موقف بايخ مع زوج اختي ____________

[مييم]

السلام عليكم


انا بدخل بالموضوع على طول انا عندي اخت متزوجه وعندي اخت مملكه

امس الجمعه زوج اختي قال وش رايكم تتمشون وهو اللي بيمشينا على اساس ان

ابوي مسافر احنا وافقنا ورحنا معه وامي بعد


واحنا بالسوق خطيب اختي اللي مملكه اتصل عليها وقال لها انا طفشان ومن هالكلام

قالت له انا في المكان الفلاني وش رايك تجي قال اوكي وبعدين اهي انتظرته لين جا


وصارت تتمشى معاه وأخذت الاذن من امي انها بتروح معاه بسيارته وامي وافقت لانها مو

اول مره تطلع معاه يعني عادي عندنا بس لازم تاخذ الاذن من الاهل طبعا



المهم واحنا نتمشى الا فجأه زوج اختي يسألها وين وحده من خواتك قالت له فلان جا واخذها

اللي هو زوجها ومن بعدها زعل وعصب وحالته حاله وقال يالله برجعكم البيت


وقلب على اختي وقال لها خلاص لاعاد ترجعين بيتك خليك عند اهلك واختي تقوله لاتكبرها

وبعدين اختي مستأذنه من امي وبعدين انا وش علاقتي تقلب علي وش ذنبي ؟؟





مادري انتوا وش رايكم في الموضوع وهل هو له حق انه يزعل ؟؟

 

[فجر الشرقيه]

يؤ

غريبه .. يمكن انقهر لانه ماأحد اعطاه خبر .. لانه يعتبر هو المسؤل عنكم فحس انه ماله قيمه

نصيحتي لأختك لاتكثر كلام لحد مايهدى والأفضل ماتدق عليه

وهو بيرجع يكلمها وتفهم وجهة نظره

لانه غلطان يدخل اختك في السالفه ومن حقها تزعل على تعامله معاه حتى لو معه حق بزعلته لاكن تصبر

 

[القوية]

شوفي حبيبتي ...ماله حق انه يزعل واذا كان من منطلق انه خايف عليها ففي أسلوب وطريقة للكلام.....وطالما اهلك على علم بالموضوع خلاص.... بعدين أختك المتزوجة ....ايش ذنبها
الله يهديه ويصلح الحال

 

[يارب فرجآعاجلا]

عليكم السلام ورحمة الله وبركاته

والله ياأختي انا اشوف ماله حق يزعل لكن يمكن هو خاف انه طلعت مع خطيبها ويمكن هو مو عارف ان هالشي عادي وجائز طالما انها ملكه خلي اختك تشرح له الوضع بهداوه وتقوله زوجها وبالحلال وهي مستأذنه من امها والوضع عادي ومو اول مره
وأسأل الله ان يصلح شآنهم ويهدي سرهم وقبل هذا خليها تلزم الأستغفار والله يشرح صدرها ويسر امرها يارب

 

[دانة الشام]

يعني اذا كان سبب زعله إنكم مااستأذنتم منه ماله حق لأن أمك موجودة وهي يلي اعطتها الاذن ....بس ممكن زعل لأنو خطيب أختك ماسلم عليه ولاعبره بس هيك أخد أختك ومشي فحس زوجك بقلة الاحترام منه..ومعه حق اذا كان هو السبب....بس ليش ليقولك روحي بيت أهلك إنتي مالك طرف بالقصة كلها...الله يهدي النفوس

 

[رمقة وفا]

ماله داعي زعله. بس يمكن حاس انه مطلعكم ومسئول عنكم كان وده تعطونه خبر افضل.

 

[مذركير]

ماله حق يزعل مدامها مملكه
وانتي مالك ذنب

 

[غدا احلا]

لاالــــــــــــــــــه الااللـــــــــــــــــــــــــــه

 

[ام توووتي]

توي سألت زوجي عن السالفة يقول معاة حق يزعل

لانة هو المسؤل عنكم لو صار شي لاسمح اللة هذا راي الرجال

 

[حلم متناثر]

زعل لانه ابوكم مسافر.....

وهو اللي اخذكم.....فــ مسؤليته انها تطلع لو صار شي كذا ولا كذا.....؟؟


الله يهديه وش ذنب زووجته....بس وربي مسكين زعل عشان كذا وعصب....

 

[دلع قلبه]

انا اقولك ليش زعل
اولا انتم في هذي الطلعة في ذمته ومسؤول عنكم لو تغزكم شوكه
ولو يصير خير ولا شر اول شخص يلام هو صح!!!
قدام ابوك واهلك كلهم لو يصير اي شيء بيقول ايه فلان مطلعهم!!!
ثانيا هو طلعكم يوسع صدروكم ومسألة ان اختك تطلع مع خطيبها في طلعة عازمها فيه زوج اختها جرح
لرجولته ويحس انه مقصر وانه مااستانستو فدقت على خطيبها حتى لو حلفت ان خطيبها اللي دق ماراح يصدق

يحق له يززعل انا لما اعزم ناس وتجي وحده فيهم بكل بساطه تدق على احد ياخذها من عزيمتي قبل تخلص بزعل وبحلف اخر مره اعزمها
الحل ان اختك تعتذرمن زوجها بلطف وتبين بكل حب انه ماقصر وانكم استانستو
وتتكلم على لسان اختك اللي طلعت مع خطيبها انها تعتذر وتحسفت على الطلعة اللي راحت عليها
بس خطيبها احرجها فما قدرت ترده
وخلي امك تكلم زوج اختك وتشكره وتدعي له وتثني على رجولته وطيبته..
وشوفي بعدها كيف بتتغير نفسيته!!
مشكلتنا قصور فهمنا عن نفسية الرجل وتفكيره فنفسر المواقف باادمغة اناث
اللي لاتمت لدماغ الرجل بصله وبعدها نحط الخطأ والعتب عليه بدون مانفهم..

 

[3afraa_33]

رأيي ان زوج اختك غاار من عديله

رجال اخر زمن يغارون مثل الحريم ويسوون الموضوع دين وعيب ... والله الود وده هو مسوي كذا

خلي اختك تقوله اش رايك تجي تاخذني ونتمشى وترجعني عند اهلي بعدها .!

 

[هذا رأيي]

السلام عليكم



من وجهة نظرنا كنساء مافيها شي وماله حق يزعل




ومن وجهة نظرهم كرجال الموضوع كبير ويستاهل الزعل



وزي ماقالوا الأخوات هو يرى أنه من إقترح أن يمشيكم



وهو المسؤول عنكم في هذه الطلعه بالذات,


فلو حصل لأي منكم سوء هو الملوم أو على الأقل هو سيشعر بالذنب ,,



ويبدو إنه حس إن ماله قدر ليخبر على الأقل بأن

زوج أختك سيأخذ خطيبته.....







لأنه على ما يبدو على زوج أختك إنه شرقي ..




المهم الآن وضع أختك في الموضوع...




هو تركها في بيت أهلك لتشعروا أنكم أخطأتم في حقه..





الحل أن تتصل والدتك وتسلم عليه كسلام عادي


وكأن أختك لم تخبرها بشيء ثم تقول إسمح لنا

يابو فلان بس زوج فلانه جاء وطلبني وإستحيت أرده ...

ثم تشكره وتثني عليه وتدعي له..




يعني تحسسه إنه له قدر ,,واللي صار بدون تخطيط..




وأختك لاتلح عليه وتتركه يفكر..




وبإذن الله يراجع نفسه ويهجد.....الله ييسر لها,,


دلع قلبه ماشاء الله عليك قلت كل اللي بقوله..

 

[وحيده في دنياي]

بصراحه ماعنده سالفه وماله حق يزعل
الحمد لله والشكر شكله فاضي ويبي يختلق مشكله وبس
طيب هي مو مخطوبه له وبس
الا متملكه عليه يعني في ذمته لو يسوي ايش معها
هي زوجته
ولو ياخذها من اي مكان واهلها راضين هو اصلا ماله دخل

والله من جد موقف يصعب وش ذا الرجال ؟

 

[اولادي كل حياتي]

[/ماله حق يزعل ابدا ليه هو المسئول عنكم دائما لما الوالد يسافر??
ـ وبعدين ايش دخله زوج اختك مو شغله مع احترامي بيكم
ماهو اخوها ولاخالها عشان يزعل ويتحكم
ـ والمفروض هي تفهمه زوجته انه ماله حق بالزعل او السؤال والله شي يضحك يبغى يتحكم الاخ في اخت مرته وخطيبها وتقوله ماهي اختك علشان يحقلك تزعل
ـ هي اخذت شور الوالدة وهي المسئولة عنها في غياب الوالد الله يحفظه
ـ وهو ماله انه يتحكم ويفرض رايه ويزعل عجيبة والله الرجال
ـ ولااختك حتى تعطي له الحق في ذلك ابدا
ـ وتقوله خلاص الوالد لما يجي ويلاقيني ببيته وساعتها لما اقوله زوجي زعل علشان امي لما سمحت لها تروح مع خطيبها واستاذنتها زعل وماقدر مكانة امي ولااعتبره
ـ وشوفي ايش راح يرد ساعتها زوجها اكيد راح ينحرج
ـ والله يهديلها هوSIZE]

 

[فـَـيوُنـﮕـﮧ !✿]

يمكن حس نفسه المسؤل عن اي شي يحصل بحكم انه مافيه رجال معكم غيره

واختها يمكن حاله غضب اتوقع ان لو ابوها خاصم عليه بيقوله انا مارضيت وخليت بنتك عندك

 

[الـحـرهـ]

افكار متضاربه

اهو مسؤل عنكم وماعطيتوه خبر

معنه مو لازم تخبرونه

شي ثاني

باين الغيره باديه معاه
مسوي نفسه سوبر مان عندكم


وكمان انا اشوف مالها داعي خرجت البنات مع اختهم المتزوجه


​

 

[الـحـرهـ]

اقصد غيران من المنافس الجديد له زوج اختك المملكه​

 

[ياربي انصرني]

انا مع دلع قلبه وهذا رأيي

تفكير الرجل يختلف عن تفكير المرأه000

 

[دلوعة دائما]

وش دخله سلامات