أحسن طريقة للرد على الشمالي !

أحسن طريقة للرد على الشمالي :

السلام عليكم

هذا موقف يا بنات هالأيام صارلي مع زوجي وحبيت أفيدكم فيه قبل ما أنساه ..

اللي زوجها شمالي تعرف قصدي ( وإذا كنت غلطانه نبهوني الله يسعدكم ) :

شمالي = كلام مثل السم
شمالي = إهانة وتحقير للمخالف
شمالي = تشكيك في نفسك
شمالي = هو بس اللي يفهم وكل الناس أغبياء ....الخ .

المهم .. زوجي الموقر الله يهديه .. إذا بدأ بإطلاق القنابل السامة حقته .. كنت في بداية حياتنا الزوجيه أنصدم من شدة الذهول ومن غرابة الكلمات ولا أعرف أتكلم .. فما أعرف أسوي شي إلا البكااااااااء ..
والنتيجة :
بدال ما يجي يراضيني وياخذ بخاطري**
يروح هو يلبس ويتكشخ ويتعطر ويطلع ... ويخليني أموت أموت تعاسة وقهههههههر وبكاء وأقعد أبكي وأبكي وأبكي ... لما طلعت أشياء بجلدي **بقع سوداء و حبوب يقول الطبيب انها حالات نفسية ..وصار فيني اكتئاب يابنات والله لدرجة بغيت أهرب من البيت .. لكن الله ستر علي والحمد لله ..( أقول لكم عشان تهون عليكم مصايبكم والا ترى ماعمري قلته لاحد حتى أقرب الناس لي ماعمري قلت لهم )

المهم .. بعد سنوات طويلة مرت علينا على هالحال .. مليت وزهقت قلت اذا استمريت هالشكل بموت أو بنجن ..
فإش سويت ؟

بديت أرد عليه إذا تكلم .. توقعت إني ببرد حرتي وأخذ حقي ..
لكن مع الأسف .. صارت النار تزيد اشتعال وصار يصرخ ويسب وزاد في قنابله السامة بدال ما يقللها أو يخفف منها .. وصرت قدام عيالي إني ماأستحي على وجهي أرادد أبوهم ولا أحترمه ( مايدرون أن صبري نفد عقب سنين وسنين ) .. قمت اشتكيت لأختي ولأول مرة .. قالت لي الله يجزاها خير : انتبهي ترى كلمة وحدة منه بالطلاق تروحين فيها ..

في البداية قلت : حتى لو لا قدر الله وتسلط وسواها ، مني ضايعة ان شاء الله .. بعدين قعدت أقارن حياتي الحين ياالله لك الحمد ببيتي وبين عيالي .. وخاصة هو عنييييد واذا عصب ما يعرف أحد علي وعلى أعدائي ...

طيب ياربي شسوي ووين أروح ..
إن سكت مت والا انجنيت ..
وإن تكلمت تطلقت ..

يارب ..

وقعدت كله أدعي وأستغفر وأدعي وأقرأسورة البقرة .... إلى ان هداني الله لأحسن طريقة ريحتني وحتى هو بعد شفت أثرها عليه ..

اش تتوقعون يابنات ؟

ما أطول عليكم .. شيء بسيط والله ما تصدقون ..

صرت إذا بدأ يطلق قذائفه السامه ، أطالع في وجهه ولا أتكلم لكن أقعد أردد في سرّي أقول : حسبي الله ونعم الوكيل .. أو حسبي الله لا إله إلا هو عليه توكلت وهو رب العرش العظيم ( وهذا الدعاء يذهب الهم ) والله حتى هو قام يطالع فيني باستغراب كأنه حاس إني قاعده أدعي وشوي شوي تغيرت نبرة صوته وسكت من نفسه ورضى ! سبحان الله معجزة .

ومرة كنا في السيارة وقام ينتقد الناس ( وطبعا هو اللي فاهم والناس كلهم أغبياء ) وطوّل وهو ينتقد وينتقد ويعصب ويلوم وكأني أنا الغلطانة .. ** لما زهقت قمت وكلمته أحاول أهديه فعصب زيادة وازداد **لوم وغضب !!

فجأة .. **تذكرت خطتي الجديدة وقعدت أصلي على النبي بصوت واطي مرة بس أسمع نفسي .. وهو مستمر **يتكلم ويتكلم وأنا دخلت في عالم ثاني من السعادة بالصلاة على النبي حبيبي صلى الله عليه وسلم .. **وماحسيت الا وهو فجأة **يهدأ ويغير الموضوع من نفسه ! ويقعد ويسولف ويسألني إذا تبين شيء ...

يا ألله .. ما أحلى القرب من الله .. وصدق من قال : إذا كان هذا نعيم الدنيا فكيف نعيم الجنة ..

لذا يا أخواتي حبيت أفيدكم بالدرس اللي تعلمته بعد ربع قرن من حياتي الزوجية
وأقدمه لكم على طبق من ذهب ههههه
والسعيد من اتعظ بغيره ..
**
وما أبي منكم الا الدعااااااء بأن يغفر الله لي ويرحمني ويصلح زوجي و ذريتي ويجعلني واياكم ووالدينا من عتقائه من النار ..

الله يجزاك خير ويوفقك يارب

جزاك الله خير الجزاء
وحقق لك امانيك وجعل السعادة رفيقك في الدارين
انا مثلك ياختي نفس المشكلة انا من سبع سنوات
متزوجة هالشمالي والله راح اجن الله يساعدنه عليهم
اميييييييين يارب العالمين

الله يجزاكم كل خير خواتي
ويسعدكم مثل ما أسعدتوني بردودكم ودعواتكم الطيبة
وأسأل الله أن يجزيكم مثلهاواكثر ويتقبل منا ومنكم صالح الاعمال .

الله يجزاك بالجنه على هذا الصبر ويرزقني سعة الصدر والصبـــــــــــــــــــــــر
يارب

جزاك الله الف خير

نفس طريقتي مؤخرا
بس انا هو يتعصب وانا اعمل نفسي ملتهيه باي شيء
وما اجي له الا بعديييييييييييييين واقعد بثقل ورزانه ولا اكلمه ولا اناقشه في الموضوع
اتفرج العب
عادي وانا مبسوطه
يرجع هو يكلمني ولا كانه في شيء

جزاكي الله خير اختي ووضعها الله بموازين حسناتك
ليس هناك شئ بقوة الدعاء فالله معنا ويسمعنا دائماً وانا مثلك فادتني كثير الاستغفار والدعاء ومثل ما قلتي طول ما هو يتكلم أنا ادعي بداخلي وسبحان الله يصير هادي ويغير الموضوع حتي لا يبين انه ما عنده سالفه ههههه
دمتي بخير

جزاك الله كل خير
زوجي شمالي شرقي كرهت تصرفاته وأفكر بالطلاق بجدية انسان ممل متعب أناني ويحب نفسه

الله يهنيك في حياتك

الله يجزاك خير وينورلك اللي في بالك ويهديلك زوجك

الله يسعدك دنيا واخرة وياليتك تستمري على طريقتك لانه اتوقع هي الطريقة الوحيدة اللي تنفع مع الشمالي التطنيش وحبك لنفسك وانشغالك بها
الله يجعلك قرة عين زوجك اللهم امين