وكنت أظنه سحرا

[راجيه الرضا]

من رسائل الصفحة، أرسلتها صاحبتها وأذنت بنشرها.
هي حكت قصتها وفيها دروس كثي، وقصتها متكررة مع آلاف الناس.
==============
مساء الخير، ازيك يا دكتور، لعلك بخير. أنا حابة أشكر حضرتك على مساعدتي في شفائي وكتابة العلاج الصحيح.
أنا ظليت ٥ سنوات ونصف وانا أعاني وانا فاكرة انه سحرأنا واهلي فاكرين كدة، وروحت لمشايخ كتير لكن دون جدوي ومعظهم كذابين ولا يفقهوا شيئا في الدين واهم حاجة الفلوس وخلاص دون مرعاة ما يعانية المريض وانة ممكن يكون جدا مرض نفسي ودة الغالب أصلا وكنت كل يوم أقرأ سورة البقرة على ماء وأشرب واغتسل بها والماء بارد أصلا. واحيانا يوميا كل يوم أقرأ ١٠ أجزاء بنية الشفاء مع قراءة سورة البقرة، وانا الحمد لله بعرف أقرء قرآن كويس وحافظة أجزاء كتير لكن لقيت مفيش تحسن.
ولما بحثت وقريت لقيت انه مرض نفسي ونفس الأعراض اللي عندي فكلمت فعلا حضرتك وفعلا بدأت أتحسن بالاستمرار على العلاج والعلاج ماكانش فيه أي أعراض جانبية زي ما كنت متوقعة وخايفة، لأن سمعت من ناس كتير كدة إنه بيضر أكتر ما بينفع، والحقيقة نفعه أكتر بكتير من ضرره ده إذا كان ليه ضرر.
والحمد لله بفضل الله وبفضل حضرتك اتحسنت ورجعت أمارس حياتي الطبيعية أنا من القرى وناس كتير عندنا عندها مرض نفسي وهي بتعاني من سنين ومش عاوزة تروح للدكتور نفسي ولا تتعالج بحجة إنها خايفة من كلام الناس أنا بردو كنت كدة في الاول انا كان في الحقيقة اهون عندي يكون سحر ولا أعرف إنه مرض نفسي بسبب كلام الناس ويوم ما عرفت انه مرض نفسي فضلت ابكي اسبوع وقررت بعدها بفترة قريبة اني اتعالج قولت هظل لكدة لحد امتى وكل يوم بزداد سوء عن الاول فكلمت أهلي وكلمت حضرتك والحمد لله بقيت كويسة والفضل كلة بعد الله حضرتك يا دكتور.
وأتمنى أي حد يحس إن عنده أعراض نفسية مايتترددش لحظة إنه يستشير طبيب ومايتأخرش عن طلب المساعدة من الطبيب حتى لا تزداد الأمور سوءا والعلاج عمرة ما كان عيب سواء مرض نفسي أو عضوي وإنة يكون عندة صبر في الاستمرار على العلاج وعدم العجلة في سرعة الشفاء ولكل شيء دواء.

منقول عن د.محمد الشامي