َ تحبين زوجك وسعيدة معاه ,,فجأة تكرهينه وتنتقدينه !!؟ السبب وراء تقلب المرأةََ

  • بادئ الموضوع بادئ الموضوع Ro0oneY
  • تاريخ البدء تاريخ البدء
Ro0oneY

Ro0oneY

New member
إنضم
2010/05/24
المشاركات
385
بسم الله الرحمن الرحيم
وكل عام وانتم بخير بمناسبة عيد الفطر المبارك​

ندخل في موضوعنا بكل بساطة.. والموضوع من كتابااااتي رووونيي =)​

هل سمعتي في يوم "المراة صعب تنفهم ؟"
"المرأة متناقضة؟
هل حسيتي في يوم انك مو فاهمة نفسك ومو فاهمة تقلب مزاجك؟؟​

انا باتكلم من واقع تجربتي واللي جلست فترة كبيرة اعاني منه !!
انا جنوبية غربية
زوجي شمالي غربي
كنت اعيشه ايام في حب وسعادة
وفجأة انقلب انسانة تانية​

انتقادية ومتسلطة ومعصبة وفجأة اكرهه ومااطيقه !!
بعدها ارجع اعتذر واقله انا اسفة وانا وانا ..
وسار مايثق في اللحظة الحلوة !​

فسبحان الله الخالق من خلق المرأة على التقلب والرجل على الاستقرار
تعبت وانا احاول اسعده واخلي دايما حياته في راحة ورضى
لكن فترة وفترة انقلب وفي كل مرة انقلب فيها احس اني فاشلة وماعندي شي اقدمه
واني اقل من غيري من النساء!!​

قرأت كثير وسألت كثير ​

كانت اهدافي خاطئة لاني كنت اريد ان اصل للكمال
في حياتي مع زوجي
كان يريد حياة هادية مافيها مشاكل
كنت اسعى لذلك
ولكن في كل مرة تكون هناك مشكلة الوم نفسي كثيير
واشعر بفشل
جلست فترة طويلة على هذا الحال !!
وانا اعرف يمكن في منكم من تعاني مثلي
لحد ماقرأت في كتاب الرجال من المريخ والنساء من الزهرة ​

في فصل الابقاء على سحر الحب حياً !
أحد الاشياء المحيرة للحب هو انه عندما تجري الامور على نحو جيد ونشعر بأننا محبوبون وسعداء
وفجأة نجد أنفسنا نبتعد عاطفيا عمن نحب او باردين معاهم!!​

هل شعرتي في وم من الايام مع زوجك:
انك تحبينه وفي الصباح متضايقة منه وماتطقينه؟
تلاقي نفسك يوم من الايام محبة وصبورة ومتقبلة لزوجك وأسعدتيه جدا
ثم اليوم اللي بعده تطالبينه بانه يهتم بيك وانه مهمل ليكي وتبكين وغير راضية على اي شي يسويه عشانك!!!
قيد يوم من الايام حسيتي انك ماتقدري تستغني عن زوجك وبعد ايام تتخاصمي معاه وتسير مشكلة بينكم وتفكري في الطلاق؟​

ولا في يوم جابلك زوجك هدية او دللك وسوالك المستحيل عشان يسعدك
ولازلتي تشعري انك معصبة منه ومتضايقة لانه في يوم اتجاهلك واتجاهل العيال ومطالبكم؟؟​

تحسين انك منجذبة لزوجك وبعدها حاسة ببرود معاه ولاعاد يجذبك؟؟​

انتي سعيدة مع زوجك وكل شي فل الفلللل وفجأة تحسي انك مو مطمنة له وانه مايحققلك الي تبغينه؟؟
تشعرين في ايام انك واثقة ومتاكدة انه زوجك يحبك وفجأة تشعرين انك عاجزة تقدميله او تعطينه ؟؟
وفي يوم دلعتيه وعيشتيه كل ايام الرومنسية
وفجاة تمسكيله على الغلطة وتصيري انتقادية انت وانت وانت وفيك ومافيك...
وتصدري احكام سلبية ماتحبني مو مخلص معايا ماتقدملي انا اسوي وافعل و و ..
وفي يوم تلاقي انك منجذبة لزوجك وانه رجاااال
ولمن تلاقينه منجذب لكي تفقدين انجذابك له او احيانا في حريم يفكرون انه في رجال اكثر جاذبية وتقول لنفسها ياليت كان زوجي اطول اقصر ابيض اسمر اتخن اعرض انحف..الخ​

وهذا الشي تلاقينه اكثر في الجنس تكون منجذبة لزوجها من يوم مايقرب منها تبغاه يخلص وتفتك منه
ولا تفكر تقول حاعمله وحاسويله من يوم مايجي جنبها تحس ببرووود معاه!!
احيانا بعض الحريم تقول لزوجها هيا نخرج مشينا وخرجنا لكن لمن يقول هو يلا نخرج
والله مافيا اخرج مكسلة خد العيال معاك!!!
او انك تجلسي معاه ايام ياسلااااام سمنة على عسل وراضية عن حياتك وعن عطائك
فجأة تحسينه انه مايستاهل ويبدأ اهمالك والتقصير​

ولا يوم من الايام تطالعين لزوجك واااو مافي احسن منه ولمن يقول كلمة معينة او يسوي شي معين
تحسين انك ماتبغيه وتبتعدي عاطفيا عنه​


هل مريتي بهذا كله ؟؟؟
نعم مرررتي بهذه التغيرات في حياتك ​

لمـــــــــــــــــــــــــــــاذا ؟
ومالحـــــــــــــــــــل ؟؟​

تابعي معايا,,​
 
عزيزتي روني أنا ماني متزوجه ولا شي بس نفس هالحاله (النفور وتقلب المزاج ) تجيني مع أهلي و صديقاتي :(​
 
ياكثر مامريت بهالحاله وادري ان الغلط فيني بس ودي اعرف السبب بليز متابعتك لاتطولين
 
فعلا صادقه كاني انا اللي كاتبه الموضوع عجلي علينا الله يفرج همك ويحقق لك ما تتمنين
​
 
ايــــــــــــــه والله صادقه
احبه لحظه وبلحظه اكرهه ودي انفصل عنه عشي تافه..وربي فجأه توها مامرت ساعه اضحك واشتاق له
وهو يستغرب ..؟

يارب يسر لنا ..
نبي حلولك يالغالـــيه ^_^
 
كملي حبيبتي والله كلامك 100%

وكانك تتكلمين عن نفسسسسي

لدرجه اني اتملل من نفسسسسي


كملي الله يعافيك لاتطولييين تكفيين​
 
اشكركم حبيباتي على الرد
واعتذر على التأخير

يلا ياقمرات نكمل دردشتنا..
وعلى فكرة يابنات هذه التقلبات مع الازواج تسير حتى مع الرجال
بس خلونا نتكلم ببساطة وبدون تعقيد

...
اكيد مرينا بتجارب تحولاتنا المفاجئة من وقت الى اخر
ومن الشااااائع جدا انه اثنين يحبون بعض لكن يتخاصمون واحيانا يسير بينهم كره
وانا هنا ماتكلم على الشجارات الزوجية
لا اتكلم عن التقلب المفاجئ واللي يسير كثثيير معانا احنا النساء !!
ياكثر ماعانيت منه يابنات :30:

هذه التحولات المفاجئة محيرة حقا !! لكن يابنات مررة شاااائعة
واذا مافهمنا ليش يسير لنا كدا ؟؟ حنحس ااننا مو طبيعين
(هذا اللي حسيته احيانا احس اني مجنونة وكل يوم برأي وحال خخخ)
بس لمن قرأت اكثر عرفت انه هذا شي طبيعي
طيب ايش التفسيــــــــــــــــر لهذا كله؟

الحب يخلي مشاعرنا الغير محلولة بالظهور ,,ويوم نحس اننا محبوبين فجأة وفي اليوم الثاني
خايفين اننا نثق بالحب
وتبدأ ذكرياتنا المؤلمة لحياتنا بالظهور عندما تقابل بالحب والثقة من الناس او مع الشريك
وكلما ماحبينا نفسنا اكثر وكنا محبوبين اكثر من الناس
كلما ظهرت مشاعرنا المكبوتة في الظهور
ليش تظهر؟؟
ظهرت مشاعرك المكبوتة عشان تشفى عشان تحرريها
اعراض ذلك ؟
فجأة نصبح سريعي التهيج ,او دفاعيين,وانتقاديين وعصبيين او مو راضيين عن شي
او متبلدين وباردين
هذه المشاعر التي لم تكوني قد عبرتي عنها في الماضي تظهر يوم تحسين بالامان
الحب يحرر مشاعرنا المكبوتة

يعني يابنات كأنه هذه المشاعر تستناكي الين ماتحبين او تنحبي سواء من صديقات واهل
او بعد مااتزوجين عشان تقولك هااااااااااي وتظهر :10:
يعني البنات المتزوجين يوافقوني الرأي انه هذه التقلبات ماكانت تسير لهم كثير يوم كانو بنات
وبعدين ياحبيباتي كل الناس عندهم مشاعر غير محلولة ومكبوتة
وهي جروح الماضي تظل ساكنة جواتنا لحد مانحس بالامان وقتها تظهر وتطفو على السطح بالتدريج
بداية اي علاقة مع اي شخص ماتلاحظي هذه المشاعر ظهرت ليش؟
لانك لسة ماحسيتي بالامان انك تظهري حقيقتك
من يوم ماتحسي بالامان تبدأة وتقولك هاااااااااي :19:

حبيباتي اذا قدرنا اننا نتعامل مع هذه المشاعر بنجاح حنشعر براحة ودفء حتى في هذه الاوقات
ولكن لو اتخاصمنا مع ازواجنا ومع الناس ونلومهم بدلا من معالجة الماضي حنتضايق ونكبتها اكثر واكثر

كيف تظهر مشاعرنا المكبوتة؟

المشكلة انه هذه المشاعر ماحتقلك (مرحبا انا مشاعرك الغير محلولة من الماضي طلعت واستناكي تحررني وتشفيني!!)
الامر مو بهذه السهولة
مثلا لو في طفولتك اتعرضتي لاهمال ورفض وحسيتي انك مو محبوبة ولا احد يهتم فيكي
ومحد يبغاكي لمن تكبرين وتلاقي مين يحبك حتظهر هذه المشاعر وتحسي انك مهملة يهتم وزوجك مايهتم فيكي ومايحبك

ألم الماضي يسقط على الحاضر
وتلاحظي انه شي تافه جدا لكن سببلك جرح كبير وقتها اعرفي انه سارلك شي في طفولتك او في ماضيكي وظهر لكي

دفنا هذه المشاعر جواتنا سنوات طويلة! ثم حبينا وجعلنا الحب نشعر بالامان لدرجة
اننا نصير واعيين بهذه المشاعر
لانه الحب يحرر قيودنا ونبدأ الشعور بألمنا

لماذا يتشاجر الازواج في الاوقات السعيدة؟؟
(يووووووووه تعبت من هذا الشي يومين حلوين وسعادة و10 ايام نكد ومشاكل)

طبعا زي ماقلنا هذه المشاعر تظهر يوم نحس بحي ورضا وسعادة وبامان
وفي هذه الاوقات بدل مانكون سعيدين مع بعض وتستمر سعادتنا
نتخاصم وينقلب كلامنا نكد

على اي شي نتخاصم على الخرجات الاكل او مناسبات اوقات الاجازات او اترقينا في الوظيفة
يعني في اوقات نحتاج نكون فيها سعيدين على الاخر
هذه المناسبات الخاصة نمر بتجربة مزاجية وردود افعال مالها تفسير
ونتضايق قبل المناسبة او بعدها مباشرة

ايا كان الموقف بينكم لو حسيتي انه مريتي بهذه التحولات اللي ذكرتها فاعرفي
انه 90% له علاقة بماضيكي
و10% له علاقة بالموقف الحالي
لوكان احد ينتقدك وانتي صغيرة حتتضايقين لمن احد ينتقدك الان
ومع انك تكوني عارففة انه مايقصد زوجك ينتقدك ولا الموضوع عادي لكن محتارة ايشبك وليش مكبرة الموضوع وليش متضايقة لهادرجة!!
لانه انتقاد زوجك لكي أشعل جواتك الم الماضي يوم كنتي طفلة وكانو ينتقدونك ع الرايحة والجاية !!
يوم كنا صغار كان لمن احد يضربنا او يخاصمنا او ينتقدنا او يلومنا ناخذه بشكل شخصي
ونعتبر انه الذنب ذنبنا وانه سوينا غلط ماكنا نفهم انننا ابرياء وانه المشكلة كانت من طريقة تعامل ابائنا لنا هذه مشكلتهم ليست مشكلة الاطفال

تخيلي احد صدم بيكي من الخلف على ذراعك
هذا غير مؤلم
والان تخيلي انه فيكي جرح مفتوح وجا احد صدم فيكي
هذا مؤلم بكثير
نفس الطريقة لو ان هذا المشاعر الغير محلولة من الماضي تكون بدأت تظهر حنكون حساسين لاي شي ولاي صدمات
البنات اللي يسألوني ليش مااحس بهذا الشي في بداية زواجي او بداية علاقتي مع الناس
لانه حتاخدي وقت عشان تظهر مشاعرك

كيف نقدر نساعد بعض في هذه الحالة ؟؟
كيف يقدر الرجل يساعد زوجته في هذه الحالة؟
كيف المرأة تقدر تساعد الرجل لو ظهرت مشاعر ماضيه المجروحة؟؟

لي عودة ,,​
 
-لمن ماضي الرجل يظهر فانه تلاقينه يعود الى كهفه ويصير جدا حسااااااااااس على اي شي
وقتها اعرفي انه مشاعره في طفولته ظهرت في عقله الباطن
يحتاج من التقبل لاتردي كل كلمة بعشرة
والمرأة كذلك يعود ماضي المراة بالظهور يعندما يتحطم تقدير الذات لديها وفي هذا الوقت تحتاج للحنان والرعاية ( بنات ياكثر ماحاولت افهم هذا الشي لزوجي بس ماكان يفهمني
يقلي لو تبغين حناني وحبي خليكي هادية لكن لمن انقلب مايحتويني يستناني احتوي نفسي فقلت الحل هنا اني اعرف كيف أوصل هذه المشاعر له وبعدها حالاقي اهتمامه) ​

يلا يابنات هذه الطريقة اننا نحل مشاعرنا هذه بطريقة صحيحة بدون مانخلي تقلباتنا تتحكم فينا :​

لمن تصير مشكلة بينك وبين زوجك اكتبي مشاعرك على ورقة (او في بنات يحبون يواجه بهذه المشاعر مو مشكلة)​

وسميها رسالة حب : هذه الرسالة حتحررك من الام الماضي وحتشفيها باذن الله
الرسالة هذه حتخلي تركيزك على الموقف الحاضر دون الغوص في مشاعر الماضي المؤلمة وبالتالي لاتسيطيرين على مشاعرك وانفعلاتك ومن فايدتها حتقدري تكوني متسامحة لزوجك لو انتقدك او جرحك وحتتقبليه وتفهمينه
كمان نفس الشي لو حسيتي انه ردة فعل زوجك قوية اعرفي بسبب مشاعره الماضية
ووقتها لاتقولي لزوجك انت تبالغ في ردة فعلك مافي شي يسوى
وقتها تزيدين المه وجروحه
واعطيه وقت يهدى واذا كان صعب تسمعيله خليه يوجهلك رسالة حب ​

احيانا يابنات الاحظ في محيطي انه في بنات اتعرضوا لطفولتهم لجروح مثلا شافو ابوهم يخون امهم شافو شجارات مستمرة ابوها كان ينتقدها دايما اخوها كان يضربها او صديقاتها كانو يستهزوأ من شكلها وحياتها واشياء كثيرة في ماصينا
لمن تحدث مشكلة اكتبي رسالة وشوفي هل يذكرك هذا الشي بماضيكي؟؟
واكتبي رسالة للشخض اللي ضايقك ابوكي امك صديقاتك..
ويابنات اغلب اسباب ضيقنا سببها جرح في الماضي مو سبب المشكلة الحالي
بعض البنات حساسين لموضوع وفي ناس يشوفونه شي عادي ...​

خلونا ناخد امثلة/في الصباح صحيت نهى وهي متضايقة من زوجها وايش ماسوى تتضايق اكثر لمن جلست مع نفسها وكتبت رسالة حب اكتشفت انها كانت متضايقة من ابوها اللي كان يتحكم في حياتهم لمن كانت بنت ..كتبت رسالة حب قصيرة لابوها
وبعدها حست براحة وانها مو متضايقة من زوجها وكملت يومها معاه بسعادة​

عاشت سهام ليلة رومنسية مع زوجها شموع وورد وفي اليوم اللي بعده دخلت في مشكلة مع زوجها لانها نسيت تسوي شي معين وبالغت في ردة فعلها وفكرت انها تتطلق
وفهمت لمن كتبت رسالة الحب انها خايفة انه يتركها زوجها واتذكرت انه ابوها وامها كانو يتخاصمون وهي تشوفهم فكتبت رسالة حب لابوها وامها.​

كان زوج هنادي مشغول في عمله واتأخر في عمله وهي معصبة ومتضايقة وكان جواتها فاهمة انه مضغوط في عمله لكن انفعاليا معصبة منه
ولمن كتبت رسالة حب اكتشفت انها متضايقة من ابوها اللي اتخلى عن امها
فكتبت رسالة حب لابوها وماسارت متضايقة من زوجها​


منار مخطوبة من عبد العزيز ويحبون بعض وقالها انه يحبها ومافي زيها وانه سعيد معاها
ثاني يوم تغير مزاجها عليه فجأة وسارت تشك فيه وماسارت تشتاقله ولمن كتبت رسالة حب اكتشفت انها متضايقة من ابوها اللي كان يجرح امها وكان مايعاملها باللطف ​


يمكن وانتي جالسة تكتبين رسالة حب ماتتذكرين ماضيكي لكن مع التدرب حتصيرين اكثر انفتاح لمشاعرك وواعية لانفعلاتك المزاجية وانفعالات زوجك لانها تحررك من سلبية ماضيكي..​

حنتعلم طريقة كتابة رسايل الحب !
 
اتوقع هذا السبب اللي ينصح فيه الخبراء بكتابة المذكرات..

في انتظار المزيييد...
 
طيب لما يكون زوجك هو اللي متقلب بالمزاج ................... كيف تتعاملين معاه ؟
لأنه ماراح يرضى يكتب رسايل حب والاشياء هذي ............. ومااعتقد اصلا انه يؤمن بالكلام هذا .
لكن انا مقتنعة تماما بكلامك _ بس انصحيني كيف اتعامل معاه !!!!!!!!!!!!!!!!!!!​
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل