تفاحة الحلوة
New member
- إنضم
- 2008/02/19
- المشاركات
- 563
السلام عليكم ورحمة الله وبركاته
شخباركم يا بلقيسيات انا عندي مشكله كبيرة وترددت كم مرة اكتبها لانها وايد متداخله في بعضها وفيها تفاصيل تعور الراس
بس اخيرا قررت واسمحوا لي بعرض مكشلتي ويا ريت ناعمه واستشاريات بلقيس يتدخلون ويساعدوني
انا من ابوظبي وحاولت اروح المركز كم مرة ما قدرت خذيت موعد وضيعت الطريق لاني ما ادل
المهم
مشكلتي تتلخص في آفه العصر بصراحه وهو البلاك بيري ،،:30:
لان هالتلفون هو سبب خراب بيتي اللي للحين اعاني منه،،، ريلي قبل هالفون كان يستخدم نوكيا عادي وما كان في احسن منه والكل يعتبره مثال حتى الاكبر منه بالعايله كان ملتزم بصلاته ووايد يقعد مع العيال ومعاي ..
ومن خذ هالفون تغير واااايد ودخل بقروبات وتعرف على بنات وتغير علي وقام يحب نفسه وايد
كان وايد متيين والحين التزم بالرياضه وصار معضل ورشيق...
وقام يعايرني بجسمي وانا شوي متينه بسبب الحمل انا متزوجته من 6سنين وعندي عيال والحين حامل بالشهر السابع ونفسيتي وايد زفت
اول مرة كلمته بهدواة وعصب لاني فتشت بتلفونه وعصب وقرر يتزوج علي بس عناد فيني واهله سمعوا صراخه لاني كنت ساكنه ببيتهم وتدخلوا وكلموه وقنعوه بانه يترك هالتلفون ورضى وكسر الفون جدامي وقال ما راح ارجع واعتذر لي
ورجعت حياتنا ما في احلى منها وانتقلنا بيت ثاني والحمد لله عشنا مرتاحين لفترة ورجع اشترى له نفس التلفون البلاك بيري وشافني متضايقه قال لي والله اقسم لج اني بس بضيف شباب ربعي ومب ضايف ولا بنت ..
وصدقته ومع الايام شفته قام يتغير ويمل مني ومن اليهال والبيت وولا يقرب مني مع اني ما كنت مقصرة بشي
وفجاه فتشت وراه ولقيته رجع يضيف بنات ويكلمهن وشفت صورهن بوضعيات مخجله وملابس عاريه وهو كان يصور نفسه ويرسله لوحده بس وكان يكتب لها انها يحبها موت وما يقدر يعيش من غيرها...
والله انهرت يومها ما عرفت شو اسوي وانصدمت ان زوجي هالانسان الحنون الطيب الكريم جدا فجاة ينقلب حتى كلمات الحب ما كنت اسمعها منه كنت اظن ما يعرف يعبر لكن مع البنت اللي كان يكلمها استوى شاعر ورومانسي
هجرني في الفراش واااايد ولا يكلمني وكله معصب وكله يالس بروحه حابس نفسه بس هو والتلفون
ويوم كلمته وسالته عن التلفون وعن البنات عصب وايد وضربني وشتمني بكلمات عمري ما سمعتها وظليت كم يوم طريحة البيت و الفراش
يقول ليش كل مرة تفتشيتن تلفوني وتتدخلين بخصوصياتي انا حر اسوي اللي اسويه ...
ما شكيت لحد لان يوم شكيت لاهله قبل تدخلوا وحلوا المشكله وكان يقلبها علي ويبين جدامهم انه خلاص صار احسن معاي بس فترة ويرجع نفس ما كان
والحين منعني اني اتواصل معاهم او اشتكي لهم
بتقولون وين اهلي انا من دولة خليجيه ثانيه وماعندي حد غير امي امراة كبيرة في العمر ومرة شكيت لولد عمي الكبير وما سوى لي شي لانه علاقته زينه بزوجي وما يبي يخربها
الحين احنا عايشين في بيت واحد بس بدون اي حق من حقوق الزوجه بس نتكلم في اي شي يخص اغرض البيت او اليهال غير جي ما يكلمني
حاولت اراضيه مافي فايده مجرد ابتدي كلام يمشي عني او يغلط علي يقول انا كرهتج خلاص وبس بينا العيال ولا كانه يشوفني مهما حطيت ميك اب او لبست عاري
تعرفون شنو اكثر شي قاهرني انه البنت اللي ميت عليها من نفس بلدي والله اني كرهت كل شي في ديرتي بسبب هالموضوع
قولوا لي شو اسوي ترى هاذي المشكله باختصار ادري عورت راسكن بس مالي غيركن
هيه صح بعد نسي اخبركن شي مهم في وحده من اهل زوجي كانت تتمنى انه يتزوجها وطبعا ما صار وكنت من نصيبه وهي للحين مقهورة انه زوجي تعنى وسافر لبلد خليجي وتركها هي والله كان يكرهها ما يحبها لانها استغفر الله عليها حركات بس الحين وايد تحاول تقرب منه وتطرش له مسجات واشعار حب وهو عادي يستقبل ويرد عليها استغربت وايد ويوم كلمته قال عادي هاذي بنت عمي
وهي فرحانه انه بدى يكلمها وفي نفس الوقت تكلم اخوه المتزوج وخربت بيته عشان يتزوجها والله ما اعرف شو اسوي وايد دعيت ربي في صلاتي انه يبعد ريلي عن بنات الحرام والله تعبت وتمللت من حياتي بروحه الحمل متعبني
ولللاسف ماعندي صديقات ولا اهل اهل في الامارات كانت ناعمه خلال محاضراتها اللي حضرتها لها يزاها الله خير وايد تقول وتنصح ان الحرمه لازم تهتم بنفسها وتحب نفسها اكثر وتقوم بهواياتها والله سويت كل شي بس اللي ما سويته انه وقتي كله لعيالي وبيتي لان ما عندي احد اروح له ازوره وحتى ما كنت اتصل وايد على ريلي بالداوم ولا اشغله بامور البيت ولا العيال ولا اطلب منه طلبات كنت اتذكر الفرق بين العشيقه والزوجه نفس اللي قالته ناعمه بس ما شي فايده تعبت
ارجوكم ساعدوني باراكم او على الاقل بالدعاء يزاكم الله خير
