معاناتي مع السمنه ...

[AUDI]

<P>حبيبتي لاتزعلين وخلي ايمانك باالله قوي و ان شاء الله تنحفين والاراده مهمه ولاتكونين عجوله والمساله يبغى لها صبر وانسي الميزان يعني موكل شوي وازنه واهم النصائح شرب الماء بكثره والاكل المعتد ل والمشي يوميا ساعه مع الاعتماد على بعض الاجهزه  المناسبه وشرب الشاهي  الاحضروالزنجبيل والابتعادعن الحلويات والدهون         وادعي ربي انك تنحفين من  غيرشراوضرر     وانا عندي بنت في اول متوسط ودبدوبه وماتسمع الكلام وماهمها  اذازادت عجزت عنها تقول انا مرتاحه كذا وعاجبني شكلي

 

[فاطمه محمد]

اختي روجي .. يوم يلست أقرا كلامج كانج تتكلمين عني في السابق .. أنا عمري الحين 21 سنة .. تخيلي وزني كان 98 و طولي 155 .. و كنت وايد وااايد اسمع كلام جارح من حولي .. خاصة من امي و ابوي .. و كنت وايد اكره عمري .. و ابدا ما اكشخ .. و ما اطلع السوق اخاف من نظرات الناس .. اجوف خواتي يتسوقون يشترون احلى الثياب احس بغصه لاني ما احصل على مقاسي .. ما البس حلو في الأعياد و لا الأعراس .. و لا اسير لها بالاساس .. الا للضرورة .. اذا كانت لحد من الأهل ..
كنت اكره نفسي بطريقة ما تتصورينها .. و ما اهتم بجسمي ابدا .. ولا ببشرتي .. و كله اقول لعمري يوم بضعف بسوي جي و جي .. .. انخطبيت انا قبل 4 سنوات تخيلو ولا اهتميت اجوف اللي خاطبني .. و لا بغيته يجوفني لأني متينه .. و ما عني ثقة بنفسي .. عقب مرة قريت عن مرض السكري .. و خفت من هالشي وايد ..و انا الصراحة السمنة سبب لي وايد امراض منها لخبطة في الدورة الشهرية يعني تخيلي اتم وياي 6 اشهر عادي بدون لا توقف .. و تقطع 3 ولا 4 اشهر و ترد و جي .. و من كثر نزول الدم استوى لي فقر دم .. و كنت امرض بسرعة .. قلت حق عمري لازم الحق ع عمري قبل لا تروح صحتي .. و بالفعل .. حاولت وايد .. مرة سويت رجيم قااااااااااااسي جدا نقصت في الاسبوع الواحد 6 ولا 7 كيلو .. في اسبوع واحد .. كنت ما آكل شي ابدا .. و اسكت الجوع بالماي و لا عصير تخيلي .. و مرضت بشده و يوم تعافيت و بعد فتره رجع الوزن دبل .. لأنه اللي سويته غلط .. عقب حصلت تشجيع كبير من اختي و من صديقتي المقرية مع انهم رشيقات الا انهم كانو يحببوني في نفسي .. بديت اشتري لعمري ثياب حلوة .. كنت ادور وايد بس في النهاية احصل قطعة ولا قطعتين على قياسي .. بديت اهتم في جسمي .. سبحان الله اكتشفت اشكثر انا حلوة .. بس انا مب مقدرة هالنعمة .. بعدين قلت يلا .. لازم ما اتكاسل و اسوي رجيم .. سألت استاري تغدية .. قالي حدج في اليوم تاكلين 1200 كالوري .. و عطاني لسته اكل و الله اني اشبع من الأكل قبل لا يخلص .. يعني آكل وايد .. و مع ذلك ما اكون موصلة للـ 1200 كالوري .. و بعدين اشتركت في نادي .. ما كنت ادوام عليه تبين الصراحة .. بس حسيت بالفرق .. و كنت اغش بالأكل مرات .. بس كنت اعتبره يوم راحه .. مع انه اللسته بدائل حلوة للأكل .. اذا تبين بحطيها هنيه عشان تستفيدين و يستفيدون الخوات .. نقصت الحين 13 كيلو .. هذا بديته بشهر 1 و مستمرة عليه مع الغش الكثير خخخ .. بس الصراحة ثيابي وسعت .. ملامح جسمي تحددت .. تخصر جسمي .. و غير هذا ملامج ويهي تحددت و استوت احلى .. حتى يوم جافوني رباعتي بالجامعة قالو والله احلويتي وايد .. بس نصيييييييييييييحه كلي اكل صحي و لا تحرمي نفسج .. لأني يوم حرمت نفسي عانيت من تساقط الشعر وااايد .. بس الحين مع الأكل الصحي صار أحسن الحمد لله .. و غير هذا لون بشرتي صارت احسن .. و ان شاء الله اوصل للوزن المطلوب .. يعني جوفي الحين انا مع كل هذا .. يتم وزني اكثر عن وزنج .. و انا و انتي بنفس الطول .. بس انا مستانسة و انتي لاء .. تعرفين ليش ؟ لأني عودت نفسي اني احب عمري .. اعرف هالشي صعب .. خاصة اني بسبب الدورة و لخبطة الهرمونات استوت شعرانية وايد .. و ما كنت اهتم اشيل الشعر غير المناطق الحساسة .. بس الحين جوفي جسمي مع انه متين .. بس الحمد لله يلق .. لأني اهتم فيه ..

اهتمي بنفسج باجر لي انخطبتي ان شاء الله ما تتوهقين و تبدين تعدلين بجسمج و تسوين .. دايما حافظيه عليه دايما عطريه و نتفي الشعر .. حبي عمرج بجذي يوم بتفكرين تنزلين .. بتنزلين بسهولة .. و مثل ما قالت وحدة من الخوات حاولي تنقصين كل اسبوع كيلو .. انا هاللي اسويه الصراحة .. عشان جي يوم آكل براحتي ما يزداد وزني يكون ثابت ..

و شي ثاني .. اذا ريلج تعورج مو لازم تضعطين عليها .. ي تمارين تسوينها و انتي منسدحة ( مستلقية ) عالأرض .. في تمارين آيروبيك خفيفة بس جدا ناافعة انا اسبوع واحد بس داومت عليها .. ما اجذب عليج بس اسبوع .. اسويه كل صبح مرة و ليل مرة .. و تخصر جسمي و انشد بطني و حسيت بالفرق .. هذا بس اسبوع عيل لو اذا مدامة عليه شو كان بيصير ..

التمارين عندي مخزنه بالجهاز برفعها و بحطيها لج هنيه .. انتي خزنيها و مارسيها .. حتى لو بدون رجيم .. جربي مب خسرانة شي انتي .. و ترا الرياضة وناسة صدقيني .. تريح النفس وايد ..

و دايما توكلي على الله .. و كل ما هميتي اتسوين شي توكلي عليه لا تتواكلين .. لا تقولين انا متينه و جي و انتي قاعدة .. سوي اللي عليج و توكلي على رب العالمين و صدقيني ما بيخيب ظنج ..


كثرت بالكلام .. بس ما حبيت اجوفج متضايجة من سالفة حلها بايدج ^_^

مـــــــــــــااااااااااقصرتي يا ثمينه الصرااااحه كلاااامج مهم جداااا جدااا و ان شاء الله اتمنى الاخت تستفيد منه ..............................





:icon26::icon26::icon26::icon26:


و انا مثلكم حالي من حالكم و يااااااااااارب نضعف اللهم آمين

 

[شمـــ وطن ـــوخ]

:clap::clap:

و انا بعد نفسج دووبه و مستوي امتن وحده في العائله يعني فيل و كل يوم اسمع كلام جارح من امي و اخواني و الكل :icon1366::icon1366:


و راح ابدء و ياج رجيم و نشجع بعض

موافقه :icon30:

ابي حد يعطنا ريجيم عشان امشي عليه :shiny:

 

[@زينة@]

ياقلبوا ذكرتينى بالذى مضى كنت اكرة شئ اسمه مرايه من كثرما اكره شكل جسمى ومع التعليقات كمان الواحد يكره شكله صرة مااحب اخرج من غرفتى بس قدام المرايه اتحسر على نفسى خصوصان لمى يقولوا حلوه بس خساره تخينه مره بعدها مليت وقررت اتعب على نفسى صحيح كانت حركاتى الرياضيه عشوايه بس اهم شئ اتحرك وابذل مجهود بعد ماخسرة 10 كم صرة والله مابغى اترك المرايه مع انه كان قدامى كثير عشان اوصل للى ابغاه بس اهم شئ لاتحاولى احد يحطمك خلى كل كلمه تسمعيها تزيد من اصرارك تكونى زى ماتبغى حاولى تهتمى ببشرتك وشعرك حاولى تركزى على امور ثانيه وخلى مواعي اكلك ثابته وتاكلى شئ غير الفاكهه فى المساء طولت عليك ياقلبوا بس الله يسعدك ويحقق الى ببالك

 

[انشودتي الكويت]

انشاء اللة تحققين هدفج يا رب

 

[مسكاوية]

غاليتي اولا لازم تكون نفسيتك ومعنوياتك مرتفعه انصحك تابعين عند مركز رياض الهجن موجود بطريق الملك عبدالله دكتوره رندا اذا موجوده مره رائعه

 

[*نونه*]

انشاء اللة تحققين هدفج يا رب

اعتذر عن المداخلة:


اختي حرام تكتبي اسم الجلالة الله بالتاء المربوطة و حرام ايضا ان تكتبي ان شاء ككلمة واحدة كما فعلتي... ابحثي عن معناها في النت انها تعني ايجاد و خلق... استغفر الله... ان الله هو الذي يخلق فقط... و ليس العكس... لذا اقتضى التنويه...

 

[sa_hu13]

الله معكي يا اختي وانا كذلك اعاني من نفس مشكلتك ولكني متزوجة ودائما زوجي يعايرني بذلك فقررت المحاولة من جديد بالرغم من ان ارادتكي ضعيفة ولكني ساحول وقد قرأت في احد المنتديات ان شرب خل التفاح منحف ممتاز علي المدي الطويل مع تخفيف الأكل وقد بدأت فعلا أشربة منذ اسبوعين ثلاث مرات يوميا بعد الأكل معلقة كبيرة علي كوب ماء وان شاء الله نري نتيجة طيبة

 

[أم_فيصل]

مشكلتك أبد ما تختلف عن مشكلتي ....مشكلتي السمنهه المفرطه....المصيبه أني ولا مررة شفت نفسي نحييفه من وأنا صغييره والسمنه وراي وأنا الحيين بروح أول ثانوي...بس حياتي منكده وأكره شي في الدنيا هو أبويي لا تستغربون أبوي نكد علي حيااتي والسبب هو السمنه .....تخيلوا حتى لو جا بينصحني لا زم يتطنز على سمنتي...تخيلوا أني ما أحس أتجاهه بمشاعر الأبوه صحييح أنه جابلي ipoooooooooood وهذا كنت أتمنااه بس هو يفسر حبه لي بطرييقه جاارحه أكره وأكره اليوم الي عرفت فييه أنه أبوي(معليش طلعت برا الموضووع بس بشرح علشان تفهموون معاناتي) أكييد الي بيقرأ الكلام الي كتبته عن أبوي بيقولون أني قليلة أدب.... أعذروني أذا كلامي عن أبوي فيه وقاحه.....أنا عمري 15سنه بس أحس أن عمريي 40سنه من السمنه ..السمنه عقدتني كرهتني في حياتي صرت مطنزه للعايله .... في مواااااقف كثييره في حياتي ومنها:*كنا في رمضان ومجتمعيين في بيت أهل أمي وكانوا حاطين مسلسل غشمشم طبعا تعرفون أنهم سمااان ...فقال ولد خالتي الكبيير :هذي ..... وذاك زوجها.... يعني قالوا أنا زوجة غشمشم وزوجي غشمشم هو ولد خالتي الي يعاني من السمنه مثلي .....طبعا كلهم ضحكوا وانا ضحكت معاااهم بس من داخلي ودي أذبحهم.......*الموقف الثاني قالت لي أياه ماما وهو أن عمتي سافرت جده عند أهل أبوي قامت جدتي (على فكره جدتي ما تطييييقنا) سألتها بنت أخوكي الين دحين دوبه طبعا عمتي أيش قالت؟قالت :دوبهه مرررره ما تقدر تدخل من الباب......................(طبعا هي كذابه أنا أقدر أدخل من الباب بس هي تحب تبالغ وتزييييد)............المهم ....أهل أبوي هذولا معاناة ثانيه بالنسبه لي أهل أبوي (جدتي &عمتي &عمتي الكبيره) ما يطيقونا أبددددددددد..طبعا هذولا طووول الوقت يتكلموون عنييييي وعن سمنتي ...............طبعا أكييد أشتركت مع دكتورة تغذيه ومشييت معاها تماااام ونقص من وزنيييي وصار الكل يقولي أني حلويييت وبان وجهي بس صار موقف خلا كل الي سويييته يضيييييييع الموقف اني أكتشفت خيانة أبوي لأمي ....نعم خاانها(والين الحييين )لا ومع وحده صغييره ذاك الوقت تمنيت الأرض تنشق وتبلعني صرت أقوول في نفسي مستحييل هذا أبوي الي أعرفه وصارت لي حالة أكتئاب وطبعا صرت آكللللللللللل الين ما سمنت بشكل كبييييير وصار لقبي عند أبوي وأخوي الي أصغر مني ب3سنواات ***مطب صناعي*** حتى عياال عمي الصغاار صرت مطنزه لهم صرت أضحك معاهم لما يتطنزوون علي بس من داخلي اتقطع...تدرون من الي أحس معاه اني حلوه والدنيا بخييير وان موالمهم شكلي هم **صديقاتي &أختي الصغييره الله لا يحرمني منها صحيح أنها أصغر مني ب6سنواات لكن تحسسني اني حلوه ودايما تدافع عني وتقولي اني حلوه وأجنن &بنت عمي الي بجده&أحيانا امييي** أمي .......أحبها أموووووت عليها ودي أحقق أمنيتها وهي أني أكوون نحييفه والله علشانها بس ما أقدر ما أدري أيش يصير وأرجع زي أول وأكثر بعد ......أنا أمووت بس المووت النفسي مو المووت الجسمي أمووت لما أشوف بنات خالاتي لا بسين ومتكشخيين إلا أنا ...........تصدقوون عاد أنا مره أبوي قالي: مين الي بياخذ وحده مثلك الرجال يبغى حرمه يتغزل فيها مو.........ما يحتاج أكمل ....حياتي مآسي صرت أتمنى المووووت مع أني أذووقه كل يووم بس أبي أرتاااح أبي لما أرووح السووق أشتري ملابس وأشتري وأشتري ولا أوقف ............بس من وييين الاقي مقاسي صرت أكره الملابس واكره الدنيا وأكره نفسييي وأكره الناس تكفوون أبي حللل موبس علشاني علشان أفرح أمييي(ترى أمي هي*** تاج الأحزان*** أنا بنتها)

قلبي عورني عليج والله .. الله يفرج همج حبيبتي .. بس بجذي انتي تهدمين نفسج زيادة ..
و بعدين منو قال البنت السمينه ما تحصل حد ياخذها ؟ انا انخطبت و وزني 98 يعني قريب الـميه .. و اللي خطبني جسمه حلو الف من تتمناه .. ما قال والله انه هاذي دبه ما باخذها .. هو كان يعرف اني متينه .. بس مع ذلك رضى فيني .. عشان جي انا احينه ابا اضعف من عمري .. ابا لي تزوجت اكون رشيقة و حلوة ..

لا تحطين هالشي ببالج .. انتي الف من يتمناج .. و بعدين انتي بعدج 15 .. و العمر جدامج ان شاء الله .. بعدج تقدرين تضعفين اذا انتي تبين هالشي .. تعرفين شو .. لا تنسين اللي جرحج .. دايما حطي هالي ببالج .. عشان يكون اهو الحافز عشان تضعفين .. لأنج يوم بتضعفين .. بتسكتين حلوجهم .. ما بيعرفون يقولون لج شي .. تحديهم اذا تكلمو بعدين .. تقدرين تجلسين وياهم بكل ثقة .. محد يقدر يلقبج .. بصراحة انا عانيت من الألقاب .. بس كلما يا حد يقولي انتي دبة و سمينه تعرفين شو كنت ارد عليه ؟ كنت اقوله هذا دليل اني عايشة بعز .. و يسكتون .. خلي نفسج قويه .. يوم يضحكون .. اضحكي .. انا الحين لي حد قالي دبه اضحك .. كنت انجرح وايد من هالكلمة بس صارت الحين عادية .. و خير يعني انا دبه ؟ ما في متان غيري ؟ و الله انا احلى عن امية وحدة ضعيفة .. يعني الموضوع سهل جدا .. انتي بس شدي على نفسج شوي .. و لا تخلي الناس تغير من تفكيرج .. الناس عمرها ما بتسكت .. باجر لي ضعفتي ان شاء الله بيطلعون رمسه يديده .. و بيعايرونج عليها .. لو عطيتيهم مجال يحطمونج .. بتمين طول عمرج محطمه .. لأنهم ما بيسكتون صدقيني ..
و شي ثاني .. ادعي دايما .. ادعي وانتي واثقة من الاجابه .. و ربج بيفرج همكم .. و بيهدي الوالد ان شاء الله ..
انتي بعدها الحياه جدامج .. لا تفقدي الأمل فيها .. جوفي اشكثر اشيا حلوة حوالينج .. جوفي بشو انتي بارعة .. مثلا بالطبخ بالرسم بأي شي .. ابدعي بهالمجال .. سكتي حلوج الناس بهالشي .. انا يوم كنت اتضايج كنت اروح ارسم .. و بعدين يت لي فكره استخدم الحنا .. الحين انا الحمد لله باااارعة فيها .. كل ما كانت نفسيتي تخيس و اتضايق اروح امسك صحن ولا قدر و احني عليه .. بس الحين جوفي بالمناسبات و جي .. الكل ايي عندي .. يقولي ثمينه ابا اتحنى و جي .. و انا احنيهم لأنه هواية بالنسبة لي .. فجذي الناس ما بتعرف تغلط عليج لأنه عندها مصلحة وياج ..
حاولي حبيبتي .. المشاكل ما بتنحل من روحها .. يبالها ارادة وعزيمة عشان اتحلينها ..

 

[هواها شرقي]

الى اختي كان الله في عونك ويسر امرك وحقق مبتغاك .
الى ابنتي ابنة تاج الاحزان لقد قرات قصتك انت فعلا تعيشين ماساة حقيقيه ولكن صغيرتي لاتيأسي من قدرة رب العالمين فهو الوحيد الذي يجب ان تلجأي اليه وما خاب من لجأاليه ولكن هناك عدة نقاط احببت ان اوضحها لك.
انت لديك القدره على الكتابه باسلوب رائع كان من الافضل ان تكتبي موضوعك ومشكلتك في قسم الاستشارات البناتيه.او في قسم القصص.. فهنا فقط يخص المتزوجات .
ان اعرف بانك تحبين والدك ولكن بسبب افعاله وتصرفاته معكي ومع امك جعلك تتحدثيين عنه بذلك الاسلوب الذي لاتفق معك فيه فاحساسي يقول بأنك فتاة ذات اخلاق حسنه. ولكن عليكي احترامه وحسن معاملته فمهما عمل فلا تقللي من شأنه والاحسان اليه.
اما بخصوص سمنتك حبيبتي بيدك انت فقط الحل لماذا انت سلبيه في حل مشكلتك .كان يجب عليكي ان تفعلي كل ما تستطعين فعله فأنت صغيره والحياة امامك طويله ان شاء الله.فلا تختلقي الاعذار ولا تجعلي خيانة والدك سبب لتناولك الطعام انا اعرف انك ربما حاولت ولكن تنقصك العزيمه والاراده اجعلي لك هدفا بحيث تقولي سأنحف لاجل صحتي لاجل امي لاجل احقق جميع ماتتمناه نفسي لاجل ان اقول لجميع من استهزأ بي هذه انا التي كنتم تنظرون اليها بمنظور ضيق الان اصبحت فتاة اخرى جميله ورشيقه .هيا انهضي ابدأي من اليوم قرري ان تودعي السمنه الى الابد ابدأي بأول خطوه اجعلي لك جدولا تسيرين عليه بمساعدة والدتك .انت قلت انك ستدخلين المرحلة الثانويه ستكونين في عالم اخر ربما تصادفين مواقف تحرجك بسبب سمنتك وقد تجرحك.هيا انوي بان العام القادم سيرونك زميلاتك وانت بشكل جديد.
صغيرتي انا سابقى بجانبك مارأيك لو نتابع سويا خطواتك القادمه لتوديع السمنه هيا راسليني واكتبي لي ما حققته من تطورات واعتبريني مثل امك واذا اردت التحدث مع صديقه اعتبريني احدى صديقاتك .
نقطة مهمه احببت ان انبهك عليه عندما تريدين كتابة قصتك او مشكلتك لاتلمحي باقاربك سواء من اهل ابيك او امك واماكن اقامتهم حتى لاتقع امك بمشاكل هي بغنى عنها .فانت تعلمين ان هذا المنتدى يقرأه الجميع افهمت ما اقصده .
واخيرا تمنياتي لك بكل السعاده وان يحقق الله ما تريدينه وييسر امرك ويهدي والدك ويجازي امك على صبرها خير الجزاء في امان الله..

 

[هذاك اول]

انا كنت مثلك اروح السوق وارجع وانا ابكي لكن قلت اصحي لمتى هذا المتن وهذا الشكل ونفس الموال ينعاد مع الملابس المهم بديت رجيم ورحت لدكتورة تغذيه مع اني ماالتزمت معاها والحمدلله بدا وزني ينقص لكن نصيحتي اولا ادعي الله واستغفري وصلي في الثلث الاخيروبعدها الاراده مو انك تكرهين شكلك وتستنين احد يساعدك حبيبتي انتي ساعدي نفسك بنفسك خلي عندك هدف واطمحي له لازم تتغيرين وسوي هذا التمرين يوميا اكتبي انا نحيفه انا اكل مثل النحاف انا مااكل الي يضر بصحتي المهم ارسلي لعقلك الباطن مثل هاذي الرسايل الايجابيه حتى يصدقها ومع الوقت تتغير نظرتك لنفسك وترتاحين وبرضه امشي يوميا نص ساعه وذا ماتقدرين في تمارين سويها:showoff: واشربي الشاي الاخضر والزنجبيل والنعناع والكمون احيانا انا احط بدل الكمون قشر الرمان واول ماتصحين خذي ليمون وقطعيه وحطيه مع ماء حار الين يفتر واشربيه واذا حسيتي بجوع في اي وقت من اليوم كلي تفاح اخضر او خيار ولازم من السلطه في الغذا وقولي هاذي فتره باضغط على نفسي فيها وبعدين بارتاح موانك ترجعين تاكلين زي اول لا تاكلين زي النحاف هههههه بس ياناس انا عندي كرتون تويكس اعطيه مييييييييين