!!!!

[هديه]

زوجي جنوبي غربي .. قبل يومين كلمني بنبره حاااده جدا كان يصرخ فيني مع إني مو عامله حاجه تستاهل ..

المهم من ذاك اليوم و أنا نفسي مو طايقته يحاول يتقرب و لا كأنه غلط وأنا ما لي نفس أبد .. أحس أبغى أنفصل عنه مع إني صارلي بس 8 شهور متزوجه منو !!

مو مستحمله أسلوبه أي حاجه ما تعجبه يعصب و لازم كل كلامو هو الصح و اللي يمشي !!

وش أسوي .. وليه يحصل كذا فيني!

 

[ام فريال]

حبيبتي شي طبيبعي اول سنه زواج يكون فيها شوية مشاكل

عاد انتي لاتدققين وتوقفين ع الوحدهـ توك ببداية المشوار

وبعدين اذا هو عصب اتركيه لحاله واذا جااا يراضيك اسأليه وبكل هدوء وش سبب عصبيتك ..؟؟

مايصير ياقلبي هو يشد وانتي تشدين معه لازم ترخين شووي ..وتمشيين شويات .. وانتبهي تعاندين لان الرجل

مايحب اللي تعاند .. طبعا هو بما انكم ببداية زواجكم يبي يسوي له شخصيه وهيبه انتي خذيه بالزين

ابشر.. وسم ياعمري .. وامر .. بتشوفين كيف بعدين مايفكر حتى يزعلك بس خذيه بالاسلوب الحلووو

وعسى الله يوفقكم ويسعدكم .

 

[هديه]

مشكوره أم فريال .. ما أدري ليه فكره الانفصال كتير تجي على بالي .. أحس لسه ما حبيتو !

 

[معشوقه]

السلام عليكم ورحمة الله وبركاته ...

و مبارك عليكم الشهر ...

يا الحلوه إنت توج عروس و هذا أول رمضان يمر عليكم و إنت في بيت زوجك لا يمر و إنت بخلاف ... و إذا على المشاكل فهذه طبيعيه مثل ما قالت الإخت أم فريال لأنها أول سنه زواج تحتاجين وقت على ما تذوب الفوارق الشخصية إلي بينكم و تفهمينه و يفهمج عدل ... بس أنا بعطيج نصايح طبقيها و إن شاء الله تفيدج ...

أولها بقتبسها من كلام أخت أم فريال لا اتدققين على كل شي .
ثانيا لما تزعلين و يراضيج ارضي أحسن من إنج إنت إلي تلحقينه تبين تراضينه . يعني استغلي جيته لج و حولي الموقف لصالحج و طلعي الكسبانه .
ثالثا استغلي أوقات الرواق و أسسي علاقتج بزوجج فهمي منه شنو إلي يزعجه و شنو إلي ما يحبج تعمليه و شنو التصرفات إلي يحبها ...
رابعا في أوقات الفراغ و الكلام الحلو و القعده الرايقه قولي له أنا أتمنى لما ازعل أو يصير موقف بينه إنك اتبادر في الصلح و لما يصير موقف بينا ما يكبر ... و من هالكلام إلي إنت تبينه و كل إلي في خاطرك يصير حتى إذا كنت تبينه يهاديج أو تحبين يجيب لج ورد استغلي هالأوقات و وضحي الأشياء إلي اتحبينها و اتمنين إنه يعملها لج ...

خامسا خليج معاه مستمعه أكثر و أكثر الرياييل يحبون إلي تسمع أكثر من إلي تتكلم .

سادسا في أمور تكون بعيونك بسيطه و سخيفه وما تستاهل بس بعيون غيرك مثل زوجك شي يستاهل و كبير .. عرفي شنو اهتاماته و اولوياته و اشوي اشوي نصبي روحك عليهم و كوني إنت رقم واحد أو على الأقل كوني في مرتبه متقدمه من هالأولويات و هذا مو فرض يعني الريال مو مثل الحرمه الحرمه زوجها رقم واحد لكن الريال الحرمه مو رقم واحد بالمره في وايد شغلات تجي في مراتب قبلها مثل عمله أمه خواته و بعدين زوجته و في بعض الرجال اصدقائهم يجون في مراتب أولى قبل الزوجه و طبعا الهوايه و إلي في الغالب رقم واحد.

سابعا من الأساسيات في حياة أي زوجين إنه سرهم يتم بينهم و مشاكل و كل إلي يصير في البيت يعني لا أهله ولا أهلك و هذا وايد راح يفرق معاج بعد كم سنه ..

و بس الله يوفقك و يسخركم لبعض و روقي يا أختي إحنا برمضان مافي شي يستاهل الزعل و مثل ما قلتي دام إنه شي بسيط ما يستاهل يزعلك بسببه عيل ما يستاهل أكيد إنك تضايقين إنت بسببه بعد ...:wink:

 

[من إماراتي]

ماعليه يا هدية .. و مثلما أقول دايما ما دام ياي و يتصرف بشكل عادي فهذي طريقته في التصالح و انتي لا تردينه بس بنفس الوقت لا تكونين عادية معاه .. حسسيه غنك متألمة من صراخه عليج بدون داعي .

 

[توما]

جنوبي غربي يعصب جذي؟


والله ساعات اشك بنط شخصية زوجي

لان زوجي ما يعصب ابد وهو جنوبي غربي


بس اعتقد زوجك متضايق من شيء معين وصار مزاجه مو حلووو


الله يعينك

 

[um_noora]

الله يهدي زوجك

 

[فكر راقي]

الله يهديه ويسخركم لبعض لازم تتحملين شوي بعدين اذا عرفتي شخصيته راح يسهل عليك التعامل معه......

 

[نقطة تفتيش]

طولي بالك وطنشي يمكن يبي يشوف قوة انتي تستحملين او لا (يختبر معدنك)

 

[هديه]

مشكورين على النصيحه .. شكلي بتكلم معاه بصراحه و ربنا يسهل ..