كيف تنقل خبر الوفاه لطفل

راجيه الرضا

مراقبة و متميزة أقسام نسوة
الفتره دي بيجيلي اسئله كتير عن الاطفال اللي ابائهم وامهاتهم توفوا سواء بالكورونا او غيرها رحمهم الله جميعا وصبر ذويهم
وبيسئلوني ازاي ابلغ الخبر ده للطفل

اول حاجه مين يبلغ الخبر ده للطفل ؟

الام او الاب مينفعش خالص الخبر ده ينزل علي الطفل وامه او ابوه ميبقوش معاه هو مش هيفهم ضعفكم هو هيفهم انكم مكنتوش جمبه في وقت من اصعب اوقات حياته

امتي ؟

بسرعه وعلي طول لان اي كدب هيتكدب عليه ممكن يعمله ازمه ثقه في اي حاجه تقولوها بعد كده وكمان كتير علي جهازه العصبي القلق ده
ده غير ان خطر جدا ان الخبر ده يتنقله بطريقه مش متحضره او يسمعه بالصدفه والله اعلم استجابه اللي موجود وقتها هتبقي تربويه ولا لا

اقول ايه ؟

هقولك خبر محزن جدا بابا توفي

توفي وبس مفضلش ربط الموت بالجنه لان اولا احنا منعرفش ثانيا في اطفال بتربط الجنه بمشاعر سلبيه

لو الطفل هو اللي سئل بعد كده نجاوب علي اللي بيسئل عليه ببساطه ووضوح ومن غير شرح او سيناريو متفائل الموت حادث مهيب ومحزن بس الانسان بيقدر يتعافي منه فالكلام اللي احنا بنقوله ظنا مننا اننا بنخفف عن الطفل بيعمله لخبطه في مشاعره هو بيبقي مصدوم واحنا بنحسسه انها حاجه حلوه فده بيزود لخبطته وبيحس ان الناس مش حاسه بيه فممكن يخاف يشارك مشاعره ويكتمها وده بعد كده يؤثر علي نفسيته ويخليه عصبي او متوتر ويعبر عن ده بالانسحاب والعزله او النشاط الزياده او حتي العنف

اكنه بيقول للعالم حس بيا عن طريق تصرفاته اللي مقدرش يقولها في كلام

فاللي هيبلغ الخبر مهم جدا انه يقول اجابات الاسئله بحقيقه وبساطه وميجاوبش علي حاجه الطفل مسئلش عنها

يعني مات ازاي ؟

هتقولي السبب
مرض
حادثه اتخبط جامد في راسه
قلبه وقف

اتعور تعويره كبيره جدا خلت دم كتير جدا ينزل منه

حاولوا تبسطوا المعلومه لو سئل

هنشوفه تاني ولا لا ؟

مش هنشوفه في الدنيا بس لما نموت زيه لو دخلنا الجنه ان شاء الله كلنا هنتقابل هناك

طيب انا هموت امتي ؟

مفيش انسان يعرف ربنا عنده العلم

طيب انا عايز اروحله

تقصد انك نفسك تشوفه تاني ؟ وانا كمان اوي اوي ومش مصدقه وحاسه ان قلبي وجعني اوي من الزعل والحزن عليه (ده بيساعد الطفل انه يفهم انه طبيعي لو حس انه مش مظبوط او مخنوق )

كل الاسئله الدينيه يسئل فيها رجل دين عشان الاجابات تبقي صحيحه ميه في الميه مينفعش نجتهد خالص يا جماعه وقتها قولي للطفل انك مش متاكده من الاجابه وهتتاكدي وترجعيله

طيب اتعامل معاه ازاي بعد كده ؟

١-لو عيط احضنيه وقوليله انك حاسه بيه بس متحاوليش تخرجيه من المود او تضحكيه سيبيه يخرج ويهدي مع نفسه العياط ده صحي جدا وحتي لو كان مصحوب بكلمات فيها غضب سيبيه يعبر عن غضبه حتي لو قال كلام فيه اعتراض علي اللي حصل احتويه وبعدين لما الفتره دي تعدي ممكن نعلمه الصبر علي الابتلاء والرضا بالقضاء وجزاء الصبر بس سيبيه براحته هو طفل وده مش وقت تأديب خالص ولا صح وغلط وفي اطفال مش بتعيط وبتنح وده برضه طبيعي

٢-ممنوع تغيير اي حاجه في حياته الا للضروره القصوي يعني مدرسته او بيته او التعرف علي ناس جديده نحاول نمشي الروتين اللي هو متعود عليه قدر الامكان عشان الطفل ميحسش ان حياته هتتشقلب
ولو مضطرين لازم نعمل اعداد مسبق ونمهد ونفهمه التغيير ده بنعمله ليه واننا جنبه لو احتاج اي دعم بس اننا نقرر كل شويه قرار ويلاقي نفسه حياته اتلخبطت ده هيؤثر بالسلب جدا عليه وممكن يكبر عنده الخوف من الفقد ويبقي بيقاوم التغيير بعد كده بشكل مبالغ فيه

٣-نسيب كل الذكريات والصور ونسيبه يتكلم عن المتوفي براحه راحته ونسمعه باهتمام ونشاركه مشاعرنا

٤-نحاول نعمل انشطه مبهجه بس مش لدرجه الالهاء التام هو محتاج يعيش الحدث بس برضه هو مش هيتحمل كل المشاعر السلبيه فيبقي عندنا sense كده لجرعه الالم اللي حواللين الطفل لا نحميه منه ولا كمان نسيبه يتعرض لاي معلومات ممكن الكبار يقولوها وهما مش مركزين

زي النقاشات عن حاله المتوفي اللي فيها تفاصيل موجعه

نقاشات عن الالتزامات الماديه والخلافات الاسريه

الفكره ان ممكن الطفل يعرف اننا بنعمل replaning لبعض الروتين بس مش لازم يسمع كلام درامي وجرعات مشاعر كبيره وافوره بعض الاقارب مش بيبقوا مركزين ان الطفل قليل الحيله وممكن حوارات زي دي تعمله مخاوف مدي الحياه يجاهد انه يتغلب عليها

هل يحضر مراسم الجنازه والعزا ؟

انا راي تخيروه
تحكوله هي عباره عن ايه ويروح يحضر لو حابب
مش حابب خلاص

وبرضه يبقي عندنا sense لو حسينا ان الوضع بقي صعب نحاول ميبقاش ده لمده طويله

ولو الام تعبانه
نوضح له ان ده اوقات بيحصل من كتر الحزن وان ده بيبقي عامل زي الجرح وبيخف مع الوقت عشان يبقي واقعي ومتفهم ان مامته هتاخد وقت عقبال ما تبقي كويسه وتتعافي
ويتقبل كمان ان هو هيبقي محتاج وقت

ازاي اعوضه عن فقده لابوه او لامه ؟

مفيش يا جماعه حاجه هتعوض فقد انسان بحجم دور الاب والام في حياته
ربنا هيتولاهم ان شاء الله
ولكن مهم جدا ان يكون في حد بيلعب الدور ده في حياته غير الام
خال
عم
جد
صديق لوالده
شيخ مسجد
نموذج ذكورى او نموذج انثوي (في حاله فقد الام )
يكون بيشوفه بشكل منتظم يسمح بصداقه وعلاقه فيها تناغم وقرب مش علاقه سطحيه

عشان يقدر يكون صوره ذهنيه عن الذكر او الانثي ويتزن في ميوله وتصرفاته

اتعامل ازاي لو اساء السلوك او اتغير بعد الوفاه ؟

ده موضوع شائع جدا
بيتحل بالاحتواء والنصيحه والصبر
لو الوقت مخلاش الدنيا تتحسن يفضل الاستعانه بمتخصص بس يفضل تدي سنه تعافي لان غالبا الدنيا هتتظبط لوحدها الا في حاله اكتئاب الطفل او اعراض القلق الشديده

واخيرا اوصيكم بالنضوج

وتجنب المشاحانات والمعارك الجانبيه اللي ممكن توتر حياتكم مع الاقارب او المعارف وانكم تحاولوا تحافظوا علي نفسيتكم ومتتوقعوش انكم في عالم من الملايكه

بالعكس خالص انتوا هتشوفوا العجب من ناس كنتوا بتعتبروهم في مكانه كبيره وهتتصدموا في ناس كتير كانت مصدر ثقه بس مهم جدا انكم متعرضوش الاطفال للقصص دي عشان ميحصلهمش ازمات ثقه هما كمان ولو سمعوا حاجه بالغلط قولولهم ان في سوء تفاهم وبلاش تحكوا اي قصص لان الفتره دي الاطفال بتكون حساسه جدا وبتاخد كل حاجه علي مشاعرهم اوي يا حبايبي

مصابكم عظيم
ربنا يصبركم
متستعجلوش علي التعافي ولا انكم ترجعوا كويسيين هي مش ضغطه زرار

واعتقد كداب اللي يقولكم انه تعافي من صدمه زي كده بيفضل وجع في القلب واللم حتي لو عدي فتره بقينا احسن بس ان شاء الله في ميزان حسناتكم ورفع لدرجاتكم
وانا لله وانا الليه راجعون


منقول ...ساره سيف استشاريه علاقات اسريه
 
أعلى