يوم أن مات أبي "هياكلوا منين يا رب"

[راجيه الرضا]

مما قرأت
لماأبويا مات وأنا عندى خمس سنين كان سايب بدر أختى عندها سنة، كل اللى جاى يعزى أمى من الستات كانوا بيقولوا لبعض: هما هياكلوا منين دول، لا حيلتهم أرض ولا بهيمة .
مكنتش أعرف دول جايين يعزوا ولا يشمتوا، يومها أنا كنت صغير بس فاكر أمى وهى بتعيط وبتقول
يارب هياكلوا منين يارب ؟؟!! وبدر كانت في حجرها عماله تصرخ، يومها انا خدت بدر من حجرها غصب عنها ودخلت أوضة أبويا وفضلت أطبطب عليها عشان أسكتها وأنا بقولها متخفيش ربنا مش هيضيعنا يابدر
اتفض العزاء والستات رجعوا بيوتهم وقعدت أنا وأمى لوحدنا في الليل الطويل اللي من غير أمل ولا ونيس، أنا فاكر وقتها اننا فعلا أفقر ناس في البلد وأمى قالت اللي زود الطين أن أبوك يموت وانت قدامك سنة وتحتاج تقدم في المدرسة طيب وبدر وفلوس لو تعبت هنصرف عليها منين، فضلت أمى تعد وتقول وأنا ساكت كل اللي كنت بقوله ربنا مش هيضيعنا
فات شهر على موت أبويا لا فيه حد دخل سألنا عن حالنا ولا حد ساعدنا بلقمة وصلت بينا الأيام لاكل العيش حاف
كنت عيل صغير بدل ما يلعب مع العيال في الشارع
كنت قاعد في البيت كتفى لكتف أمى بنحسب في الايام وبنعد في الفلوس وهتكفينا نجيب كام طقه، طفل صغير قاعد يفكر إيه الفرق بين الوحدة وبين الفقر والعجز وقتها مكنتش عارف إسم المصطلحات دي، بس عارف فعلها على النفس كويس، عارف يعني ايه البيت يفضل مقفول عليا وعلى امى لشهور من غير ما حد يخبط علينا، عارف يعني ايه بدر تتلوى من الوجع في نص الليل وناخدها أنا وأمى ونمشي علي الطريق الزراعى في نصاص الليالي مسافة كيلو وأكتر لحد ما نوصل للمستوصف، عرفت يعنى إيه أمى تشيلنى بدر وتروح لواحدة جارتنا تستلف منها طبخة رز ولا معلقة شاى !!
وبرغم كل اللي حصل وبيحصل كنت واثق إن ربنا لا يمكن يسيبنا، قولت لأمى مش هدخل المدرسة وهشتغل عشانك وعشان بدر ... قالت شغل عيل صغير لا هياكل ولا هيشبع هيعدموك العافيه وفي الاخر مش هيدولك فلوس وهيقولوا عيل صغير لا اشتغل ولا حاجة، وقالتلى روح المدرسة وخلاص بس من غير هدوم جديدة ومن غير شنطة، ولو علي قد تمن مصاريف الكتب هتتدبر .
مش عاوز اقولكم قد إيه كل الفصل كان بيتريق علي لبسى وعلي إنى شايل الكتب علي إيدى بس الحمد لله كلامهم مأثرش فيا لأنى جمدت من يوم ما أبويا مات وشوفت الدنيا علي حقيقتها، ولما وصلت تالته ابتدائي اقترحت علي أمى تعمل عيش في الفرن الطين وأنا هشيله علي رأسي وأروح بيه للبندر أبيعه، فى الأول مكنتش موافقه بس الحوجة كانت كبيرة ، كنت انا بفرش علي العيش وهي تعمله وتاخد بالها من بدر ومفيش يوم روحت ابيع فيه ورجعت برغيف واحد ويوم ورا يوم بقى ليا زباين والعيش اللى أمى بتعمله مبيكفيش، خدت تريقه كتير بردو لما كنت بشيل العيش علي دماغى ويقولولي انت زى النسوان، بس بردو الحوجة كانت أكبر من أنى طفل صغير ممكن يعيط من تريقة، كله كان عشان أمى وبدر ، وبفضل الله كنا بنكسب كويس من شغل العيش لان البندر بيحبوا العيش الفلاحى، والحمد لله كنت بنجح فى المدرسة، وكبرت بدر وبقت فعلا بدر ودخلت المدرسة .
كان فضل ربنا علينا كبير كنا مستورين وشاطرين في المدرسة ، ربنا عمره ما جاب لنا حاجة وحشة بس قلة الايمان وقلة الثقة فى الله هي اللى بتخلينا نضعف ونحس بالضياع مع أول أختبار يجي من ربنا
عشت أنا وأمى وأختى مستورين وفضل العيش هو شغلى لحد ما خلصت كلية وسافرت اشتغلت في القاهرة وربنا فتح عليا بمشروع صغير كدا كنت ببيع فيه العيش الفلاحى ، وسنة ورا سنة المشروع بقي أربعه وبدل الالف بقيت بكسب اربعه وخمسة ، وبعد كام سنة من التعب كنت من أغنى الناس في بلدنا وليا أحسن بيت وأمى لابسه أحسن لبس
وبدر اللى كانت بتصرخ في حجر أمى يوم موت أبويا ربنا كرمنا فيها وبقت مديرة المدرسة اللي في البلد ، كل حياتى مرت قدام عيني وامى بتعيط وتقول
يارب هما هياكلوا منين ؟؟
وفى يوم كنت بوزع شغل ليا في بلد أرياف كدا تبعد عن بلدى بساعة سفر ، لقيت صوات في الشارع وحالة عزاء وست ماسكه ابنها من ايده وماشيه ورا النعش تصرخ علي جوزها يومها انا شوفت الولد ده علي انه أنا ، روحتله وقعدت معاه عملت معاهم اللي كان نفسي يتعمل معايا ، افتكرت وقت لما كنت بدعى ربنا الباب بتاعنا يخبط وحد يساعدنا ولو بكلمة تقوينا علي مر الأيام
انا اديتهم فلوس كتير فلوس تكفيهم يفتحوا مشروع يصرفوا منه وقولتلهم الفلوس دي اعتبروها دين في رقبتكم .
قالولي أول ما ربنا يرزقنا هتاخدهم، يومها انا قولت للولد
الدين ده فى رقبتك انت بس مش ليا، أوعدنى ترده لطفل والده مات وممكن يضيع أقف معاه واديله فلوس حتى لو متعرفوش زي مانا معرفكش .
خرجت من عندهم وأنا بدعى ربنا الدين ده يفضل يلف من شخص للتانى لأنى عندى يقين أنه هيوصل لإبني بعد ما أموت فى يوم من الايام وكله سلف ودين وبيترد لك



منقول