::لماذا تحرمني... يازوجي من كلمة "ماما"؟؟؟::

السلام عليكم و رحمة الله وبركاته​

والله ياخواتي انا لا أجيد صف الكلمات ولا تنميق العبارات​

لكني قصدتكن بعد الله تعالى لتشاركنني همي وتنقذوني من الحيره اللي انا فيها...:tears:​

وإليكن قصتي​

واللي اتمنى من الله ان القى لديكن الراي السديد باذن الله تعالى​

...​

أنا صار لي متزوجة من سنتين...و أنا و زوجي تزوجنا عن حب و مو منغص علينا غير حكاية الخلفه اللي تأخرت...و زوجي من النوع اللي يموت في الأطفال...
قبل فترة رحت لمستشفى حكومي عشان اسوي فحوصات لتأخر الحمل و مثل ما تعرفون يطلبون من الزوج عينه من السائل ماله عشان الفحص و طبعا زوجي ماراح لهم إلا بعد ما طلع روحي..و بعدين طلعت النتايج الدكتورة بلغتني إن أنا سليمة و ما فيني شي و يوم شافت نتيجة زوجي سكتت سألتها: في شي.. قالت: ما أعرف هو لازم يروح لمستشفى متخصص قسم جلدية و تناسلية و احنا اهنيه ما عندنا قسم متخصص في المستشفى قلتلها: دكتورة في شي في النتيجه قالت ما أعرف خليه يروح و بيعرف هناك..​

طبعا أنا تذكرت زوجي و عناده في المرة الأولى و كيف انه ما رضى لي يروح إلا بعد طلوع الروح و جاني احبااااط شديد:sadwalk: و يوم رجعت البيت طبعا هو ما سألني عن النتيجه و لا فكر حتى يسأل و استغربت لهالشي و حاولت معاااه انه يروح و طمنته انه مافي بس هو يحتاج شوية فحوصات مثل ما سويت أنا طبعا هو رفض...​

بعد فترة رحت لمستشفى خاص مدحوه لي البنات و قالولي الدكتورة شاطرة وااايد بتعجبج بس بتطلب من ريلج عينه وفي نفس الوقت تعطيج النتيجة ويوم رحت لها سألتني إذا سويت فحوصات من قبل و إذا زوجي سوى؟؟؟ تذكرت ورقة التحويل مالت زوجي اللي عطتني إياها الدكتورة اللي رحت لها من قبل عشان يروح مستشفى ثانية و لأنها كتبت فيها كلام ما فهمته و رويتها إياها و بعد ما فحصتني الدكتورة و كل شي قالت لي كل شي فيج سليم بس زوجج و اهنيه "انتفضت عظامي" و قلت يا رب استر ... قالت لي زوجج الحيوانات المنوية عنده:صفر ولازم يسوي فحوصات أكثر و يتعالج أنا سكتت و قلت في داخلي الحمدلله على كل حال و صبرت نفسي...​

المشكلة إني مب عارفه كيف أبلغ زوجي بالنتيجه عشان يتعالج؟؟؟!!! :sadwalk:جربت إني أشجعه و أحمسه إنه يروح عشان يكون عندنا أطفال حالنا حال غيرنا و نفرح بهم و يملون علينا حياتنا إذا لنا نصيب بهم في هالدنيا رفض و عصب علي و قاللي إذا لنا نصيب بهم بيجون و إذا مالنا نصيب خلاص أنا خايفه ان العلاج يكون بسيط بس احنا نطول السالفه...​

و الله ما أعرف شو أسوي معاه ما أريد أجرح مشاعره هذا زوجي اللي أحبه و ما أستغني عنه و الله أحيانا أقول ما عليه عادي الدنيا بدون أطفال و شو يعني أهم شي عندي زوجي!! و أحيانا أرجع أحن لهم و أتذكر سني اللي يزيد سنه ورا سنه...أنا ما أريد ابعد عن زوجي بس أقول إذا في علاج ليش لأ و إذا مافي نتيجه و مالنا نصيب و الله مب معترضه على حكمة رب العالمين بس لازم نحااااول على الأقل أريح بالي و أرضى باللي الله كاتبلي إياه...​

سامحوني خواااتي إذا طولت عليكم :blushing:و الله تعبت و احترت شو أسوي و الصراحة تشجعت يوم قريت ردود الاستشاريات و ارتحت...​

و جزاااكم الله خير​

أنقر للتوسيع...