم النفس وتقدرين تحولين كل سلبياتك لايجابيات مع التمرينات وتغيير معتقداتك السلبيه اللي بعقلك الباطن بهذا التمرين اللي وضعته بالواجب كل صفه حوليها لايجاب وحسي فيها بأحاسيسك وبتتحول عاده ايجابيه بحياتك
أنا ماتوقعت بيوم اني اصير معلمه لكم أبدآ كنت فاشله وأفشل من الفشل لكن الطلاق صحاني كان صفعه قويه لي صحتني من غفلتي لذلك الامر بيدك لاتنتظري مأساه او حادث اليم لأجل يغير حيياتك لا أعملي من الان لأجلك أنتي فقط فلا احد يستحق ان يعيش في افظل حال غير نفسك فنفسك أولى من كل شيء
أتمنى فهمتي الرساله التي اريد ايصالها لك
ومثلما اتفقنا يوم الثلاثاء بيكون للدروس أحرصو عليه لأجل تحلون واجباته بسرعه أنا وضعت قصتي المختصره فقط لأجل أن يحرصوا العجازات على عمل التمرينات لأن محد بينفعهم وانا اللي علي بسويه كتوجيه ونصح والباقي عليكم انا بأدلكم على الطريق وأنتم كملوه بمزاجيتكم ولكن انبه بان التمرين مهم جدآ أهم من اي شيء لذلك يجب عمله قال فرنك أوتلو :
((راقب أفكارك لأنها ستصبح أفعال راقب أفعالك لأنها ستصبح عادات راقب عاداتك لأنها ستصبح طباع راقب طباعك لأنها ستحدد مصيرك))
مابي اكثر كلام ولكن اتمنى ان ارى جديه أكثر من الحماس الذي اظهرتموه
دمتي بحفظ الرحمن
