كيف اقنع زوجي نتناقش ونخطط بدون صراخ ومشاكل !!!!

[ميمو الدندونة]

السلام عليكم ..

بإختصار .. متزوجه من 4 سنين .. وكانت حياتي جحيم لكن انفصلت ورجعت ومن بعدها ولله الحمد الامور مستقره ( وهذا الي يخليني اتردد اسوي اي تصرف )

اخاف اخسر هذا الهدوء الي انا عايشته هالفتره ..

لكن تعبببببببت وانا اكتم .. انا شماليه غربيه .. وزوجي جنوبي شرقي

او شمالي شرقي مو عارفه ..

لكن طووول الوقت اخطط .. تلاقوني افكر 24 ساعه ايش ناقص البيت وايش ممكن انجز في الويكند ومتى يمديني اسوي غرفة بنتي الي كملت 3 سنين ماعندها حتى سرير ..


البيت ناقصه اشياء واجد الحمام الله يكرمكم خربانه فيه اشياء واجد .. المطبخ يبيله تصليح كلها امور ما ينفع يسويها الا هو ..

كلللللللللل هالامور ولا تخطر في باله ولا يفكر فيها .. ويحس اني بس ابغى اخسره

واذا قلت له بهدوء خلينا نروح نسوي شغله ردوده المعتاه ( مانزل الراتب - الشوارع زحمممه - انا اكررره المولات - خليها بعدين )

مع العلم انه ولله الحمد خلص ديونه هالسنه ويقدر يشتري لو كل شهر شغله ..

نفسي اتجرأ واقعد اقوله ترى نبغى في البيت كذا وكذا وكذا .. بس مستحيل

اذا ابغى اجيب طاري غرفة بنتي اقوله انها تحتاج سرير فقط

احس لو اقوله اني قاعده اختار الصبغ والفرش وبقية اثاث الغرفه بينجلط

احسه بخيل احيانا احس من الفقر والتعب الي عاشه ايام زمان مااا يهون عليه يصرف الريال بسهوله

بس عشان تعرفون شخصيته .. ( امس كنا طالعين وشفت لوز مدخن اشتهيته ماكان ببالي اشتريه بس شفته اخذته وحاسبت وطلعت ترى ب 25 (انا موظفه كل مصاريفي انا ادفعها ) الزبده وانا احاسب طارت عيونه يقولي لييييييه تشترين شي ماله داعي قلت له لو تشوفيني اخذ راتبي واحرقه بزباله لا تكلمني ) عصبت وطلعت


بس ترى هذي ضروريات وش الحلللللل ابي اعرف كيف اطلب وكيف اخليه ينفذ تعببببببببببننننني

 

[القمر اﻻبيض]

اطلبي منه يعطيك راتب وجمعي واشتري الي تبي

 

[نور1406]

طلبي منه مصروف شهري بشكل تدريجي لمن يقتنع لان قد يفتعل العصبيه عشان لا تطلبين منه وطلبي منه المصروف بدلع

 

[ميمو الدندونة]

مصروف لي ما يعطيني هو يشوف اني تاركه البيت 10 ساعات ومتوظفه عشان اصرف على نفسي و الصدق ما ابي مصروفه شكرا راتبي يكفيني الحمدلله

ولو يعطيني لبنته كل شي عنده بسبب يعني ابي فلوس لملابسها يعطيني ابي فلوس لطلعة العاب يعطيني

ما يمديني اجمع شي لغرفتها ولمتى بقعد اجمع منه عشان اكمل 5 ولا 6 الاف اسوي فيها غرفه لبنتي ما تنفع سالفة التجميع

انا ابي حل يهيئني اتفاهم معاه .. حل يخليه يسمعني اذا بغيت اقول له على شي يخص بيتنا

 

[نور1406]

صحيح ان راتبك يكفيك ولكن من الغلط انك تصرفين على نفسك في الامور الاساسيه لانك بهالاسلوب تعودينه انك مو بحاجته وبكذا راح يصعب عليه يصرف ع البيت

 

[فتون ♡]

المفروض تطلبي وهذا حق من حقوقك الين متى راح تصبرين
الزمن هذا صار كل شي فيه مرتفع وغصب عنا ناخذ بس كل شهر خذي لكم شي
شوي شوي اما نهائي والاعذار و الحجج مشكلة اختي ..
لك مني دعوه الله ييسر لك ويرزقكم كل خير ..
تحياتي ..

 

[القمر اﻻبيض]

الجنوبي يعشق المرأه الدلوعه وانت شماليه خط مستقيم ادلعي وشوفي التغيير

 

[ميمو الدندونة]

القمر الابيض يسعدلي قلبببك ..

عجبني ردك فعلا ما احب اتميلح عنده هههههههههه خلاص ياخي الامور اوزنها بعقلك الضروري والواجب سويه وانتهينا ما احب اللكع -__-