مفيش حاجة اسمها معنديش وقت.لا تحتقر الأهداف الصغيرة

[راجيه الرضا]

بسم الله،

مفيش حاجة اسمها معنديش وقت
اليوم عندك ٢٤ ساعة واللي بيحقق أهدافه هو كمان اليوم عنده ٢٤ ساعة مش أكتر
بس الفرق بينك وبينه إيه؟ (تحديد الهدف - تنظيم الوقت - المواظبة)
_إنه حدد لنفسه في الأول هدف صغير يتم الوصول له في وقت محدد
_ونظم وقته فألزم نفسه بجزء بسيط منه لتحقيق هدفه فماكانش أسـيـر مواقع التواصل
_وواظـب يوميًا على إنجاز شيء بسيط من هدفه في الوقت القليل اللي ألزم بيه نفسه

فكانت إيه النتيجة؟
عدت الأيام والشهور وهو ماشي خطوة خطوة لغاية ما خلص قراءة كتابين مهمين وانت لسة واقف مكانك متحركتش خطوة وبتقول: (معقول بعد كل الشهور دي وميخلصش إلا كتابين بس؟)
عندك حق، كتابين مش حاجة كبيرة فعلا بس متنساش إنهم أكيد أحسن من الصـفر اللي انت لسة واقف عنده بعد الشهور دي.
كمان متنساش إن الانسان لما بيدخل في دايرة تحقيق الأهداف فعليًا بيلاقي نفسه بقى عنده شغف بتحقيق الإنجازات فبيتشجع إنه يعمل مجهود أكتر وبيقدر يحقق أهداف أكبر في فترات زمنية أقل.
يعني اللي خلّص كتابين مهمين في ٣ شهور، هييجي عليه الوقت اللي هيخلص فيه ١٠ كتب مهمة في مدة ال ٣ شهور دول.

وقيس على كدة بقى اللي بيخلص دورات مهمة وبينجح فيها واللي بيحفظ أجزاء من القرآن حفظ متقن واللي اتعلم حاجات مفيدة وبقى متمكن منها.

فلو انت فضلت تتحجج بإن مفيش وقت وتـحـتـقــر الأهداف الصغيرة متزعلش لما تلاقي الناس حواليك مشيوا مسافات وحققوا أهداف وانت لسة واقف مكانك متحركتش خطوة.
.
Milly Siro