معلومات فتاة الأمل
- إنضم
- 11 يونيو 2010
- المشاركات
- 166
- مستوى التفاعل
- 1
- النقاط
- 0
معلقة في بيت اهلي.. وهذه قصة معاناتي.. ارجوكم انصحوني وادعوا لي.. ((الجزء الثاني))
السلام عليكم ورحمة الله وبركاته
كيف حالكم اخواتي الغاليات؟؟
انا اختكم.. فتاة الامل
صار لي معلقة في بيت اهلي ست شهور.. بعد ماطلعني زوجي من بيتي وتركني انا وولده بدون مايتصل او يصرف علينا..
وانا بعد ماعمل معي هالحركة ((وليست اول مرة)) طلبت منه الطلاق مع شرح الاسباب اللي كنت اعاني منها..
ونزلت قصتي بالتفصيل قبل فترة على هذا الرابط:
وهذة هي تكملة قصتي.. او بالاصح مااستجد من احداث:
اتصل اخوي على زوجي علشان يعرف وش سالفته ليش مااتصل ولا سأل عني ولا عن ابنه.. فرد زوجي علي اخوي باسلوب هجومي وقال له انت اختك ((يقصد انا)) كذابة وهي ارتكبت خطأ كبير في حقي.. قال له اخوي وش هالخطأ؟؟ قال زوجي اسألها وخلها هي تقول لك وش سوت!!! ((يعني زوجي اتهمني اتهام كبير في حقي وكان غامض في كلامه ومتهجم مع اخوي))
قال له اخوي طيب خلاص اذا هي غلطانة عطها ورقة طلاقها.. قال لا ماراح اطلق!!
قال له اخوي طيب ليش ماتجي تشوف ولدك ولاتصرف عليه.. قال زوجي اخاف اذا جيت تردوني وماتفتحون لي الباب!!!! وانت السبب ((يقصد اخوي)) اللي مايخلي زوجتي ترد علي ((وهو اصلا ماتصل غير مره وحدة فقط مثل ماذكرت..وانا مستغربة منه كيف يقول هالكلام عني وعن اهلي))!!
طيب ليش هو مايشوف نفسه وش سوى فيني.. مايكفي انه اللحين طاردني من بيتي ومعلقني عند اهلي..
وبعدها بايام اتصل اخوي عليه اكثر من مرة بس زوجي كان مطنشة ومايرد عليه..
بعدها بفترة اتصل اخو زوجي (الاخ الكبير اللي بمنزلة ابوه الله يرحمه) على جوالي مرتين كواسطة خير وكمحاولة انه يصلح الامور بيني انا وزوجي، وكل مره كان يجلس يحكي معي ساعتين وانا كنت اقوله كل اللي بخاطري واشرح له الاسباب اللي خلتني اطلب الطلاق.. وهو كان يحاول يهديني ويقول معليش كل البيوت فيها مشاكل وزوجك طيب بس انه يكابر والطلاق شي كبير وخطير بالعكس المفروض انك تصبرين على زوجك...... الخ من هالكلام.. وامه نفس الشي اتصلت على امي وقالت لها نفس الكلام.. وصاحب الشأن اللي هو زوجي مافكر يتنازل ويتصل الى الان!!
وفي نهاية الاتصال الاول لاخو زوجي طلب مني انه يجي وياخذ ولدي علشان يشوفونه.. واخذ ولدي المغرب ورجعه الساعة 12:30 بالليل ولقيت بشنطة ولدي الف ريال.. بس ماادري هل هالمصروف هذا من زوجي او من اخوه..
بس بعد كم يوم في الاتصال الثاني قال لي: ((متى تصيرين جاهزة علشان يجي زوجك ياخذك؟؟))!!!!!!!
انا حسيت انها قوية وانصدمت من كلامه!!! وشلون بهالبساطة يقولها لي!!! وطبعا انا رفضت.. وحاول يقنعني وقال باعطيك فرصة ثلاث ايام تفكرين على راحتك بعدين باتصل عليك..
وبعدها بيومين كتبت رسالة بالجوال وارسلتها له.. وكان هذا بمثابة ردي:
((شكرا وبيض الله وجهك.. كنت واسطة خير وما قصرت.. انا فكرت واستخرت.. بس انا اسفة.. انا ماارتحت وتعبت نفسيتي وماأبي ارجع.. ماأقدر انسى بسهوله كيف زوجي طلعني من بيتي اكثر من مرة والمرة الاخيرة ماسأل عني ولاعن ولده فترة طويلة.. ولا فيه اي مباردة من طرفه تخليني اتفائل وارتاح له.. بالعكس هو ساكت ولا ادري وش عنده.. اذا هو صادق وقلبه صافي يبي يرجعني ونعيش مع بعض باحترام وبأمان يحل الموضوع مع اهلي اللي هو بنفسه حطني عندهم.. انا حبيته وحبيت اهله واحترمتهم فاذا هو مستحيل يحترم اهلي انا بعد مستحيل اعيش معه واعرض نفسي للتجريح وللألم مرة ثانية.. وانا مااعتبر نفسي طلبت شي.. انا تحملت واتنازلت كثير بس مالقيت نتيجة غير زيادة كبريائه.. وارجوكم انا خلاص تعبت وماابغى اتكلم زيادة بالموضوع مع اي احد..))
والحمدلله احس اني ارتحت نفسيا يوم ارسلت هالرسالة.. بس احيانا تجيني لحظات ضعف واحس بالحنين الى بيتي وزوجي.. واحيانا اقول لا انا ماابغى ارجع للحياة الاولى اللي كنت عايشتها معه الا في حالة حصل تحسن وتغيرت حياتنا للأفضل.. وهالشي الى الان ماظن راح يصير بناءعلى موقف زوجي السلبي..
بس يا اخواتي
قولولي..وش رايكم بردة فعلي؟؟
وهل انا غلطت يوم طلبت منهم يحلون الموضوع مع اهلي ((ابوي واخوي))؟؟
لانهم اهل زوجي اعترضوا على هالنقطة وقالوا ان هالموضوع بينها وبين زوجها وماله داعي تدخل اهلها.. هذا بالاضافة الى ان زوجي يكره الدخول لبيت اهلي ولا يحترم ابوي وشايل عليه ((واقسم بالله مافيه سبب او مبرر يخليه يعامل ابوي بهالطريقة المخزية.. مثل ما انا ذكرت في الجزء الاول من قصتي))..
والغريب انهم هم اتصلوا وتدخلوا بالمشكلة ((امه واخوه)) وزوجي صاحب الشأن ماتصل علي ولا على اهلي.. يعني باختصار وش هالتناقض!!!!!
ارجوكم اخواتي انصحوني
وادعوا لي ربي يفرج كربتي ويزيل همي ويختار لي الخيرة
والله ست شهور من عمري الم وعذاب.. تعبت والله تعبت!!!