من ملفات الاستشارات

[راجيه الرضا]

د.هويدا الدمرداش


#استشارة_اليوم

أنا لسه سنه اولى جواز، المفروض طبعا انها تكون احلى سنه في عمري كله بس ... و آه من كلمة بس!?
انا عارفه اني استاهل النتيجه اللي وصلت لها لاني تعمدت مع سبق الاصرار والترصد ما اشوفش عيوبه اللي واضحه زي الشمس من أول يوم خطوبة.
انا وافقت عليه مش حبا فيه ولا اعجابا بسمات شخصيته الفظيعه لكن ببساطه عشان كنت زهقت وفقدت الامل الاقي الشخص المناسب.?‍
بيقولوا عليا جميلة وجدعة ودمي خفيف، والحمد لله انا بنت ناس، اتقدم لي ناس كتير واتخطبت 5 مرات وقريت الفاتحة 4 مرات.
و في كل مره اتصدم بصفة سيئة ما أقدرش أتعامل معها واضطر افسخ الخطوبة.
فقولت خلاص مش هادقق في العيوب وهعمل نفسي مش شايفه اي حاجه و هقبل العريس اللي هيتقدم لي بدون أي اعتراض عشان اخلص من زن اهلي علي بإني اتجوز وانهم عايزين يتطمنوا اني مسؤوله من راجل يهنيني و يدلعني والحاجات اللذوذه دي بقى.
و قد كان وجوزي اتقدم لي وقبلت واتجوزت..
اكتر صفه بأكرها في الانسان اللي يتقدم لي انه يكون قيمة الفلوس عنده عالية فلبست في واحد مش بس مادي لا وكمان بخيل.
انا اللي يصدق عليه المثل اللي بيقول اللي يخاف من العفريت يطلع له .
خالتي كان جوزها بخيل جدا وحياتها عذاب، ومامتي كانت بتعطف عليها وبتقف جنبها وبتحاول تعوضها عن بخل جوزها عشان ما تطلقش.
صحيح جوزها مات من سنتين وخلصوا منه وورثوا منه ثروه كبيره بيتمتعوا بها دلوقتي، لكن ايه الفايده بعد ما عشرته تعبتهم وسابتهم مرضى نفسيين من بخله في الفلوس والمشاعر.
خالتي كانت بتتعالج قبل وفاة جوزها ولسه بتتعالج بعد وفاته والفلوس ما عوضتهاش عن عمرها اللي قضيته في عيشة جافة وقاسية جدا، خالتي عانت في شبابها من جوزها وفي كبرها حزينة بسبب مشاكل عيالها.
عندها بنت متعقده من الجواز ورافضة الجواز تماما و فيها عقد الدنيا من قسوة ابوها و عنفه. و كمان عندها ولدين شباب في السن لكن عواجير نفسيًا، متلخبطين في الدنيا دي وعندهم اكتئاب وانسحاب من الدنيا وعايشين بيزقوا الايام ومش عارفين يتخلصوا من آثار عشرة المرحوم ابوهم على نفسيتهم.
أنا مش عايزه اجيب اطفال يعيشوا العيشه دي...
كنت باحلم ببيت دافي زي بيت ابويا وامي، يكون فيه موده ورحمة ويبقى المكان اللي بنرجع نلاقي فيه الحب والقبول والاحترام والذوق والحنان والكرم.
عيشة مامتي وخالتي علموني ان القيمه الحقيقيه في العشره الطيبه مش في الفلوس. والمكسب الحقيقي في انك تعيش مع قلوب طيبه وتبعد عن القلوب البخيله الخبيثه القاسيه.
دلوقتي خالتي اغنى من مامتي وبابايا كتير جدا لكنها عايشه حطام بني آدم هي وولادها، وابويا وامي عايشين حياه متوسطه لكن كريمه جدا وسعادتهم في حبهم لبعض.
و انا – بكل براءه - كنت باحلم بزوج زي ابويا وبيت زي بيت عيلتي.
لكن لبست في الحيط.
جوزي الظريف اللطيف مغترب، الجوازة تمت بسرعة في اجازة نزلها مصر بيدور على عروسة.
مش هاتكلم عن المهازل اللي حصلت في الخطوبة لانها كانت قصيرة جدا وعفى الله عما سلف.
بدات افوق له وأعد له اخطاءه من شهر العسل.
سافرنا تركيا، وقولت اجيب هدايا لعيلتي انكسفت اطلب منه فاشتريت بفلوسي جيبت حاجات عاديه جدا مفيش فيها حاجه واحدة يتقال عليها غاليه.
وطبعا جيبت لكل فرد من اسرتي حاجة، كان مصدوم و متضايق جدا و قال لي "ايه ده ؟ انت مُبذره، كده أوفر أوي!".
استغربت كلامه جدا و سكت، كنت لسه عروسة بقى ومكسوفة وكده..
وطبعا لسه كان جوايا انكار عالي للي باشوفه ومش عايزه اصدق انه مادي وبخيل.
لغاية لما حصل موقف خلاني اتخرست بعدها السفرية كلها وكل أملي أوصل مصر بأي شكل.
خلصت الكاش اللي معايا وأنا باشتري الطلبات فطلبت منه ليرة واحده تركيه عشان بادفع حساب الهدايا، لقيته قالي "آسف انا مش مقتنع باللي بتعمليه".
قلت يمكن بيهزر او مش سامعني كويس، دي ليره يتيمه، لكنه رفض برده تماما وقال لي بلهجة اللي بيدافع عن نفسه من حد بيعتدي على حقه "انتي مش بتراعي ظروفي انا مستلف فلوس السفريه وعلي ديون الجواز".
انا من الصدمه ما عرفتش اعمل اي حاجه و سكت، رجعت هديه من اللي معايا و قلت هاشتري بالفيزا بعدين.
وصلنا مصر والبيه بيستعد للسفر عشان يرجع شغله في بلد خليجي بيشتغل فيه من 7 سنين قبل جوازنا ومنصبه كويس جدا و كله تمام، لقيته ماشي ومش سايب لي فلوس في البيت، فاستغربت وقلت يمكن ناسي اما افكره فقلت له بدلع العرايس اللذيذ ده :" حبيبي انت سايبني من غير مصروف للبيت ".
راح رد بحدة وخشونة وهو منتفخ كده نفخة حكيم الحكماء اللي بيفهم في كل حاجه و مفيش زيه :"عيب جدا لما تتكلمي في الحاجات دي ! مش شايفه اني مزنوق ودفعت كتير في جواز و سفر ؟! و بعدين انتي مش معاكي فلوس النقطه اللي ادوها لك اهلك؟ ما تصرفي منها، وكمان عندك مرتبك وبتشتغلي والمفروض تساعدي جوزك و تصرفي على نفسك، انتِ ليه بتتعاملي معايا بماديه كده؟ انا شايف انك المفروض تنضجي بقى وتبطلي تصرفي مرتبك في هدايا وحاجات تافهة، دورك دلوقتي انك تساعدي جوزك يحوش عشان يعمل لك مستقبل كويس".
عرفت اني مش هاخد منه اي قرش واني لبست في الحيطه وان العيشه ضنك وشبه عيشة خالتي كده، فقلت خليه يسافر واقعد مع نفسي افكر وبلاش وجع دماغ دلوقتي.
البيه سافر. و بيكلمني بالتليفون. و جرى بيينا حوار زي اي زوجين. بيقول لي انه المحلات عنده عامله sale فقلت له :"كويس قوي . الحق اشتري لك هدوم جديده . انت مالحقتش تشتري حاجه على جوازنا عشان اتجوزنا بسرعه".
اقل قميص لبسه و هو عريس مش ممكن يكون عمره اقل من 3 سنين. و كان حاجه تدعو للعجب الصراحه. بس قلت معلش هنبقى نشتري مع بعض بعد الجواز. بس ده ما حصلش وهو ما عرضش في شهر العسل اننا نشتري اي حاجه و لا لي و لا له.
المهم ان لما شجعته يشتري لنفسه حاجات لقيت نفس النبره الحاده اللي بتطلع كل ما تيجي سيرة الفلوس. فرد علي بقرف الدنيا كلها و قال لي " ايوه طبعا ماهي دي طريقة تفكيرك. صرف صرف صرف. انتي عقليه استهلاكيه و ما عندكيش حسن تدبير و تخطيط و بتبصى تحت رجليكي و بس".
يا لهوي كل ده عشان شجعته يشتري لنفسه قميصين؟ امال لو قلت له يشتري لي حاجه كان عمل في ايه ؟
انا عارفه كويس اني لا يمكن اتحمل اعيش عيشة خالتي. و ان الشخص ده مش هيديني عيشة اهلي. بس المشكله اني لو سبته هارجع اقابل زمايله العرسان اللي فيهم العبر. و مش عارفه اعمل ايه .
انتهيت القصة !!