........ثرثرات تغريد!!

  • بادئ الموضوع بادئ الموضوع جيانة
  • تاريخ البدء تاريخ البدء
جيانة

جيانة

قاصة متميزة بمنتديات نسوة
إنضم
2008/05/31
المشاركات
5,386
سواليف جديدة!​
كالعادة..أتيت إليكم بموضوع طازج عن طريق قصة وهمية..كي أصل بطريقتي إلى عقولكم وأستدرجكم من حيث لاتشعرون وأستكشف خبايا هذه العقول!
(لقافة نسوان بعيد عنكم!!أو مثل مايسمونها بالتعريف الثقافي قراءة الشخصيات!!)
المهم بما إنني انسانة قليلة الكلام<<<اتقي الله يامخلوقة العضوات صاروا يعرفونك!!!هههه
سأترك الكلام للآنسة تغريد تحكي لكم بنفسها..
ياهلا ومسهله...
أنا تغريد...
وأحب الهذرةوالثرثرة
بس بفايدة مو قرقرة>>>على فكرة هذي كلماتي!مو آخر قصيدة لعبدالرحمن بن مساعد!لأن بيني وبينكم كثير صاروا يسرقون هالأيام وينسبون لأنفسهم!!
عندي ثقة كبيرة بنفسي...ثقة لاتقدر بثمن!!على قولة أختي طيف:ثقتك لاتقدر بثمن..لأن مالها ثمن أصلاً!!!>>عاد..وش بأقول وحسادي كثير؟!!
المهم يابنات الحلال..يوم من الأيام كان فيه مِلكة عائلية ببيت خالي وحيثُ أني فاشلة مع مرتبة الشرف في وضع الميك آب..اضطريت للذهاب للصالون اللي بنفس حارتنا..(ولا بيني وبينكم الملكة كانت عائلية ومختصرة وماتسوى أحد يروح يخسر قروشه بصالون!!)
وماتدرون أخوي قد إيش عل قلبي عشان يوصلني للصالون وحدث بيننا الحوار التالي:
أخوي عبدالكريم:الحين وشهوله قالقتنا وتبين تروحين للصالون؟؟
أنا:يعني ليش الوحدة تروح للصالون بالله؟؟عشان تتزلج على الجليد؟ولا تطِق إبرة مُضاد؟؟
عبدالكريم:مدري عنك!إنتي مافي شي أستبعده عن عقلك!!!
أنا:رايحة أتزين للملكة!
عبدالكريم:لاتتعبين نفسك!الشين شين ولو دهنوه بـ ذهب وطيبوه بـ مسك!!!
أنا:شكراً ياأخي العزيز على كلامك اللطيف..وعلى قولة جدتي لاشافتني وشافتك(سبحان الله..فولة وانقسمت نصين!!!!!)>>استعارة مكنية يُقصد بها قوة الشبه بيني وبينه!!!بس مدري!مرات أحس إنها مديح ومرات أحس إنها سَبة!لأنه يا أخوي يشبه البنات.. يا أنا أشبه الأولاد!!!
المهم ياعزيزاتي ماأحب الإطالة!!
وصلت الصالون وحيث كانت هذي هي المرة الأولى اللي أروح لهذا الصالون...
دخلت وانطلقت لغرفة الكوافير..
مسكتني موظفة الريسيبشن
وقالت:لحظة لحظة ياأخت على فين؟؟؟
أنا:بأروح أتمكيج داخل!
موظفة الاستقبال:حبيبتي لازم تعملي الاجراءات الأول!
أنا:أي اجراءات؟؟أَمْنِيَة؟أقسم بالله ماني شايلة أسلحة!!!
موظفة الاستقبال:هههه واه ياقلبو شكلك أول مرة تدخلي صالون!المهم...تعالي سجلي اسمك في الدفتر..وانتي مِن متى حاجزة؟واسم الكوافيرة اللي انتي حاجزة عندها...وتحبي تخلصي متى؟؟واش الخدمة اللي تبغيها؟
أنا:الله الله..كل هذا؟؟أنا لو رايحة السفارة ماسألوني أسئلة هالكثر؟المهم..أنا بنية قنوعة..ومايفرِق معاي اسم الكوافيرة أهم شي انها سنعة ونشمية وتخلصني بدري..وماقد حجزت عندكم..وأبي مكياج وسشوار بس!
وبعد ماانتهيت من هالاجراءات..
جيت منطلقة على الداخل..
موظفة الاستقبال:ياأخت ياأخت لسه ماانتهينا!!
أنا:يابنت الناس وراك ناشبة بحلقي؟فكيني الله يرحم والديك!
موظفة الاستقبال:طيب انتي مادفعتي!
أنا:وافرضي دفعت وطلع شغلكم خرِطي؟؟فلوس أبوي تروح بلاش؟؟
موظفة الاستقبال:لا لا عيب الكلام ده..صالوننا من أشهر الصوالين ومافي زبونة تطلع من عندنا زعلانة...
المهم دفعت المقسوم ودخلت..
لقيت وحدة سمبتيكه...قالت:أهلين مدام؟
أنا:آنسة لو سمحتي!ولا انتوا كل ماشفتوا وحدة منفقعة حسبتوها متزوجة ومخلِفة؟؟أنا منفوخة شوي لأن ستايلي كذا!!
الكوافيرة:تِكرم عينك..أهلين ياآنسة..شو طلبك؟؟
أنا:أبي تسوين لي مكياج..
الكوافيرة:وش نوعه؟؟
أنا:يا سِتي مو فارقة..أي ماركة تؤدي الغرض!!أهم شي يطلع اسمه ماكياج بالنهاية!!
الكوافيرة:عفواً آنسة..أنا بِأئصُد بدك نوعه..خفيف إما متوسط إما تئيل؟؟؟
أنا:خليه خفيف لأن بعدي بنية!..
الكوافيرة:خفيف من أيا نوع؟؟
أنا:لاحول ولاقوة إلا بالله..ياناس انتوا ماقد تصَلَح عندكم أحد من قبل؟؟؟
الكوافيرة:ياآنسة مافهمتي أصدي منيح؟اللي بإصدو بَدِك ماكياج
سوء(ق) مَسَلاً؟؟
أنا:نعم؟؟وش يطلع مكياج السوق هذا؟؟أكيد المكياج بتشترونه من السوق..أجل بتاخذونه من حلقة الخضار؟؟؟
الكوافيرة:اللهم صلي وسلِم عليك يامحمد..مكياج السوء(ق) هو ماكياج للعيون بس..يعني فونديشن+كحل مركز+ماسكارا!!وبس!
أنا:وش ذا البخل؟؟والخدود والفم مالهم نصيب؟؟
الكوافيرة:لا عيون بس!!
أنا:آه عشان يطلع أرخص!
الكوافيرة:لأ..مش هيك الئِصة!ماكياج السوق بيحطوه النسوان اللي بيلبسوا براقع أو لثمة أو نقاب حتى..لما بدهم يروحوا السوق..أما خدودُن وإتمامن مش راح تبان لأنا بتكون مغطاية..فهمتي كِيف؟؟؟؟
أنا:الله لايربحهم ولايربحكم..بعد وحدة رايحة تتسوق وتتقضى..
وشهوله تزبرق عيونها؟؟عشان يناظرونها الرجاجيل؟؟؟
الكوافيرة:لأ يوه ياآنسة..ليش هيك ظنِك سيء؟؟ بس هدول نسوان حريصات يطلعوا بأجمل صورة بكل وئت!!
أنا:ايه..جميلات بعيون الشيطان..
آخر موضة والله!!مابقي إلا تحطون ماكياج عزاء؟؟
الكوافيرة:ايه موجود بدِك؟؟؟
أنا:نعم؟؟إنتي مِن صدقك؟؟
وشلون ماكياج العزاء؟؟
الكوافيرة:بيكون خفيف وناتشيورال
مشان تطلعي حِلوِة بكل لحضاتك!!
أنا:أقول صديتي نفسي ماعاد لي خاطر أسمع شي..سوي لي ماكياج بسيط وناعم والسلام!!
وسوت لي ماكياج هادي وحلو وسشوار لشعري..وخرجت من عندها..
موظفة الاستقبال:ان شاء الله مبسوطة من صالوننا ياآنسة؟؟
أنا:ايه..وصالونكم ذا..بأسميه صالون أبو تحقيق..مافي سؤال ماسألتوني اياه..مابقي إلا تعرفون كم وزني!!
موظفة الاستقبال:ايوه إزا تبغي... فيه مدربة رياضة جوه..ممكن تحط لك نظام تغزية مناسب وتبدأي معاها سبورت على حسب وزنك!
أنا:أقول مع السلامة..وهذا جسمي وأنا ستايلي كذا..لازم كل فتيات العالم يكونون رشيقات؟؟
بالعكس فخر لي أكون متميزة عنهم!!!!
وخرجت من عندهم على السيارة
وبعد ماركبت...
أخوي عبدالكريم:صح النوم؟؟كل هالوقت عندهم؟ليش؟قاعدة تسوين صِيانة شاملة؟ولا صَنفرة؟؟
أنا:وش هالكلام؟راجع من ورشة إنت؟؟أقول سوق سوق!!
ووصلت البيت والماكياج عجب أمي..وماهي إلا ساعة ونص ورحنا بيت خالي نحضر مِلكة بنته امتنان...
وهناك قابلت أختي طيف المتزوجة وأقاربنا(أهل أمي)...
أنا:وش رايكم بمكياجي؟؟
طيف:أشوف؟؟ لاااا لك مستقبل يابنت!!!
بنت خالتي:لو تنحفين شوي تطلعين واو!!!
أنا:لا أبي أصير واو ولا ياء..خلني ماشية مثل الألِف!!!
ومرت الليلة على خير وجلسْت بطرف المجلس جنب وحدة من بنات خالي تصير أخت العروس..
هدى(بنت خالي):مكياجك حلو ياتغريد...فين سويتيه؟؟
أنا:في صالون(؟؟؟)..>>علامات الاستفهام هذي لأني ماأحب أسوي دعايات مجانية!!يكسبون هم زباين وأنا مايطلع لي نسبة؟؟لا يمكن!!!
هدى:يبغالي يوم أجربهم..
أنا:أما أنا ماعد بأطب عليهم..رفعوا ضغطي..تصدقون إنهم يسوون ماكياج عزاء..لا والأدهى يسوون ماكياج سوق!!!
هدى(ببرود):طيب اشفيها؟؟
أنا:اشفيها؟؟؟يالله إنك تشفيها..أقول لك ماكياج سوق..وماأعتب على الصالون..لأنهم لاقيين نسوان فاغرات يدورون عن هالأشياء..بس عتبي على النسوان اللي لاخوف ولاحيا..شلون الوحدة تسمح لنفسها تحط ميك آب عيون وتطلع به السوق..أكيد نيتها شينة!!
هدى:وليش الظلم عاد؟أنا بصراحة قبل ما أروح السوق أمكيج عيوني وأضبطهم!!
أنا:الله لايسامحك ليش؟؟زوجك مايغار عليك؟
هدى:وأنا أصلاً ليش أحط هالميك آب؟كله عشان زوجي لايلتفت يمين ولاشمال!
أنا:لا ياشيخة؟تبين تقولين لي..إنه بيترك السوق كله ويحط عينه بعينك ويناظر جمالك ويتأملك؟ليش؟فاتن حمامة وعمر الشريف على غفلة؟؟؟
هدى:هههه مو القصة..بس على الأقل لما يشوف بنات حلوات ويشوفني..يحس إني مو أقل منهم وعندي مثل ماعندهم وأحسن منهم!
أنا:لا مثقفة بصراحة!!
(وعاد أنا ماأخفيكم حسيت وقتها إني نفسي لو بإيدي مطرقة كان مسكت هدى وعلقتها على الجدار بمسامير صناعة ياباني ومانزلتها لين ماتقول(تُبتُ إليكَ يارب)!!!!
ياناس ياعالم حرام عليكم!!ليش ربي شرع لنا الحجاب تتوقعون؟؟مو عشان نستتر عن أعين الرجال الأغراب؟؟طيب اش فايدة الحجاب إذا كنت بأتمكيج وأضبط عيوني بشكل مغري ومُلفِت..يخليني أجمل بكثير من الواقع؟؟يمكن لو وحدة من هالمتزينات كشفت وجهها طلعت تخرِع قبيلة!!بس تضبيطها لعينها من تحت البرقع أو اللثمة أو النقاب يخليها قمر والشيطان يحليها زيادة بعيون ضعفاء النفوس..
لاأحد يضحك علي ويقول:نيتي طاهرة بس أحب أتزين!!
وأنا سؤالي:تتزينين لمين في السوق ياحلوة؟؟ماتدرين إن الشيطان ينصب رايته بالسوق؟
مثل ماجاء بالسنة؟؟
استروا أنفسكم وبناتكم تراها أمانة ولاتتبرجوا تبرج الجاهلية الأولى...كل عضو تكشفينه تأثمين عليه فما بالك يوم تزينينه للفت الأنظار؟!!!!!!
والله يهدينا جميعاً
ملحوظة:كل الحوارات السابقة والشخصيات من فحوى الخيال..ولكن ماكياج السوق والعزاء موجودة في الواقع...وهدفي أعتقد واضح للجميع....​
 
الله يعطيك العافيه يا عسل قصه هادفه بطريقه روع
 
وااااااااااااااااااااااااااااااااااااااااااااااو
جيون هنا يامرحبا يامرحبا
يالله انك تحييها
خخخخخخخخخخخخخخخخخخخخخ
مابقى الا القهوه والحلى
رائـــــــــــــــــــــــــــــــعه
كما عهدناك دائماً جيوووووووووووووون
رائعه في طرحك وهادفه في موضوعاتك
مشكورررره
للاسف هذا اللي حاصل في المجتمع
تقبلي مروري
 
يعطيك العافية على هالقصة الرووووعة
يااحلى جيااااانووووو​

ماشاء الله عليكى دووووما متميزة وطرحك راقى وجذاب​

وذو هدف وعبرة​
بارك الله فيكى واكرمك
 
فعلا كلامك صحيح وأسلوبك رائع ويوسع
الصدر شكرا لك والله يهدي الجميع
 
جزاك الله خيرايااختى على هده القصة الرائعة

ياناس ياعالم حرام عليكم!!ليش ربي شرع لنا الحجاب تتوقعون؟؟مو عشان نستتر عن أعين الرجال الأغراب؟؟طيب اش فايدة الحجاب إذا كنت بأتمكيج وأضبط عيوني بشكل مغري ومُلفِت..يخليني أجمل بكثير من الواقع؟؟يمكن لو وحدة من هالمتزينات كشفت وجهها طلعت تخرِع قبيلة!!بس تضبيطها لعينها من تحت البرقع أو اللثمة أو النقاب يخليها قمر والشيطان يحليها زيادة بعيون ضعفاء
وهدا الجزء من القصة أسأل الله أن يجعله فى ميزان
حسناتك
 
سالفة أخرى!!​
بيوم من الأيام كانت أمي معزومة عند ناس...وأختي طيف المتزوجة تبي حمار مكدَّة يساعدها!!واللي هو أنا!!عشان صاحباتها بيجونها
..فتبرعت مشكورة بالذهــــاب
ومساعدتها لإعداد مالذ وطاب
واستقبال الضيوف بالودِ والترحاب
(ياناس علياَّ تتعبون تقولون شاعرة!!)هههه
وبدأوا صديقاتها في الحضور عندما حل المساء...دُرت عليهم بالعصير ثم دخلت إلى الصالة الداخلية وانرزعت فيها!!
وبعد برهة قصيرة أقبلت طيف أختي..
طيف:تغريد؟قومي جيبي القهوة وأغراضها وباشري على الحريم..
ورحت أصب للحريم قهوة...
وحدة منهم:انتي متخرجة من الجامعة من زمان؟؟
أنا:لا ماتخرجت..بعدي بسنة ثانية جامعة...
الحرمة:ليش؟؟رسبتي؟؟
أنا:لا بسم الله علي مارسبت..بس جسمي ظالمني شوي!!
الحرمة:عندي ريجيم خطيييير..
تبينه؟؟
أنا:لا..ماأبيه..أمي علمتني أبعد عن كل خطر!!
النسوان:ههههههه
تركتهم ورجعت للصالة وتسمرت قدام التليفزيون أفتر من قناة لقناة..عل وعسى ألقى شي يشجع على المتابعة ولكن مامن جدوى..أستطيع أن استنتج إن جميع الأمراض المستعصية بعالمنا العربي سببها التلفاز!!!
فبرامجه ومسلسلاته تجيب الضغط والسكري والقلب وكل مرض نسمع به أو مانسمع!!إلا فيما نَدَر!والمشكلة على قد مايُعرض بالتلفاز من سخافات مازال عدد المشاهدين يزداد!!
يا قنوات فيها منصة للرقص بالوسط وبنات ليل يتنافسن لعرض اللحوم حشى حَلَبَة لسباق الأبقار وكل وحدة أخس من الثانية.. ماأدري هذول العالم ماوراهم أهل يربونهم؟؟
ولا اش يحسون فيه وهم يستعرضون أجسادهم بطرق فاضحة؟؟وكل وحدة ترقص بعالم آخر لاتناسق
..عفاشة+سماجة+سوق نخاسة!!
والأردى والأخس منهم اللي يتابعهم!!!
الصراحة شكلي بأألف فيهم كتاب وأسميه(تأملات معاصرة في طُرق هز الخاصِرة!!)وأتبعه بالجزء الثاني(في بيوتنا مراقص!!!)
ولا مسلسلات تركية..لاتعليق!!!
يجيبون الدعارة والزنا والعلاقات المحرمة في قالب الحب والرومانسية!!يعني افساد وتدمير لشخصيات ضِعاف النفوس
والعقول اللي يتابعونهم!!!
ولا مسلسلا ت عربية وقال إيش كوميدية!!وهي أقرب للتهريج..لدرجة إنه حتى أطفال أختي طيف يقولون:اش هذي الهبالة؟!!
ولا المسلسلات الخليجية شي يجيب العصبي غصب!!يجيبون الرِجال يعربدون أو يضربون زوجاتهم ويكعشونهم من شعورهم والبطلة تصارخ وتهز شعرها المضروب سشوار لين ماقالت بس!!!ومو بس كذا كل المسلسل استعراض ملابس وجلابيات ومكياج!!سبحان الله الوحدة تصحى من النوم في المسلسل وحاطة ماكياج عروس!
لا وكل مسلسل لازم فيه مستشفى..وكل الأبطال يوقفون فيه ومالهم كلمة غير أحاتي فلان وأحاتي فلانة!!!!
الصراحة..عين العقل إن الوحدة تسوي مقاطعة لجميع القنوات..ماعدا الدينية اللي تبث مواضيع تنفعنا بآخرتنا..
دخلت علي طيف وقطعت حبل أفكاري....
طيف:تغريد؟؟وشفيك ماتقعدين معانا؟وكل دقيقة وانتي شاردة؟
أنا:لأني خابرتكم ياالنسوان...سواليفكم تجيب لي المغص!!!
طيف:الله يالغيرة...يعني من زين سوالفك ياعزوبية؟؟قومي قومي اقعدي مع النسوان يالله..
ودخلت لقيت وحدة منهم تقول واسمها(شموخ):يالله ياحلوات..كل وحدة تقول لنا..وش مسمية زوجها بجوالها؟؟؟
الأولى:أنا مسميته تاج راسي!!
الثانية:الحب كله!
الثالثة:بعد عمري!
الرابعة:صعب أنساك
أختي طيف:وزارة الخارجية!!
الجميع:هههههههه
شموخ:جِعلك تعرسين ياتغريد ونعرف اسم زوجك بجوالك!!!
أنا:وليش اللف والدوران واختيار اسماء لأزواجكم؟فضاوة؟سموهم بالأسماء اللي أهاليهم مسمينهم إياها!!
الثانية:تغيير..مو أكثر!
أنا:تغيير؟ولا استعراض؟؟وش يفيدك لاكان اسمه بعد عمري ولا بعد طوايفي؟؟
الرابعة:عادي..ليش ماخذة الموضوع جد؟؟
أنا:لأنه قبل ماتطلع موضة الجوالات كنَّا نكتب الأرقام بالدفتر..وماأتذكر إنه فيه أحد يحط الأسماء بألقاب!!ولا شلون؟؟؟
الجميع:صح!ههههه
وفجأة قالت وحدة اسمها معالي..
معالي:ايه قبل ماأنسى..اش اسمها الخياطة اللي فصلتي عندها فستان لزواج أخوك يانورا؟؟
نورا:اسمها سديم بس ترى هي مصممة مو خياطة وعندها طاقم خياطات..
معالي:بس الصراحة كان فستانك خيااااال..
نورا:طبعاً...زودتها في الأجرة مقابل إنها تصمم لي فستان خاص فيني ومايكون عند أحد مثله
أنا:بالنهاية هو فستان...يعني هل اخترعت لك اختراع ماسبقها إليه أحد؟؟؟
نورا: مو بالضبط..بس جداً مميز..وطلعت أميز وحدة بالعرس!
شموخ:أكيد كلفك فوق ال3 آلاف..صح؟؟؟
نورا:ايه بكثير!!!
أنا:ليش؟؟خيطوه لك بخيوط ذهب؟
نورا:ههههه لا ياقلبي بس هذي أسعار المصممات..واللي يبي التميز لازم يخسر فلوس!!
أنا:وياترى..وشهو مفهوم التميُز بنظركم؟؟
صارت طيف تبحلق عيونها فيني عشان أسكِت..وأنا ضاربتها طناش
معالي:التميز..إنك تنفردين بشي..ماعند الناس مثله!!
أنا:آه..وتصيرين وحدة من ثنتين:يا حاسدة يا محسودة!!
شموخ:بالعكس..ليش ماتكون الوحدة منفردة بذوقها عن الجميع؟
أنا:وليش ماتكون الوحدة مثل الناس؟ولا لازم الغرور والكبرياء والمباهاة والسرف...تدرون عواقب لابسة ثوب الشهرة؟؟؟
أطرح بين أياديكم هذا السؤال:
ماهو ثوب الشهرة؟؟ابحثولي عنه في الأحاديث!​
 
حبيبتي انا من اشد المعجبات بقصصك ماشاء الله تبارك الله بما فيها من مواعظ واستفادة دينية
الى الامام حبيبتي
فبطريقة دعوتك السهلة والسلسة تكوني داعية اسلامية في هذا الصرح
جزيتي الجنه
انت واخواتك وامهن
 
اولاً
زعلانه اهلي وارحب وقهوه وحلى ولاتردين علي اهئ اهئ

ثانياً
جيتي على الجرح ياقلبو
والله اني زهقانه انا وبناتي الله يحفظهن من هالمظاهر
1وش نوع جوالك او ليش إلى هالحين ماغيرتيه
2بكم شنطتك
3ساعتك اصليه
4وين بتسافرون
5بلوزتك ماركه
وإلى آخره من هالتفاهات للاسف ..................
قسمن بالله صرنا نكره اجتماعتنا ناس سطحيين إلى ابعد حد
بس وش نسوي مجبورين نجتمع معهم
الله يعين
 
السدم قال:
اولاً
أنقر للتوسيع...
السدم قال:
زعلانه اهلي وارحب وقهوه وحلى ولاتردين علي اهئ اهئ

ثانياً
جيتي على الجرح ياقلبو
والله اني زهقانه انا وبناتي الله يحفظهن من هالمظاهر
1وش نوع جوالك او ليش إلى هالحين ماغيرتيه
2بكم شنطتك
3ساعتك اصليه
4وين بتسافرون
5بلوزتك ماركه
وإلى آخره من هالتفاهات للاسف ..................
قسمن بالله صرنا نكره اجتماعتنا ناس سطحيين إلى ابعد حد
بس وش نسوي مجبورين نجتمع معهم
الله يعين
أنقر للتوسيع...

والله يالسدم..من غير ماتحلفيني..أول ماكتبت هذا الموضوع...قلت بنفسي بأروح أسوي شَغلة وبعدين أرجع للسدم أرسل لها على الخاص رابط الموضوع..إلا لقيتك رديتي وفرحت لردك مرة ياعسل
وقهوتك وشربناها وحلاك اعتبري إنه وصل وذقناه
وسلمي على بناتك الله يحفظكم لبعض يارب...
مشكلة البعض من الناس صار عندهم هشاشة في التفكير..مايفكر إلا بالمظهر لاعتقاده إنه الناس يتعاملون مع منظره فقط!!!

 
ولا مسلسلات تركية..لاتعليق!!!
يجيبون الدعارة والزنا والعلاقات المحرمة في قالب الحب والرومانسية!!يعني افساد وتدمير لشخصيات ضِعاف النفوس
والعقول اللي يتابعونهم!!!






جيتي على الجرح والله........تكاد تكون ظاهرة تكون منتشرة بين المراهقات تقليد تلك المسلسلات بشكل ملحوظ ..يعني انهن يتباهين ويتفاخرن بتلك الحركات المحرمة ..انا احب وفلان يعشقني او لا يستطيع ينام قبل ان يكلمني ..وتلك تبحث عن عشيق لتتباهى هي الأخرى بأنها محبوبة حتى لو كان بائع البقالة
حسبنا الله على من روج للحرام ..كانوا الناس في الماضي يسترون انفسهم اما اليوم فيجاهرون بالمعاصي ظنن مهنم انه لا بدى ان تجاري صاحباتها..حتى لا تكون غريبة من بينهن...طوبى للغرباء


واصلي ياجيانة بوركت اناملاً كتبت:32:
 
اجابه على سؤال جيوونه

التوجيه الشرعي في أمر اللباس يستحب للناس أن يتوسطوا ويعتدلوا فيه ، من غير إسراف ولا مخيلة ، ومن غير رداءة ولا رثاثة ، فالاعتدال مندوب في جميع الأمور ، ومنها اللباس الذي يقي الإنسان من الحر أو البرد ويتزين به للناس .
يقول الله عز وجل : ( يَا بَنِي آَدَمَ خُذُوا زِينَتَكُمْ عِنْدَ كُلِّ مَسْجِدٍ وَكُلُوا وَاشْرَبُوا وَلَا تُسْرِفُوا إِنَّهُ لَا يُحِبُّ الْمُسْرِفِينَ ) الأعراف/31
عن عبد الله بن عمرو بن العاص أن النبي صلى الله عليه وسلم قال : ( كُلُوا وَتَصَدَّقُوا وَالْبَسُوا فِي غَيْرِ إِسْرَافٍ وَلَا مَخِيلَةٍ ) رواه النسائي (2559) وحسنه الألباني في "صحيح النسائي"
وقال ابن عباس رضي الله عنهما : " كل ما شئت ، والبس ما شئت ، ما أخطأتك خصلتان : سرَف ومَخِيلة " انتهى .
رواه ابن أبي شيبة في "المصنف" (5/171) .
وقد ورد في خصوص لباس الشهرة أحاديث منها حديث ابْنِ عُمَرَ رضي الله عنهما ، قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ لَبِسَ ثَوْبَ شُهْرَةٍ فِي الدُّنْيَا أَلْبَسَهُ اللَّهُ ثَوْبَ مَذَلَّةٍ يَوْمَ الْقِيَامَةِ ) . رواه أبو داود (4029) والنسائي في "السنن الكبرى" (5/460) وابن ماجه (3606) وأحمد في "المسند" (2/92) وغيرهم ، وحسنه الألباني والأرناؤوط .


لا تعليق على كلامك كله صح وهو اللي المفروض يسير بس الله يعين

مثل ما قلتي الشيطان يزين لضعاف النفوس المعصية


 
تتجدد السواليف مع ثرثرات تغريد​
رحنا مرة لزوجة أخوي عبدالله وكان اسمها فايزة
ومعانا أختي طيف وأمي وزوجة أخوي عبدالقادر
واثنين من خالاتي...
وكانت سُفرة القهوة عامرة بالأطباق الشهية...
وأنواع الحلى اللذيذة..
وكعادتنا إحنا الإناث نقاوم كل شيء إلا الحلى!!
وإن طبينا..طبينا بإخلاص في معركة محتدمة بيننا وبين الصحون...والأطباق تستنجد من ضرب الملاعق عليها!!!
ولا انتهينا....كان ختامها مسك!!!نسوي برَّاد الشاي الأخضر....وننسفه لآخر قطرة!على بالنا بيمحي آثار الجريمة اللي ارتكبناها قبل شوي في مسح الصحون!!!
أثنى الجميع على الأصناف اللذيذة....وبدأ الكلام يدور عن وصفات الأكلات والحلويات وطرق التزيين..
وعاد الأسماء..حدِث ولا حرج..
طبق اسمه..كشك الأمراء!!والثاني حلى الأغنياء والثالث رِضا الوالدين..والرابع كُل واِشكر!!والخامس قُدرة قادر..والسادس واثق من نفسه!
وغيرهم كنافة كذابة..ومنتو كذاب..وبيتزا كذابة!!سبحان الله!!
الكذب انتقل حتى للأكل؟!!!!
بعد ماانتهينا من الأكل والشرب بدأوا الضيوف بالانصراف وبقيت أنا وفايزة زوجة أخوي عبدالله اللي عازمتنا وسامية زوجة عبدالقادر...
وأمي راحت وسمحت لي أجلس عشان أساعد زوجة أخوي بالتنظيف...
سامية(الضيفة زوجة أخوي عبدالقادر):ماشاء الله أكلاتك لذيذة يافايزة...هذاك الحلى اللي عليه توفي..وش مقاديره؟؟؟
وقامت فايزة تعطيها الطريقة....
سامية:طيب الحلى اللي عليه قرفة ومكسرات..كيف طريقته؟؟؟
راحت فايزة تشرح لها...
وشوي جاء أخوي عبدالقادر وأخذ سامية ورجعوا بيتهم وبقيت أنا وفايزة ننظف المطبخ..وآآكل مابقي في الأطباق!!!
أنا:فايزة؟؟
فايزة:يا نعم!
أنا:ماني طالعة من بيتك لين تعلميني طريقة هالحلى وذاك..
فايزة:ابشري...
وقامت تقول لي المكونات والمقادير..ولقيت إنها مختلفة عن الكلام اللي قالته لـ سامية!!!
أنا:فايزة يابكاشة!!وش هالحسد؟؟على بالك إذني مالقطت بعض المقادير اللي قلتيها لسامية؟؟؟والله إنها مختلفة عن اللي قلتيه ذحين!!
فايزة:أدري!
أنا:تدرين يالنذلة؟؟ وليش تكذبين علي؟؟
فايزة:أنا ماكذبت عليك..أنا كذبت على سامية!!!
أنا:وليش يابعدي؟؟
فايزة:لأني خبيرة بطبع النسوان..بكرة تسويه وتنسبه لنفسها وإنه من اختراعها الشخصي من غير ماتجيب لي ذِكر!!!فرجعت عطيتها إياه غلط!
أنا:يقطع ابليسك!!حرام عليك بنت الناس بكرة تضيع مكونات في أكلات فاشلة!!
فايزة:أحسن!!
أنا:ياحسودة..مين قال لك إن حقوق الأكلات محفوظة لك؟؟؟بضغطة زِر على النت تلاقين ملايين الأكلات والوصفات اللذيذة...وماهي منسوبة لأحد!!ولا على بالك أنا لا أخذت منك طريقة طبق بأحط عليه خَتم بإسمك؟!!!
فايزة:لا طبعاً..بس قولي أنا أخذت طريقته من فايزة!!
أنا:ياسلام..يعني اللي تعرفينه انتي..مايعرفه غيرك؟؟؟تمني للناس ماتتمنينه لنفسك!يرضيك وحدة تكذب عليك وتعطيك وصفات غلط؟؟
فايزة:لا طبعاً..أنا لو تفتحين دفتر الطبخ حقي بتلقين فيه..كل وصفة وجنبها اسم الحرمة اللي أعطتني اياها!
أنا:بس الناس مايهمهم مين اللي علَّمك الأكلة بقدر مايهمهم شلون سويتيها..
والا انتوا اش رايكم ياعضوات؟؟؟
حلو نكذب على بعض حتى في وصفات الأكل؟؟؟
 


رائعة جداً
مواضيع تخدم البشر بقالب كوميدي جميل
يصل للقلب قبل العين ...

مبدعة ياعزيزتي
ويحق لهم تسميتكِ بــ ( القاصة )

موفقة

 
يجب تسجيل الدخول أو التسجيل كي تتمكن من الرد هنا.
عودة
أعلى أسفل