لو كنت مكانك لم أكن اتحمل

[راجيه الرضا]

انا لو مكانك مكنتش استحملت !!

-ست مستحملة جوزها الصعب العصبي وواخدة الأمور ببساطة .. جت صحبتها قعدت معاها ساعتين ، قالتلها: الله يعينك انا عمري ما استحمل الطريقة دى ..

انا لو مكانك مكنتش استحملت !!
ومن ساعتها حست انها قليلة و المفروض يكون ليها واقفة وموقف وحياتها بقت نكد 24 ساعة لا عارفة ترجع تهزر وتضحك معاه ولا عارفة تسيبه!

-واحد سأل صاحبه بتشتغل كام ساعة في اليوم .. قاله يعني 10 ساعات 12 ساعة مش اقل من كدة ... ياااه انا لو مكانك مكنتش استحملت !!
مبقاش طايق شغله وحاسس انه مطحون واتخنق وقصر في شغله لحد ما سابه، ومبقاش لاقي شغل ومديون !!

-بنت كانت عايشة مع باباها لوحدهم بتخدمه وواخدة نية البر ، دخلت جارتها قالتلها يابنتي فكري في نفسك شوية انتي عمرك بيجري .. ده انا لو مكانك مكنتش استحملت !!
الكلمتين فضلو يرنو في ودانها وابتدت المشاكل بينها وبين باباها لحد ما تعب واتوفى وحست بالذنب بقية عمرها.

"لو مكانك مكنتش استحملت"

الجملة دي مش مدح ولا شكر !
الجملة دي بتوجع مش بتواسي ..

الجملة دي بتخلينا ناخد بالنا اننا المفروض منستحملش.
الجملة بتحسسنا بإننا أقل من اللي حوالينا.

ناس كتير بتبقي متعايشة مع حالها وراضية وتيجي كلمة زى دي تدمرها،

لو مش بإيدك حاجة تعملها عشان تخفف عنهم متحطش صوباعك على الجرح وتضغط لحد ما يجيب دم.

عايزين تشيلو عنهم بجد ..
اضحكوا في وشهم ،،
عرفهم انهم ناس جميلة وثوابهم وأجرهم عند ربنا .

وخلي بالك انت لو مكانه ماكنتش استحملت ... ربنا سبحانه وتعالى حكيم، لا يُقدّر أي بلاء على حد إلا وهو يعلم إن الإنسان ده يقدر يتحمله .
وده معنى قوله تعالى:"لا يُكلّف الله نفسًا إلا وسعها".

قال تعالى: "وقولوا للناس حُسْنًا".

وقال صل الله عليه وسلم:"الكلمة الطيبة صدقة".

خليك حساس والكلمة بتخرج منك .