هموسه خربوطه زخزوخة شيره وبنات الحجاز

[غروب...]

السلام عليكم ورحمته الله وبركاته
اش الاخبار
هموسه الخربوطه تحت زخات المطر البشاير اعرف انكم من الحجاز متابعتكم في فنجان قهوه
وبنات الحجاز
بما انكم من الحجاز
حابه اسالكم عن الحلويات الحجازيه
ماهي اسماها وانواعها وفين الاقيها في جده
انا مااعرف غير اللبنيه واللدو
وياليت تدلوني لاني سمعت انها حلوه
واا في صور عنها ياليت تجيبونها

الله يجزاكم الجنه

 

[غروب...]

وينكم انتظركم
والي تعرف لاتبخل علي اخواتي

 

[هموسهـ]

حبوبه انا رديت عليك ياعسل بس مدري وين طار اليوم الرد!!



اذا رجع المنتدى على السيرفر القديم بعد كم يوم حتلاقي الرد ان شاء الله



^__^​

 

[الامومه]

:showoff:ياعسل افضل محل وطازجه ولينه هو(حلواني )عندمركز شاكر

 

[الخربوطهـ]

هــــــــــــــلا بـ غرووب
والله يا عسل أنا أعرف أساميهم لــكن ما أعرف فين تباع لأني مو صاحبتهم مرره ,, وحاولت أجيب لكِ صور بس طلعت فاشله
المهــم الحلويات هي:
لبينة .... سمسمية ... طبطاب الجنة ....... حلاوة جوز الهند

لوزية وفستقية وكمان تمر باللوز وتمر معجون بالهيل والفرقة بالسمسم

سوووري على التأخير ,, بس إن شاء الله البنات ح يساعدوكِ =')
​

 

[هموسهـ]

بما انو الرد مارجع راح اعيدوا لعيونك ياعسل


ماتنسيني بالدعوات انو ربي يفرج عني ويكفني شر من فيه شر

.° اللبنية °.°


المقادير
4كاسات سكر
كاس ماء
كاس زيت
هيل
4كاسات نيدو بودره
طبعا راح نستخدم نفس الكاس لجميع المقادير
الطريقه :
تحطي السكر والمويا على النار وتخليها تغلي لين يذوب السكر
-بعدينه تحطين الزيت وتخليه على النار خمسة دقايق
-بعدين تشيليه من النار وتحطي الهيل ويتقلب وتضيفي الحليب مع التقليب المستمر واول ما تشوفيه صار مافيله كلاكيع والحليب ذاب كله تحطيه في صينيه
-تخلينه يبرد شوي برا وبعدين تحطينه بالثلاجه ويتقطع على شكل معينات

وبس..

°.° الديبازة °.°


هيه عبارة عن مربى بالمكسرات

المقادير
قمر الدين
ماء
سكر حسب الرغبه غالبا ..كوب او كوب وربع
هيل حسب الرغبه
مكسرات حسب الرغبه النوع اللي تحبوه
(( قلاده . مشمش. لوز .كاجو <--(يتسمى كمان سن العجوزة).

.زبيب..اي شي .))
الطريق

نحمص المكسرات اولا
-نضع القمر الدين بعد تقطيعه وعصره في الخلاط
-نضع عليه المويه ونتركه لحدما يذوب ونضع عليه السكر والهيل
-بعدينه نضع عليه المكسرات وهو على النار .. لحدما تبدأ تتخن شويه
-وخلاص تحطيها في التلاجه
وعلى فكره لازم لما تحطيها في الثلاجه تحطي على الوجه زيت حتى ماتخرب

°.° الهريسه °.°


المقادير
-اربع كاسات حمص مطحون ناعم مثل الدقيق( حمص بليلة)
-ثلاثة كاسات سكر
-ثلاثة كاسات ماء
-كاسة ونصف زبدة سايحة..او سمن بلدي
-ثلاثة ملاعق طعام هيل
-ربع كاسة سكر

الطريقة

--انخلي دقيق الحمص حطي علية الزبدة او السمن وقلبيه واتركيه جانبا

-في قدر حطي السكر وذوبيه مع التقليب المستمر لحدمايسير لونه ذهبي بني فاتح

-ضيفي الموياوقلبيه واتركيه على النار حتى تعقد الشيرة وتصبح لزجة

-حطي عليه الهيل ونزليه من على النار وضعي عليه دقيق الحمص وقلبيه بملعقة خشب كويس

-رجعيه مره ثانيه على النار بس خلي النار على اوطى شيء وقلبيه لين تبدأتلزق في قاع القدر

-دحين نزليه من على النار<--(شغله والله نطلعه ونزله ..خخخ).المهم ..نزليه وحطيه في صينيه ويتساوى بالملعقة بعدين ..زينيه باللوز المبشور او بدون حسب الرغبة ..واتركيه يبرد

وبس

°.° حــلاوة لدو °.°

..هذي غالبا نشتريها جاهزه ..

المقادير :
1 كيلو دقيق حمص .
زيت للقلي .
ماء للعجن .
2 كاسة شيرة غليظة .
قليل من الهيل .
قليل من الزعفران .
ملعقة اكل بكنج بودر .
كاسة من شرايح اللوز المحمرة والزبيب المقلي قليل في الزيت .

الطريق :
-نذوب الحمص والبكنج بودر بالمويه حتى يسير سايل غليظ نسيبه ساعه على جنب
-نسخن الزيت وناخذ من الخليط السابق بملعقه مخرمة ونحط في الزيت الحامي ..نقلبه ولمايسير ذهبي نشيله في صفايه
-نصفيه زين زين..:؛..بعدين نحط الشيره ونسيبه لحد يبرد وبعدين نهرسه ويفرك باليد برضو زين زين

-تحط اللوز والزبيب ويخلط تاخذي قليل في يدك وتضغطي عليها حتى تتخلصي من الشيرة الزائدة وتكور على شكل كور صغير في حجم االيمون الصغيرة وترص في صينية نخليها يوم كامل ثم توضع في علبة من البلستك وتحفظ .

وهذا الطبق من اختياري ان شاء الله يعجبكم ..اسمه

°.° تراب المملكة°.°

المقادير:.

4 ظروف دريم ويب
علبتين قشطه (قمير)
علبة كبيرة حليب نستله المحلى
كأس كبير حليب سائل بارد
علبتين بسكويت الشاي (ماري)
الطريقة:
تخلط جميع المقادير إلا البسكويت في الخلاط حتى تتماسك قليلا (تطلع شبة سايله)
- بعد خلط المقادير نحط الخليط في صينية التقديمبعدينه على للفريزر لمدة نصف ساعة
بعد كذا نطحن البسكويت ناعما مرره ونحطه على الخليط السابق من فوق ونرجعه التلاجه
لوقت التقديم

​

اما بالنسبة للمحلات اللي تبيعها او تسوي اكثر منها فهي ..



سعد الدين



العماد



القصور



الجونه



البيادر



الفراوله



هذي اللي عرفتها من المنتديات الثانيه ولا انا مااعرف شيء بجده ياعسل



وبالنسبه لاماكنها اتصلي بـ 905 وخذي ارقامهم واتصلي فيهم وخليهم يوصفون لك



وبالتوفيق حبوبه ^__^​

 

[غروب...]

الله يعطيكم العافيه كلكم وهمو سه وصلني ردك وانا رديت عليك وشكرتك
بس كمان طار الرد
وانا احب زخزوخه هنادي واعرفها بس هي ماتعرفني
ماشالله عليها شخصيه قويه ومحترمه وفي نفس الوقت مرحه
وتوقف مع الكل ووقت الشده تلاقينها
ومو اي حد يتعرف عليها
كان نفسي ترد علي كمان
الله يوفقها

 

[حليمه السعديه]

عند ابو نار تلاقي هذي الحلويات في ناس حضرت لهم ملكه كانو جايبين الحلويات الحجازيه سالتهم قالو من عند ابو نار والله اعلم انا ماقد اشتريتها