السلام عليكم ورحمة الله وبركاته
عزيزاتي ،،
أنا أطرح إلكم مشكلتي و أتمنى منكم النصيحه والمساعده
لفيت يمين و شمال أبحث عن أحد يشاركني همي ما لقيت غيركن ،، فلا تبخلن علي ..
أنا صارلي متزوجة 11 شهر تقريبا ،، زوجي مب من قرايبي ،، أنا عمري 21 سنه و زوجي 28 سنه،، كانت فتره الملجه شهرين بس،، لهالسبب وجدنا صعوبه فبداية زواجنا،، مرينا بمشاكل كثيرة و أخذنا فتره حتى تأقلمنا و فهمنا بعض،،
زوجي إنسان مثقف و طيب و حنون لدرجه كبيييييييره ،، ما يرضى عليه ،، و يثق فيه كثير ،، و يخاف عليه من أبسط شي ،، يحاتي أكلي و لبسي و كل خطواتي ،، إنسان وااااضح ،، أول زواجي صارحني بكل ما ضيه ،، بكل وحده حبته من أهله و لا مش من أهله ،، هو من النوع اللي ينحب بسرعه ،، روحه مرحه ،، يحب الصراحه ،، خلاني أثق فيه ،، كنت أعرف وين يسير و ين يرد و يا منو طلع ،، وثقت فيه لدرجه كبيره ،،
في مره من المرات من باب الفضول فتحت جواله و جيكت على المسجات ،، بس الحمدالله ما شفت شي ،، و بعد فتره طويله و بعد ما صلحت الامور بينا و صرنا سمنه على عسل ،، مريت أنا بظروف صحيه سيئه ،، عملت فيهم عمليتين ،، و بنفس الفتره بعد مريت بظروف عائليه من جهة أهلي عشت فيهم مظلومه ،، تعبت نفسيتي وااااااااااااايد ،، بحكم عمله كنت ما أشوفه إلا فالويكند ،، العيب الوحيد اللي فزوجي مش دايما يعبر عن عواطفه و فيه نوع من الغموض احيانا يخليني أعيد حساباتي و أراجع ثقتي فيه ،،
في صباح يوم من الايام ،، قام من النوم وجيك على موبايله و دخل ياخذله دش ،، فضولي دفعني أفتح موبايله ،،،
وياليتني ما فتحته ،، كنت أقرا وأيدي ترتجف أحس عمري بطيح ،، انصعقت ،، ما صدقت ،، قلت يمكن هذا واحد بس يكلمه بهالاسلوب ،، قريت مسجات فضيعه رحت على المرسله تأكدت انها وحده ،، كنت وااااقفه مكاني أحاول أفكر شو أسوي أواجهه ألحين و لا أتريا شوي و أفكر فطريقة ثانية سجلت الرقم فورقه عندي و خبيتها رجعت التيلفون مكانه و مسكت نفسي طلع و استغرب أني ما صبحت عليه كالعاده دخلت الحمام كأني مطنشتنه و لا أشوفه ،، سكرت الباب و انفجرت صياح ،،
طلعت و انا شكلي غير قالي شو فيج قلتله تعبانه مصدعه شوي ،، رفضت أتكلم هالوقت لان حزتها كانت صلاة الجمعه و غير هذا أهله مجتمعين و ما حبيت أخرب عليه يومه،،
بعدها لبست و كشخت و طلعت جلست مع أهله حاولت قد ما أقدر اني أكون طبيعيه بس لما اتذكر تمتلي عيني دموع و أحاول ما أنزلهم و ما أخلي حد ينتبه عليه،، مسكت نفسي كثير ،،كنت ما أبا أشوفه ولا أسمع صوته ،، لما يجيي عندنا و يسولف ويا امه و خواته كنت لا إرادي احط عيني فعينه و أتم ساكته ما أسمع سوالفهم هم يضحكون و أنا عيني كلها دموع ،، لاحظ عليه
،،
بس ما تكلم ،، كنت ما أدخل غرفتي طول اليوم بس عشان ما أبا أفكر فالسالفه أشغل عمري معاهم بالسوالف ،، أدخل وقت الصلاه بس ،، كنت أصلي ويهي كله دموع ،، كل ما أخلص صلاتي أدعي ربي يهديني إلى حل أقدر أحمي فيه بيتي ،،
بعد صلاة المغرب كنت وياه فالغرفه كنت طايحه على السرير ،، و هو يتجهز بيطلع ويا زوج أخته إلى نادي الرياضه ،، جلس جنبي سولفت و نكت و ضحكت وياه ،، بس لاحظني لما أوقف أحس بدوار،، قالي أنتي اليوم مش طبيعيه ،، قلتله ولا شي بس تعبانه ،،
المهم مر اليوم والكل راح فحال سبيله ،، قررت أكلمه قبل ما ينام لاني كنت أحس أني لو ستحملت أكثر من هاليوم عادي يصير فيني شي ،، دخل و مهدت لعمري شوي سولفت وياه وضحكت ولا كأن شي فخاطري ،، بعدها سألته بجديه يا فلان أنا قصرت وياك بشي؟؟ قالي لا ،، قلتله أنته تحبني؟؟ قالي هيه بس ليش كل هالاسئله ،، قلتله جاوبني بدون ما تسأل أنا شو قيمتي عندك؟؟ ،، هنيه حس أن الموضوع فيه شي ما رضى يجاوب إلا لما يعرف شو السالفه ،، سكت فتره ،،
قلتله يا فلان أنا استحملت اليوم بس مش مستعده أتحمل باجر ،، و ضيقي يضايقك و ادري أنك ما تحب تشوفني مضايقه ،، أباك تجاوبني بصراحه ،، أنت في وحده فحياتك ؟؟؟ قالي لا ،، قلتله أنته تعرف وحده و تكلمها .. صح ؟؟ قالي لا منو قالج أنا ما بجاوب عليج زياده لي ما أعرف منو قالج ،،، حاولت ما أقوله كيف عرفت بس حسيته أنه بيجذب عليه لو قلته عن طريق حد ثاني مب أنا شخصيا ،، انفجرت صياح و قلتله أنا قريت مسجاتها و مسجاتك أنا فتحت تيلفونك ،، بس للأسف انصدمت ،، عمري أنا زوجتك ما بعثتلك هالمسجات ،، تم ساااااااكت ،، ظليت أصيح و هو ساااااااااااااااكت ،،
قالي هاذي وحده أعرفها قبل ما أخذج و قبل العرس قطعت علاقتي فيها بس للأسف انا رجعتلها نتيجة المشاكل اللي مرينا فيها بداية زواجنا ،،
قالي بس تأكدي يا (....) أني أكلمها شفقة بس و معاملتي وياها عاديه وكان كلامه صح و الدليل مسجاته المرسله ،، قلتله ليش هي مسجاتها فضيعه قالي صغيره مراهقه ،،
رديت عليه قلت عللت على وساخة مسجاتها أنها مراهقه ،، ليش عيل على المشاكل اللي صارت بينا أول زواجنا ما قلت أني أنا صغيره بالنسبه لك و صعب نتفاهم بسرعه ،، سكت
تم فتره ساااااااكت و أنا انفجرت صياح ،، خفت اللي فالبيت يسمعوني ،، خلاني أصيح عشان أرتاح و أطلع الكبته اللي طول اليوم فيني ،،
قال ( يا فلانه) دامها يلسة مصارحه خليني أصارحج بشي ثاني ما تعرفينه عني تعرفينه مني و لا تنصدمين نفس هالسالفه ،، هنيه مسكت نفسي و أنا ستين فكره فراسي ،،
قالي انا أدوخ مدواخ ،، ( كان هذا أول سؤال من أسئلة أهلي عنه لما خطبني هل هو يدوخ ولا.. وتزوجته على أساس أنه ما يدوخ ) قلتله تمنيت الارض تنشق و تبلعني و لا أعرف عنك هالشيئين بالذات ،، انهرت ما قدرت أمسك نفسي و بعدها ما حسيت بعمري إلا و انا راقده فحضنه انتبهت عليه يمسح دموعه ،،
حاولت اهديه و أبين له أنه مهما صار كل شي له حل بالتفاهم ،، و قلت له أني ما كلمتك إلا لاني ما أبا أهدم حياتي و لا ادخل أي حد من اهلي و لا اهلك .. هذي حياتنا نواجهه مشاكلنا رواحنا و نحلها رواحنا ،،
بعد ما ارتاحت نفسيتنا شوي غطينا فرقاد عميق
فاليوم اللي بعده رغم حالتي النفسيه التعبانه و حالته النفسيه الاسوء طلعت وياه يوم كامل مشوار ضروري لأحد المولات التجاريه كنا متفقين عليه قبل ما يصير كل اللي صار ..
حاولت فيه أتكلم عادي ،، و تكلمنا وسلفنا و ضحكنا ،،
على الغدا قالي يا ( .....) قلبج كبير ،،
عرفتي السالفه الاولي روحج و الثانيه كانت بعد صعبه عليج و رغم كل هذا تضحكين و تسولفين معايه
صدقيني محد بيعوضني فيج ،،
قلتله يا فلان أنا لاني أحبك و لاني مرتاحه وياك و ما شفت عليك قبل أي شي يضايقني و الاهم ما أبا أهدم حياتي ...
مر اليوم ونحن نسولف و نضحك بس نظل فداخلنا تعبانين ..
خواتي ادري اني طولت عليكم ,, بس أبغي أعرف منكم هل تصرفي صح ،، و بشو تنصحوني عشان أنهي هالعقبتين من حياتي بشكل نهائي ,, لاني مش مرتاحه تفكيري ما يوقف ،، و أحس أني شاله هم على صدري ،،
أنصحوني كيف اتعامل وياه .. ثقتيه فيه خلاص صارت مش نفس قبل ،، مع انه اعترف لي و أول مره يطلع جدامي ضعيف,,
وو عدني ينهيهم بس الثانيه و اللي هي التدخين طلب مني مساعدتي ،،
و أنا ألحين أطلب مساعدتكن عزيزاتي ,,
و أتمنى أنكم ما تخيبون ظني فيكم ,,
والسموحه على الاطاله
