هل تأيدين الفطور مع ان الزوج

[الاميره الحلوه]

السلام عليكم بنات
بنات افتوني في امري
انا كنت ساكنه بيت لحالي المهم اهل زوجي اشتروا بيت كبير وعطوا كل واحد من عيالهم شقه مستقله
المهم صارنا ننزل عند ام زوجي دايما بما اننا بيت واحد
المهم صارت حركات من سلفتي ماعجبتني وبصراحه نفرتني من اهل زوجي وكرهتني فيهم لانهم ساكتين ع الخطا
هم طيبين بصراحه بس احيانا يجوا مع هذيك بحكم اني شايله نفسي منهم
انا صرت اسحب نفسي منهم شوي شوي الين لقيت نفسي ماشوفهم الا بالاسبوع مره يوم التجمع العائلي
فصاروا سلفتي واخت زوجي اللي ساكنه معانا ينزلزن من بيوتهم يومياااا يفطروا مع خالتي
وخالتي كم مره تحاول فيني انزلي افطري معانا لدرجه انها ماتصدق لوقلت لها مثلا اليوم الجو حلو يبيله فطور بالسطح تقول خلاص ايش رايك نطلع بكره السطح ؟
يعنى احس نفسها اكون معاهم بس انا اللي ممتنعه يمكن علشان انقرصت من كلام سلفتي واخت زوجي اول ماسكنا مع بعض
لي كم يوم انزل معاهم تقريبا ساعه واطلع وهي كل يوم يتصلون علي هي وبنتها يقولون نزلي افطري معانا
والله يابنات اني حسيت نفسي كأني غريبه بينهم مع اني قريبتهم مررررررررررره وهذيك مايعرفوها اصلا بس النصيب
كلامي سطحي معاهم وهي تعرف عنهم كل شي بحسبت بناتهم
وانا خايفه من كثر الاحتكاك يوميا اني انجرح من احد مع العلم ان سلفتي صار موقف بيني وبينها واحترمت نفسها نوعا ما
لومانزلت يمكن يقولون ليش ماتبغانا واحنا نجري وراها
واخاف انزل مايعجبني الوضع بعدين اسحب نفسي ويبان اني زعلت او شي زي كذا
والله اني محتااااااره
وش رايكم تايدون ان الوحده تكون فري مع اهل زوجها او تكون رسميه مثلي
انصحووني الله يسعدكم مدري انا صح او غلط لي كم يوم محتاره
​

 

[دمعتي خانتني]

شوفي خير الآمور أوسطها
يعني خليك بحدود يعني الفطور لو تفطري
عايدي مافيه رسميه لكن خصوصياتك إلي بينك وبين زوجك
لا يطلعون عليها والباقي خليك معاهم فرفوشه وأكسبيهم
في حسن المعامله والله ولي التوفيق..
​

 

[الاميره الحلوه]

وينكم بنااااااات ردوا
والله اني احبكم واحب ردوردكم الحلوووه

 

[نفوفه]

خليك وسط لا ضرر ولا ضرار​

 

[اميره القصر]

والله الجمعه على الفطور حلوه لاتحرمي نفسك الجلسه الحلوه عشان سلفتك انتي اهم شي خالتك انبسطي معها والباقي عامليهم زي ماتبغينهم يعاملوك بحدود

 

[الاميره الحلوه]

دمعتي خانتني جزاك الله خير ع الرد
والله هاليومين اللي اكون فيها معاها احس لااااانو معاي كثييير خصوصا اخت زوجي ( اما سلفتي ماتطالع في ولاطايقتني)
بس مالله اخاف كثره الاحتكاك كل يوم تجيب نتيجه عكسيه
مع اني حتى اذا كنت معاهم مو كثيره كلام اتكلم باللي اعرفه

 

[صاحبةعيالي]

خليك ودوده مع ام زوجك بس انتبهي اذا ارتاحت لك وجابت سيرت سلفتك او حتى بنتها بشي شين لاتعلقين بغير كلمة الله يهديها اوو هي ما تقصد من هذا الكلام
اهم شي لايندعس طرفك
موفقه اختي

 

[فوفو القمر]

والله ياقلبي انت بتصرفك هذا بينتي لسلفتك انك ظعيفه واتنازلتي لها عن الجلسه خليتي الجو يصفا لها يعني لو تغيرو عليك اهل زوجك لاتلومينهم لومي نفسك لانك عطيتي مجال لغيرك يدخل بينكم
انا اشوف انك تنزلي تفطري مع ام زوجك واللي مو عاجبك كنه موموجود سولفي واظحكي مع ام زوجك وهي خليها ولاتعبرينها
اذا سالتك بتردي كلمه ورد غطاها مابتردي صرفي الموظوع او سوي ماسمعت
عشان تكسبي ام زوجك واخته بطرفك لازم تتوددي لهم
الله ييسرامرك

 

[فازل]

انا اشوف خير الامور اوسطها مو لازم كل يوم تفطرين يعني في الاسبوع مرتين ثلاث والباقي عادي عند شغل او غسيل او مانمت امس بدري او اي عذر قولي ع حسب الظروف واهل الزوج ينبسطون كثير اذا عزميتهم في بيتك يعني مره قولي حياك ياعميمه افطري عندي او اسهري عندي وسوي شي تحبه وقولي لها سويته عشان اعرف انك تحبينه واذا صرتي تحترمينهم وتقدرينهم حتى عمك والله يحطونك ع راسهم من فوق بس كل شي بااعتدال وبالتوفيق​

 

[الاميره الحلوه]

فوفو القمر صحيح كلامك هي حاسه اني خليت الجو لها وهي مبسوطه
بس احيانا اهل زوجي مع انهم طيبين وجمايلهم علي كثير الا انهم يقهرووووون لما يجون بصفها
واللي يقهرني اكثر لما ام زوجي تلمح عن اهلي شي بحكم بنتها متزوجه اخوي قدام سلفتي وهي طبعا ذكيه تفهم وتقلب الطاوله لها ويصفا لها الجو انا تقفل معاي واكرها واكره خالتي معاها
تخيلوا مرت اخوي هذي كانت ساكنه مع اهلي
سلفتي تقول لها وش فيك انت نحفانه ومرهقه وش ماتاكلين لازم تتغذي ووووو ومن هذا الكلام طبعا قدامي الكلام وماخفي كان اعظم
المهم اخوي نقل شقه لحاله بعدها والله يابنات مافي كم يوم شافتها سلفتي الا تقول لها والله محلوه وسمنانه ليش مو كذا من زمان(يعني الراحه النفسيه والسمنه بتجي بكم يوم )سبحان الله

 

[غموض الاحساس]

اسمعي يا الغاليه اعتبري اهل زوجك مثل اهلك ولكن في حدود معين
بمعنى الفطور عادي بالعكس يولد في قلبهم الب والالفة بس بلاش الثحدث عن
خصوصيتك انتي وزوجك و العلاقات الخاصة والماديات ممكن الثحدث عن الاشياء الواضحه للكل
او الاشياء العامه
بس نصيحه لوجه الله ترى الفطور معهم يولد الحب والؤلفه بينك وبينهم بس مثلا يومين اوثلاثة ويوم لا
او اسبوع كامل انزلي معاهم
وتخلفي مثلا يوم او يومين وتحججي بالاعمال المنزليه
او انزلي كل يوم بس لا تطولي مره للظهر يكفي 3 او 4 ساعات
والله يسعدك اتركي السماع لكلام
الاخرين وضعي راسك على المخده وقالي يارب اني اسامح كل من زعلني او تكلم علي
ونقي قلبك من الزعل والحقد والله تعيشي سعيده باذن الله

 

[الاميره الحلوه]

يارب يسعدكم يابناااااات قسم بالله انك اخواااات راااائعات
يعني تقولون انزل واكون معاهم
اصلا رابع ايام فقط اللي يجتمعون فيها لان الخميس والاثنين خالتي صايمه والجمعه عيالها يفطرون معاها

 

[الاميره الحلوه]

غموض الاحساس
الله يسعد قلبك ياعمري
صحيح كلامك ان الفطور يولد الحب
انا شفت هذا الشي بعيوني مع غيري

 

[شذا الليل]

إنت عليك بأم زوجك مدام هي تحبك خلاص

وممكن تسوين شي حلو وإنت نازلة لها خاص

يعني عليك بس بأم زوجك

والجمعة حلوة

ولا تتحسسي كثير يا عمري

ولا تدخلي في شؤؤن أي أحد منهم

 

[الاميره الحلوه]

شذا الليل
يعطيك العافيه حبيبتي ماقصرتي

 

[- جنون أنثى]

صح و الله يالغاليه
لا تتركين الجو لسلفتك و ما عليك فيها و لا في كلامها
الزم ما عليك ام زوجك اعتبريها امك و الباقي مع السلامه
ثاني شي لا تكوني حساسه لأي كلمة خليك جريئه و واثقه مو لازم أي كلمه تقصدك فيها حتى لو انتي فاهمه انها تقصدك كبري دماغك و طنشيها ترى الحقران يقطع المصران

 

[دلوعة عمرو]

اذا تبين راي انزلي افطري معاهم مرتين في الاسبوع يعني مثلا كل سبت وثلاثاء


وعوديهم على كذا نصيحه مني لا تنزلين كل شوي ولا تحتكين فيهم مررره


ابعد عن الشر وغنيله ترى الجمعات ما يجي من وراها الا المشاكل

 

[بك آمنت ربي]

بالعكس كان المفروض تثبتي وجودك !!
أنت تركت الساحة لسلفتك خاصة وحركاتها !
هذا أولا وثانيا : يا حلوة يا ما لقينا من القريب والبعيد مواقف وتحملنا وصبرنا وبلعناها !!
يعني حاولي ما تتحسسي من كل موقف ،، لأنها لو فرضا تغار منك فأنت جالسة تحققي مرادها !
>> ولو فرضا إنها هي كذا طبيعتها وتحب تحرج راح تكرهك وتقول شكثر حساسة !

وما يصلح مرة تعذرك الدايم لأنه في الأخير بيقلبون عليك >> المفروض كل يوم تنزلين معم وتفطرين وياهم وتشاركينهم وإذا حسيتي منها بأي حركات خليك مع أم زوجك واندمجي معها بالسواليف ولا اشغلي نفسك مع الأطفال واضغطي على نفسك لو كل يوم تجلسي ساعة ثم اعتذري بلباقة واطلعي وشوي عن شوي راح تتعودي عليهم !!
وممكن تحسسي سلفتك بإنه مو كل كلام ينقال مثل تطنشيها أو تطدي عنها إذا قالت كلام مو حلو بس بهدوء بدون مشكلة كبيرة وهي راح تحس وتستحي على وجهها !!


بالنسبة لسؤالك الرسمية أو الميانة : الصراحة جوابي راح يكون على مدى فهمك لمعنى الرسمية عندك أو الميانة !
لكن على قولة وحدة من العضوات خير الأمور أوسطها

 

[نضوج أنثى]

طالما ام زوجك تتصل عليك وتدور عليك انزلي عشان لا يحز بخاطرهاو تزعل اهم شي رضاها عشان لاتتحسس بعدين وماعاد تدق تطلبك انزلي عادي وافطري وانبسطي وسلفتك خلي اذن من طين واذن من عجين لا تعطينها مجال تصير قريبه منهم أكثر وانتي الأولى بحكم قرابتك معهم لاتصيرين حساسه والله تتعبين ويضيع حقك وترى بعض السلفات الله يهديهم يشوفون السلفه كأنها ضرتها وتبي تكون هي الأهم والكل في الكل

 

[الاميره الحلوه]

طيب يااااناس حتى لو نزلت عادي امه راح ترحب بي
بش المشكله خالتي الله يهديها ضعيفه قدام سلفتي
سلفتي قوووووويه مرررررررره
واللي تقوله هو الصح وانا مااتحمل كذا
لو تنصفنا وتقول للغلطان غلطان حلو
الله يهديهم
بعدين كيف اضغط على نفسي اذا قعدوا يلمحون على اهلي اوشي مااااااقدر امسك نفسي على طول يباان على واقلب وجهي
بتقولون اييش بينهم وبين اهلي
بقولكم ايش
ام زوجي كانت هي وامي مرررره صديقات بعدين مع السنين سبحان الله تحولت المحبه الى كره
فتباعدوا عن بعض
فصارت ام زوجي مانواطن امي وسلفتي تكرهني خلقه
فجتمعوا ثنتينهم على شي واحد
الله المستعااااان