المؤهل الدراسي: - بكالوريوس طب و جراحة الفم و الأسنان – جامعة القاهرة. - ماجستير إدارة الأعمال MBA - كلية الدراسات العليا في الإدارة- AAGSB. - دورات متعددة في مجالات التسويق و الإدارة و القيادة و الموارد البشرية: -تدرب على تصميم البرامج التدريبية في الولايات المتحدة الأمريكية -الاتحاد الأمريكي للإدارة AMA. -البرمجة اللغوية العصبيةNLP-الكود الجديدللبرمجة اللغويةالعصبيةعلى يد المؤسس د.جون جريندر.
جوائز و تكريم : - المركز الأول في مسابقة Manisa-mesir العالمية للكاريكاتير. - شهادة مشاركة من معرض World Press Cartoon للكاريكاتير. - شهادة تقدير من الجامعة الأمريكية بالقاهرة. - درع كلية طب أسنان قناة السويس. - درع كلية الحقوق جامعة القاهرة. - شهادتي تقدير من كلية طب أسنان القاهرة. - شهادة تقدير من المعهد العالي للعلوم و التكنولوجيا.
كـتـب :
- كتاب لماذا من حولك أغبياء؟ - كتاب كاريكاتوري ساخر عن مهارات التواصل (تأليف ورسوم). -كتاب برمج عقلك – نظرية علمية جديدة عن التحكم في المشاعر (تأليف ورسوم). - كتاب تخلص من عقلك - عن الاعتقادات السلبية في العقل العربي (تأليف ورسوم). (الكتب السابقة من أكثر الكتب مبيعا في مكتبات القاهرة: الشروق- فيرجن- ديوان) - كتاب كذا مذا (تأليف: أ.جمال الشاعر- الغلاف و الرسوم الداخلية: شريف عرفة). - كتاب الأوقاف في سطور و صور (تأليف: د.هدى السعدي- رسوم داخلية: شريف عرفة).
البرامج التلفزيونية:- يقدم حاليا فقرة ثابتة في قناة (نايل لايف) عن التنمية الذاتية. - قدم فقرة ثابتة (برنامج شبابيك) بقناة دريم الفضائية. - قدم فقرة ثابتة (في برنامج مساءك سكر زيادة) بقناة Otv الفضائية. - قدم فقرة ثابتة في قناة النيل للمنوعات( برنامج صح صح معانا ). - قدم برنامج (ورانا إيه) في قناة مودرن الفضائية. - استضيف في عدد من الفضائيات ( الفضائية المصرية - ART - قناة أوربت – قناة النيل (بالإنجليزية)- قناة النيل للمنوعات – on tv- .....)
================== سلسلة برمج عقـلك ================== الحلقة الاولى
بعنوان
بتكلم نفســك أزاي؟؟؟
هل تعلم.. إننا كلنا بنكلم نفسنا؟؟
طبعا مش قصدي نقف قدام المراية نكلم نفسنا
لكن أقصد الحوار اللي بيحصل بينك وبين نفسك وإنت قافل بقك.. فاهم حاجة؟؟
تعالوا نخش في الموضوع..
لم تأتِ خطيبة "زكي" لزيارته في عمله كالعادة..
وكلمها على الموبايل فوجده مغلقا.. فدارت في ذهنه هذه الأفكار:
لماذا لم تأتِ؟!
أكيد متضايقه مني!
متضايقة ليه؟
أكيد لا تحترمني ولا أمثل لها أي أهمية!
لماذا أغلقت هاتفها؟
لأنها لا تبالي بي ولا تريد أن أكلمها لأنني أسبب لها إزعاجا!
إنها لا تحبني!
أنا لا أمثل لها أية أهمية!
حسنا.. أنا أكرهها ولن أتصل بها!!
وسأتشاجر معها كذلك!!
هل لاحظت تسلسل الأفكار التي جالت بخاطره؟؟
لم يحدث أي حوار فعلي بينه وبين خطيبته لتخبره بسبب تأخرها..
تسلسل أفكاره قاده لافتراضات معينة لا ذنب لها فيها أصلا!!
من الممكن أن تكون قد تأخرت لأنها تحضر له مفاجأة،
وهاتفها مغلق لأن بطاريته قد نفدت.. ممكن طبعا!!
إيه اللي حصل هنا؟ اللي حصل حاجة اسمها: الحوار الداخلي..
الحوار الداخلي
هو الحوار الذي يدور في ذهن كل منا..
قد نتخيل أننا نكلم شخصا ما ونفترض أنه سيجيب بطريقة معينة قد تؤثر على حكمنا عليه..
أو أننا نجري حوارا بيننا و بين أنفسنا نفترض فيه افتراضات سلبية أو إيجابية.
حكمة:
احذر الحوار الداخلي السلبي، واحذر تأثيره..
حين نتخيل حوارا مع شخص.. فهذا الحوار الوهمي قد يؤثر في حكمنا عليه فعلا..
لذلك حاول أن تفهم الشخص ذاته ولا تفترض فيه افتراضات مسبقة.. ولا تفترض دائما الأسوأ في أي موقف..
اقرأ معي هذا الخبر الغريب:
رجل يقتل زوجته لأنها رفضت السهر!
خبر مرعب طبعا.. لكن لو دققنا النظر سنجد أن السبب الرئيسي لهذه الجريمة ليس رفض الزوجة السهر.. لكن الحوار الداخلي للزوج (الذي يعاني مشكلة نفسية غالبا) هو السبب الرئيسي لما حدث..
ما الحوار الداخلي السلبي الذي دار في ذهنه مثلا؟
لم لا تسهر معي؟
لأنها لا تحترمني..
ألا تعرف أنني رجل البيت هنا؟؟
ألا تقدر ما أفعله من أجلها؟
تصرفها هذا يعني إهانة لرجولتي..
يجب أن أثأر لكرامتي...
في هذا الحوار السلبي افترض أنها أهانت رجولته فأخرج السكين وطعنها
(بما أنه يعاني مشكلة نفسية غالبا)..
ربما لم تقصد بهذا إهانة رجولته لكن قصدت بهذا الراحة بعد يوم عمل شاق مثلا!!
احذر الحوار الداخلي السلبي.. تعلم كيف تتوقع الأفضل دائما..
اجعل حوارك الداخلي إيجابيا لا سلبيا كي تعيش سعيدا.. هذا هو مفتاح سعادتك مع الناس..
طيب.. ما الحوار الداخلي الإيجابي بقى؟؟
قول إنت بقى.. الدور عليك..
المثالين اللي فاتوا كتبنا مع بعض حوار داخلي سلبي لكل منهما.. اكتب إنت الإيجابي..
لم تأتِ خطيبة "زكي" لزيارته في عمله كالعادة..
وكلمها على الموبايل فوجده مغلقا.. فدارت في ذهنه هذه الأفكار الإيجابية:
حين تأخرت اليوم افتقدتها.. إنني أحبها فعلا..
بالتأكيد تأخرت لأنها تحضر لي خبرا سارا..
أكمل أنت بقية هذا الحوار لتدرب نفسك على الحوار الداخلي الإيجابي ..................................... ..................................... ..................................... ..................................... .....................................
رجل عاد للبيت متأخرا فوجد زوجته ترفض السهر..
سيدور في ذهنه هذا الحوار الإيجابي:
لقد أرهقت نفسها اليوم كثيرا من أجلي لأنها تحبني.. لن أجبرها على السهر كي تعرف كم أحبها...
أكمل أنت بقية هذا الحوار لتدرب نفسك على الحوار الداخلي الإيجابي
تعلم كيف تفترض افتراضات إيجابية تفسر أي موقف يمر عليك..
هل تعلم أن (80 %) من أسباب القلق سببها طريقة تفكيرنا السلبية ولا علاقة لها بما يحدث فعلا؟؟
اجعل كلامك مع نفسك إيجابيا ولاحظ الفرق الذي سيصنعه ذلك لحياتك ولنظرتك للأشياء...
==============
انتظرونــــا فى الحلقة الثانيـة من برمج عقلك
هل محدد أهدافك؟ هل تعرف بالضبط إنت عايز تعمل إيه؟ هل ماشي في طريقك ومش بتحود يمين أو شمال؟
مسألة تحقيق الأهداف دي من المسائل اللي اتكتب فيها كلام كتير واللي تهم كل واحد مننا طبعا.. عشان كده قلت إننا لازم ندردش حواليها شوية..
الموضوع ده ينقسم لقسمين.. أولا: اكتشاف الأهداف نفسها.. ثانيا: العمل على تحقيقها..
هنتكلم المرة دي عن اكتشاف أهدافك
أولا: اكتشف أهدافك
ماينفعش نحقق أهدافنا واحنا مش عارفين هي إيه أساسا.. عشان كده لازم نركز في معرفة أهدافنا الأول..
فيه كذا طريقة ممكن بيها نعرف أهدافنا.. هاديلك هنا أبسطها.. الموضوع ده ممكن ياخد كذا يوم.. ماتستعجلش يعني
في اليوم الأول:
جيب ورقة فاضية واكتب فيها كل اللي نفسك فيه.. كل أهدافك وأحلامك.. ماتحطش أي قيود.. وسيبك من اللي يقول لك: "احلم على قدك" عشان الجملة دي بتاعة الناس الفاشلين في حياتهم.. وهتحد من قدراتك وتطلعاتك.. وبعدين انسَ الورقة دي النهارده.. كمل يومك عادي وارجع لها يوم تاني..
في اليوم الثاني:
ارجع للورقة واقرا الأهداف اللي كتبتها.. هتلاقي إن فيه حاجات مالهاش لازمة أو مش مهتم بيها قوي.. اشطبها أو عدلها.. اتأمل الورقة شوية وبعدين سيبها.. ارجع ليها بعدين!!
في اليوم الثالث:
بص في الورقة بتاعة أهدافك.. كلها حاجات مش بطالة، مش كده؟؟ ابتدي بقى رتب الأهم فالأهم.. رتبها حسب أهميتها ليك ولحياتك.. والغي أي حاجة مالهاش لازمة لو لقيت..
بص في الورقة كويس.. وبعدين سيبها وارجع ليها بعدين!!
في اليوم الرابع: ارجع لورقتك.. حدد أهم أهداف من اللي إنت حاططها في الأول وحاسس بأهميتها.. خد لك هدفين أو تلاته تبتدي بيهم... وبعدين اكتب: 1- ما الأسباب اللي خلت ده هدفك؟ 2- ما النتائج الرائعة التي ستحصل عليها إذا حققت هذا الهدف؟
اكتب في كل نقطة على الأقل خمسة أسباب.. اكتب عشرة, عشرين لو عايز.. اكتب على قد ما تقدر..
السؤالين دول لما تجاوب فيهم كتير عارف بيعملوا إيه؟
بيزودوا عندك الرغبة في تحقيق الهدف.. لأنهم بيساعدوك على تخيله والتركيز على فوايده في حياتك.. بتبرمج عقلك اللاواعي على أهمية الهدف ده والسعي إليه.. الرغبة الحقيقية دي هي أول خطوة فعلية في تحقيق هدفك..
دي إحدى الطرق البسيطة اللي ممكن تحدد بيها أهدافك.. فيه طرق تانية طبعا هنبقى نقولها (ورانا حاجة؟) لكن خلينا في دي..
في العدد ده عملنا خطوتين مهمين: تحديد الهدف. غرس الرغبة في تحقيق الهدف.
العدد الجاي هنتكلم عن خطوات تحقيق الهدف نفسه..
ابقوا قولوا لينا أهدافكم اللي طلعتوها بالتجربة دي عشان ندردش عنها المرة الجاية.
مـــــــــــــــوضــــــــــــــوع رائــــــــــــــــــع بجد أنا واحدة من الناس الا مش عندى أى هدف بس بعد الكلام الا قرأته هبدأ فى برمجة عقلى وأشوف أيه هى أهدافى وأبدأ أشتغل عليها
======================= سلسلـــة برمــــج عــقــلـك ======================= الحلقة الثالثة
بعنوان
حقــــــــــــق هــــــــدفــــــــك (2)!!
هل حددت أهدافك في الحلقة اللي فاتت؟
هل عرفت فعلا إنت عايز تعمل إيه ورتبت أهدافك حسب الأهمية؟
تعالَ بقى نخش في الموضوع:
كيف تحقق هدفك اللي حددته؟؟
في الأول تعالَ نتكلم عن أنواع الأهداف..
أولا: أهداف طويلة المدى:
زي: عايز أكون دكتور – عايز أطلع ضابط – عايز أكون مليونير....
ودي بتاخد وقت كتير عشان تتحقق..
ثانيا: أهداف متوسطة المدى:
عايز آخد الدورة الفلانية – عايز أسافر...
ودي بتاخد وقت أقل شوية عشان تتحقق..
ثالثا: أهداف قصيرة المدى:
زي: عايز أشتري بنطلون - عايز أزور فلان...
وده بيحتاج خطوات بسيطة وممكن يتحقق في فترة قصيرة..
وإليك كيفية تحقيق أهدافك:
1-وضع إطار زمني:
عشان تبتدي تحقق أهدافك لازم تعرف نوعها.. هل هي طويلة أم قصيرة أم متوسطة لوضع إطار زمني لتحقيقها.. ماتسيبيهاش مفتوحة.. حط تاريخ محدد باليوم والشهر لتحقيق الهدف..
2- تقسيم الهدف:
لو كان هدفك طويل المدى قسمه لأهداف قصيرة أو متوسطة.. وحط لكل واحد منها إطار زمني لتحقيقه.. خلّي بالك دي أهم نقطة.. لو ماحددتش وقت معين لتحقيق أهدافك هتطنش عليه خالص وتنساه..
الهدف طويل المدى: أكون دكتور..
يتقسم لأهداف:
متوسطة: أعمل جدول مذاكرة لكل أسبوع - أذاكر وأجيب مجموع لا يقل عن 98 %.
قصيرة: لازم أخلص الفصل الخامس النهارده عشان أراجعه بكره تاني.
3 – أسلوب الخطوة:
ماتسمحش لنفسك تنام بالليل مستريح, لو في اليوم ده مامشتش خطوة (ولو بسيطة) تقربك من هدفك.. كل يوم لازم تكون قربت من هدفك ولو خطوة واحدة..
الهدف: أتعلم فرنساوي..
الخطوات:
أسأل عن المراكز اللي بتدرسه (خطوة)
أعرف مكانها (خطوة)
أسأل عن أسعارها (خطوة)
وبكده هتلاقي نفسك بتقرب من هدفك واحدة واحدة لحد ما في النهاية تلاقي إنه اتحقق...
4- التقييم:
بعد ما تمشي في الخطوات السابقة بتاعتك.. بص على النتائج اللي حققتها وقيم نفسك.. هل إنت ماشي لطريقك بمعدل كويس؟ هل ممكن تكون أسرع من كده؟ هل إنت راضي عن أسلوبك؟
هل فيه طريقة أحسن من دي تقربك من الهدف؟
قيم نفسك كل فترة (كل أسبوع مثلا) وشوف إنت عملت إيه وقربت لهدفك قد إيه..
لو راضي عن أدائك: كمل وربنا معاك يا بطل..
لو مش راضي عن أدائك: اعرف الخلل فين بالضبط.. هل عدم التزام منك؟ هل أسلوبك غلط؟ هل فيه طرق أحسن؟ عدل اللي إنت عايزه وارجع تاني كمل مشوارك...
5 – الفعل:
لازم تنفذ كل الخطوات السابقة بالتزام تام.. لازم تعمل مش مجرد إنك تفكر في الخطوات دي وماتعملش بيها.. قرر وإنت قادر إنك تبدأ تحقق حلمك.. لو بدأت فعلا تمشي ناحيته..
6 – الإيمان:
مافيش حاجة اسمها الظروف.. كل العقبات اللي هتواجهك دي لازم تلاقيها لو إنت ماشي في طريقك صح.. لو مافيش أي عقبات يبقى مش هتحقق أي حاجة... كل ما تقاوم الظروف أكتر, كل ما نجاحك هيكون أروع وأفضل.. وطول ما إنت مع ربنا هينصرك لأنه فوق كل الظروف وكل العقبات.. لو هو معاك هيوصلك لأي هدف لأنه فوق الأسباب...
7- تصرف وكأنك حققت هدفك فعلا:
تخيل دايما نفسك وإنت عايش حلمك.. وعيش الحلم ده فعلا.. حس إنك حققته فعلا واتصرف على هذا الأساس.. تخيل مثلك الأعلى وهو محقق الحلم ده.. وراقبه... بيتكلم ازاي؟ بيفكر ازاي؟ بيتصرف ازاي؟ بيلبس إيه؟ اعمل زيه –من الآن– في كل الحاجات اللي اتقالت دي..
تخيلك ده هو اللي هيبرمج عقلك اللاواعي عشان يوصلك لهدفك اللي إنت بدأت تعيشه فعلا..
صباح الخير جزاك الله خيرا على المجهود الرائع فعلا موضوع يستحق القراءه الحوار الداخلي مهم جدا ويؤثر على شخصيه الانسان وطريقه تفكيره ونظرته للحياه رؤيتك الايجابيه لنفسك تدفعك دائما للنجاح ورؤيتك السلبيه لنفسك سبب فشلك في الحياه نحن على شوق بانتظار ماتبقى من الموضوع
ساعات بتلاحظ إنك بتكلم حد في موضوع وهو مش قادر يوصل للفكرة اللي إنت عايز تقولها.. صح؟
عارف ليه؟
طيب قبل ما نجاوب السؤال ده هنلعب مع بعض لعبة صغيرة!
هاسألك كام سؤال.. أوك؟؟
(أهم حاجة في الموضوع هنا إنك تجاوب الأسئلة دي عشان هتحتاجها بعدين.. ما ينفعش تكمل قراءة من غير ما تجاوب عشان تستفيد من الموضوع ده....يللا قوم هات ورقة وأكتبهم)
فكر في أي صديق ييجي في بالك حالاً... اتكلم عنه في 3 أسطر على الأقل اوصف المكان اللي إنت قاعد فيه دلوقتي... في 3 أسطر على الأقل تخيل نفسك بعد 10 سنين من دلوقت في موقف معين.. اوصف الموقف اللي إنت متخيله ده بالتفصيل الممل
دلوقتي وبعد ما عرفنا نظامنا التمثيلي ونظام الناس اللي بنتعامل معاهم (راجع الحلقة اللي فاتت) هنستفيد من الكلام ده كله بإيه؟؟
هاقول لك مثال:
لو بتتنافس مع واحد تعرفه حول موضوع معين...
لو شخص بصري:
هتلاقيه يستخدم كلمات(بصرية) زي:
"شايف وجهة نظري؟.. بص للموضوع من الزاوية دي.. شكله كويس..."
لو شخص سمعي:
هتلاقيه يستخدم كلمات (سمعية) زي:
" اسمع.. ركز.. نشاز....."
عارف ليه؟ لأنه (سامع) الفكرة في مخه, وبيحاول يقول لك التحليل المنطقي ليها...
لو شخص شعوري:
هتلاقيه بيستخدم كلمات (شعورية) زي:
"مش مستريح للموضوع ده...."
عارف ليه؟ لأنه (حاسس) بالفكرة, وبيحاول ينقل لك مشاعره ناحيتها....
فهمت بقى الفولة؟؟
يبقى لو عايز تقنع واحد بصري بحاجة: حاول ترسم له الصورة بتاعتها وبتعبيرات بصرية....
لو سمعي: اقنعه بالمنطق وبتعبيرات سمعية...
لو شعوري: اقنعه بالمشاعر والأحاسيس بتعبيرات حسية...
لعبة
تمرين 1:
عاوز تقنع واحد إنه يروح معاك السينما... هتقول له إيه؟...
لو بصري؟
............................
............................
............................
لو هو سمعي؟
............................
............................
............................
لو هو شعوري؟
............................
............................
............................
المصفاة دي بتاخد المعلومات اللي جت لها وتحذف منها شوية.. بتعدي حاجات وماتعديش حاجات..
إنت قاعد دلوقتي أمام جهاز الكمبيوتر بتقرا الموضوع ده ومركز فيه.. وفي نفس الوقت فيه مؤثرات كتيييرة جدا حواليك.. فيه أصوات كتير حواليك صح؟ ركز كده.. لكن إنت ماكنتش منتبه للأصوات دي ومركز في القراءة.. صح؟
أهي المصفاة دي دورها كده.. بتلغي شوية مؤثرات وتسيب غيرها.. المعلومات اللي رايحة في طريقها للمخ المصفاة مش بتسيبها تعدي في حالها.. بتلغي شوية حاجات..
2ـ مصفاة التعميم:
المصفاه دي بقى على العكس.. بتاخد شوية معلومات وتكبرها وتحسسك إن هي دي بس المعلومات الموجودة.. يعني عممت المعلومات دي على التجربة كلها.
فكر في حد إنت مش بتحبه خالص أو مش بتستلطفه مطلقا.. فكرت فيه؟.. اكتب هنا أهم صفاته
شفت؟ هو ده بقى التعميم.. كل بني آدم فيه ملايين الصفات الكويسة والوحشة.. لكن إنت عشان مش بتحب الشخص ده, وصفته بصفة سلبية.. رغم إن فيه صفات إيجابية كتير..
مصفاة التعميم خلت الصفة السلبية دي هي اللي تتعمم.. رغم إن أكيد فيه صفات كويسة كتير، المصفاة دي ما خلتهاش تعدي لمخك (الخريطة).
هي: " كل الرجال قاسيين .."
ده مثال تاني للتعميم.. صاحبة الجملة دي أكيد مرت بتجربة مع واحد قاسي, خلتها تعمم الموضوع على كل الرجال.. مع إن ده مش صحيح...
3ـ مصفاة التحريف:
المصفاة دي غير اللي فاتوا خالص.. لأنها ببساطة بتحرف المعلومات اللي رايحة المخ ..
لي واحد صاحبي بيحب واحدة زميلتنا جدا, وهي مش في دماغها أصلا.. وفي يوم من الأيام كانت ماشية قدامنا وقالت: "صباح الخير!".. عادي يعني! صاحبنا ده قال إن ده دليل إنها بتحبه وإنها تعمدت تعدي قدامنا وتقول كده عشان تشوفه!! .. الغريب إنه كان مصدق كده تماما..
السبب في كده: مصفاة التحريف.. خلت الموقف العادي ده يتحرف ويبقى حاجة تانية خالص..
طيب.. أي نوع من دول عندنا؟؟
صح.. التلاتة طبعا.. كل مصفاة في وقتها بطريقة لا إرادية...
التحكم في المصافي:
دلوقتي بعد ما فهمنا أنواع المصافي دي وازاي بتشتغل, نقدر بكل بساطة نتحكم فيها عشان نعيش حياة أسعد..
تعال نشوف المشاكل دي كده:
مشكلة 1:
هو: مراتي رغاية أوي وبتتكلم كتيييييييييير
مشكلة 2:
هي: جوزي عمره ما يحط حاجة في مكانها خالص!!
خدت بالك من المشاكل دي؟؟
فكر كده في الفلاتر اللي استخدمت في كل حالة
المشكلة 1:
الزوج استخدم مصفاة ( التعميم والإلغاء)
ركز في مشكــلة الكلام الكتير لزوجته (تعميم) وتــجاهل حاجات كتــير قـــوي ممكن تكون كويسة فيها (إلغاء).
عارفين الحل إيه؟
يستخدم الإلغاء في موضوع الكلام الكتير ويعمم في أي صفة حلوة عندها..
يركز في إن مراته منظمة مثلا.. في إنها بتحبه.. في إنها بتربي عياله كويس وبتخلي بالها من بيته.. كده يعني..
كل ماتتكلم كتير قدامه يركز كم هي حنونة وجميلة وتحملت معي الكثير.. وبكده هيعدي الموضوع!
المشكلة 2:
الزوجة استخدمت مصفاة (التعميم والإلغاء والتحريف).
مصفاة التحريف: يعني معقول عمره ما حط حاجة في مكانها؟؟ ليه يعني؟؟ دايما بيحط الأكل في الدولاب والقمصان في التلاجة مثلا؟؟ عمره ما حط دماغه على المخدة يعني ولا بيحطها على الكومودينو دايما؟؟ أكيد منظم إلى حد ما في بعض الأشياء..
لو شغلت مصفاة (التعميم) في المواقف اللي كان فيها منظم.. هتلاقي إنه مش بشع إلى هذا الحد!!
وبكده على الأقل هتقدّر حجم المشكلة بالضبط وتقدر تتفاهم معاه وتعلمه النظام في الحاجات القليلة اللي هو غير منظم فيها..
ودلوقتي وبعد ما حلينا المشكلتين دول.. ارجع للمشاكل اللي في أول الموضوع هتلاقي نفسك حليتها لوحدك..
بتحكمك في المصافي بتاعتك هتقدر تحب (شريك حياتك- عملك- أهلك أكتر وأكتر) (بتعميم) صفاته الكويسة و(إلغاء) صفاته اللي مش عاجباك.. و(حرّف) زي ما إنت عايز.. بس وإنت بتستخدم المصافي دي اعرف إن الهدف الأساسي هو: إنك تعيش حياة أسعد, بعيدة عن الضغوط...
ورحلة حياة سعيدة..
هو ده بقى موضوع المصافي (علميا اسمها: الفلاتر).
بعد ما المعلومات بتعدي من المصافي دي, بتروح على المخ.. اللي هو الخريطة..
