هذا العلم الذي تعبت فيه ...؟...ليس علمك ولا قوتك

[راجيه الرضا]

يا صباح الفل على الناس الفل

آمن بنفسك
انت تقدر تحقق المستحيل
تعبك هيخليك تستحق النتيجة
كل ده نتيجة تعبك و جهدك و عرقك!

بااااااااس يا عمنا فرمل شوية ابوس راسك، الكلام ده ظاهره حلو مش كده؟ اللي هو ايه يا عم احمد انت حتى كلمتين التشجيع دول هتقف لنا عليهم؟

طيب اقرأ كده؟

" قَالَ إِنَّمَا أُوتِيتُهُ عَلَىٰ عِلْمٍ عِندِي ۚ أَوَلَمْ يَعْلَمْ أَنَّ اللَّهَ قَدْ أَهْلَكَ مِن قَبْلِهِ مِنَ الْقُرُونِ مَنْ هُوَ أَشَدُّ مِنْهُ قُوَّةً وَأَكْثَرُ جَمْعًا ۚ وَلَا يُسْأَلُ عَن ذُنُوبِهِمُ الْمُجْرِمُونَ (78) فَخَرَجَ عَلَىٰ قَوْمِهِ فِي زِينَتِهِ ۖ قَالَ الَّذِينَ يُرِيدُونَ الْحَيَاةَ الدُّنْيَا يَا لَيْتَ لَنَا مِثْلَ مَا أُوتِيَ قَارُونُ إِنَّهُ لَذُو حَظٍّ عَظِيمٍ (79) وَقَالَ الَّذِينَ أُوتُوا الْعِلْمَ وَيْلَكُمْ ثَوَابُ اللَّهِ خَيْرٌ لِّمَنْ آمَنَ وَعَمِلَ صَالِحًا وَلَا يُلَقَّاهَا إِلَّا الصَّابِرُونَ (80) فَخَسَفْنَا بِهِ وَبِدَارِهِ الْأَرْضَ فَمَا كَانَ لَهُ مِن فِئَةٍ يَنصُرُونَهُ مِن دُونِ اللَّهِ وَمَا كَانَ مِنَ الْمُنتَصِرِينَ"

الآيات دي ملخص الدنيا اللي احنا عايشينها المجتمع المادي اللي بعد تماماً عن بوصلته الحقيقية و اصبحت فيه المادة غاية و ليست وسيلة

قارون ربنا اعطاه كنوز و علم يحول بيه التراب دهب ، كنوزه مكانش يقدر يشيلها مجموعة كبيرة من الرجال الاقوياء!
بس كان مغرور، ومتكبر لما قومه قالوا له متفرحش ربنا ما بيحبش الفرحين( الفرحين هنا بمعنى الناس اللي حياتها كلها بذخ واسراف و عدم شكر النعمة و مش معنى الشكر الشكر اللفظي فقط، بل الشكر اللفظي و الفعلي)

المهم كان رده ايه؟

انا آمنت بنفسي و قدراتي و العلم ده انا اللي تعبت فيه و ثروتي دي عن استحقاق!

و خرج على قومه لابس و متشيك و بيقول ثقة في الله انا نمبر وان، و فعلاً انبهروا بيه زي ما انبهروا بكل ناجح في الدنيا نجاح مادي

و لكن الذين اوتوا العلم ( الدين) اللي هو العلم الحقيقي، زجروا الناس ضعيفة الايمان المنبهرين بالنجاح المادي و خطب ( دونط ضاي بيفور يور ضيث) و قالوا لهم ثواب ربنا خير من كنوز الدنيا للي يعمل الخير و الصالح اللي امرنا بيه ربنا و لا يلقاها الا ايه؟ الصابرون اللي بيصبروا على الابتلاء و الظروف الصعبة و ايمانهم ما بيتهزش بربنا.

و النتيجة ان ربنا خسف بقارون و ببيته و كنوزه الارض عشان نعتبر و نفهم ان النجاح المادي عمره ما كان بيبني امم
فرق بين ان الفلوس تكون في ايدك و بين انها تكون في قلبك

فرق بين انك تآمن بالله و بين انك تعتقد ان ايمانك بنفسك ده ليه وزن!!
ربنا قال " وَمَا تَشَاءُونَ إِلَّا أَن يَشَاءَ اللَّهُ رَبُّ الْعَالَمِينَ "
ليس
مشيئتك ملهاش وزن من غير ما ربنا يشاء، و لذلك المؤمن الحق يعتقد ان كل شئ من عند الله هو يأخذ بالاسباب فقط، ليس اعتقاداً في قدرته هو و لكن اعتقاداً في قدرة الله عز و جل

المعنى ده مهم جداً جداً جاداً جداً ، و لا يجتمع مفهوم الثقة بالنفس مع الثقة بالله!! و لا الايمان بنفسك مع الايمان بالله، لان جوهرهم مختلف

الثقة في الله تعني انك لا ترى في نفسك ولا الكون كله مسبب لاي شئ و لكن ترى ان المسبب هو الله،
الايمان بالله لا يجتمع مع اي ايمان اخر صغر او كبر

و للأسف الخطاب الزحفيزي المستورد كله مبني على ( one man show) عرض الرجل الأوحد، انا جامد انا اقدر انا هنجح

و نسيوا ان الثقة الرهيبة دي في الولاحاجة، مهما شئت او اردت ان لم تكن مشيئة الله فكل اللي هتعمله في الهوا

الله عز و جل من وضع القوانين و هو قادر على تعطيلها او تغييرها،

اسعى السعي المادي و افهم الاسباب المادية و استخدمها، و خلي الدينا بالنسبة لك وسيلة لعبادة الله مش غاية لأن بدون عقيدة سليمة مش هتفرق عن قارون في نجاحه.

#قلوب_تعقل

أحمد سالم