كثير منّا يحتار إذا قرر يشتر جهاز كمبيوتر جديد .. وش يشتري ومن وين وش الشركة اللي يختارها ووش المواصفات .. وكثير من الناس يا يدورون واحد يعرفون إن عنده معلومات بهـ المجال من معارفه .. أو يسأل الموظف اللي موجود بالمحل .. برأيي كل الخيارين غير مناسبة .. يعني لو الواحد يعرف بالضبط وش يبي .. ويعرف وش قطع الجهاز وهذا وش يعني وذاك وش يعني .. بيكون عنده نسبة 60-70% من المعلومات المهمة .. الباقي غالباً شغلات إضافية وما راح تأثر بنسبة كبيرة إلا ببعض الحالات اللي بذكرها إن شاء الله بنهاية الموضوع .. ممكن الواحد لو بحث بالنت بيلقى شرح لكل شي .. وش المعالج وأنواعه وتعريف كل نوع والسرعات والنواة وووو .. وكل قطع الكمبيوتر بالمثل .. فكرتي بالموضوع هذا إنّي أوصل معلومة مبسطة أي واحد عنده إلمام بسيط جداً يقدر يستوعبها .. مفاتيح تخليه يعرف يفرق بين الأجهزة .. ويعرف كم يحط بالضبط ميزانية والأهم ؛ هل الجهاز يستاهل السعر -بناء على إحتياجه- أو لا ! بتكلم عن المواصفات بشكل عام تقريباً .. الموضوع طويل تقريباً وممكن يكون مرجع مبسط للي ناويةتشتري أو تطور ثقافتها بهـ الموضوع
كثير من الناس ينسى أصلاً النقطة هذي .. وأشوفها نقطة مركزية لازم الواحد يفكر فيها أول شي .. وش راح تاخذ .. PC (مكتبي) أو Laptop (محمول) ؟ لكل نوع إستخدامات ومستخدمين .. ممكن التفكير بالأمر يحسن من أداءك ع الجهاز ..
يعني لو تختار مكتبي وأنت يناسبك محمول راح يختلف إنتاجك عن إذا أخذت محمول .. بشكل عام .. راح أكتب خصائص كل نوع .. وأنت تقدر تحدد وش يناسبك .. المكتبي :
* جهاز ثابت ما ينتقل .
* عادةً يكون أسرع وأقوى من المحمول نظراً لأنه أكبر والتهوية فيه أفضل -والتهوية حاجة مهمة للكمبيوتر- وتطويره أسرع وأقل كلفة .
* التعديل عليه أسهل .
* العمل عليه بوقت طويل وتركه لأيام وأشهر ممكن يعمل طوال الوقت ما يضره عكس المحمول .
* ممكن توصل له أجهزه طرفية أكثر (طابعة ، هارد خارجي ، سكانر ، كاميرا ، فلاش ميموري ...) . المحمول :
* جهاز مخصص للتنقل وحمله سهل جداً .
* القطع فيه تعمل مع بعضها بشكل أفضل من المكتبي اللي عادة ما يكون تجميع .
* البطارية تساعد على عمل الجهاز بكل الأوقات حتى مع فقدان الكهرباء .
* الشكل الخارجي أفضل . طبعاً هذا مب مجال مفاضلة .. يعني محد يقدر يقول إن المحمول أفضل من المكتبي أو العكس على الإطلاق .. مثل ما قلت المهم وش يناسبك أنت بالضبط ووش الفائدة اللي تبيها من الجهاز .. يعني واحد يقول : أنا عزوبي طلعاتي واجد وموظف عندي أشغال أخلصها برا المكتبي وأرد على ايميلات بأوقات كثيرة وممكن أحتاج ملفات بالمكتب وبرا المكتب ..
نقول له خذ محمول .. لكن وحدة تقول : أنا طالبة وقاعدة بالبيت أبي الجهاز أتصفح انترنت وأصمم عليه وممكن أشغل عليه ميديا وبرضو راح أطبع منه وأسوي عليه بحوث للجامعة ووو
نقول لها خوذي مكتبي .. وقيسوا على كذا .. كلما صار الجهاز ثابت وفيه شغل ثقيل المكتبي أفضل ..
وكلما صار فيه تنقل وما فيه ضغط بالشغل المحمول أفضل .. .. ، بهـ الموضوع راح يكون الكلام عن مواصفات المحمول نظراً لأن الطلب عليه أكثر ..
وما فيه إختلاف كبير بين المكتبي والمحمول في الأشياء الأساسية .. الإختلاف ببعض الأنواع وبالشكل ..
يعني الرام اللي للمحمول تختلف عن الرام اللي للمكتبي .. لكن الرام بالعموم عمله واحد بالاثنين .. وماركاته فيها إختلاف بسيط .. يعني سامسونق مثلاً مميز للمكتبي لكن ممكن ما يكون مميز للمحمول .. -مجرد مثال
المعالج له أنواع وسرعات مختلفة .. بالأساس الشركات اللي تصنع المعالج شركتين : Intel & AMD Intel هي الشركة الأشهر والأقوى والأكثر انتشار .. AMD شركة منافسة لكن شغلها مب بقوة انتل .. اشتهرت بمعالجات خاصة لأجهزة الجرافكس والألعاب إذا منب واهم .. المهم لنا : وش نوع المعالج اللي يناسبني ؟ بالنسبة للشركات .. من وجهة نظري الشخصية ما أفضل AMD لأسباب كثيرة .. فجميع الكلام هنا بيكون عن معالجات Intel .. ما راح أدخل بتفاصيل فنّية دقيقة ممكن ما تفيدنا بالعموم .. بتكلم بالأنواع العامة والمنتشرة واللي يهمك تعرف وش يهمك منها .. بالبداية السرعات : تكون غالباً بين 1.6 كأقل حد إلى 2.6 على ما أذكر .. ممكن بعد سنة يتغير هـ الكلام .. كل يوم تطلع سرعات جديدة وتكون السرعات الحالية من الماضي .. فـ المهم تاخذ أعلى نوع وأقل نوع عشان تعرف وش يناسبك .. كل ما كان شغلك كثير وضغط وتشغل برامج أكثر وتكرف الجهاز وممكن تدفع أكثر خذ الأعلى .. وكل ما كان شغلك خفيف ع الجهاز تصفح وورد وبس .. خذ الأقل .. أنواع المعالج : المنتشرة الحين نوعين : 1. Core Duo : وهو المعالج الأول بتقنية ثنائي النواة من Intell .. أرخص سعر ومناسب للإستعمالات العادية . 2. Core 2 duo : وهو النسخة الثانية المطورة .. أسرع وأقوى من الأول .. أغلى سعر ويناسب الإستخدامات الفعّالة (التصميم ، الهندسة ...) وأقوى عمل طبعاً .. كيف نعرف المعالج بالضبط ؟ بطريقتين : * إنك تقرا بمواصفات الجهاز (المعالج) أو (Processor) وأحياناً (CPU) .. ويكتبون عندها النوع (Core duo - Core 2 duo - Dual Core) أو غيرها من الأنواع .. * بتلقى ملصق ع الجهاز نفسه -غالباً يكون جمب التش باد بتاع الماوس- مثل كذا ..
وهذا للـ Core 2 Duo ..
المعالج هو المحرك الأساسي للجهاز .. ولازم تفكر كويس قبل تحدد وش بتاخذ .. فيه أنواع ثانية من المعالجات ما تكلمت عنها لأنها كثيرة وتحتاج بحث ومعلومات أكيدة .. لكن هذي معلومات عامة تفيد الهواة بس .. مؤخرات أنتجت Intell معالجات جديدة سمتها i3 , i5 & i7 وعشان ما عندي معلومات مفصلة عنها ما حبيت أكتب شي عام ومعلومات مني متأكد منها ..
الرام تنتجه شركات كثيرة .. وتختلف بالجودة بين بعض .. الرام يجي من الشركة نفسها وهـ الشي مافيه خيارات .. اللي تقدر تختاره بس كم حجم الرام .. حجمه بالأوقات هذي يكون بين قيقا إلى 4 قيقا .. -ممكن يكتبون 1024 ميقا وهي تساوي 1 قيقا- .. ونفس الكلام بالنسبة للمعالج .. لكن غالباً الرام يكون 2 قيقا مناسب جداً .. .. ، الهارد دسك "القرص الصلب"
عمل الهارد دسك : هو حفظ الملفات . نظام التشغيل والبرامج والملفات وكل شي ع الجهاز يكون محفوظ بالهارد دسك .. غالباً من الأشياء ما يحتاج الواحد يدقق فيه كثير .. لأنه يجي بالأجهزة وما فيه إختلافات كثيرة .. اللهم الحجم .. سعة الهارد يعني .. من تجارب كثيرة توصلت إلى أن الأفضل يكون الهارد حجمه متوسط .. مو شوي ولا كثير .. يعني لابتوب لا يتجاوز الهارد 250 بالكثير .. ولا يقل عن 120 .. واللي عنده ملفات كثير ممكن ياخذ له هارد دسك خارجي والحمد لله .. إذا كان الهارد عندك كبير ومليته ملفات بيصير الجهاز بطيء .. خلونا نفترض واحد عنده هارد 500 قيقا .. وملفاته حجمها 400 قيقا ! هل تتوقعون بيكون البحث والعمل ع الهارد أسرع من لو كان بالهارد 200 قيقا بس مثلاً !؟ الهارد دسك الخارجي حل عملي وممتاز جداً .. وأنصح أي واحد بيشتري لابتوب أو حتى جهاز مكتبي وعنده ملفات كثيرة وحجمها كبير ياخذ هارد دسك خارجي ويرح نفسه ..
من الأشياء المهمة باللابتوب الشاشة .. وهذا الشي يدخل بالخطوات الأولى .. إذا أخترت جهاز لازم تعرف وش مقاس الجهاز اللي بتاخذه .. وعشان تحدد لازم تعرف وش إستخدامك بالضبط للابتوب .. ليه ؟ لأنّ كلما كبرت الشاشة صار الجهاز أثقل .. والعكس .. طيب .. لو كان واحد موظف تسويق وعلى طول يروح ويجي والجهاز على كتفه طول الوقت .. هذا أكيد ياخذ جهاز شاشته صغيرة .. لو واحد قال : أنا أبي الجهاز عشان أعرض ملفات فديو وصور وأفلام وإلا أصمم ووو هذا بنقوله خذ شاشة أكبر .. طيب وش المقاسات المفضلة !؟ بالنسبة للأجهزة الصغيرة أفضل الواحد ياخذ شاشة 13.3 أو 11 بوصة .. طبعاً بيلقى 13.3 أكثر .. -والأجهزة الصغيرة مش الـ Mini laptop لا هذيك وضعها مختلف شوي كلامنا هنا عن اللابتوب العادي- بالنسبة للكبيرة 15.4 هو المقاس المنتشر جداً وهو مناسب .. وما أنصح أحد ياخذ 17 إلا واحد ما يحرك جهازه كثير لأنه ثقيل جداً .. ممكن الواحد بالبداية ما يقدر هـ الشي ويقول : صح أنا أروح وأجي وأنقل الجهاز معي بس الـ 15.4 مب مرة ثقيل .. مع الوقت راح يعرف إنه قراره كان خاطئ .. كان عندي لابتوب توشيبا 15.4 وكنت أفكر بنفس الطريقة .. وبعد ثلاثة أشهر ندمت كثير لأني عرفت إنّه ثقيل على الشيل والحط .. نصيحتي الواحد ينتبه لهـ النقطة لأنها مهمة كثير .. .. ، كرت الشاشة
للمهتمين بالألعاب والتصميم والميديا بشكل عام .. كروت الشاشة تجي غالباً مدمجة مع المذربورد ومافيها خيارات .. لكن بعض الأجهزة اللي يكون أدائها عالي غالباً يكون فيها الكرت مفصول أو مدعم من شركة معروفة مثل Nvidia أو ATI .. وراح تحصل بالمواصفات انو كرت الشاشة من الشركة هذي ولازم تحصل ستيكر على الجهاز -عند ستيكر المعالج- فيه واحد من الشكلين اللي فوق .. بالنسبة لي أفضّل Nvidia أكثر لقوتها .. جربت الثنتين مع أجهزتي المكتبية وكانت Nvidia أفضل .. كرت الشاشة له حجم برضو .. يا 256 أو 512 أو 1024 .. الأخير ما أتوقع يطلع بأي جهاز .. المنتشر 256 و 512 .. وهو مهم مثل ما قلت للمهتمين بالميديا ....
ملحقات الأشياء الباقية بالغالب عبارة عن أشياء تكميلية -وهي بدون شك مفيدة- لكنها مش أساسية .. * منافذ USB : ممكن بعضكم يعتبرها شي تافه .. لكن ضروري تحرص تكون كثيرة بالجهاز .. لأنها مهمة جداً .. لقيت لابتوبات مافيها إلا منفذين بس .. وهذا الشي ممكن يسبب لك تاخير .. * Vidio out منفذ الفديو : منفذ الفديو على اشكال كثيرة .. أغلبها مع التقنيات الجديدة صار قديم وما يستفاد منه .. من الأشياء المفيدة -خصوصاً إذا صرت تحب الميديا- يكون بالجهاز منفذ HDMI
ومهمتة يربط بين الكمبيوتر وبين الشاشات اللي تدعم هالمنفذ -وهي غالب الشاشات الجديدة- وينقل الصورة بشكل أكثر وضوح بمراحل من أساليب النقل القديمة .. * نظام التشغيل : كل ما كان نظام التشغيل أحدث كل ما صار أحسن .. أحرص تنتبه لهـ الشي لأن بعض الشركات يصرفون الأجهزة اللي عليها أنظمة أقدم -مثل Vista هالأيام مع نزول 7 - لأنهم يعرفون إن كثير من الناس ما تدقق .. * مهم تشتري شنطة للجهاز إذا ما جا معاه شنطة
تلميحات عامة * بعض الشركات تسوي حركة غريبة ..
يعني يحط لك عرض لجهازين الأول (المعالج 2.1 والهارد 250) والثاني (المعالج2.2 والهارد 400) مثلاً .. وما يكون بين الجهازين أي فرق غير كذا .. كل المواصفات الباقية نفسها بالضبط ..
ويخلي الفرق بينهم 500 أو 700 ريال .. برأيي هـ الفرق غير منطقي أبداً .. حاول دايم تقدر حاجتك والمبلغ اللي معك .. لأن فرق مثل كذا ما يستاهل ولا يسوى .. وحتى ما راح يفرق معاك شي .. المعالج الفرق بسيط وتافه .. والهارد ممكن تشتري خارجي دبل الحجم ونص السعر ..
حاول تقرا تفاصيل الأجهزة كويس ولا تنغشّ .. ---------------------------------------- * حاول إنك ما تطلب الناس اللي تعرفهم وفاهمين للكمبيوتر يشترون لك كل مرة!
كويس إنك تسألهم وتاخذ منهم معلومات والجديد وو .. عشان تنمي هالشي فيك ومع الوقت راح تقدر تقرر بنفسك وما تروح لأحد . ---------------------------------------- * الكمبيوتر مو جزمة! -وأنتم بكرامة-
يعني مب المسألة انزل للسوق وأشتر وارجع .. مهم إنك تروح أكثر من مرة ..
يعني المتوسط ثلاث مرات .. المرة الأولى شف فيها كل الأنواع وخذ فكرة عامة .. أطلع وببالك كم جهاز بشكل عام ..
المرة الثانية شف الأجهزة اللي حددتها واقرا تفاصيل مميزاتها وشف المنافذ وشكل الجهاز وووو
المرة الأخيرة بتروح وببالك جهاز واحد أو جهازين .. طبعاً بتكون سألت أو قريت بالنت ووو
بتطلع ع الأقل بجهاز أنت مقتنع فيه تماماً .. ---------------------------------------- * البرامج :
إذا اشتريت الجهاز من محلات كبيرة مثل جرير وأكسترا وغيرها ما راح تحصل كل البرامج اللي تبيها ..
يعني مافيه Office ولا Real player ولا غيرها ..
بتضطر إنك تروح لمحل يركب لك مجموعة برامج بمبلغ 50 ريال أو حولها ..
حاول تسأل عن محلات يعرفون وش يسوون .. وحاول تعطي العامل اللي يشتغل بالمحل لستة بالبرامج اللي تبيها .. ترا لو ركب لك برامج وحاست جهازك الضمان ما راح يسوون لك شي لأنك ركبت برامج مب أصلية . ---------------------------------------- * إختلاف الماركات لا يفسد للود قضية ..
الماركات بدت تكثر .. أول ما نعرف الا كم اسم وبس .. الحين الشركات كثرت وكلن يطلع شي يحاول يتميز فيه ..
والواحد فعلاً يحتار .. يعني الشركة اللي كان يسمع إنها متميزة وأحسن شي ينصدم بعد ما يجربها إن فيها مشكلة ..
وممكن تقابل اثنين واحد يسب والثاني يمدح نفس الشركة .. ما تقدر تطلع بنتيجة نهائية أبداً ولا فيه إطلاقات بمجال التقنية .. كل يوم يطلع شي يغير أشياء واجد .. والذكي -من الشركات- اللي يستمر على الجودة العالية والتطوير المستمر والجديد .. أهم شي أعرف المواصفات اللي تبيها .. حاول تقرا بالنت عن تجارب مختلفة عشان ما تكون عندك صورة ناقصة .. ولا تاخذ رأي واحد وتخليه عندك قانون وأساس .. ولا تهمل آراء الناس كلها ..
