قيمة الإخوة والأصحاب ..فلتساعد دون كثير كلام

[راجيه الرضا]

اتفرجت على فيديو مؤثر جدا للدكتور حازم شومان بيتكلم فيها عن دروس اتعلمها من وفاة ابنه الصغير خالد
في وسط كلامه قال إنه عرف قيمة الأصحاب والأخُوَّة في الله ، وعرف الفرق بين الجدع وبين بتاع الكلام !
قال كلمة علّمت معايا جامد ، وكإنه بيعتب على ناس معينة هو يعرفها !
بيقول الواحد في وسط الأزمة بيبقى محتاج لكل أنواع الدعم ، فياريت اللي عاوز يساعد يساعد على طول ، بلاش تعرض خدماتك وتقول : لو محتاج أي حاجة قل لي !! لأ روح اقف جمب صاحبك على طول !
الموضوع ده أنا حسيت بيه جدا جدا لما وقعت في ابتلاء كبير سنة 2020!
عرفت الفرق مابين أصحاب الأفعال و بتوع الكلام !
لما ربنا زاح عني الغمة، لقيت ناس جاية تاخد لقطة على "الكلام" اللي قالته!
واحد يقول لي : والله انا سألت عنك فلان وكنت مهموم بيك جدا !
والتاني يقول لي : هو أخوك ماقالكش أنا "قلت" ايه ؟؟ ده أنا قلتله : لو عماد محتاج أي حاجة من جنيه لميت ألف جنيه أنا موجود !! هو أخوك ماقالكش ؟؟
قلتله لا ماقاليش ، فقال : لاااا ، ازاي كدة ؟؟ طيب اسأله أسأله أنا "قلت" ايه ؟!
في المقابل بقا ، فيه ناس من أصحابي والله لحد دلوقتي ماعرف هم مين ! كانت مراتي تفتح باب البيت تلاقي ظرف محطوط فيه مبلغ كبير جدا ! مش عارفين لحد دلوقتي ده من مين ؟!
كانت تروح عشان تدفع مصاريف الولاد في المدرسة كل مرة تلاقي المصاريف اتدفعت !! بذلت جهد كبير بعدها عشان اعرف مين اللي دفع ، طلع مرة من أصحابي ومرة من أصحابها !!
فيه ناس كانوا ملازمين ليها ، يشيلوا معاها الأولاد ويساعدوها في مشاوريها
ناس بتخلص !! بتجيب من الاخر !! مش بتعيش الدور عليك بالكلام وخلاص !! لأ وواحد من العيلة قال لي : أنا سألت أهلك لو محتاجين حاجة فقالولي ربنا يكرمك دعواتك !
لا والله !! هو أنت مستنيهم يشحتوا منك ولا ايه ؟!
الحمد لله على كل الحال ، الأزمة عدت ، والواحد عرف قيمة الناس بجد ، ربنا ما يحرمنا أبدا من صحبة الجدعان
أنا عاوز أبعت رسالة ليك أنت .. ياللي كنت بتساعدني في غيابي من غير ما تظهر ولا تقول انت مين !! والله جميلك فوق راسي ، أنا نفسي أعرف انت مين عشان أردلك جزء من جمايلك ، لكن أنا عارف إنك فضّلت تاخد أجرك كله من الله وحده لا شريك له .. لكن أبشر .. والله ما بنساكم أبدا من دعائي ، وبإذن الله هتشوفوا أثر دعواتي ليكم في الدينا والآخرة إن شاء الله
وأنا والله بحاول أرد الفضل والجميل بالشكر لله تعالى أولاً وأخيرا - زي ما أكرمني بناس دايما تقف جمبي في كل مراحل حياتي - بإني أقف جمب كل واحد محتاج مساعدة على قدر استطاعتي ، هي أصلها جمعية ودايرة ، يوم ليك ويوم عليك ، وكما تدين تدان !
صدق القائل :
من يفعَلِ الخَيرَ لا يَعدَم جَوازِيَهُ ، لا يَذهَبُ العُرفُ بَينَ اللَهِ وَالناسِ
قال عمر بن الخطاب (رضي الله عنه) : عليك بإخوان الصدق فعِش في أكنافهم، فإنهم زينة في الرخاء و "عُدّة في البلاء"!
كان عبد الله ابن مسعود (رضي الله عنه) إذا خرج إلى أصحابه قال : (أنتم جلاء حزني)
اللهم بارك لي في إخواني ، وبارك لزوجتي في أخواتها
اللهم ارزقني شكر نعمة الصحبة الصالحة يارب العالمين


عماد الشريف​