يوم خذلوني وجبرت بخاطري الست ياسمين

[راجيه الرضا]

وأنا في ٦ ابتدائي طلعت الأول وكنت ناقص درجة واحدة بس، كنت راجع طاير من الفرحة وخدت الطريق في سرعة البرق عشان أفرح أهلي، بس هما خذلوني وكسروا نفسي في اليوم ده، هو موقف يبان عادي بس للأسف ذكريات الطفولة بتكون مؤلمة شويتين.

أول ما قولتلهم الخبر قابلوني ببرود واستهونوا بنجاحي!
خدت الشهادة في ايدي وطلعت بره البيت في جنب وعيطت بوجع ومكنتش عارف اتنفس، واحدة جارتنا كانت بتعدي الشارع بالصدفة ولما لقتني بعيط قعدت جنبي ومسحت على شعري وقالتلي " مالك؟ "

بصيت للشهادة وأنا ساكت وحزين وتقريبًا هي فهمت.
فخدتني من ايدي وراحت للبقال وفتحت شنطتها ملقتش فيها غير خمسة جنيه.
فحاولت تداري كسوفها واشترت بالخمسة جنيه كيس حلاوة فالبقال قالها خدي دول عشان القمر ده ياست ياسمين.
وحطلها خمس حبات كرملة زيادة، قعدت تشجع فيا وتقولي مبروك، أنت بطل، في أطفال في عمرك عايشين يلعبوا وبس، لكن أنت راجل وهتطلع دكتور كمان، وأنا واثقة فيك وفي ذكائك ?

وقعدت توزع على الشارع من الحلاوة وتديني أوزع وتقولي بص فرحة الناس بيك عاملة إزاي عشان نجحت؟
فتخيل فرحتهم بقى لما تبقى دكتور قد الدنيا وبتكشف على الغلابة ببلاش؟ ?

اليوم عدى وحالي اتشقلب، كنت مبسوط ومتشجع للمذاكرة ومرت السنين وكل ما أحس بيأس كنت أفتكر الموقف ده.

وفعلاً جبت مجموع الطب وقررت أول قبض ليا هيكون ليها.
الدنيا لخبطت معايا شوية لحد ما فتحت عيادة بس سبحان الله جالي ناس كتير جدًا أول يوم ولما روحتلها البيت افرحها لاقتيها ماتت!

مكنتش مصدق من الصدمة، وبقيت حاسس إن حد ضربني على دماغي بطوبة، روحت فورًا اشتريت بالفلوس اللي معايا
" كولدير مية " وحطيته في الشارع بتاعها وخواتم تسبيح وحلاوة ووزعتهم يوم وفاتها عشان يكونوا صدقة جارية.

مكنتش أعرف إن عندها بنت جميلة وخلوقة كدا ?
كانت بنتها الوحيدة وكان في واحدة ست حضناها وبتقولها " كانت شايلة همك وخايفة تسيبك في الدنيا لوحدك يا ندى "

في الحقيقة الكلمة وجعتني، استنيت بعد الأربعين وطلبت ايديها من عمها لأن باباها كان ميت وهي طفلة.

دلوقتي معانا بنوتة اسمها ياسمين وكل شهر بطلع ربع المرتب صدقة جارية على روح الست ياسمين وحقيقي الخير في أول كل الشهر بيبقى زايد بطريقة بستغربلها ?

موقف بسيط جدًا خلاني كسبت ست وزوجة عظيمة وبنوتة جميلة ورزق مش عارف بيجي منين بالشكل ده، وفوق كل ده وصلت لحلمي بسبب تشجعيها ?

فرَّح قلب حزين واحتسبها عند ربنا وانتظر البشاير بعدها ?
- مقتبس

والله ما رأيت مصليا على محمد إلا وقد جبر ?

اللهم صل وسلم وبارك عليك يا رسول اللهﷺ ?​