والله اكره نفسي .. واكره حياتي

[P A I N]

السلام عليكم ورحمة الله وبركاته

..

أنا حاسه نفسي خلاص وصلت لدرجة اليأس الأخيرة
قلبي مافيه أي أمل
تعبت كثير
وحاولت كثير اني اغير نفسي
قلت امكن اذا غيرت نفسي راح تتغير حياتي
بس مهما غيرت في نفسي من أشياء مافي شيء يتغير
..
راح اتكلم عن نفسي اكثر:
أنا أكبر أخواني وأخواتي
عمري 17 سنه
نجحت من الصف الثاني ثانوي .. والسنة الجاية راح اكون بالصف الثالث ثانوي
أخوي اللي بعدي السنة الجاية راح يكون بالصف الثالث المتوسط
وأختي اللي بعده السنة الجاية راح تكون بالصف الاول المتوسط
وأخوي اللي بعدها السنة الجاية راح يكون بالصف الرابع الإبتدائي
يعني عددنا 4 .. مع بابا و ماما نصير 6
ومن مكة المكرمة

بدأت حياتي انسانه وحيدة من يوم ماكنت طفلة صغيرة .. لأني اكبر وحده
ولأني رحت عن اقاربي من طفولتي تقريبا لمن كان عمري 5 أو 6 سنين .. لأن ماما معلمة وكانت تدرس في قرية بعيدة عن مكة
بابا ما كان معانا .. كان في مكة لأنه معلم في مكة .. وكان يزورنا بعض الأحيان
في أيام الأربعاء والخميس

لمن ماما كانت تدرس في القرية .. كنت أنا لحالي وأحس بالوحدة .. أخوي اللي أصغر مني كان
يخرج من البيت ويلعب مع ولد الجيران
أما أنا كنت اجلس لحالي ..
والعب لحالي ..
كنت اوقات العب بالرسم .. يعني ارسم شخصيات كرتونية بحجم صغير زي العرايس الالعاب .. واقصها .. واجلس احركها كأنها ناس .. والعب فيها مع نفسي
أنا كانت عند العاب بس ما كنت احب العب بها
لأن احس مافي احد يلعب معايا
اما لمن ارسم شخصيات كرتونية كثيرة .. واقصها .. واحركها .. واتكلم بها مع نفسي .. احس كأن فيه ناس كثير معايا .. مع اني في نفسي وفي اعماقي احس بالوحده
كنت احب كثير اتفرج على افلام الكرتون (( الانمي ))
ودائما اجلس لحالي واتفرج عليها

وكنت اعاني من مشكلة وهي اني .. ابلل فراشي وانا نايمة بدون ما احس
هذه المشكلة جلست معايا لين الصف الثاني المتوسط بعد ما بلغت

كانوا اهلي دائما يخاصموني على هذا الشيء
مع انه كان خارج عن ارادتي

لمن صار عمري 7 سنين .. دخلت المدرسة في القرية مع ماما
ولمن صرت في الصف الثاني الابتدائي رجعت لمكة .. ورحت للمدرسة القريبة من بيتنا
كانت بنت الجيران بالصف السادس الابتدائي .. كنت معاها بنفس المدرسة
كنت استناها كل صباح تمرني ونروح المدرسة مع بعض وتوصلني لفصلي

كنت ابدا ما اتكلم مع احد في المدرسة .. وما اتحرك من مكاني في الفصل
حتى لمن يدق جرس الفسحة ما اتحرك من الكرسي .. لمن تجي بنت الجيران وتاخذني معاها هي وصديقاتها وتجلسني معاهم
بس حتى بنت جيراننا ما كنت اتكلم معاها
ما كان لي وجود .. ما اكلم احد وماعندي صديقات وما اطالع في احد .. ولا اتحرك من مكاني غير اذا بنت الجيران جات اخذتني معاها

بعد نجاحي في الصف الثاني الابتدائي .. رجعت مع ماما وأخوي الصغير للقرية
ودرست في القرية الصف الثالث الابتدائي (( الفصل الدراسي الاول فقط ))
اما الفصل الدراسي الثاني من الصف الثالث الابتدائي رجعت لمكة واستقرينا في مكة خلاص
ورحت للمدرسة القريبة من بيتنا ..((نفسها اللي درست فيها الصف الثاني الابتدائي))
لكن هذه المره ما كانت بنت الجيران تمرني ونروح المدرسة مع بعض .. لأنها كبرت وصارت في المرحلة المتوسطة

ونفس الشيء كنت وحيدة في الفصل وما اكلم واحد .. ونظراتي قليلة في الناس وما اتحرك من الكرسي .. وكانت تواجهني مشكلة (( استفرغ واعدم مريولي في الدرسة .. تقريبا بشكل يومي ))

يعني كذا صار خصام اهلي اكثر (( عشان ابلل فراشي وانا نايمة بدون ما احس + استفرغ في المدرسة )) لكن بعد الصف الثالث راحت عني مشكلة الاستفراغ فقط


ولمن انتقلت للصف الرابع في بنات جدد جو لمدرستي
وتعرفت لوحده بنت .. وصرت صديقتها
لكن فترة وهذه البنت تركتني
وصارت تستحقرني واوقات كانت تسبني وتقولي انتي غبية
ولمن تكون تحتاجني تجيني وتقول لي انتي صديقتي(( يعني بس مصلحة ))
وانا كنت افرح لمن كنت اشوفها تجيني وتقولي اني صديقتها
ولمن تنتهي مصلحتها تقولي روحي ياغبية
اكثر من مره انا اسامحها واصدقها .. بس كانت تستخدمني بس للمصلحة
انا كنت على نياتي بريئة مره .. وفي نظري كل الناس الصادقين
كنت اصدق كل شيء
وكنت اشوف الناس كلهم طيبين
لأني كنت اشوف الجميع عندهم اصدقاء غير انا
.. كنت الوم نفسي واقول : الخطأ مني .. أنا شريرة .. أنا أزعل الناس .. أنا غبية
مع اني في الحقيقة والله ما ازعل احد .. ولا احب اشوف احد حزين او يبكي
..
لمن صرت بالصف الاول المتوسط
كان فيه بنات جدد كثير في المدرسة
ونفس الشيء .. تعرفت علي بنت
وصرنا انا وهي صديقات
لكن فترة وتركتني

انا حزنت كثير

وقلت نفس الشيء صار معي
وقلت انا دائما كذا اكيد الخطأ مني

في الصف الثاني المتوسط (( الفصل الدراسي الثاني ))
نقلت مدرسة جديدة .. عشان نقلنا من بيتنا ..

وانا مره مره مره حزنت لمن نقلت من المدرسة
لأن كان عندي صديقات .. ما كانوا مقربات كثير مني
بس على الأقل كنت اجلس معاهم والعب معاهم بعض الاوقات

هذا سبب ضغط كبير كثير علي
اولا انا بلغت مع بداية الصف الثاني متوسط
ثانيا انا نقلت من المدرسة في الفصل الدراسي الثاني من الصف الثاني المتوسط
ثالثا صديقاتي الجديدات في المدرسة الجديدة اللي رحت لها .. استغلوني كثير
وكانوا يقولون لي اذا ما سويتي كذا (( اي طلب يبغونه )) نزعل منك وما نكلمك
يعني صداقة مصلحة

ولمن رحت للصف الثالث المتوسط
بنت خالتي تركتني وصارت ماتعطيني وجه وتتكلم علي من وراي ودائما تكذب علي
انا ما كنت اعرف انها كذا
عشان كذا انصدمت كثير

وتعبت نفسيتي كثير
وصرت ابكي كثير بس بدون محد يدري

ماما وبابا دائما ماقد فكروا فيني
بس يهتمون من الناحية المادية

بعد الصدمة من بنت خالتي
اتعرفت على صديقة في النت
ومره كثير اتعلقت فيها وكانت اعز صديقة لي
وكنت اعتبرها اختي

ولمن صرت في الصف الاول الثانوي
انجرحت من صديقتي اللي في النت وعرفت انها تكذب علي
مررره انصدمت

يعني كل حياتي كانت كذا

دائما انسب واسكت
وانصدم في الناس
وينكذب علي

انسانه وحيدة واحس بالذل و الاهانه والالم ومافي احد اقدر اثق فيه واتكلم معاه واقوله اللي في قلبي
لأني انصدمت كثير

انا مع بداية الصف الثاني الثانوي قررت ابدأ حياة جديدة لكن فشلت
واكثر من مره كلمتني المرشدة الطلابية .. وهي ومعلمة الانجليزي ساعدوني كثير
وقررأت ابدأ من جديد مع بداية الفصل الدراسي الثاني من الصف الثانوي
والصراحة بدأت بحماسة كبيرة والكل لاحظوا اني تغيرت للأحسن
حتى مستواي الدراسي رجع تحسن .. لأنه كان سيء مره من الصف الثالث المتوسط

لكن مع نهاية العام رجعت ابكي ورجعت يأست
ورجع مستواي الدراسي انخفض

وانا ذحين رجعت لوضعي السابق
وصرت كل يوم تقريبا ابكي لحالي في غرفة النوم او المجلس
بدون محد يعرف اني ابكي

اهلي دائما يحطموني
ويقولون اني غبية فاشلة ما اعرف اسوي شيء
ودائما انتقادات
واهم شيء بالنسبة لهم الدراسة
عندهم الدراسة اهم من صحتي
بس عشان يجلسون يتفاخرون بالشهادات عند الناس
انا في نهاية هذا العام الدراسي تعبت نفسيتي مره وصرت ابكي كل يوم
وبعدين قلبي صار مره يعورني .. من شدة الالم ما اقدر اتحرك
قلت لبابا وماما يودوني المستشفى لأن الالم كان ما يحتمل
لكن رفضوا وقالوا : الاختبارات النهائية قربت .. نوديك بعد الاختبارات النهائية
دائما الاهم عندهم الدراسة .. والاشياء المادية
ماقد حسوا فيني

حتى اوقات لمن يصير شيء وازعل .. يرضوني بالفلوس ..يعطوني فلوس
كل شيء في حياتهم بالاشياء المادية

انا خلااااص والله اكره نفسي
واكثر من مره جرحت نفسي
واوقات كنت افكر انتحر
لكن انا اخاف من الله .. لو انتحرت راح ازعل ربي وادخل النار
عشان كذا انا خلاص شلت فكرة الانتحار من نفسي

وذحين في وحده من صديقاتي صارت صداقتي معاها اقوى من اول
لكن للأسف .. عرفت انها مريضة بالسرطان
انا مره حزنت لمن سمعت الخبر
وجلست ابكي لين خلاص حسيت اني بختنق من البكاء

يعني المي ذحين صار اكبر
انا صرت اكلمها واحاول اعطيها الأمل
واخليها فرحانه ومتفائلة
وهي تقول انها مره فرحانه لأنها عرفتني
وتقول اني انا خليتها تتمسك بالحياة
وتتمنى انها عرفتني من قبل

انا لمن سمعت كلامها .. قلت لازم اوقف معاها
مع اني احزن لمن اسمع كلامها وهي تقولي : انا ايامي معدودة
انا دائما احاول اكون جنبها
ووعدتها اكون جنبها وما اتركها لحالها
لأني ما احب اشوفها تتألم
ولأني اعرف شعور الانسان لمن يبكي ويتألم لحاله بدون محد يكون جنبه
لأن هذا اللي انا حسيته طول حياتي

هي ذحين ماتعرف اني انا انسانه مره حزينة
وتشوف اني مثال للانسانه السعيدة
وتقول اني ساعدتها وخليتها تتغير للاحسن

هي ماتدري ان الانسانة اللي تكلمها تبكي وتتألم كل يوم

..

انا والله مره تعبانه ..
تعبت كثير
كل يوم ابكي
مع اني انا احاول افرح صديقتي .. وانجح اني اخليها فرحانه
بس ما اقدر اخلي نفسي فرحانه

انا احس بالوحدة مع ان صديقتي هذه موجودة معايا
انا ابغى ابكي وابغى احد يسمعني .. بس دائما مافي احد
ما اقدر اقول لصديقتي عن اللي احس فيه .. لأن هي مريضة
واخاف اخليها تحزن وتسبب لحالها الاذى .. لأنها زيي كانت تبغى تنتحر في الماضي
لكن انا وقفت معاها وساعدتها ورجعت لها الامل

مع اني ما اقدر ارجع لنفسي الامل

والله اكره نفسي ..
واكره حياتي ..
وتعبت كثير ..

نفسي ابكي واحد يسمعني ..
بس مافي

والله كل يوم احس حالي مخنوقة مره

وفي قلبي كلام كثيييييييير

..
آسفة طولت عليكم
بس والله محد يسمعني
عشان كذا قلت اكتب ولو شوي .. امكن ارتاح شوي

..
اللي تقدر تساعدني ولو بكلمة تساعدني

وادعوا لي​

 

[سري المكنون..]

هلا اختي ..

كيفك؟؟ كل عام وانتي الى الرحمن اقرب... واخبار رمضان معك؟؟
قرأت قصتك ... انا من رايي انك تجلسين مع امك .. وتعلمينها كل شيء ..
ترى الام حنونه وقلبها طيب .. وانتي بنتها مستحيل تقسى عليك حتى لوكانت من النوع المادي
لان اللي فيك من معاملة اهلك لكـ .. هم ع بالهم ان الفلوس هي اللي ترضيك .
لازم تتكلمين مع مك وتصارحينها بكل شيء ..
ماشاءالله عليك انتي وحده كبيره وفااااااااااااهمه وكلمي امك بأسلوب حلو قوليلها وش النقص اللي حاسه فيه قوليلها ابي حنان منكم مو من الناس ..
كلميها عن كل اللي بخاطرك..
والحين احنا برمضان تقربي من ربك اكثر ..
واذا عندك اي مشكلة .. الله لايجيب المشاكل ..اكتبي هنا ترى حنا خواتك ياعسل ..

 

[كيان إمرأة]

ياحبيبتي ذكرتيني بايام زماان

ترا انا اكبر منج بسنة هههه

بس عاقلة وفاهمة الدنيا زين

وشخصيتي قوية وما اخلي احد يدوس لي على طرف لا امي ولا ابوي ولا احد

يخسى الا هوو

انا امي وابوي من نفس نوعية اهلج بس كان في شوي حنان

وانا الي امشكل نفسي معاهم مو هم مساكين ههههههههه

حبيبتي يبيلج تقوين شخصيتج وتثقين في نفسج

كوني لج صداقات تكلمي واخذي راحتج

انا من صغري كنت قوية واجتماعية واهلي ربوني احسن تربية واتفاخر بنفسي لان انا الي صراحة تعبت على نفسي من الناحية النفسية قبل المادية والجسدية

اخذيها مني

لا ام ولا اب ولا صديق راح يفيدج

محد راح يفيدج غير نفسج

فثقي في نفسج ورفعي راسج ولا يهزج اي كائن كان

عليج بالصلاة والقرآن تراهم شفاء القلب والعقل

طهري نفسج من الذنوب واي كلمة تنقال لج بشر او خير رديها بعشر ولكن بادب واحترام

ولا تخلين احد ياكل حقج وانتي تطالعينه

رديه في اهله الي يقولج كلمة مو زينة

ترا هذي الدنيا اذا ما تغذيتي فيها بتتعشى فيج

 

[شيختهم ..]

آهلين آختي ..

قصتك كلهآا سببهآا عدم الثقه بالنفس انا اقول مثل آخواتي اوثقي بنفسك لآ تخلين حقك

كوني صداقات خذي واعطي حتى لو كان فيه مشكله حاولي انك تمرريهآأ لا تكبري الامور

واذا بغيتي اي شي ترآني اختك الصغيره ومابيني وبينك شي ..

آلله يسسسسعدك ويفرج همك

 

[الضحكة الزائفة]

اهلين حبيبتي ..

حسيتك متألمة مرة وانتي تكتبي قصتك .. بس صدقيني ..

دايما الأهالي المتعلمين يسوون كذا ..

بس انتي مكبرة السالفه مرة ..

مشكلتك حساسة كثير .. وهذا بسبب اهلك ..

تبين الإهتمام والأمان اللي فقدتيه ..

بس اذا صرتي تعددي الأشياء السلبية بحياتك راح تتعبين !

وانا كنت مثلك ..

وهذا الشيطان يوسوس لك بهالأشياء ..

ناس كثيرة تعرضوا للي تعرضتي له مو بس انتي .. وناس اعظم منك ..

وناس راحوا يدوروا عن الاهتمام عن الطريق الحرام ..

شوفي تجارب الغير وقولي الحمدلله .. انتي ماشاء الله باين عليك كبيرة وفاهمة و واعية من خلال اسلوبك ..

قوية ومؤمنة بالله وعارفة الصح والغلط مع صغر سنك واحسن من غيرك بكثير فديتك ..

انتي بس مكتأبة ومقهورة وحاسة بكلام كثير بقلبك .. بس ماراح ترتاحي الا اذا واجهتي فيه امك ..

وبينتي لها انك فاقده اهتمامها واهتمام ابوك ..

اجلسي معاها وحاولي بهدوء انك تشرحي لها حالتك .. وبيني لها انك عارفه انها تبي مصلحتك ..

بس هالشي اثر عليك .. ابكي عندها وقولي لها قد ايش كنتي كاتمة بقلبك طول هالسنين ..

وامك راح تفهمك وتحس فيك لو وش ما صار .. وراح تحاول تصحح خطأها قد ماتقدر ..

وتهتم فيك اكثر .. حاولي انك تقربي من اخوانك وخواتك .. ابتدي من بيتكم وحاولي انك تتصالحي معهم

وبعدين حاولي انك تبني علاقات صداقة برى البيت .. اذا الأساس " اللي هو البيت " مو صح

ماراح تقدري تبني اي صداقة برى البيت بطريقه صح ..

حاولي انك تدوري الأشياء الإيجابية حولك .. وربك بالأول والأخير مايبي لك الا الخير بس اصبري ..

الله يهديك دوم ويقرب بينك وبين اهلك ويشفي صاحبتك .. ادعي لها بهالشهر ..

موفقة قلبي ..

 

[عطر طيبة]

عزيزتي P A I N

أول شيء
ثقي بالله عز وجل وأمني به و أعرفي ان هذة الدنيا فانية ولن نخرج منها الا بأعمالنا

انسي الماضي انسي كل شيء ولا تدعيه يؤثر فيك للحظة

ابدي حياة جديدة ملؤها التفاؤل والابتسامة
وابعدي عن الحساسية
حاولي تفسري كل شيء بمعنى جيد وابعدي تماماً عن المعاني السيئة

بداية التغير بتكون اكيد صعبة ولكن بعون الله تتسهل
ادعي ولا تملي ولا تكلي ابدا من الدعاء الى ان يفرجها الله من عنده
وحتى لو حسيتي بالفشل حاولي مرة ثانية

وبيجي يوم بإذن الله في المستقبل
وتنظري نظرة بسيطة للماضي
وتقولي الحمد لله فين كنت وكيف صرت

وركزي في دراستك عشان اذا نجحتي فيها تقدري بعدها تكوني اللي تبغي
و ان شاء الله نشوفك في المستقبل شخصية قيادية


أختك
عطر طيبة
​

 

[نوف2009]

السلام عليكم ورحمةالله وبركاته
اولاكل عام وانتي بخير
ثانيا انامثل حالتك وحيده ماعندي الااخت عمره سنتين كنت احب الرسم وخصوصا
شخصات كرتونيه وكنت دائمااجلس لوحدي واهلي تقريبامثل اهلك بس لما
كبرت غيرت نفسي للافضل تركت الوحده وصرت اجلس معاهم واسولف
واحافظ على الصلاه واقرالقران والله ان حالي تغير والحمدلله على كل
شي حبيبتي ثقي بنفسك اعزمي على التغير لاتخلين
احد
يحطمك بالكلام
واهم شي لاتجلسين لحالك ترى الشيطان شاطراشغلي نفسك باي شي اهم شي
لاتقعدين لحالك
وحافضي على الصلاه والقران واحناالحين في شهر
رمضان ادعي ربك
ياقلبي مااحدبيفدك الانفسك وليكن عنوان حياتك
﴿لاياس مع الحياه ولاحياه مع الياس﴾
:icon26::icon26::icon26::icon26::icon26::icon26::icon26::icon26::icon26::icon26::icon26::icon26::icon26::icon26:​

 

[مسس سويت]

السلام عليكم حياتي.....
اولا انا فيني نفس الألم اللي فيك بس والله اهلي كانوا حنونين معاي وطيبين ومو مقصرين علي بأي شي بس ((الألم نفسه))انا فقدت كثييييييير
من اهلي وصديقاتي وحتى خطيبي وانا اكبر منك بسنه وحسيت بالوحده والقهر والعذاب والكتئآب لان الكل تخلى عني حسيت ان ماعاد باقي لي احد وسرت بس ابكي لوحدي وحاااسه بالضعف وثقتي اللي كانت عااااااااااليه لدرجه انهم يسموها غرور سارت ولاشي!!! بس الالم والحزن اللي انا فيه بس انا فكرت وقلت يمكن ربيسلب مني كل هالاشياء عشان يقولوا ردي لي ادعي صلي استغفري والله العظييييم سرت ارتااااااااح كثير كثير اقرأ البقره يوميا واستغفر هذي من الناحيه الدينيه
وانصحك مثل ماقالوا البنات كلمي امك قوليلها ما ابغى غيرك يسمعني .. اللي بقلبك كللللللللللله قوليه لها
انتي اللي فيك كلو نتيجة الوحده اللي عشتيها ف الطفوله .. واذا مستحيه تكلمي امك ارسلي لها رساله ووضحي فيها كلللللل شي ووقتها كوني مجهزه لها هديه وقوليها انتي داااايم تهديني هدايا ماااديه بس هالمرا انا بهديك هديه ماااديه وانتي معنويه واحضنيها وصدقيني بترتاااحي لاتستحي من حضنها انتي قربي واحضنيها وابكي عااااااااادي يااقلبي المهم ترتاحي وهي بتحس فيك هذي امك..وبعدها والله ثقتك راح ترجع لك وكوني صداااقات لايأثر الماضي عليك زايام الطفوووله اعتبريها حلم
والصداقات اللي فقدتيها حطي ببالك بيجيك احسن منها بإذن الله
واسفه ع الاطاااله ....اختك وصديقتك..ممكن؟وراح اكون فخووووره بصداقتك

 

[مسس سويت]

سوري ع الاخطاء الاملائيه اللي فوق<<مستعجله الاخت

 

[miooooor]

عزيزتي انا اشعر بك جدا لاني مثلك لم انال حب اهلي واهتمامهم ولكني كنت لاخوتي الصغار ام ومعلمة فكنت اعلمهم وافيدهم بكل ما تعلمتة من خلال الكتب التي قرات( فلم يكن عندي نت) وانت امامك العالم مفتوح فتعلمي ما يفيدك وتفيدين بة غيرك فسوف تشعرين بالسعادة واهمس لك لا تنتظري صديقة تعتمدين عليها بل كوني صديقة يعتمد عليها

 

[جـرح انثـى]

حبيبتي ثقي بنفسج ودايما اقراي القران فكتاب الله مداوي القلووب وخليه صديقج فهوأفضل صديق

ومن الان اعتبـريني صديقتج واذا تبين ايميلي راسليني عالخاص وبعطيج اياه

 

[فراغ وقهر وظلم]

أنتي تشبهين لمشششكلتي
سبـحإأآن الله
الله يعينك والله وديـ أساإأآعدكـ بس فأإآقد الشيء لايعطيه

 

[P A I N]

اشكركم اخواتي
على محاولتكم للتخفيف عني
جزاكم الله خير
وجعله في موازين حسناتكم

( الله يسعدكم دنيا وآخره )