مشكلتي مع أستاذتي واتهام دون تبين !

[إحسآس ~]

السلام عليكم ورحمة الله وبركاته

اخواتي حابة أطرح لكم مشكلتي يمكن تقولوا انها انتهت او اني مكبرة السالفة
لكن والله من وقت المشكلة الى اليوم وانا ابكي قهر وظلم

مشكلتي تكمن مع استاذتي ودرجات المادة

انا طالبة جامعية هذا ترم التخرج ليا ان شاء الله

قبل اطرح المشكلة.. استاذتي هذه كنت اكن لها كل الاحترام والتقدير
كانت متعاونة معانا خلال الترم يعني في شغلنا لان تخصصي عملي كانت تساعدنا تطلب مننا يوم نسلم فيه الشغل ولو شافت ماقدرنا تدينا فرصة الله يجزاها خير

مشي الترم جات الاختبارات الدورية اختبرنا بعد الاختبار نسألها ياأستاذة نبغى الدرجات تقول بعدين نهاية الترم أديكم هيا
والسبب أنها تقول الطالبة تحسب درجاتها تظمن درجة النجاح وماتدخل الاختبار النهائي..مع انو من حقنا اننا نعرف درجاتنا

جا الاختبار النهائي واحنا مانعرف عن درجاتنا شيء
بعد ماخلصنا الاختبار رحتلها اسألها عن درجة اعمال السنة ابغى اتطمن
قالتلي مفروض مااديكم هيا بس دامكم اختبرتوا النهائي باديكم هيا بس الكشف مو معايا ذحين

قالتلي اديني ايميلك ارسلك قائمة اسماء البنات فيها درجات اعمال السنة
قلتلها طيب ارسلك هيا مسج على الجوال وانا عندي رقمها جيت ارسلها سئلتها وصلتك الرسالة قالتلي لا وطلع الرقم المخزن عندي فيه نقص
وادتني الرقم من جديد وارسلتلها وعلى وعدها انها ترسلي
هذا الكلام يوم الاحد استنيت الى يوم الثلاثاء وهيا ماارسلت شيء قلت اكيد انها انشغلت بالتصحيح عذرتها

رحت ارسلتلها مسج اسئلها عن شغلي تبع المادة لاني سلمتها هوا ابغى اعرف متى تجي الكلية والوقت..ولا جاني رد منها

طيب عذرتها انا هنا كمان..مشي الربوع والخميس والجمعة جا الاحد نزلت درجة المادة على موقع الجامعة
لما شفتها انصدمت انصدمت ناقصة 10 درجات
رحت ارسلتلها مسج محتواه مساء الخير استاذة نهى استاذة حابة اتاكد من درجتي ناقصة في اعمال السنة ولا في النهائي؟لاني صراحة مرة مصدومة من الدرجة عيناتي كنت مشتغلة فيها تطريز يدوي
والمشروع مرره تعبت بس في الكلف لانها كانت ورق ولفيت عليه القصب واخذ مني اسبوع بس اللف ومااتوقع في بنت اجتهدت في المادةقد جهدي من عينات ومشروع واسكتش واختبار
والاسكتش المادة العلمية اللي فيه فوق المطلوب مننا وحسبتيلي فيه درجة البحث اللي كنتي طالبته مننا.ان شاء الله مافيه ظلم بس والله فعلا مصدومة من الدرجة.. انتهت الرسالة

برضوا ماجاني رد منها..وانا بت ذاك اليوم ابكي من الدرجة ماني عارفة وين النقص الدرجة فيها غلط ولا ايش ؟!
استنيت اليوم اللي بعد الى لما جا العصر واتصل عليها اول شيء مشغول اتصلت مرة ثانية ردت عليا
سلمت عليها عرفتها بنفسي قالتلي انتي ارسلتيلي امس! انا كتبت لك رد يا إحساس بس (ولدي مسح الرسالة) قلتلها انا قلت يمكن الشبكة فيها مشكلة الرسالة ماوصلتك
او ان ردك ماجاني بسبب الشبكة..ولو انها ماقالت لي عذرها كان احسن .
سألتها عن الدرجات كان تقولي يا إحساس انا ماأظلم أحد المشكلة كشف الدرجات ماني عارفة فين حطيتو شويا الا تقولي شوفي تقسيم الدرجات الاختبار الدوري كذا
العملي كذا شغل المادة كذا الاختبار النهائي كذا وضحتلي تقسيم الدرجات بعدين قالتلي انا كم كانت درجاتي..
الى هنا انا اقتنعت عرفت مواطن النقص عندي.. شكرتها وقلتلها انا بس كنت ابغى اتطمن اعرف فين النقص لاني انا كنت مجتهدة في المادة وانصدمت من النتيجة
قالتلي مو بس انتي اجتهدتي كل البنات اجتهدوا
وانا عليا بالاخراج النهائي مو بالجهد اللي انبذل..طبعا انا سكت ماقلت شيء..قالتلي لو ماعجبتك الدرجة ممكن تكتبي خطاب نفتح لجنة من جديد للتصحيح
قلتلها لا ..جزاكِ الله خير مايحتاج الامر كذا انتي وضحتيلي الدرجات مايحتاج.. وانتهت المكالمة بإقتناعي بالدرجة

بعد المكالمة هذه صادفت اني رحت المدينة صراحة اتذكرت كل من ساعدني من استاذات من صحباتي من اهلي ودعيتلهم
نزلنا مكة بعدها ..
وقتها انا كنت ادعي قدام الكعبة قلت خليني ارسل لاستاذاتي وصحباتي من "باب حسن النية والله"
رحت كتبت رسالة" من أمام الكعبة وفي هذا الوقت الفضيل.. ذكرتك في دعاء ف قولي آمييين.."
ارسلتها اول شيء لصحباتي بعدين مرة ثانية ارسلتها لاستاذاتي يعني ارسلتها على مجموعتين..

شويا كذا الا ردت عليا 2من صحباتي اللهم آمين ولكِ بالمثل..والثانية آآآآآميييين لاحرمني الله قلبا كقلبك.

على الظهر انا كنت نايمة.. اتصلت عليا استاذة من اللي ارسلتلهم بعدين انا شفت اتصالها وماكان عندي رصيد اتصل فيها
بعدها على العصر اتصلت عليا استاذة ثانية برضوا كنت نايمة تعبانة من السفر..

على العشا انتبهت للجوال وشفت الاتصالين.. دقايق الا ترجع تتصل عليا الاستاذة اللي اتصلت العصر
رديت عليها سألتني مين أنا قلتلها انا من طالباتك وصراحة انتي لكي فضل عليا ماانساه اتذكرتك في الحرم ودعيتلك
قالتلي درستك اي مادة وقلتلها.. قالتلي جزاك الله خير الله يوفقك انا بس عشان مومخزنة الرقم ماني عارفة مين المرسل وانا قلت سواء دعيتيلي او دعيتي عليا كل الحالتين
جزاكي الله خير.. قفلت منها
هذا الكلام كان يوم رجعت من مكة الاسبوع اللي بعد نزلت فيه المادة يوم الثلوث
يوم الجمعة القى رسالة من الاستاذة تبعة المشكلة تقولي
موعدنا 10.5في مكتبي احضري مشروعك
رديت عليها مساء الخير..بس والدي مسافر ومايرجع الا الاثنين فما اقدر اجي..وارسلتها

رحت للكلية انا يوم الاثنين
وانا ماشية في الممر شفتها وماتطالع فيا ماشية راح للقاعة
بعدين بعد كم ساعة راحت لغرفتها وانا كنت عند مرشدتي الاكاديمية عشان الجدول
رحت لغرفتها ولقيتها تكلم بالجوال وفيها كم مكتب وفيها بنات كثير ومنهم صحباتي.. رحت لهم كان يقولولي الاستاذة زعلانة تبغاكي
انفجعت قلتلهم ليه ايش فيه! قالولي مدري تقول: بنظرات وتسأل وين صاحبتكم اللي الصباح معاكم ! قالولها اني عند المرشدة

المهم انتظرتها تخلص وعادي انا كنت ابتسم سلمت عليها ونظراتها شويا وتخترقني
قالتلي جبتي المشروع قلتلها لا.. قالتلي ليش قلتلها مو معايا
قالتلي كيف مومعاكي.قلت لها يوم جبته ع اساس تصححيه والدي جا وانتي لسا ماجيتي واديته وحدة من صحباتي "فلانة"تسلمه لكي
قالت لي مين هيا هذه"فلانة" قلتلها فلانة الـ كذا تدرسيها انتي في الشعبة الثانية
قالتلي ايش ودا المشروع عندها ! قلتلها من وقت اديتها هوا عشان تصححيه مااخذته منها لان ايام اختباراتنا ماهي زي بعض
وذحين هيا خارج المنطقة مااقدر اخذه منها..عاد عصبت هيا
وتقولي يعني رسايل دعاوي وكلام فاضي وفي النهاية مو معاكي المشروع ايش ابغى فيكي اجل !
وتطاااالع فيا كاني ماادري مسوية ايش
ابتفاهم معاكي هنا ولا على مكتبي قلتلها لا على مكتبك
رحنا غرفة ثانية فيها مكتبها.. قالتلي المشروع وماجبيته ورسايل دعاوي انا ذحين انزل للعميدة اوريها الرسايل <يعني خيييييير كلها رسالة سؤال متى تجي
ورسالة دعوة لها صراحة شكيت في نفسي مرسلتلها رسالة فاحشة ولا فيها دعارة..
المهم انا انفجرت ابكي ماقدرت اتحمل اللي جالسة تسويه وتقوله تقولي انا وثقت فيكي من بين البنات كلهم واديتك رقمي احمد ربك الرسالة طاحت
في يدي مو يد بنت خوجة ولامدري مين لاطاحت في يد وحدة قبيلية
والله لوطاحت في يد وحدة ثانية كان تعتبرها تهديد وتحرمين من البكالوريوس تحرمين من شهادة حسن سيرة وسلوك
بعدين مرسلتلي الرسالة الفجر! الناس ترسل عصر مغرب عشا مو فجر! زوجي قام سمع صوت الرسالة قالي مين الرقم الغريب المرسل ذحين.. الله مين اللي افتكرتك هذا الوقت ولا قدام الكعبة تدعيلك
(انا جلست هنا اشهق وابكي) هذا شكلها تدعي عليكي..وانا قلت امين ولك بالمثل ماني خايفة منك لان يكون بعلمك انا مااظلم احد ازيد الطالبة درجة و2 ولا اكون ظالمتها
مااحط راسي على المخدة الا اظمن زايدة الطالبةدرجات.. قلتلها وقت مارسلتلك انا كنت قدام الكعبةو ربي يشهد عليا ان دعيتلك مادعيت عليكي تذكرت تسهيلك لنا خلال الترم وتعاونك معانا وماكان قصدي من الرسالة
الا شيء طيب والرسالة هذه ارسلتها لصحباتي وكم استاذة اوريكي هيا لو مومصدقة وابكيييي قالتلي لاتبكييين وجات عندي بعدين كان ترجع مكانها وتقولي انتي حطيتيني في مشكلة مع زوجي سار يمشي ويستهزيء فيني يقول تدعيلك
المهم وانا ابكي ماارد عليها قالتلي درجتك ذحين راضية عنها قلتلها ايوا راضية عنها من يوم كلمتك انتهت المكالمة بأني راضية عن الدرجة والرسالة مارسلتها
الا لاني قبل كنت في الحرم النبوي تذكرتك ودعيتلك وبعدين كنت في مكة ودعيتلك ..قلتلها وانا كنت مصدومة من الدرجة لاني فعلا كنت مهتمة في المادة وتفاجئت بالنتيجة
بس بعدين لما كلمتك ووضحتيلي الدرجات وتقسيمها وصراحة مو اي استاذة بتدي الطالبة الدرجات وكيف تقسيمها انا اقتنعت وخلاص..
قالتلي انا دكتورة فلانة(الدكتورةهذه تدرس نفس المادة هذه) حطتني في موقف سيء قالتلي لاتدي الطالبات الدرجات وانتي من حقك تعرفي درجتك بس لما قلتلك بارسلك الدرجات
اتذكرت الشعبة الثانية مااختبروا فكيف انتوا تاخذو الدرجات وهما مااديهم!
بعدين تقولي انتي حطي نفسك مكاني متزوجة وتجيكي رسالة في هذاك الوقت انا لو بنت في بيت اهلي مافكرت فيها وطنشتها
انا جوالي يسوي فرز للرسايل لما جات رسالتك رجعت لاول رسالة ووريتها زوجي قلتله شوف البنت هذه هذه اللي سالفتها كذا وكذا البنت قبيلية
بعدين جات عندي توريني جوالها تبغى تهديني..وانا مازلت ابكيييي
بعدين تقولي انتي غلطتي وغلطة الشاطر بالف هذا درس لكي قبل لايكون ليا..احذري ترسلي رسايل زي كذا لاستاذات..انا زي كذا ارسلها لخواتي صحباتي بس
اعتبريني اختك الكبيرة وتضحك وتقولي ولا ماتبغين! بعدين مدت يدها وسلمت عليا بعدين حضنتني قالتلي خلاص انسي الموضوع ولاتنكدي على نفسك..
انا طلعت من عندها ابكي واشهق احس فمي ناشف اكلم صحباتي خلاص شفايفي تلصق في اسناني... انصدمت منها صدمة كبييييييييييييييييييرة
والله من طلعت من عندها الى اليوم وانا ابكي وادعي عليها من القهر والظلم.. وترى اغراضي الى الآن عندها ماستلمتها

انتهت المشكلة

انا اسئلكم ايش رأيكم في موقف الاستاذة؟ وكلامها وتصرفاتها؟وايش انا كان ممكن اسوي..
يعني والله انا انسانة مثقفة الحمدلله عاقلة وفوق هذا ماطولت لساني معاها وقاوحت
بروح لها يوم ثاني مع ان والله مالي خاطر اطالع في وجهها بعد هذا اللي سوته فيا

انا فكرت اني اكلمها مرة ثانية لوحدهاعلى اسلوبها وانو لازم تتبين من الرسالة ماتهاجم وتتهم وان كل انسان فيه الخوف من الله
مولازم يكون قبيلي بس طبعا باسلوب..لاني وقت ماكلمتني ماقدرت اتكلم من البكا
والله العظيم الالم النفسي اللي سببته ليا مو شيء بسيط..

رأيكم ياكرام