مشكلتي معها .. ** تم الرد **

[دلوعه ممنوعه]

السلاااام عليكم اخت نجوى ..

مشكلتي تبدأ وتنتهى مع بنت زوجي عمرها الان 11 سنه تزوجت ابوها لما كان عمرها 6 سنوات


وكنت معها غايه في اللطافه خصوصا ان امها مطلقه وانا مريت بشبه تجربتها لما كنت صغيره


فأنا مقدره كل مشااااعرها واحاسيسها طبعا استمرت العلااااقه حلوه بيننا وكنت اتحمل تصرفاتها


ولطيفه معها حتى لو غلطت علي كنت اتحمل بحجة صغر سنها لكن الان الامر زااااد سوء مرت


عليها فتره زارت امها مدة ثلااااث شهور ولما رجعت تغيرت افكاااارها تماما وصااارت تكرهني كثييير


وتغلط علي انا وابوها وتقول انا اكرهكم وما احبكم ووووووو....مابقى شئ ماقالته وكأننا اشد اعدائها


واحنا نهتم فيها اكثر من امها لانها صراااحه مهملتها طبعا هالشئ صااار وعمرها 8 سنوااات ومن


هنا بدت المشكله انصدمت وكرهتها بعد ماسمعت كلاااامها بعد كل الطيبه والحب تفاااجأت منها


على العموم انا ما امارس عليها اي نوع من انواع القسوه تماما لكني قللت من الاهتمااام فيها والارتباط


ومن ذاك الوقت صاااارت تكرهني ((وهي كانت تحبني على قولتها وكانت تسميني ماما ))وتدخلت امها ..



وخف اهتمامي فيها وصاااارت تتضااايق مني وتحااااول تسخر مني وتقلل من شأني وتنافسني وتغار


مني وصاااارت عدوتي في كل شئ هي طبعا شخصيتها قويه وقويه جدا ومدلله ومتحكمه وصاااارت


تتعبني يعني ماتسمع كلااااامي حتى لوكان في مصلحتها وماتسمح اني اتدخل في اي شئ يخصها وهي


لو ماأوجهها احس انها بتضيع وانا اخاااف انها تنحرف او تصير لها حالات نفسيه بسبب الطلااااق مثل


اللي نسمع عنها .. عموما الفاظها وسلوكها معي سئ ومستهتره وانا لاااازم اربيها واساعدها علشان


تكون قدوة لاخوانها اللي اصغر منها ((عياااالي)) هي عنيده وعصبيه ودايما تصرخ وتصرخ في وجهي


وما تحترمني كأني شغاله وابوها حاااط بيننا حواجز ودايم يتدخل بيننا ويترجم اي كلمه اقولها لها بظن


سئ والله تعبت انا اقوله لاتدخل بيننا والله ماراح اضرها والله ما اظلمها خلني اعلمها اوصل بها لبرالامان


انا بنت وافهم افكااار البنات واعتبرها اختي ويرفض من خوفه عليها ويقول انا بعلمها وهو مايعرف يربي


ومايعرف يتعامل مع مخها حتى هي تفضلني فالتربيه اكثر منه وتقوله انت ماتعرف لكن دايم يتدخل لين


مليت وخليتهم لبعض لكنها سيئة السلوك معي كيف امسك بزمام الامور واخليها تكون محترمه معي وتكون


علاااقنا مع بعض مثل الاصدقاء واخليها تبوح بكل اللي فقلبها لانها كتووومه جدا ..حتى اسرارها مع


صاحباتها ما اعرف عنها شئ ابدا ونمط حياااتها سئ لانها بس تاكل وتنوم وتروح بس للحمام وتذاكر


وباااقي الوقت قدااام التلفزيون وتاكل حلويااات كثيييييييييرولا تاكل وجبات الفطور والغداء والعشاااء


وصار وزنها فوق الطبيعي سمينه مره وعلى فكره ماتصلي لين يرتفع ضغطي واصرخ وحراااام علي لو


تركتها لاني مسؤله عنها حاولت اكلم امها ونتعاون لكن رفضت وماتبيني اسوي اي شئ لبنتها والله


محتااااره المشكله حتى الام والله ماتهتم في بنتها ابد ساااعديني قبل يطفح الكيل وحتى ولدي مثلها عمره


ثلاث سنوات يعاندني ومايحب اسوي له شئ ورافض ينام بسريره وهي تحب المرح وصديقاتها وعند الناس

صاااااااااااامته تماما ..

ســــــــــــــــــــــــــــــــاعـــــديني الله يــــــــــــــوفقك ..

 

[أ.نجوى ناجي]

عزيزتي , مافي إمكانية أن تذهب للعيش مع والدتها ؟؟ لأن هذا السن حساس ومادامت بهذا الشكل فالأولى بها العيش عند أمها

 

[دلوعه ممنوعه]

لايمكن لظروف كثيره وهي موكذا معي لحالي حتى ابوها وامها بعد ..

وتكره المدرسه ..

 

[دلوعه ممنوعه]

هل التمستي من شرحي لسلوكها انها بحاجه لامها وهل هالشئ اتضح على سلوكها دون مانحس فيها ......؟؟

 

[أ.نجوى ناجي]

الطفلة أحوالها غير مستقرة وأنا أرى أن تعيش مع والدتها أفضل وتبدأ في تقويم سلوكياتها فهي مرحلة خطرة وتحتاج لوالدتها .. ومهما قلت لكِ من نصائح وإرشادات حتى تتحسن الطفلة لن تتقبلها منكِ لأنكِ في النهاية زوجة والدها ولستِ والدتها ..
​

 

[دلوعه ممنوعه]

يا استاذه البنت وضعها سئ صح هي مرحه بشكل عااام وتحب اللعب وتمارس طفولتها بس مثل ماقلت فيها بعض

السلوكيات متعبه شوي وابوها مستحيل يخليها تروح لامها وانا بعد ودي صرااااحه احسن لها بس هو رافض تماما

ودايما يسبب لي مشااااكل بسببها ويقول اني سبب الوضع اللي هي فيه انا ودي اساعدها وماني عارفه كيف ولو اتكلم

واقول لابوها يخليها تروح بيرجع المشكله علي ويقول ماتبين بنتي وانتي اللي كرهتيها في البيت و..و..و...الخ

وكل المشاكل بترجع علي وانتي تعرفين الصوره السيئه اللي مرسومه عن زوجة الاب مثل انها قاااسيه وظالمه وتكره

عياااال زوجها...و....و...و...الخ

وبعدين وجودها يملى علينا البيت وابوها يكتئب لو راحت عنه ويفكر فيها طول الوقت وينشغل يعني الطلااااق بكبره

ازمه وهو حملني مسؤوليتها وحتى انا تضررت لانها عنيده معي وكل سلوك غلط تسويه يرجع فيني والله اني محتاااره

ومحسبه لزوجي مليون حساب لانه يبيني انا اعوضها حنان امها انا في وضع حرج ارجوك دليني ليس بيدي خيااار اخر..

 

[أ.نجوى ناجي]

عزيزتي , صراحة ليس لدي نصيحة لكِ فأعذريني مهما كنتي فأنتِ زوجة والدها يعني بديل لأمها مفروض عليها في وجهة نظرها .. الله يعينكِ ويعينها , فكما أخبرتكِ الطفلة تحتاج لأمها بشكل كبير ..

 

[دلوعه ممنوعه]

يا الله ياليتك ساعدتيني لو بكلمتين لو مجامله علشان تنعشين الامل داخل صدري وقلبي ..

واحس بالامان انا في حالة قلق وودي احس انه فيه احد بيقدر مشاعري انا ربي عارف ان نيتي زينه وصادقه

والحمدلله احس بالفرج لعبت معها وضحكتها جلست معها وشرحت لها وجهة نظري وبررت لها تصرفاتي اللي كانت تحسب انها قسوه مني لانها مررررررررره حساسه..

وفهمتني وحسيت انها تحسنت قلت لها ياحبيبتي لاتحسبيني يوم غلطت عليك فالموقف الفلاني اني قصدت ازعلك او اجرحك

بالعكس ماودي اشوف الدموع فعيونك انتي مشكلتك انك حاطه في بالك اني مرة الاب الظالمه لكن انتي تدرين مرت الاب الظالمه وش تسوي ..؟؟

تدرين انها تحرم عيال زوجها من كل متعه وتحطهم تحت خدمتها وتضربهم وتقسى عليهم وتحرمهم من ابسط حقوقهم و
تقوي قلب ابوهم عليهم و..و...و...و...اشياء كثيييييييييييييره..

لكن انا عمري قسيت عليك ...؟!!

او عمري سويت لك كذا او عمري طلبت منك طلب لمصلحتي ..

عمري ظلمتك ...؟!!!

قالت: لااااا

قلت............

انا يافلاااانه ان شفتي مني خير ماشفتي مني شر وانا لاتعتبريني مرت ابوك انا خالتك اخت امك شفي خالتك فلانه شلون

تحبك وتحن عليك ..؟ قالت ايه .. قلت انا مثلها امك عمرها ماتدخلت في حياتي او ضايقتني في شئ..

وانا احبها مثل اختي وانتي بنتها يعني بنت اختي ومن اليوم وطالع انا خالتك فلانه وما ارضى منك بغير هالاسم..

وماله داعي تصارخين علي او انك تقللين احترامك او تزعلين من اقل كلمه وانا يوم صار الموقف الفلاني ترى ماكن

غلطتي غلطتك انتي تدرين ليه..؟؟

لانك بعد ماطلعتي من المدرسه مارحتي تنامين شوي ولاكلتي وجبتك مثل البنات علشان كذا بقيتي طول اليوم معصبه

والحين انتي مرهقه انا بتركك تذاكرين واذا خلصتي تعالي معي انا بالمجلس نتابع برنامج كوميدي سوا قالت طيب

خلصت مذاكره ولبست وجت تجلس معي مبسوطه ومرتاحه..

وحتى اليوم الثااااني اول ماطلعت من المدرسه نامت وبعد ماصحت من النوم اكلت وجبتها معي وقالت انا احس ان اليوم بيكوون حلو لاني اكلت وجبتي ونمت نومه حلوه ...

و كانت في قمة الاحترام والذوق والطيبه الحمدلله الحين انا بالي مرتاح وودي اسعدها لانها املي

فالحياة ولان الله مارزقني ببنوته انا اعتبرها بنتي ..

وولدي بديت اسيطرعليه واستخدمت معه اسلوب سوبر ناني اللي بالـــ MBC4

واحس جاب معه نتيجه وهو عمره ثلاث سنوات وصرت اعمل معهم اكثر مما اتكلم ومشاركتي معهم روضتهم مساكين

شكلهم حاسين بفراغ عاطفه ومحتاجين حنان الله يحفظهم ويسخرني لهم يااااااارب

وشكرا واسفه معليش خذت من وقتك فالرد على الاستشاره الله يوفقك امين ..

في حفظ الله حبيبتي ..