مطلوب من صاحبات الخبره...

[الأميييره]

صباح الخير للحلوات اللي عندهم خبره في اكل النفاس
اختي نفاس وابغى اعملها اكل زييييين وماني عارفه اعملها ايش
ممكن طلب منكم ياطباخات ياسنعات تعطوني طريقه اكله تصلح لنفاس وتكسبون اجر في اختي
الله يسعده اللي تساعدني والله لايرد لها دعوه

 

[مَلآمِحْ حُلمْ]

صباح النور و السرور ..
ما شاء الله تبارك الله
الله يجعل البيبي قرة عين لها و لزوجها و يكون من مواليد السعاده يا رب ...:11::11::11:
أعطوها مثلا
مطازيز و مرقوق و حليب بالعسل و حلبه
و يا رب البنات يفيدوك ..

 

[ساحرة بس شاطرة]

هلا حبيبتي

بالنسبه للنفاس لازم يكون اكلها مغذي+صحي

انصحك باستخدام لحم الغنم قطع خاليه من الدهن والشحم

اعتمدي الاكلات الشعبيه (المرقوق / المطازيز / الجريش / السليق / القرصان)

بالنسبه للخضار ابعدي عن الطماطم+الحوامض(برتقال/ليمون+فراوله
+كيوي....)+الخضروات اللزجه(الكوسا/الملوخيه..)

ابعدي عن البهارات بقدر المستطاع او ضعيها بكميات قليله( ركزي على القرفه في طبخك)

استخدمي اللبن والحليب مزوع الدسم

حاولي انك تتبعي طرق الشوي في اغلب الاكلات

سويلها اي شئ يجي في بالك

اهم شئ الفطور يكون مغذي يحتوي على منتجات الالبان+فيتامينات+كربوهيدرات بسيطه

والغداء اعتمدي الطبخ العادي مع الاخذ بالاعتبار النقاط المهمه

بالنسبه للعشاء انصحك يكون خضار



................تحياتي

 

[وزيره]

المرررق مرررررره ممتاز ولو تحطين فيه خضار يكون احسن

 

[دددددودي]

صبا ح الخير ومبرووووووك مجابت اختس
حبيبتي تعرفين القرصان الرطب اكيد تلقينه بقسم المخبوزات ببنده
سوي ايدام مرق بلحم واذا استوا الحم حطي الخظار و القرصان الرطب وخلي المويه كثيره شوي
وخليه يطبخ على نار وسط لنص ساعه وقدميه له مع فلفل اسود وبلعافيه على قلبه

 

[ام صغيرونه]

هلا اخي

مبرووك ماجابت اختك وتستحقون سلامتها


خبز رقاق ويا العسل والسمن البلدي

الثريد

الحلبه مع الحليب

واهم شي العسلللللل

 

[الأميييره]

مشكورات اخواتي بنت المريخ وساحره بس شاطره ووزيره ودددددودي وام صغيرونه
والله يسلمكم ويسعدكم ولايرد لكم دعوه يارب
ابشركم سويت لها مرقوق وشربه وان شاء الله الباقي اسويه لها اليوم

 

[ام الابطال999]

الحمد لله على سلامتها

والبنات ماشاء الله ماقصروا قالوا الي كنت باقوله

 

[هدوء أميرة]

يغلق تم الرد​